ସୁଭାଷ ଚନ୍ଦ୍ର ପଟ୍ଟନାୟକ
ଓଡ଼ିଶା ସରକାରୀ ଭାଷା (ସଂଶୋଧନ) ବିଧେୟକ, ୨୦୧୬ ଆଜି ବିଧାନସଭାରେ ପାରିତ ହୋଇଗଲା । ରାଜ୍ୟପାଳ ସମ୍ମତି ପ୍ରଦାନ କଲା ପରେ ଏହା ବିଧିବଦ୍ଧ ଆଇନ ରୂପ ପାଇବ ।
ନିଯମାବଳୀ ପ୍ରଣୟନ ପାଇଁ ସାମର୍ଥ୍ୟ ଲାଭ ସକାଶେ ଆଇନ ସଂଶୋଧନ କରିବାକୁ ମନ୍ତ୍ରୀସ୍ତରୀୟ କମଟିରେ ମୁଁ ସରକାରଙ୍କୁ ଯେଉଁ ପରାମର୍ଶ ଦେଇଥିଲି ସେହି ପରାମର୍ଶ ଏହି ଆଇନକୁ ଜନ୍ମ ଦେଇଛି ବୋଲି ଏକପ୍ରକାର ଆତ୍ମସନ୍ତୋଷ ମିଳୁଥିଲେ ମଧ୍ୟ ମୋତେ ଦୁଃଖ ଓ ଲଜ୍ଜାର ସହ କହିବାଲୁ ପଡୁଛି ଯେ, ସେଦିନ ମୁଁ ଅନ୍ଦାଜ କରିପାରିନଥିଲି ଯେ, ମୁଁ ଯାହା କଲି ତାହା ମାଙ୍କଡ଼ ହାତରେ ଶାଳଗ୍ରାମ ସଦୃଶ ହୋଇଯିବ ଓ ସେ ଏପରି ନଚାଇ ନଚାଇ ତାହାର ପ୍ରାଣ ନେଇଯିବ ।
ନବୀନ ପଟ୍ଟନାୟକ ଏହା ହିଁ କରିଛନ୍ତି । ଆଜି ଯେଉଁ ସଂଶୋଧନ ବିଧାନସଭା ଗ୍ରହଣକଲା , ତାହା ରାଜ୍ୟ ପରିଚାଳନାରେ ଆମ ଭାଷାର ଅଲଙ୍ଘ୍ୟତା ସୃଷ୍ଟିକରିବା ପରିବର୍ତ୍ତେ ତାକୁ ଅକାର୍ଯ୍ୟ କରିଦେବ ।
ବିଧାନସଭା ଚାହିଁଥିଲେ ଅଧ୍ୟାଦେଶକୁ ଅନୁମୋଦନ ଦେବାକୁ ମନା କରିଦେଇପାରିଥାନ୍ତା । କାରଣ, କେଉଁ ଜରୁରୀ ପରିସ୍ଥିତିରେ ଅଧ୍ୟାଦେଶ ଜାରି ହୋଇଥିଲା ତାହା ସରକାର ଲୁଚାଇ ରଖିଥିଲେ । ସେହି ଅଧ୍ୟାଦେଶର ପ୍ରବଞ୍ଚନା ସମ୍ପର୍କରେ ମୁଁ ନିଜେ ଓ ମୋର ସାଥୀ କଳାପତାକା ଅଭିଯାତ୍ରୀମାନେ ଆଗଧାଡ଼ିଆ ବିଧାୟକମାନଙ୍କୁ ଭେଟି ଏହି ଅଧ୍ୟାଦେଶକୁ ଅନୁମୋଦନ ନଦେବା ପାଇଁ ଅନୁରୋଧ କରିଥିଲୁ । ଆଜି ପ୍ରାତଃସଂସ୍କରଣରେ ସମ୍ବାଦ ‘ଭାଷା ଆଧ୍ୟଦେଶର ପ୍ରବଞ୍ଚନା ପ୍ରତ୍ୟାଖ୍ୟାତ ହେଉ’ ଶୀର୍ଷକ ମୋ ପ୍ରବନ୍ଧ ପ୍ରକାଶ କରିଥିଲା ଓ ତାହା ସବୁ ବିଧାୟକଙ୍କ ପାଖରେ ପହଞ୍ଚିଥିଲା ।
ଲଜ୍ଜାର ସହ କହିବାକୁ ପଡୁଛି , ଆମ ଭାଷାକୁ ଆମ ରାଜ୍ୟର କାର୍ଯ୍ୟଭାଷା କରିବା ପାଇଁ ଭାଷା ଆନ୍ଦୋଳନର ସମସ୍ତ ଉଦ୍ୟମ ମୁଖ୍ୟମନ୍ତ୍ରୀଙ୍କ ଚକ୍ରାନ୍ତ ପାଖରେ ପରାଭୂତ ହୋଇଛି ଓ ଓଡ଼ିଆ ଭାଷା ଜନନୀ ଭୟଙ୍କର ଭାବେ କ୍ଷତାକ୍ତ ହୋଇଛି ।
ଆମକୁ ଆମ ଆନ୍ଦୋଳନ ଅଧିକ ଶକ୍ତିଶାଳୀ କରିବାକୁ ହେବ ।
