ବିଶ୍ଵ ଓଡ଼ିଆ ଭାଷା ସମ୍ମିଳନୀ ଉପରେ ଭାଷା ଆନ୍ଦୋଳନ ଓଡ଼ିଶାର ସିଂହାବଲୋକନ: ସାଂସ୍କୃତିକ ଅସଦାଚରଣ ପାଇଁ ଦାୟୀ ବ୍ୟକ୍ତିଙ୍କୁ କଠିନ ଦଣ୍ଡବିଧାନ ଦାବି

ଦି ନ୍ୟୁଜ୍ ସିଣ୍ଡିକେଟ୍

ଏ ପର୍ଯ୍ୟନ୍ତ ହିସାବ ସରିନଥିବା ସରକାରୀ ‘ବିଶ୍ଵ ଓଡ଼ିଆ ଭାଷା ସମ୍ମିଳନୀ’ ଓଡ଼ିଶା କାର୍ଯ୍ୟ ନିୟମାବଳୀ ଦ୍ଵାରା ସମର୍ଥିତ ହୋଇ ନଥିବା ହେତୁ, ତହିଁର ସମଗ୍ର ଖର୍ଚ୍ଚ ଉପରେ ସାମାଜିକ ଯାଞ୍ଚ (social audit ) ପାଇଁ ଭାଷା ଆନ୍ଦୋଳନ ଓଡିଶା ଦାବି କରିଛି ।

ସୁବିଦିତ ପରିବେଶବିତ୍ ଓ ଚାଟାର୍ଡ ଆକାଉଟାଣ୍ଟ ବିଶ୍ଵଜିତ ମହାନ୍ତିଙ୍କ ସଭାପତିତ୍ଵରେ  ଭାଷା ଆନ୍ଦୋଳନର ମାତୃଭାଷାପ୍ରେମୀ ସମ୍ମିଳନୀ -୩ ଅନୁଷ୍ଠିତ ହୋଇଯାଇଛି ଫେବୃଆରୀ ୦୭ ତାରିଖ ଅପରାହ୍ନରେ ଭୁବନେଶ୍ୱରସ୍ଥ ଲୋହିଆ ଆକାଡ଼େମୀ ସଭାକକ୍ଷରେ । ଏହି ସମ୍ମିଳନୀରେ ଓଡ଼ିଆ ଭାଷା ଉପରେ ଦେଖାଦେଇଥିବା ବିପଦ ସମ୍ପର୍କରେ ବିଭିନ୍ନ ଦିଗରୁ ଆଲୋଚନା କରିଥିଲେ ଭାଷା ଆନ୍ଦୋଳନ ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ, କବି ଶଙ୍କର୍ଷଣ ପରିଡ଼ା , ଭାଷାତତ୍ତ୍ଵବିତ୍ ପ୍ରଫେସର ମନୋରଞ୍ଜନ ଦାସ, ଭାଷାତତ୍ତ୍ଵବିତ୍ ଡଃ ସୁବ୍ରତ ପୃଷ୍ଟି , ସୂଚନା ଅଧିକାର ଅଭିଯାନର ମୁଖ୍ୟ ପ୍ରଦୀପ ପ୍ରଧାନ, ଭାଷା ଆନ୍ଦୋଳନର ଅନ୍ୟତମ ତୁଙ୍ଗ ନେତା ଅଶୋକ ପରିଡ଼ା, ଅଖିଳ ଭାରତୀୟ ଛାତ୍ର ସଂଘର ଜାତୀୟ ଉପସଭାନେତ୍ରୀ ସଙ୍ଘମିତ୍ରା ଜେନା,  ଛତ୍ରମଣ୍ଡଳରୁ  ମନୋଜ କୁମାର କର,ଯୁବମଣ୍ଡଳରୁ ଦେବବ୍ରତ ବେହେରା, କୃଷକ ମଣ୍ଡଳରୁ କୃଷକ ନେତା ଅଜୟ କୁମାର  ପ୍ରମୁଖ । ଅଂଶ ଗ୍ରହଣ କରିଥିଲେ ବିଶିଷ୍ଟ ସାମ୍ବାଦିକ ସତ୍ୟ ପ୍ରକାଶ ନାୟକ, ସାମ୍ବାଦିକ କିଶାନ ବରାଇ, ଆଡଭୋକେଟ ଇଲା ମହାରଣା, ଶ୍ଵେତା ମିଶ୍ର, ବୈଜ୍ଞାନିକ ଡଃ ଅଶୋକ ମିଶ୍ର, ତପନ ପାଢୀ, ଜେନାମଣି ଦିଲ୍ଲୀପ କୁମାର ରାୟ , ଆମର କବି ଶତପଥୀ , ନିହାର ଶତପଥୀ , ପି. କେ. ନନ୍ଦ, ଅନିଲ କୁମାର ସାହୁ, ସନ୍ତୋଷ କୁମାର ମୁଦୁଳି, ଭକ୍ତି ରଞ୍ଜନ ପଳାଇ, ରଜନୀକାନ୍ତ ଲେଙ୍କା, ପ୍ରକାଶ ଦାସ, ବିଭୁତି ଭୂଷଣ ଚଉଧୁରୀ, ପ୍ରଦୀପ କୁମାର ସ୍ଵାଇଁ,  ଦେବ ପ୍ରସାଦ ପରିଡ଼ା, ସଚ୍ଚିକାନ୍ତ ପ୍ରଧାନ  ଇତ୍ୟାଦି । 

ବିଧାନ ପ୍ରଣୟନ ପ୍ରକ୍ରିୟାରେ ଜାଲିଆତି ପ୍ରୟୋଗ କରି ମୁଖ୍ୟମନ୍ତ୍ରୀ ଓଡ଼ିଶା କାର୍ଯ୍ୟାଳୟ ଭାଷା ଆଇନକୁ ଏପରି ଅକର୍ମଣ୍ୟ କରିଦେଇଛନ୍ତି ଯେ, ଓଡ଼ିଆରେ କେଉଁଠି ବି କୌଣସି କାମ ହେଉନି । ଓଡ଼ିଆ ଭାଷା ବିରୁଦ୍ଧରେ ମୁଖ୍ୟମନ୍ତ୍ରୀଙ୍କ ଏହି ଷଡଯନ୍ତ୍ର ପ୍ରତିବାଦରେ ଓ ରାଜ୍ୟ ଭାଷା ଓଡ଼ିଆରେ ଓଡ଼ିଶାର ସାମଗ୍ରିକ ପରିଚାଳନା ସୁନିଶ୍ଚିତ କରାଯିବା ଦାବିରେ ଭାଷା ଆନ୍ଦୋଳନର କଳା ପତାକା ଅଭିଯାନ ନିରବଚ୍ଛିନ୍ନ ଚାଲିଛି । ଏହି ଆନ୍ଦୋଳନ ହେତୁ ସମଗ୍ର ଓଡ଼ିଶାରେ ଫଲ୍ଗୁ ଧାରା ପରି ଚହଟି ଚାଲିଛି ଭାଷା ଅସ୍ମିତା, ଯାହା ଓଡ଼ିଶା ପ୍ରଦେଶ ସୃଷ୍ଟି ପରଠାରୁ ଏପର୍ଯ୍ୟନ୍ତ କେବେ ଏପରି ଘଟି ନଥିଲା । ଏହି ଅସାଧାରଣ ସ୍ଥିତିରେ ନିଜକୁ ଓଡ଼ିଆ ଭାଷାପ୍ରେମୀ ବୋଲି ପ୍ରଚାର କରାଇବା ପାଇଁ ରାଜକୋଷରୁ ବିପୁଳ ପାଣ୍ଠି ଉଡ଼ାଇ ମୁଖ୍ୟମନ୍ତ୍ରୀ ବିଶ୍ଵ ଓଡ଼ିଆ ଭାଷା ସମ୍ମିଳନୀର ଆୟୋଜନ କରିଥିଲେ, ଯାହା ୦୩.୦୨.୨୦୨୪ ତାରିଖରୁ ଆରମ୍ଭ ହୋଇ ୦୫.୦୨.୨୦୨୪ ପର୍ଯ୍ୟନ୍ତ ଚାଲିଥିଲା । ଅଥଚ ଦେଖାଗଲା, ଏହି ସମ୍ମିଳନୀ ଥିଲା ଓଡ଼ିଆ ଭାଷା ଉପରେ ପ୍ରଶାସନିକ ପ୍ରବଞ୍ଚନାର ଏକ ଗ୍ଲାନୀକର  ଖେଳ ।

ଏ ସମ୍ପର୍କରେ ସୁବିସ୍ତିର୍ଣ୍ଣ ଆଲୋଚନା ଶେଷରେ ନିମ୍ନ ପ୍ରସ୍ତାବଗୁଡ଼ିକ ସର୍ବସମ୍ମତିକ୍ରମେ ଗୃହୀତ ହୋଇଥିଲା :

ପ୍ରସ୍ତାବ -୧

ଏହି ସମ୍ମିଳନୀ ଅନୁଭବ କରୁଛି କି ଓଡ଼ିଶା ରାଜ୍ୟ ସରକାର ଫେବୃଆରୀ ୦୩ ରୁ ୦୫ ପର୍ଯ୍ୟନ୍ତ ଯେଉଁ ପ୍ରଥମ ବିଶ୍ଵ ଓଡ଼ିଆଭାଷା ସମ୍ମିଳନୀ ଆୟୋଜନ କରି ରାଜକୋଷରୁ ବିପୁଳ ଅର୍ଥ ବ୍ୟୟ କରିଛନ୍ତି, ତାହା ଓଡ଼ିଶା କାର୍ଯ୍ୟ ନିୟମାବଳୀ (Rules of Business ଦ୍ଵାରା ସମର୍ଥିତ ନୁହେଁ । ଏତଦ୍ଦୃଷ୍ଟିରୁ ଏହି ମାତୃଭାଷାପ୍ରେମୀ ସମ୍ମିଳନୀ ଦାବି କରୁଛି କି, ତଥାକଥିତ ବିଶ୍ଵ ସମ୍ମିଳନୀରେ ଅନଧିକୃତ ଭାବେ ହୋଇଥିବା ବିପୁଳ ବ୍ୟୟର ସାମାଜିକ ଯାଞ୍ଚ (social audit ) କରାଯାଉ ଓ ଅନିୟମିତତା ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ହେଉ ।

ପ୍ରସ୍ତାବ -୨

ବିଶ୍ଵ ଓଡ଼ିଆ ଭାଷା ସମ୍ମିଳନୀରେ ଓଡ଼ିଆ ଭାଷାର ମୌଳିକ ଅକ୍ଷର ସମ୍ଭାର ତଥା ଉଚ୍ଚାରଣ ବୈଶିଷ୍ଟ୍ୟ ବିପର୍ଯ୍ୟସ୍ତ କରି ଓଡ଼ିଆ ଜାତି ପ୍ରତି ତାତ୍ସଲ୍ୟ ପ୍ରଦର୍ଶନ କରିଥିବା ହେତୁ ଓ ତାହା ସମ୍ମିଳନୀ ପ୍ରବାହରେ ବାରମ୍ବାର ଘଟିଥିବା ହେତୁ ଏହି ମାତୃଭାଷାପ୍ରେମୀ ସମ୍ମିଳନୀ ତାହା ରାଜ୍ୟସରକାରଙ୍କ ସଂସ୍କୃତିକ ଅସଦାଚରଣ ବୋଲି ଅନୁଭବ କରି, ସରକାରଙ୍କୁ ଭର୍ତ୍ସନା କରୁଅଛି ଓ ଓଡ଼ିଆ ଭାଷାର ମୌଳିକତାର ଅବମାନନା କରିଥିବା ବ୍ୟକ୍ତିବିଶେଷଙ୍କ ବିରୁଦ୍ଧରେ କଠିନ ଦଣ୍ଡବିଧି କାର୍ଯ୍ୟାନୁଷ୍ଠାନ ଦାବି କରୁଛି ।

ପ୍ରସ୍ତାବ -୩

ଏହି ମାତୃଭାଷାପ୍ରେମୀ ସମ୍ମିଳନୀ ଅନୁଭବ କରୁଛି କି, ଓଡ଼ିଆ ଭାଷାରେ ଓଡ଼ିଶାର ପରିଚାଳନା ପାଇଁ ୨୦୧୬ ଏପ୍ରିଲରୁ ଚାଲିଥିବା ଭାଷା ଆନ୍ଦୋଳନ ଓଡ଼ିଶାରେ ସର୍ବତ୍ର ଭାଷା ଜାତୀୟତାର ଫଲ୍ଗୁ ପ୍ରବାହିତ କରିଥିବା ହେତୁ, ଓଡ଼ିଆ ଜାତିର  ରାଜନୈତିକ ନେତୃତ୍ଵ ନିଜର ଓଡ଼ିଆବିଦ୍ଵେଷ କାଳିମା ଉପରୁ ଜନ ରୋଷ ଅପସାରଣ ପାଇଁ ବିଶ୍ଵ ଓଡ଼ିଆ ଭାଷା ସମ୍ମିଳନୀ ଆହୁତ କରିଥିଲେ, ଯାହା ଓଡ଼ିଆ ଭାଷାର ବ୍ୟବହାର୍ଯ୍ୟତା ସୁନିଶ୍ଚିତ କରିବାପାଇଁ  କୌଣସି ଭୂମିକା ନିର୍ବାହ କରିନାହିଁ । ଏପରି ହଟଚମଟ ପରିବର୍ତ୍ତେ ଓଡ଼ିଶା କାର୍ଯ୍ୟାଳୟ ଭାଷା ଆଇନ ଅଲଙ୍ଘ୍ୟ କରିବା ପାଇଁ  ରାଜ୍ୟସରକାର ୧୪.୦୩.୨୦୧୮ ତାରିଖର ମନ୍ତ୍ରୀମଣ୍ଡଳ ପ୍ରସ୍ତାବ ଅନୁଯାୟୀ ତୁରନ୍ତ ତହିଁର ସଂଶୋଧନ କରନ୍ତୁ ଓ ଅତ୍ୟନ୍ତ ଅନଧିକୃତ ଭାବେ ନିଷିଦ୍ଧ କରାଯାଇଥିବା “ଓଡ଼ିଆରେ ଶାସନ’ ଶୀର୍ଷକ ୱେବସାଇଟକୁ ସକ୍ରିୟ କରାଯାଇ ଓଡ଼ିଶାର ଜନ ସାଧାରଣ ନିଜ ରାଜ୍ୟଭାଷାରେ ରାଜ୍ୟ ପରିଚାଳନା ଅଲଙ୍ଘ୍ୟ କରିବାକୁ ଯେପରି ସକ୍ଷମ ହେବେ, ତାହା  ସୁନିଶ୍ଚିତ କରନ୍ତୁ । 

ପ୍ରସ୍ତାବ -୪ 

ଓଡ଼ିଆ ଭାଷାର ଆର୍ଯ୍ୟପୂର୍ବ ପ୍ରାଚୀନତା ଓ ମୌଳିକତା ଦୃଷ୍ଟେ ଏହି ଭାଷାକୁ ସର୍ବତ୍ର “ଆଦିମଭାଷା” ନାମରେ ପରିଚିତ ଓ ଉପସ୍ଥାପିତ କରିବା ପାଇଁ ଏହି ସମ୍ମିଳନୀ ରାଜ୍ୟ ତଥା ଭାରତ ସରକାରଙ୍କୁ ଏବଂ ଭାଷାତତ୍ତ୍ଵବିତ୍ ସମୁଦାୟଙ୍କୁ ତଥା ଶିକ୍ଷାୟତନମାନଙ୍କୁ ନିବେଦନ କରୁଛି ଓ ଓଡ଼ିଶାର ଆଦିମ ଜନଜାତିମାନଙ୍କ ମାତୃଭାଷାକୁ ରାଜ୍ୟର ଭାଷା ଭାବେ ସ୍ଵୀକୃତି ପ୍ରଦାନ ପାଇଁ ରାଜ୍ୟ ସରକାରଙ୍କୁ ଅନୁରୋଧ କରୁଛି । 

ପ୍ରସ୍ତାବ -୫ 

ରାଜକୋଷରୁ ପ୍ରଚୁର ଅର୍ଥବ୍ୟୟ କରି ସରକାରୀ ସ୍ତରରେ ବିଶ୍ଵ ଓଡ଼ିଆ ଭାଷା ସମ୍ମିଳନୀ କରାଯାଇଥିଲେ ମଧ୍ୟ ଓଡ଼ିଆ ଭାଷା ଉପରେ ଭାଷାତାତ୍ତ୍ଵିକ ଗବେଷଣା କରିଥିବା ଓ ଦିଗଦର୍ଶନ ଦେଇଥିବା ଓଡ଼ିଶାର ବିଶିଷ୍ଟ ଭାଷାବିଜ୍ଞାନୀମାନଙ୍କୁ ଏହି ଭାଷା ସମ୍ମିଳନୀରେ ସ୍ମରଣ ଓ ସମ୍ମାନ ପ୍ରଦର୍ଶନ କରାଯାଇନଥିବା ଘଟଣାରେ ଏହି ମାତୃଭାଷାପ୍ରେମୀ ସମ୍ମିଳନୀ ଘୋର ଉଦ୍ବେଗ ପ୍ରକାଶ କରୁଛି ଓ ଯେଉଁ ପଦଧିକାରୀଙ୍କ ତ୍ରୁଟିପୂର୍ଣ୍ଣ ନିଷ୍ପତ୍ତି ହେତୁ ଏହା ଘଟିଲା, ତାଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ କଠିନ କାର୍ଯ୍ୟାନୁଷ୍ଠାନ ପାଇଁ ଦାବି କରୁଛି । 

ଭାଷା ଆନ୍ଦୋଳନକୁ ବ୍ୟାପକ ଓ ଶକ୍ତିଶାଳୀ କରିବା ପାଇଁ କେତେକ ଗୁରୁତ୍ୱପୂର୍ଣ୍ଣ ସାଙ୍ଗଠନିକ ନିଷ୍ପତ୍ତି ନିଆଯାଇଛି । ଏଥିପାଇଁ ଏକ କେନ୍ଦ୍ରୀୟ ସମିତି ଗଠନ କରାଯିବା ସଙ୍ଗେ ସଙ୍ଗେ କାର୍ଯ୍ୟ ନିର୍ବାହରେ ପରାମର୍ଶ ପାଇଁ ଏକ ଉପଦେଷ୍ଟା ମଣ୍ଡଳୀ ମଧ୍ୟ ପ୍ରସ୍ତାବିତ ହୋଇଛି । 

ସୁଖର କଥା, ଓଡ଼ିଶାର ଭାଷାପ୍ରେମୀ ଜନସାଧାରଣ ସରକାରୀ ଭାଷା ସମ୍ମିଳନୀ ଦ୍ଵାରା ପ୍ରତାରିତ ହୋଇନାହାନ୍ତି ଓ ସାମାଜିକ ଗଣମାଧ୍ୟମ ତଥା ମୁଦ୍ରିତ ଗଣମାଧ୍ୟମରେ ତହିଁର ତୀବ୍ର ସମାଲୋଚନା ଦୃଷ୍ଟିଗୋଚର ହେଉଛି । 

ସାଧାରଣ ଲୋକେ ବିଚାରୁଛନ୍ତି, ବିଶ୍ଵ ଭାଷା ସମ୍ମିଳନୀ ପରି ପ୍ରହେଳିକା ପ୍ରଦର୍ଶନ ପରିବର୍ତ୍ତେ ଓଡ଼ିଆ ଭାଷାରେ କିପରି ଓଡ଼ିଶାର ପରିଚାଳନା ଅଲଙ୍ଘ୍ୟ ହେବ, ତା ପାଇଁ ସରକାର ଭାଷା ଆଇନର ଅପସଂଶୋଧନ ପ୍ରତ୍ୟାହାର କରି, ତହିଁର ସାନି ସଂଶୋଧନ କରନ୍ତୁ , ଯହିଁରେ ଓଡ଼ିଆରେକାମ ନକଲେ , କଠିନ ଦଣ୍ଡବିଧାନ ସୁନିଶ୍ଚିତ ହେବ । 

ନବୀନ ସରକାରଙ୍କ ଓଡ଼ିଆ ଭାଷାଭେଳିକି

ଅଧ୍ୟାପକ ମନୋରଞ୍ଜନ ଦାସ 

ନବୀନ ସରକାରଙ୍କ ଓଡ଼ିଆ ଭାଷାପ୍ରେମ ଭେଳିକି ଦେଖି ଦେଖି ତାଟକା ଲାଗିଲାଣି । ଯେତେବେଳେ ଶ୍ରୀ ସମୀର ଦେ ତାଙ୍କ ସରକାରରେ ଉଚ୍ଚଶିକ୍ଷା ମନ୍ତ୍ରୀ ଥିଲେ ସେତେବେଳେ ଏକ ସରକାରୀ ହୁକମନାମା ବାହାରିଲା ଯେ ଛାତ୍ରଛାତ୍ରୀ ଅଭାବ ଯୋଗୁଁ ରାଜ୍ୟର ୧୪୦ଟି ମହାବିଦ୍ୟାଳୟରୁ ଓଡ଼ିଆ ଭାଷାସାହିତ୍ୟ ବିଭାଗ ଉଠାଇଦିଆଗଲା । ମୁଁ ସେତେବେଳେ ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟରେ ଅଧ୍ୟାପକ ଥାଏ ।ଏହି କଲେଜରୁ ମଧ୍ୟ ଓଡ଼ିଆ ଭାଷାସାହିତ୍ୟ ବିଭାଗରୁ ଓଡ଼ିଆ ପାସ୍ ପାଠ୍ୟକ୍ରମ ଉଠିଗଲା । ନବୀନ ସରକାରଙ୍କ ଏହି ପଦକ୍ଷେପ ବିରୋଧରେ ସାରା ରାଜ୍ୟରେ ଜନମତ ଗର୍ଜିଉଠିଲା । ଅଗତ୍ୟା ସରକାର ରାଜଧାନୀସ୍ଥିତ ରବୀନ୍ଦ୍ର ମଣ୍ଡପ ଠାରେ ମହାବିଦ୍ୟାଳୟଗୁଡିକର ଓଡ଼ିଆ ଭାଷା ସାହିତ୍ୟ ବିଭାଗର ମୁଖ୍ୟ ଓ ରାଜ୍ୟର ବୁଦ୍ଧିଜୀବୀଙ୍କ ଏକ ମିଳିତ ଅଧିବେଶନ ଡକାଇଲେ । ଶେଷରେ ଏ ହୁକମନାମା ପ୍ରତ୍ୟାହୃତ ହେଲା । ମାତ୍ର ଢେଙ୍କାନାଳ କଲେଜରେ ଅନ୍ତର୍ଦ୍ଧାନ ହୋଇଥିବା ଓଡ଼ିଆ ପାସ୍ ପାଠ୍ୟକ୍ରମ ଆଉ ଫେରି ନଥିଲା । ଅନ୍ୟ କଲେଜ ସମ୍ପର୍କରେ ମୁଁ ଜାଣିନାହିଁ ।

ଆଜି ଶୁଣିବାକୁ ପାଇଲି ଯେ ଏବେ ଢେଙ୍କାନାଳ କଲେଜରେ ଓଡ଼ିଆ ସ୍ନାତକୋତ୍ତର ପାଠ୍ୟକ୍ରମ ଖୋଲିଛି । ଷୋଳଜଣ ଛାତ୍ରଛାତ୍ରୀ ନାମ ଲେଖାଇ ସାରିଛନ୍ତି । ଆବଶ୍ୟକ ଅଧ୍ୟାପକ ନାହାଁନ୍ତି ।

ଗତ ଶିକ୍ଷକ ଦିବସର ଶୁଭଲଗ୍ନରେ ନବୀନ ସରକାର ତରବରିଆ ଭାବେ ଓଡ଼ିଆ ବିଶ୍ଵବିଦ୍ୟାଳୟର ଲୋକାର୍ପଣ କରିଛନ୍ତି ।ବିଶ୍ଵବିଦ୍ୟାଳୟ ପାଇଁ ଉଦ୍ଦିଷ୍ଟ ଅଟ୍ଟାଳିକା ପୂର୍ଣ୍ଣାଙ୍ଗ ହୋଇନାହିଁ ।ସତ୍ୟବାଦୀ ହାଇସ୍କୁଲ ଓ ମନ୍ଦିର ପାନ୍ଥଶାଳାରେ ବିଶ୍ଵବିଦ୍ୟାଳୟ ଚାଲିଛି ବୋଲି ଜଣାପଡିଛି ।କୁଳପତି ,କୁଳସଚିବ ଓ କିଛି ସହଯୋଗୀ ନିଯୁକ୍ତି ପାଇଥିବା ବେଳେ କେତେକ ଅଧ୍ୟାପକ ବିଭିନ୍ନ କଲେଜରୁ ଡିପ୍ଲୟମେଣ୍ଟ ହୋଇ ଅବସ୍ଥାପିତ ହୋଇଛନ୍ତି ।ଫଳରେ ସେଠାରେ ଅଧ୍ୟାପକ ଅଭାବ ଘଟିଛି ।

ବିଭିନ୍ନ ବିଶ୍ଵବିଦ୍ୟାଳୟ ଓ ମହାବିଦ୍ୟାଳୟରେ ଓଡ଼ିଆ ଭାଷାସାହିତ୍ୟ ସ୍ନାତକୋତ୍ତର ଶ୍ରେଣୀର ପାଠ୍ୟକ୍ରମ ଓ ଓଡ଼ିଆ ବିଶ୍ଵବିଦ୍ୟାଳୟର ପାଠ୍ୟକ୍ରମ ଭିତରେ ସଂଘାତ ନା ସଂହତି ରହିବ ତା’ର କଳନା ହୋଇଥିବ ନିଶ୍ଚୟ । ନହେଲେ ଓଡ଼ିଆ ବିଶ୍ଵବିଦ୍ୟାଳୟ ମାଧ୍ୟମରେ ବିପୁଳ ଅର୍ଥବରାଦ କକ୍ଷ୍ୟଚୂତ ହୋଇଯାଇପାରେ । ହୁଏତ ସଂସ୍କୃତ ବିଶ୍ଵବିଦ୍ୟାଳୟ ପରି କେବଳ ସ୍ଵାତନ୍ତ୍ର୍ୟ ଦାୟରେ ଓଡ଼ିଆ ବିଶ୍ଵବିଦ୍ୟାଳୟ ହୋଇଥାଇପାରେ ।

ଓଡିଶାରେ ମୋ ବସ୍ ସେବା ଚାଲିଛି । ସେଥିରେ ସ୍ଥାନସୂଚନା ପାଇଁ ଭଏସ୍ ଭାସିଆସେ । କଟକରୁ ଭୁବନେଶ୍ୱର ଆସିଲେ ସେହି ବିକୃତସ୍ଵରରେ ଭାସିଆସେ ଡଗରପାଳରୋଡ୍ ଓ ବାମ୍ଫକୁଡା । ଶୁଣାଯାଏ ଏହି ସ୍ଵର ଦକ୍ଷିଣୀ ସଂଯୋଜନାରେ ପ୍ରସ୍ତୁତ ହୋଇଛି ।

ଦୀର୍ଘ ଦୁଇଦଶନ୍ଧିରୁ ଊର୍ଦ୍ଧ୍ଵକାଳ ନବୀନସରକାର ଶାସନରେ ଥାଇ ମଧ୍ୟ ୧୯୫୪ ମସିହାରେ ତତ୍କାଳୀନ ମୁଖ୍ୟମନ୍ତ୍ରୀ ଶ୍ରୀ ନବକୃଷ୍ଣ ଚୌଧୁରୀଙ୍କ ସମୟରେ ପ୍ରଣୀତ ଓଡ଼ିଆ କାର୍ଯ୍ୟାଳୟ ଭାଷାଆଇନ ଅଲଂଘନୀୟଭାବରେ ପ୍ରଚଳନ କରାଇ ପାରିଲେ ନାହିଁ ।ଟିଟିଲାଗଡ଼ର ଅଧିବକ୍ତା ଶ୍ରୀ ଗଜାନନ ମିଶ୍ର ଏଥିପାଇଁ ଆମରଣ ଅନଶନରେ ବସିବା ପରେ ସରକାର ଏକ ମନ୍ତ୍ରିସ୍ତରୀୟ କମିଟି ଗଠନ କରି ବିହିତ ପଦକ୍ଷେପ ନେବାକୁ ଉଦ୍ୟମ କଲେ । ଏଥିରେ ସଦସ୍ୟ ଥିବା ସାମ୍ବାଦିକ ସୁଭାଷ ଚନ୍ଦ୍ର ପଟ୍ଟନାୟକ ଆଇନତିର ଆଜନ୍ମ ତ୍ରୁଟି ଠାବ କରି ତହିଁର ଅପସାରଣ ପାଇଁ ଆଇନ ସଂଶୋଧନ ଓ ନିୟମାବଳୀ ପ୍ରଣୟନର ଯେଉଁ ପ୍ରସ୍ତାବ ଓ ଚିଠା ଦେଇଥିଲେ,  ତାହା  ପ୍ରଥମଥର ପାଇଁ  ଓଡ଼ିଶା ସରକାରଙ୍କୁ ଆଇନଟିର କାର୍ଯ୍ୟକାରିତା ପଥରେ ଥିବା ଆଇନଗତ ଅନ୍ତରାୟ ସମ୍ପର୍କରେ ଅବଗତ କରାଇଥିଲା ଓ ମନ୍ତ୍ରୀସ୍ତରୀୟ କମିଟି ତାହାକୁ ସମ୍ପୂର୍ଣ୍ଣତଃ ଅନୁମୋଦନ କରିଥିଲା । ମାତ୍ର କୌଣସି ଅଜଣା ଚାପର ବଶବର୍ତ୍ତୀ ହୋଇ ନବୀନ ସରକାର ମନ୍ତ୍ରିସ୍ତରୀୟ କମିଟିର ଏହି ଅନୁମୋଦିତ ପ୍ରସ୍ତାବକୁ ଏଡେଇ ଦେଇ ଏକ ଅବୈଧ  ବିଧେୟକ ପାରିତ କରାଇ ଓଡ଼ିଶା କାର୍ଯ୍ୟାଳୟ ଭାଷାଆଇନକୁ ପଙ୍ଗୁ କରିଦେଲେ ।ଏହାକୁ ବିରୋଧ କରି ଶ୍ରୀ ସୁଭାଷ ଚନ୍ଦ୍ର ପଟ୍ଟନାୟକଙ୍କ ନେତୃତ୍ବରେ ଏକ ଅଭିନବ ଭାଷା ଆନ୍ଦୋଳନ ନୀରବ କଳାପତାକା ଅଭିଯାନ ପ୍ରକ୍ରିୟାରେ ଚାଲିଥିଲେ ମଧ୍ୟ ନବୀନ ସରକାରଙ୍କ ସେଥିପ୍ରତି ଭ୍ରୂକ୍ଷେପ ନାହିଁ ।ଏହି ପ୍ରସଙ୍ଗରେ ଶ୍ରୀ ପଟ୍ଟନାୟକ ଦୁଇଖଣ୍ଡ ତଥ୍ୟଭିତ୍ତିକ ପୁସ୍ତକ ପ୍ରଣୟନ କରିଛନ୍ତି । ତାହା- ଓଡ଼ିଆ ଭାଷାକୁ ନବୀନଙ୍କ ମରଣଆଘାତଭର୍ତ୍ସନୀୟ ବିଧାନସଭା । ତଥାପି ନବୀନ ସରକାରଙ୍କ ତିଳେମାତ୍ର ଲଜ୍ଜାବୋଧ ନାହିଁ ।

ସାମ୍ବିଧାନିକ ପ୍ରାବଧାନ ଅନୁସାରେ ପ୍ରବର୍ତ୍ତିତ ରୁଲ୍ ଅଫ୍ ବିଜିନେସକୁ ବିଦଳନ କରି ମନମୁଖି ଭାବରେ ନବୀନ ସରକାର ୫-ଟି ସଚିବ ରୂପେ ଗାଲୁପେଲି ବ୍ୟକ୍ତିଗତ ସଚିବ ଶ୍ରୀ ଭି କେ ପାଣ୍ଡିଆନଙ୍କୁ ଛାୟା ମୁଖ୍ୟମନ୍ତ୍ରୀ ଭାବରେ ଉପସ୍ଥାପନ କରାଇ କ୍ଷମତା ଅଳିନ୍ଦରେ ମନ୍ତ୍ରୀ, ମୁଖ୍ୟସଚିବ ଓ ଲୋକପ୍ରତିନିଧି ମାନଙ୍କୁ ନ୍ୟୂନ କରାଇ ଦେଇଛନ୍ତି ।ଓଡ଼ିଆ ଅସ୍ମିତାର ଧର୍ଷଣ ଅଭିଯୋଗ ସତ୍ତ୍ୱେ ନବୀନ ସରକାର ନୀରବ ଓ କାର୍ଯ୍ୟାନୁଷ୍ଠାନ ବିହୀନ ହେବା ଲକ୍ଷ୍ୟ କରାଯାଉଛି ।

ନବୀନ ସରକାରଙ୍କ ମୁଖ୍ୟ ହେଉଛନ୍ତି ଶ୍ରୀ ନବୀନ ପଟ୍ଟନାୟକ । ଅବଶ୍ୟ ତାଙ୍କର ମାତୃଭାଷା ଓଡ଼ିଆ ନୁହେଁ, ପଞ୍ଜାବୀ ବା ଅନ୍ୟକୌଣସି ଭାଷା । ତଥାପି ଦୀର୍ଘ ଅବଧିପରେ ସେ ତାଙ୍କ ବ୍ୟକ୍ତିଗତ ସ୍ତରରେ ଓଡ଼ିଆ ଭାଷା ଉଚ୍ଚାରଣ କରି ପାରିଲେ ନାହିଁ । “ଆପନମାନେ କୁସିତୋ” ଭିତରେ ସୀମିତ ରହି, ଓଡ଼ିଆ ଜାତିକି ବାରିପଦା ବଦଳରେ “ବାଡିପଡା” ଓ  ଚଣ୍ଡୀଖୋଲ ବଦଳରେ  “ଚଡିଖୋଲ” କହି  ଓଡ଼ିଆ ଭାଷାକୁ ଉପହାସିତ  କରାଉଛନ୍ତି ଓ ତାମିଲ ଭାଷାଭାଷୀ ବ୍ୟକ୍ତିଗତ ସଚିବଙ୍କ  ପଦଲେହନ ପାଇଁ ପରିବେଶ ସୃଷ୍ଟି କରାଇଛନ୍ତି  ।

ସମସ୍ତ ବିରୋଧ ଭାବନାକୁ ପ୍ରଶମନ କରାଇବା ପାଇଁ ସରକାର ବିଭିନ୍ନ କୌଶଳ ଆପଣାଇଛନ୍ତି ବୋଲି କହିବା ଅତ୍ଯୁକ୍ତି ହେବନାହିଁ  ।  ବିଭିନ୍ନ ଯୋଜନା ଆରମ୍ଭ କରି ସରକାରୀ ଅର୍ଥବାଣ୍ଟି ଲୋକଙ୍କୁ ଆସକ୍ତ କରର୍ଚ୍ଛନତି; ବିଜ୍ଞାପନର ଜୁଆର ଉଠେଇ ଗଣମାଧ୍ୟମକୁ ଆୟତ୍ତ ବି କରିଛନ୍ତି  । ଯିଏ ଅଣାୟତ୍ତ କଲା ତାକୁ ବିଜ୍ଞାପନ ବନ୍ଦ କରାଇ ଅନ୍ୟ ଗଣମାଧ୍ୟମକୁ କାକୁସ୍ଥ ବନାଇଛନ୍ତି  ।

ଭାଷାବିଦ୍ଵେଷୀ ନବୀନ ସରକାର କଳାପତାକାର ଛାଇକୁ ଦେଖି ଏମିତି ଭାଷାଭେଳିକି ଦେଖାଇ ଚାଲିଛନ୍ତି । କାରଣ ଆଗରେ ନିର୍ବାଚନ ।  ସରକାରୀ ମନମୁଖି ସିଦ୍ଧାନ୍ତଜନିତ ଭ୍ରଷ୍ଟାଚାରକୁ ବୋଧହୁଏ ଆଖିରେ ରଖି ବିରୋଧୀ ନେତା ଶ୍ରୀ ଜୟନାରାୟଣ ମିଶ୍ର ମିଡିଆକୁ ସୂଚନା ଦେଲେଣି ତାଙ୍କ ଦଳ କ୍ଷମତାକୁ ଆସିଲେ ଶ୍ରୀ ପଟ୍ଟନାୟକ ଓ ଶ୍ରୀ ପାଣ୍ଡିଆନ ବନ୍ଧାହେବେ । ଏହା ସମ୍ଭବ ହେବ କି ନାହିଁ  ସମୟ କହିବ । ମାତ୍ର ନବୀନ ସରକାରଙ୍କ ଓଡ଼ିଆ ଭାଷାଭେଳିକିରେ ପଥଚ୍ୟୁତ ନା ହୋଇ ଆମେ ଓଡ଼ିଆମାନେ ନିଶ୍ଚୟ ନିଜ ମାତୃଭାଷାର ବିପତ୍ତି କାଳରେ ମୁଖ୍ୟମନ୍ତ୍ରୀଙ୍କ ଭେଳିକି ଉପରେ ସତର୍କ ଦୃଷ୍ଟି ରଖିବା ଉଚିତ ହେବ ।

ଉଠୁ ଏ ଜାତି ନାଶି ଅରାତି ପାହିବ ରାତି ଦିନେ

କୈଲାଶ ଚନ୍ଦ୍ର ସାହାଣୀ

[ଓଡ଼ିଶା ପରିଚାଳନାରେ ଓଡ଼ିଆଭାଷାଜନନୀର ଅପରିହାର୍ଯ୍ୟତା  ପାଇଁ ଆମ କବି ଓ ସାହିତ୍ୟିକମାନେ କଲମ ଚାଳନା କରିବାକୁ ଆମେ ଦେଇଥିବା ଡକରା ଯେଉଁ କତିପୟଙ୍କ ଚେତନାରେ ପ୍ରତିଧ୍ଵନିତ ହୋଇଥିଲା, ତନ୍ମଧ୍ୟରେ ଅଧ୍ୟାପକ କବି କୈଲାଶ ଚନ୍ଦ୍ର ସାହାଣୀ ଅନ୍ୟତମ । ଗତବର୍ଷ ଏଇଦିନେ ଏହା ସାମାଜିକ ଗଣମାଧ୍ୟମ ଫେସବୁକର ପୃଷ୍ଠାମଣ୍ଡନ କରିଥିଲା । ]

ଉଠୁ ଏ ଜାତି ନାଶି ଅରାତି
ପାହିବ ରାତି ଦିନେ,
ଓଡ଼ିଆ ଭାଷା ବଢିଆ ଆମ
ପଡୁ ନାହିଁକି ମନେ ।
କେତେ ମହାନ ମାଟି ସନ୍ତାନ
କହିଲେ କାନେ କାନେ ,
ମାଆର ଭାଷା ମମତା ଭରା
ଶୁଭଇ କୁହୁ ତାନେ !

ଆସରେ ଭାଇ ଏକାଠି ହୋଇ
ଲଢ଼ିବା ଭାଷା ପାଇଁ,
ଆମ ଭାଷାରେ ଶାସନ ହେବ
ପଢ଼ିବା ମନ ଦେଇ ।

କଚେରୀଠାରୁ ବିଧାନସଭା
ଓଡ଼ିଆ ଲେଖା ହେଉ ,
ସବୁରି ଘରେ ଓଡ଼ିଆ ବହି
ଥାକରେ ଶୋଭା ପାଉ ।

ଆମ ଭାଷାକୁ ମାରିବା ପାଇଁ
କାନ୍ତି ଚନ୍ଦ୍ରର ଟାଣ,
ଭାଙ୍ଗିଲେ ଦିନେ ସେନାପତି ଏ
ଫୁଟାଇ ଶବ୍ଦ ବାଣ !

ଶାସ୍ତ୍ରୀୟ ଆମ ଓଡ଼ିଆ ଭାଷା
ଭାଷାଭିତ୍ତିକ ରାଜ୍ୟ,
କେତେ ପ୍ରାଚୀନ ଭାଷା ଏ ମୋର
କରିବା ନାହିଁ ଭାଜ୍ୟ ।


ସ୍ଵେଦ ଲହୁରେ ଆଣିଛୁ କ୍ରାନ୍ତି
ମନେ ନ ଆଣ ଭ୍ରାନ୍ତି ,
ଆମର ଦାବୀ ପୂରଣ ହେଉ
ରାଇଜେ ଆସୁ ଶାନ୍ତି ।


ଓଡ଼ିଆ ଭାଷା ଲେଖି ନପାରି
ଅମଲା କାମ କଲେ,
ଦଣ୍ଡିତ ହେବା ନିଶ୍ଚିନ୍ତ ହେବ
ଆଇନ ହୋଇ ଗଲେ ।


ଗୋରା ସାହେବ ଶାସନ କାଳେ
ଭାଷା ମୋ ବଞ୍ଚିଥିଲା ,
କଳା ସାହେବ ଶାସନେ ଆଜି
ଭାଷା ମୋ ହଜି ଗଲା ।

ଆସରେ ଆସ ଓଡ଼ିଆ ଜାତି
ମନରୁ ତେଜ ଭୟ,
ସଂଗ୍ରାମ ଆଜି ହୋଇନି ଶେଷ
ଲଭିନେ ପରାଜୟ ।

କଳାପତାକା ଅଭିଯାନର
ହୋଇନି ଅନ୍ତ ଆଜି ,
ସଫଳ ଦିନେ ହେବାରେ ଆମେ
କଷଣ ଯିବ ଭାଜି ।

ମନରୁ ତେଜ ହୀନମନ୍ୟତା
ତୋଷାମଦର କଳା,
ପ୍ରାଚୀ ନଭରେ ନବୀନ ସୂର୍ଯ୍ୟ
ବଉଦ ଭେଳା ମେଳା ।

ଅନ୍ଧାର ନାଶି ଉଇଁବ ଶଶୀ
ଦିଶିବ ଧରା ତୋରା,
ଆମରି ପଣ ଅକାଟ୍ୟ ଜାଣ
ଆସୁ ଛାଇ ବା ଖରା ।

ଓଡ଼ିଆ ଜାତି ମନରେ ଆସୁ
ଶତ ସିଂହର ବଳ ,
ଏକତା ଦିନେ ଭାଙ୍ଗି ପାରିବ
ଅହଂକାରୀର କଳ ।

ଓଡ଼ିଆ ଜାତି ଛାତିରେ କାତି
ସହିବୁ କେତେ କହ ?
ଶାର୍ଦ୍ଧୃଳ ହୋଇ ଶୃଗାଳ ହେବା
ଘାରିଛି କେଉଁ ମୋହ !

ଓଡ଼ିଆ ଭାଷା ମାଟିର ଭାଷା
ସକଳ ଓଠେ ଖେଳୁ ,
ଲେଖା ପଢ଼ାରେ ଗପ ଗୀତରେ
ଓଡ଼ିଆ ଜାତି ମିଳୁ !

ଜୀବନ ଧନ ଅଢେଇ ଦିନ
ବଡେଇ କାହିଁ ପାଇଁ,
ପାଣି ଫୋଟକା ଯିବ ମିଳାଇ
ମିଛରେ ହାଇଁ ପାଇଁ ।


ଆସୁ ସୁଦିନ ଏ ଅଭିମାନ
ଟିକିଏ ବଞ୍ଚିଥାଉ ,
ଓଡ଼ିଆ ବୋଲି ଗର୍ବ ଆମର
ଅଛନ୍ତି ମହାବାହୁ !!

ତା ୨୫,୦୮,୨୦୨୨ @କୈଳାସ ଚନ୍ଦ୍ର ସାହାଣୀ

ବ୍ୟାସନଗର: ଭାଷଜନନୀର ଜୈତ୍ରଧ୍ଵଜା ସହ ମଧୁ ଜୟନ୍ତୀ

ବିଶେଷ ପ୍ରତିନିଧି

କୁଳବୃଦ୍ଧ ମଧୁସୂଦନଙ୍କ ଜୟନ୍ତୀ ଭାଷା ଆଂଦୋଳନର ପାବନପୀଠ ବ୍ୟାସନଗରରେ ଓଡ଼ିଆ ଭାଷାଜନନୀଙ୍କ ଜୈତ୍ରଧ୍ଵଜା – କଳାପତାକା ସହ ମହାସମାରୋହରେ ପାଳିତ ହୋଇଯାଇଛି । ସହିଦ ଭଗତ ସିଂହ ଯୁବକ ସଂଘର ଅନ୍ଯତମ ତୁଙ୍ଗ ନେତା ବିଶିଷ୍ଟ ସମାଜସେବୀ ହେମନ୍ତ ଧୀରଙ୍କ ନେତୃତ୍ବରେ ଭାଷାପ୍ରାଣ ଅଞ୍ଜନ ସାହୁ ,ସୌମ୍ଯରଞ୍ଜନ ନାୟକ ଓ ଜିତେନ୍ଦ୍ର ପଲାଇ ଏହି କଳାପତାକାର ଲହରେ ଲହରେ ଜାରିକରିଛନ୍ତି ଓଡ଼ିଆ ଜାତିର ଅନାହତ ଦାବି – କାର୍ଯ୍ୟାଳୟର ଭାଷା ହେଉ ଓଡ଼ିଆ ।

ସହରର ଅଗ୍ରଣୀ ସାମାଜିକ ତଥା ସେବା ଅନୁଷ୍ଠାନ ସହୀଦ ଭଗତ ସିଂ ଯୁବକ ସଂଘ ତରଫରୁ ଉତ୍କଳ ଗୌରବ ମଧୁସୂଦନ ଦାସଙ୍କ ଶୁଭ ଜୟନ୍ତୀ ଓଡ଼ିଆ ଜାତିର ସ୍ୱାଭିମାନ ଦିବସ ଭାବେ ପାଳିତ ହୋଇଥାଏ ।  ସୁତରାଂ ସକାଳ ୮ ଘଟିକା ସମୟରେ ସ୍ଥାନୀୟ ତହସିଲ କାର୍ଯ୍ୟାଳୟ ପରିସରରେ କୁଳବୃଦ୍ଧଙ୍କ ପ୍ରତିମୂର୍ତ୍ତିରେ ସଭାପତି ରାଜେନ୍ଦ୍ର ବିଶ୍ଵାଳ, କବି ନାରାୟଣ ଚନ୍ଦ୍ର ନାୟକ ପ୍ରମୁଖ ସଂଘର ସଭ୍ୟମାନେ ପୁଷ୍ପମାଲ୍ୟ ପ୍ରଦାନ କରି ଶ୍ରଦ୍ଧାଞ୍ଜଳି ନିବେଦନ କରିଥିଲେ ।

ଏହି ଅବସରରେ ସହରର କୌଣସି ଏକ ଗୁରୁତ୍ୱ ପୂର୍ଣ୍ଣ ସ୍ଥାନରେ ମଧୁବାବୁଙ୍କର ଏକ ପ୍ରତିମୂର୍ତ୍ତି ପ୍ରତିଷ୍ଠା ନିମନ୍ତେ ପୌର ପରିଷଦର ନିର୍ବାହୀ ଅଧିକାରୀ ଶ୍ରୀଯୁକ୍ତ ବିକ୍ରମ କେଶରୀ ମଲ୍ଲିକଙ୍କୁ ଯୁବକ ସଂଘ ଏକ ଦାବିପତ୍ର ପ୍ରଦାନ କରିଥିଲେ ଏବଂ ନିର୍ବାହୀ ଅଧିକାରୀ ଏ ଦିଗରେ କାର୍ଯ୍ୟକରିବା ପାଇଁ ପ୍ରତିଶୃତି ଦେଇଥିଲେ ।

ସକାଳ ୯ ଘଟିକା ସମୟରେ ବ୍ୟାସଶ୍ରୀ କଳାନିକେତନ ସଭାଗୃହରେ  ଏକ ସାଧାରଣ ସଭା ଅନୁଷ୍ଠିତ ହୋଇଥିଲା । ସଂଘର ସଭାପତି ଏଥିରେ ସଭାପତିତ୍ୱ କରିଥିଲେ ସଂଘର ଉପଦେଷ୍ଟା ନାରାୟଣ ଚନ୍ଦ୍ର ନାୟକ, ନନ୍ଦକିଶୋର ମହାନ୍ତି ବ୍ୟାଙ୍ଗକବି ବାଇଧର ମାଝୀ, ସଭ୍ୟ ମହେଶ୍ୱର ନାୟକ, ଜନ୍ମେଜୟ ରାଉତ, ଦୀପକ ଦାଶ, ନୀଳମଣି ଜେନା, ଟୁଲୁ ଟୁଲୁ ମୋହନ ଜେନା, ସେକଉଦ୍ଦିନ ପ୍ରମୁଖ ଉପସ୍ଥିତ ରହି ଆଲୋଚନାରେ ଭାଗ ନେଇ ମହାପୁରୁଷଙ୍କୁ ଶ୍ରଦ୍ଧା ସୁମନ ଅର୍ପଣ କରିଥିଲେ ।  ସଂଘର ସମ୍ପାଦକ ଶ୍ରୀ ହେମନ୍ତ କୁମାର ଧୀର ଧନ୍ୟବାଦ ଅର୍ପଣ କରିଥିଲେ

ଆମ ଭାଷା ଶାସ୍ତ୍ରୀୟ ବୋଲି ସ୍ବୀକୃତ ହେଲା, ମାତ୍ର ଆମ ଭାଷା ଏବେ କେଉଁଠି?

ତୁଷାରକାନ୍ତ ଶତପଥୀ 

ସନ ୨୦୧୪ ମସିହା ଆଜିର ଦିନରେ ” ଓଡିଆ ଏକ ଶାସ୍ତ୍ରୀୟ ଭାଷା” ବୋଲି କେନ୍ଦ୍ର ସରକାରଙ୍କ ତରଫରୁ ମାନ୍ୟତାପ୍ରାପ୍ତ ହୋଇଥିଲା।ଏହି ଅବସରରେ, ଆମ ଭାଷାକୁ ଏପରି ସମ୍ମାନ ପ୍ରଦର୍ଶନ ମୂଳରେ ଯେଉଁମାନଙ୍କର ପରିଶ୍ରମ ଓ ଅବଦାନ ରହିଛି, ସେମାନଙ୍କ ଉଦ୍ଦେଶ୍ୟରେ ଶତକୋଟି ପ୍ରଣାମ ଅର୍ପଣ କରୁଛି ।

ଏ ବାବଦରେ ଭାରତ ସରକାରଙ୍କ ତା୧୧.୩.୨୦୧୪ରିଖର ଗେଜେଟ ଇସ୍ତାହାରରେ ଅଂଗ୍ରେଜୀରେ “xx the Govt of India here by declare Odia as a Classical Language ” ଓ ହିନ୍ଦିରେ ” ଭାରତ ସରକାର ଏତଦଦ୍ୱାରା ଓଡିଆ କୋ ‘ପ୍ରାଚୀନ ଭାଷା’ କେ ଋପ ମେଁ ଘୋଷିତ କରତା ହୈ ” ବୋଲି ଉଲ୍ଲେଖ ଅଛି ।ଏଥିରେ କୌଣସି ଠାରେ “ଶାସ୍ତ୍ରୀୟ ଭାଷା” ବୋଲି ଉଲ୍ଲେଖ ନଥିଲେ ମଧ୍ୟ ଆମ ଓଡିଶା ସରକାର ଏହାକୁ “ଶାସ୍ତ୍ରୀୟ ଭାଷା” ବୋଲି ଘୋଷଣା କରିଛନ୍ତି,ଯାହା ବୁଝିବା ସାଧାରଣ ଲୋକଙ୍କ ପକ୍ଷେ ଦୁରୁହ । 
ହୁଏତ ” ପ୍ରାଚୀନ ଭାଷା” ଋପେ ଚିହ୍ନିତ କରାଯାଇଥିଲେ,ତାହା ଅଧିକ ବୋଧଗମ୍ୟ ହୋଇଥାଆନ୍ତା ।

ଶହେଟଙ୍କିଆ ନୋଟରେ ଓଡିଆରେ ” ଏକ ଶହ ଟଙ୍କା” ଓ ହିନ୍ଦିରେ ” ଏକ ଶୌ ରୁପୟେ” ଲେଖାଥିବା ସ୍ଥଳେ
ପାଞ୍ଚଶହଟଙ୍କିଆ ନୋଟରେ ” ପାଞ୍ଚ ଶତ ଟଙ୍କା” କିନ୍ତୁ ହିନ୍ଦିରେ ଶହେଟଙ୍କିଆ ଭଳି ” ପାଞ୍ଚ ଶୌ ରୁପୟେ” ଲେଖା ଅଛି। ଦୁଇଟି ନୋଟରୁ ଶାସ୍ତ୍ରୀୟ ଓଡିଆ କେଉଁଠି?

(A classical language is a language with an independent literary tradition and a large and ancient body of written literature. Classical languages are typically dead languages, or show a high degree of diglossia  as the spoken varieties of the language diverge further away from the classical written language over time.)

ତେବେ ସେ ଯାହା ହେଉ, ଏଭଳି ମାନ୍ୟତା ମିଳିବା ପରେ ସରକାରଙ୍କ ଦ୍ୱାରା ଓଡିଆ ଭାଷାକୁ ସମ୍ମାନ ଦିଆଯିବା ଉପରେ ବ୍ୟକ୍ତିଗତ ଅନୁଭୂତିରୁ ଘଟଣାଟିଏର ବର୍ଣ୍ଣନା କରୁଛି।

“ସୂଚନା ଅଧିକାର ଆଇନ” ଜରିଆରେ ଆମ ରାଜ୍ୟର ପଞ୍ଚାୟତରାଜ ବିଭାଗକୁ ଓଡିଆଭାଷାରେ ମଗାଯାଇଥିବା ତଥ୍ୟଟିଏର ଉତ୍ତର ନିରୋଳା ଅଂଗ୍ରେଜୀ ଭାଷାରେ ମିଳିଥିଲା, ଯଦିଓ ସେତେବେଳକୁ ” ଓଡିଶାର ଶାସନ ଓଡିଆରେ ଚାଲିବ” ଭଳି ବିଜ୍ଞପ୍ତି ପ୍ରକାଶିତ ହୋଇ ସାରିଥିଲା। ଭାରତ ସରକାରଙ୍କ ସରକାରୀ ଭାଷା ବିଭାଗ- (Official Languages Dept)ର ନିୟମ ହେଉଛି “ଚିଠି ଯେଉଁ ଭାଷାରେ ଥାଏ, ଉତ୍ତର ସେଇ ଭାଷାରେ ଦିଆଯିବ” ।

ଆଜି ” ପ୍ରାଚୀନ ଭାଷା ଘୋଷଣା ଦିବସ ” ଅବସରରେ ଓଡିଶାରେ ଓଡିଆ ଭାଷାର ଅବସ୍ଥାକୁ ଅନୁଧ୍ୟାନ କଲାବେଳେ ମନେ ପଡ଼ିଯାଉଛି କବିସୂର୍ଯ୍ଯ ବଳଦେବ ରଥଙ୍କ କଟୂ କଟାକ୍ଷ :

“ସମଝଇ ନାହିଁ ସ୍ୱଦେଶୀ ଭାଷା
କହିଲେ ସେ ହୁଅଇ ଲୋକହସା
ଜଡ଼ ମୁଁ ବୋଲି ନ ଜନ୍ମ ନିର୍ବେଦ
ଷଡ଼ଦଶୀ ତୁଲେ କଲେ ବିବାଦ
ଜଗତେ କେବଳ, ଜନେ ହସିବେ ଏହି ତହୁଁ ଫଳ।” 

 ମନେ ପଡ଼ିଯାଉଛି କୁଳବୃଦ୍ଧ ମଧୁସୂଦନ ଦାସଙ୍କ “ଜାତିର ଉନ୍ନତି ହେବ କିରେ ଭାଇ ସ୍ୱାର୍ଥକୁ ଜଗତ ମଣି?
ଗୋଦରଗୋଡରେ ମାଉଁସ ଲାଗିଲେ ଦେହର କି ଶୁଭ ଗଣି!” ।

ମନେ ବି ପଡ଼ିଯାଉଛି ଓଡ଼ିଆ ତୁଣ୍ଡରେ  ଘନଘନ ପ୍ରସାରିତ  ଭକ୍ତଚରଣ ଦାସଙ୍କ “ଚିତ୍ର ପ୍ରତିମା ପ୍ରାୟ ଦିଶେ ସୁନ୍ଦର,
ଚିରି ଭିତର ଦେଖ କି ନାରଖାର”  ।

କାର୍ଯ୍ୟରେ ନହେଉ ପଛେ, ” ଓଡିଶା ଶାସନ ଓଡିଆରେ” ଭଳି ସରକାରଙ୍କ ଘୋଷଣା ପଛରେ ଏହି ଅକିଞ୍ଚନ ତାର ଗୁଣ୍ଡୁଚିମୂଷାର ଦାୟିତ୍ୱ ତୁଲାଇ ମାଟିମା’ ଋଣର କିଞ୍ଚିତ ଅଂଶ ପରିଶୋଧ କରିବାର ସୁଯୋଗ ପାଇଛି, ଯଦିଓ ଆହୁରି ବହୁତ କିଛି କରିବାର ଥିଲା, ଯେଉଁଥି ପାଇଁ ପରିସ୍ଥିତିକୁ ଦେଖି ଆଉ ଆଗ୍ରହ ନଥିଲା।
ଏବେ ତ ଘୋର ଅସୁସ୍ଥତା ଯୋଗୁ ଗୃହବନ୍ଦୀ ଅବସ୍ଥାରେ ।

ଦେଖାଯାଉ, ଓଡିଆ ଭାଷାର ଅବସ୍ଥା କ’ଣ ହେଉଛି ।

“ବନ୍ଦେ ଉତ୍କଳ ଜନନୀ,ଜୟ ହେଉ ଓଡିଆ ଭାଷାର”