ଭାଷା ଆନ୍ଦୋଳନର ନୂଆ ରଣକୌଶଳ: ବ୍ୟକ୍ତିଗତ ସତ୍ୟାଗ୍ରହରେ ସାମ୍ବାଦିକ ଦେବୀପ୍ରସନ୍ନ ନାୟକ

ସୁଭାଷ ଚନ୍ଦ୍ର ପଟ୍ଟନାୟକ

ଓଡ଼ିଆ ଭାଷାରେ ଓଡ଼ିଶାର ସମସ୍ତ କାର୍ଯ୍ୟାଳୟ ଚାଲିବା ପାଇଁ ଆମ ରାଜ୍ୟ ତଥା ଓଡ଼ିଶା କାର୍ଯ୍ୟାଳୟ ଭାଷା ଆଇନ, ୧୯୫୪ର ସୃଷ୍ଟି । ୧୯୬୩ରେ ବିଜୁ ପଟ୍ଟନାୟକଙ୍କ ଅବୈଧ ସଂଶୋଧନ ଦ୍ଵାରା ଏହି ଆଇନରେ ଧାରା ୩କ ସଂଯୋଜନ ଓ ତାଙ୍କ ପୁଅ ନବୀନ ପଟ୍ଟନାୟକଙ୍କ ଦ୍ଵାରା ଜାଲିଆତି ବଳରେ ୨୦୧୬ରେ ଧାରା ୪ ତଥା ୨୦୧୮ରେ ଧାରା ୪କର ଅନ୍ତଃସ୍ଥାପନ ଆଇନଟିକୁ ଅକର୍ମଣ୍ୟ କରିଦେଇଛି ଓ ଆମ ରାଜ୍ୟ ପ୍ରତିଷ୍ଠାର ଉଦ୍ଦେଶ୍ୟକୁ ବି ପଣ୍ଡ କରିଦେଇଛି ।

ଏହି ପ୍ରଚଣ୍ଡ ସରକାରୀ ପ୍ରତାରଣା କବଳରୁ ଆମ ପ୍ରିୟ ମାତୃଭାଷାକୁ ଉଦ୍ଧାର କରିବା ପାଇଁ ଗତ ୧୩.୮.୨୦୧୬ ତାରିଖରୁ ଚାଲିଥିବା କଳାପତାକା ଅଭିଯାନରେ ଆମେ ଏକ ନୂଆ ପରୀକ୍ଷଣ ଆରମ୍ଭ କରିଛୁ । ବିଭିନ୍ନ ସ୍ଥାନରେ ସାମୁହିକ କଳାପତାକା ପ୍ରଦର୍ଶନ ଚାଲିଥିବା ବେଳେ ଗାନ୍ଧୀଜୀଙ୍କ କୌଶଳ ଛାୟାରେ ବ୍ୟକ୍ତିଗତ ସତ୍ୟାଗ୍ରହ ଆରମ୍ଭ ହୋଇଛି । ଏହି କୌଶଳ ଅନୁଯାୟୀ, ଯେ କୌଣସି ଓଡ଼ିଆ ଯେକୌଣସି ସର୍ବସାଧାରଣ ସ୍ଥାନରେ ହାତରେ ଭାଷା ଆନ୍ଦୋଳନର ଉଦ୍ଘୋଷଣପତ୍ର ଓ କଳାପତାକା ଧରି ଏକାଏକ ଏହି ନୀରବ ସତ୍ୟାଗ୍ରହ ଚଳାଇବେ ।

ବିଶିଷ୍ଟ ସାମ୍ବାଦିକ ଦେବୀ ପ୍ରସନ୍ନ ନାୟକ ଉତ୍କଳ ଦିବସରେ ଏହି ବ୍ୟକ୍ତିଗତ ସତ୍ୟାଗ୍ରହ ଆରମ୍ଭ କରି କହିଛନ୍ତି, “ଆଜି ଆମ ଜନ୍ମମାଟି ଓଡ଼ିଶାର ଜନ୍ମଦିନ। କେଡ଼େ ପବିତ୍ର ଦିନ ଆମ ପାଇଁ। ଭାଷା ଭିତ୍ତିରେ ଗଠନ ହୋଇଥିବା ଆମ ଏ ସ୍ଵତନ୍ତ୍ର ପ୍ରଦେଶରେ କିନ୍ତୁ ଆମ ମା’ର ଭାଷା (ମାତୃଭାଷା) ଓଡ଼ିଆକୁ ସରକାରୀ କାର୍ଯ୍ୟକ୍ରମ ଓ ପ୍ରାଶାସନିକ ପରିଚାଳନାରେ ଏଯାଏଁ ପ୍ରାଥମିକତା ଦିଆଯାଇ ପାରିଲା ନାହିଁ। ଓଡ଼ିଆକୁ ସରକାରୀ ଭାଷା ଭାବରେ ପ୍ରାଥମିକତା ଓ ଏହାର ଖିଲାପକରୀଙ୍କ ବିରୋଧରେ ଦଣ୍ଡବିଧାନ ପାଇଁ ରାଜ୍ୟବ୍ୟାପି ଚାଲିଥିବା ଭାଷା ଆନ୍ଦୋଳନ (ଆମ ଭାଷା ଆମ ଅଧିକାର) ପରୀପ୍ରେକ୍ଷୀରେ ଆଜି ମୁଁ ମୋ ଅଞ୍ଚଳରେ କଳାପତାକା ଧରି ସେଥିରେ ସାମିଲ ହେଲି। ଆମ ଭାଷା ଜନନୀର ଜୟ ହେଉ। ଆମ ଜନ୍ମମାଟିର ଜୟ ହେଉ।”

ଯଦି ସରକାର ନିଜକୁ ନ ସୁଧାରନ୍ତି ଓ ଓଡ଼ିଶା କାର୍ଯ୍ୟାଳୟ ଭାଷା ଆଇନରେ ଜାଲିଆତି ବଳରେ ଖଞ୍ଜିଥିବା ଧାରା ୪ ଓ ଧାରା ୪କ ବିଲୋପ କରି ଓଡ଼ିଆ ଭାଷାରେ ସେବା ନଦେବା ବ୍ୟକ୍ତିକୁ ଦଣ୍ଡବିଧାନ ପ୍ରକ୍ରିୟା ଆରମ୍ଭ କରିବାର ଅଧିକାର ସବୁ ଓଡ଼ିଆଙ୍କୁ ପ୍ରଦାନ କରାନଯାଏ , ତେବେ ଏହି ବ୍ୟକ୍ତିଗତ କଳାପତାକା ସତ୍ୟାଗ୍ରହ “ଚାଳେ ଚାଳେ କଳାପତାକା” ପର୍ଯ୍ୟାୟକୁ ଉନ୍ନୀତ ହେବ ।

ଭାଷା ଆନ୍ଦୋଲନ ଦୃଢ଼ ହେଲେ ଓଡ଼ିଶା ଚାଲିବ ଓଡ଼ିଆରେ : ପ୍ରଫେସର ଅରବିନ୍ଦ ଦାସ

(ସୂତ୍ର – ଭାଷା ମା ପାଇଁ ପଦେ)

ଓଡ଼ିଶାର ସମସ୍ତ ସରକାରୀ କାରବାର ଓଡ଼ିଆ ଭାଷାରେ ହେବା ଆବଶ୍ୟକ ଓ ସେଥିପାଇଁ ଓଡ଼ିଆରେ କାମ ନକରିବା ବ୍ୟକ୍ତିଙ୍କୁ ଦଣ୍ଡ ବିଧାନ ପାଇଁ ଭାଷା ଆଂଦୋଳନର ଦାବି ଯଥାର୍ଥ ବୋଲି କହିଛନ୍ତି ବିଶିଷ୍ଟ ଭାଷାବିଜ୍ଞାନୀ ପ୍ରଫେସର ଅରବିନ୍ଦ ଦାସ ।

କରୋନା ପରିଚାଳନାରେ ସରକାରଙ୍କ ଏକାଗ୍ରତାରେ କୌଣସି ଆଞ୍ଚ ନ ଆଣିବା ପାଇଁ ଭାଷା ଆଂଦୋଳନର କଳାପତାକା ଅଭିଯାନ କାୟିକତଃ ସ୍ଥଗିତ ରଖି ଆଂଦୋଳନର ନେତୃତ୍ଵ ବୌଦ୍ଧିକ ସ୍ତରରେ ଅଭିଯାନ ଅତୁଟ ରଖିଛନ୍ତି ।

ସାମାଜିକ ଗଣମାଧ୍ୟମ ଫେସ୍ ବୁକ୍ ମଞ୍ଚରେ ଭାଷା ମା ପାଇଁ ପଦେ ନାମରେ ଏଥିପାଇଁ ଏକ ସ୍ଵତନ୍ତ୍ର ପୃଷ୍ଠା ଖୋଲାଯାଇଛି , ଯେଉଁଠି ପ୍ରତି ସୋମବାର ସକଳ ୧୦ଟାରେ ଜଣେ ଜଣେ ବିଜ୍ଞ ଓଡ଼ିଆ ଆଂଦୋଳନର ଅଭିଳାଷ ପ୍ରତି ସମର୍ଥନ ଜ୍ଞାପନ କରୁଛନ୍ତି । ତାହା ସିଧା ପ୍ରସାରିତ ହେଉଛି । ଗତ ସୋମବାରର ବକ୍ତା ଥିଲେ ପ୍ରଫେସର ଦାସ ।

ଅର୍ଥଲୋଭରେ ବିଶ୍ଵାସଘାତକତା କରିବା ପୂର୍ବରୁ ପବିତ୍ର ମହାରଥା

ସୁଭାଷ ଚନ୍ଦ୍ର ପଟ୍ଟନାୟକ

ଅର୍ଥଲୋଭର ବଶବର୍ତ୍ତୀ ହୋଇ ଭାଷା ଆନ୍ଦୋଳନ ପ୍ରତି ବିଶ୍ଵାସଘାତକତା କରିବା ପୂର୍ବରୁ ପବିତ୍ର ମହାରଥା ମୋର ଅତ୍ୟନ୍ତ ବିଶ୍ଵସ୍ତ ଅନୁଚର ଥିଲେ ଓ ମୋ ଘରେ ପୁତ୍ରବତ୍ ଚଳପ୍ରଚଳ ହେଉଥିଲେ । ଓଡ଼ିଶା ଅଫିସିଆଲ ଲାଙ୍ଗୁଏଜ ଆକ୍ଟର ପୂର୍ଣ୍ଣ ପ୍ରୟୋଗ ପାଇଁ ଏକ ମନ୍ତ୍ରୀସ୍ତରୀୟ କମିଟି ଗଠନ କରିବାକୁ ରାଜ୍ୟସରକାରଙ୍କୁ ବାଧ୍ୟ କରିଥିବା ଭାଷା ସଂଗ୍ରାମ ସମିତିର ସର୍ବୋଚ୍ଚ ନେତା କବି ଶଙ୍କର ପରିଡ଼ା ଏକ ସାହିତ୍ୟସଭାରେ ଥରେ କବିସୁଲ୍ଲଭ ଠାଣିରେ କହିଥିଲେ, ସୁଭାଷବାବୁ ତାଙ୍କ ଗାଡ଼ିର ବାହକଙ୍କୁ ଭାଷା ଆନ୍ଦୋଳନର ଆବାହକ କରି ନିଜ ପାଇଁ ଓ ରାଜ୍ୟ ପାଇଁ ଅଡୁଆ ସୃଷ୍ଟି କରିଛନ୍ତି । ସେତେବେଳେ ମୁଁ ହସି ଦେଇଥିଲି, ଏତେବେଳେ ଭାବୁଛି ସେ ସତ କହିଥିଲେ ।

ଯାହା ହେଉ, ଯେତେବେଳେ ସେ ମୋର ଅନୁଗତ ଅନୁଚର ଭାବେ କାମ କରୁଥିଲେ, ସେହି ସମୟର ଏକ ପ୍ରାମାଣିକ ତଥ୍ୟ ମୁଁ ଏବେ ଉପସ୍ଥାପନା କରିବି ।

ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ପାଇଁ ଓଡ଼ିଶା ସରକାର ପ୍ରସ୍ତୁତ କରିଥିବା ଯୁକ୍ତି-ସନ୍ଦର୍ଭକୁ ତଦାନୀନ୍ତନ ସାଂସଦ ରାମଚନ୍ଦ୍ର ଖୁଣ୍ଟିଆଙ୍କ ସ୍ଵାର୍ଥ ପାଇଁ ଚୋରି କରି ନିଜସ୍ଵ ଲାଭରେ ବ୍ୟବହାର କରିଥିବା ଡଃ ଦେବୀ ପ୍ରସନ୍ନ ପଟ୍ଟନାୟକ ଓ ସୁବ୍ରତ ପୃଷ୍ଟି ତଥା ସଂସ୍କୃତି ବିଭାଗକୁ ମୁଁ ସେମାନଙ୍କ ଅସଲ ରୂପରେ ଜନସାଧାରଣଙ୍କ ସମ୍ମୁଖରେ ଉପସ୍ଥାପିତ କରୁଥିଲି ଦୈନିକ ସର୍ବସାଧାରଣ କାଗଜରେ, “ମିଛ କେବେ ସତ ହୁଏନା” ଶୀର୍ଷକ ନିବନ୍ଧନିଚୟରେ ।  ସେତେବେଳେ, ସେହି ସରକାରୀ ସନ୍ଦର୍ଭର ଭିତ୍ତିପତ୍ର ଲେଖକ ଭାବେ (ଅସିତ ମହାନ୍ତିଙ୍କ “ସାହିତ୍ୟ ମହାଭାରତ”) ନିଜକୁ ଜାରିକରିଥିବା ଡଃ ନଟବର ଶତପଥୀଙ୍କୁ ଟେଲିଫୋନରେ ଜେରା କରିଥିଲେ ପବିତ୍ର ମହାରଥା ଓ ତାହାର ରେକର୍ଡ ମୋତେ ଇ-ମେଲ୍ ଯୋଗେ ପଠାଇ ଥିଲେ । ତହିଁରେ ପବିତ୍ର କହିଛନ୍ତି, ସୁଭାଷ ଚନ୍ଦ୍ର ପଟ୍ଟନାୟକ କେବେ ଫାଲତୁ କଥା କହନ୍ତିନାହିଁ ; ବିନା ପ୍ରମାଣରେ କିଛି ଲେଖନ୍ତିନାହିଁ  ଏବଂ ଆହୁରି କହିଛନ୍ତି, ସୁଭାଷ ଚନ୍ଦ୍ର ପଟ୍ଟନାୟକ କଳାପତାକା ଅଭିଯାନ ପ୍ରଥମେ ୧୯୮୦ ଦଶକରେ ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ବିରୁଦ୍ଧରେ ଆଠଗଡ଼ରେ ଚଳାଇଥିଲେ ଓ ତାଙ୍କ ସହ ମିଶି ସମାଜ କାଗଜ ବିରୁଦ୍ଧରେ କଳାପତାକା ପଟୁଆର ଭୁବନେଶ୍ଵରରେ ହୋଇଥିଲା ।

ସେହି ପବିତ୍ର ମହାରଥା ଭାଷା ଆଂଦୋଳନର ପାଣ୍ଠି ତୋଷରପାତ କରି ତାଙ୍କ ଅପରାଧ ଉପରୁ  ଲୋକଙ୍କ ଦୃଷ୍ଟି ଏଡ଼େଇବା ପାଇଁ ଏବେ ବିଭିନ୍ନ ନାଟକ ଚଳାଇଛନ୍ତି ଓ ସର୍ବବିଧ ଅସାଧୁ ଉପାୟ ଅବଲମ୍ବନ କରି ଚାଲିଛନ୍ତି । ଅଥଚ, ଭାଷା ଆଂଦୋଳନର ହିସାବ ଦେଉନାହାନ୍ତି । ସତ୍ୟର ନିକଟତର ହେବାପାଇଁ ମୁଁ ଏବେ ଆପଣଙ୍କ ସମ୍ମୁଖରେ ରଖିବାକୁ ଯାଉଛି ସେହି ରେକର୍ଡ ଯାହା ଡଃ ନଟବର ଶତପଥିଙ୍କ ସହ ତାଙ୍କ ଟେଲିଫୋନୀକ୍ ଆଲୋଚନାର ରେକର୍ଡ , ଯାହାକୁ କି ସେ ମୋତେ ପଠାଇଥିଲେ  । ତାହାକୁ ଏବେ ଅନୁଧ୍ୟାନ କରନ୍ତୁ ; ଆଲୋଚନା ଚାଲିରହିବ ।

 

 

ପ୍ରସଙ୍ଗ : ମଦମୁକ୍ତି, ପତ୍ନୀ ଓ ପ୍ରଦ୍ୟୁମ୍ନ ଶତପଥୀ

ସୁଭାଷ ଚନ୍ଦ୍ର ପଟ୍ଟନାୟକ

ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରା ମାରିଥିବା ପ୍ରଦ୍ୟୁମ୍ନ ଶତପଥୀ ପ୍ରଚାର ଚଳାଇଛନ୍ତି ଯେ, ମୁଖ୍ୟମନ୍ତ୍ରୀଙ୍କୁ ସେ ଏକ ଖୋଲା ଚିଠି ଦେଇଛନ୍ତି ଯହିଁରେ ଅନ୍ୟ କେତେକ ପ୍ରସଙ୍ଗର ଅବତାରଣା କରିଥିବା ବେଳେ ଓଡ଼ିଶାକୁ ମଦମୁକ୍ତ କରାଯାଉ ବୋଲି ସେ ଦାବି କରିଛନ୍ତି । ଏହା ମୋତେ ମନେ ପକାଇଦେଉଛି ୨୦୧୭ର ଏକ ସକାଳର କଥା । ତାରିଖ ଥିଲା ନଭେମ୍ବର ୨୫ ।

ସୌମ୍ୟ ପଟ୍ଟନାୟକଙ୍କ ଚାନ୍ଦା

ସେତେବେଳେ ସଂବାଦ ସମ୍ପାଦକ ବାବୁ ସୌମ୍ୟରଞ୍ଜନ ପଟ୍ଟନାୟକ ଭାଷା ଆଂଦୋଳନର ଜଣେ ଦୃଢ ସମର୍ଥକ ଥାନ୍ତି । କଳାପତାକାଧାରୀମାନଙ୍କ ଫଟୋଚିତ୍ର ତାଙ୍କ କାଗଜରେ ସବୁଦିନ ବାହାରୁଥାଏ ଓ ଆନ୍ଦୋଳନ ସପକ୍ଷରେ ମୁଁ ଯେଉଁ ତାତ୍ତ୍ଵିକ ଆଲୋଚନା ରଖେ ତହିଁରୁ ଅଧିକାଂଶ ମଧ୍ୟ ସେହି କାଗଜରେ ପ୍ରକାଶ ପାଉଥାଏ । ମୋ ଲେଖାଗୁଡ଼ିକ ମୁଁ ସବୁବେଳେ ସୌମ୍ୟବାବୁଙ୍କୁ ଦେଇଥାଏ । ସେଦିନ ସକାଳେ ପ୍ରାୟ ସାଢେ ଆଠଟା ବେଳେ ମୁଁ ତାଙ୍କ ଘରକୁ ଯାଇଥିଲି; ପବିତ୍ର ମହାରଥା ମୋ ଲେଖାଟିକୁ ହାତରେ ଧରିଥାନ୍ତି ତାଙ୍କୁ ଦେବା ପାଇଁ । ୧୯୯୦ ଦଶକରୁ ସେ ପର୍ଯ୍ୟନ୍ତ ତାଙ୍କ ସହ ମୋର ଦେଖା ସବୁବେଳେ ଥିଲା ମର୍ଯ୍ୟାଦାସମ୍ପନ୍ନ । ମାତ୍ର ପ୍ରଥମଥର ସେଦିନ ମୁଁ ଅପଦସ୍ତ ଅନୁଭବ କରିଥିଲି । ସବୁଥର ପରି ସେ ମୋତେ ସ୍ଵାଗତ କରିନଥିଲେ , ଗମ୍ଭୀର ହୋଇ ନିଜ ଆସନରେ ବସିଥିଲେ । ମୁଁ ପବିତ୍ରକୁ ଇସାରା ଦେଲି ଲେଖାଟି ନଦେବା ପାଇଁ । ତା ପରେ ସେ ବିନ୍ଧିଚାଲିଲେ ପବିତ୍ରକୁ ପ୍ରଶ୍ନବାଣ । ହ୍ଵାଟ୍ସଆପରୁ ଫଟୋ ଦେଖୁଥାନ୍ତି, ପବିତରକୁ ପଚାରୁଥାନ୍ତି – ଅମକ ଲୋକ କାହିଁକି ଆସିନଥିଲେ, ସମକଲୋକ କାହିଁକି ଆସିନଥିଲେ ଇତ୍ୟାଦି । ପବିତ୍ର ମୁଁହ ତଳକୁ କରି ଚୁପ୍ଚାପ ବସିଥାନ୍ତି । ଟଙ୍କା ନେବାବେଳକୁ ତ ନେଇଯିବ, କାମ କାହିଁକି ସେ ଅନୁସାରେ ହେବ ନାହିଁ ?- ବୋଲି ତୀକ୍ଷ୍ନ କଣ୍ଠରେ ପଚାରିଲେ ସୌମ୍ୟରଞ୍ଜନ ପଟ୍ଟନାୟକ । ତା ପରେ ପବିତ୍ର ପାଟି ଖୋଲିଲେ । “ଆପଣ ମୋତେ କାହିଁକି ପଚାରୁଛନ୍ତି? ପ୍ରଦ୍ୟୁମ୍ନ ଶତପଥୀ ଆପଣଙ୍କ ସହ କଣ କଥା ହୋଇଥିଲେ ତା ତ ମୁଁ ଜାଣିନି । ସେ ମୋତେ କହିଲେ, ସୌମ୍ୟବାବୁ ୩୫ ହଜାରେ ଟଙ୍କା ଦେବାକୁ କହିଛନ୍ତି , ତୁ ଯାଇ ନେଇ ଆ । ମୋତେ ଆପଣ ସେ ଟଙ୍କା ଦେଲେ, ମୁଁ ନେଇ ତାଙ୍କୁ ଦେଲି । କିଏ ଆସିଲେ ନ ଆସିଲେ ମୋତେ ପଚାରିଲେ ମୁଁ କଣ କହିବି?” ସୌମ୍ୟବାବୁ ପବିତ୍ରକୁ କହିଲେ – ତମ ଉପସ୍ଥିତିରେ ଆଲୋଚନା ହୋଇଥିଲା । ପବିତ୍ର କହିଲେ ମୁଁ ଉପସ୍ଥିତ ଥିଲି, କଣ କଥା ହୋଇଥିଲା ମୁଁ ଜାଣି ନାହିଁ । ଦୀକ୍ଷିତ ବାବୁଙ୍କ ସହ ମୁଁ କଥା ହେଉଥିଲି ଯେତେବେଳେ ଆପଣ ପ୍ରଦ୍ୟୁମ୍ନ ବାବୁଙ୍କ ସହ କଥା ହେଉଥିଲେ । ଅସ୍ଵସ୍ତି ସହିବାର ସୀମା ମୋର ଟପିଥିଲା । ମୁଁ ଉଠିଲି । ପବିତ୍ର ବି ମୋ ସହ ଉଠିଲେ ।

“କଥା କଣ?”- ଗାଡ଼ିରେ ବସି ମୁଁ ପଚାରିଲି ପବିତ୍ରକୁ । ସେ କହିଲେ – ନବବାବୁଙ୍କ ଜନ୍ମଦିନରେ ମଦମୁକ୍ତି ସମ୍ମିଳନୀ କରିବାକୁ ପ୍ରଦ୍ୟୁମ୍ନବାବୁ ସୌମ୍ୟବାବୁଙ୍କଠାରୁ ୩୫ ହଜାର ଟଙ୍କା ନେଇଥିଲେ ଓ କିଏ କିଏ ସେହି ସମ୍ମିଳନୀରେ ଯୋଗ ଦେବେ ତାକୁ ଆଖିଆଗରେ ରଖି ସୌମ୍ୟବାବୁ ସେ ଟଙ୍କା ଦେଇଥିଲେ । ସେମାନେ ନ ଆସିବାରୁ ସେ ବିଗୁଡୁଛନ୍ତି ।

ମୁଁ ସେହି ଗାଡ଼ିରୁ ପ୍ରଦ୍ଯୁମ୍ନ ଶତପଥୀଙ୍କୁ ଫୋନ କଲି ଓ ଯେହେତୁ ସେ ଭାଷା ଆନ୍ଦୋଳନରେ ଅଛନ୍ତି ଏପରି ଭାବେ କାହାଠୁ କଣ୍ଟ୍ରାକ୍ଟ ନେବା ବା ଚାନ୍ଦା ନେବା କେତେଦୂର ଉଚିତ ବୋଲି ପଚାରିଲି । “ଆପଣ କେଉଁଠି ଅଛନ୍ତି?” – ସେ ପଚାରିଲେ । ମୁଁ କାର୍ ଭିତରେ ଅଛି ବୋଲି କହିଲି । “ଘରେ କେତେବେଳେ ପହଞ୍ଚିବେ?” ବୋଲି ସେ ପଚାରିଲେ । “୫ ମିନିଟରେ” ବୋଲି ମୁଁ ଉତ୍ତର ଦେଲି ।

ମୁଁ ଘରେ ପହଞ୍ଚୁ ପହଞ୍ଚୁ ସେ ଆସି ପହଞ୍ଚିଲେ । ମୁଁ କିଛି କହିବା ପୂର୍ବରୁ କାନ ଧରି ବସ୍ ଉଠ୍ ହେଲେ ଓ ଆଉ ଦିନେ ହେଲେ ଏପରି ଭୁଲ କରିବେ ନାହିଁ ବୋଲି କହିଲେ । ଏବଂ କହିଥିଲେ, “ମୁଁ ଦି ଚାରି ଦିନରେ ସେ ପଇସା ତାଙ୍କୁ ଫେରାଇ ଦେବି।“

ଫେରେଇଛନ୍ତି କି ନାହିଁ ସେ କଥା ସୌମ୍ୟବାବୁ କହିବା ଉଚିତ ।

କିନ୍ତୁ ସେଦିନଠୁ ଆଜିଯାଏଁ ମଦ ବିରୁଦ୍ଧରେ ନୀରବ ଥିବା ପ୍ରଦ୍ୟୁମ୍ନ ଶତପଥୀ ହଠାତ୍ ମୁଖ୍ୟମନ୍ତ୍ରୀଙ୍କୁ ଏ ଖୋଲା ଚିଠି ଲେଖିଛନ୍ତି କାହିଁକି ? ଦୁଇଟି ସମ୍ଭାବ୍ୟ କାରଣ ମନକୁ ଆସୁଛି । ହୁଏତ ସୌମ୍ୟବାବୁ ବା ତାଙ୍କପରି କେହି ଏଥିପାଇଁ ତାଙ୍କୁ କିଛି ଚାନ୍ଦା ଦେଇଥାଇପାରନ୍ତି; ବା ହୁଏତ ସରକାରୀକଳରୁ କେହି ତାଙ୍କୁ ଏଥିପାଇଁ ଧରି ଥାଇ ପାରନ୍ତି । ୨ୟ କାରଣଟି ଅଧିକ ସମ୍ଭାବନା ବହନ କରୁଛି ।

ନିଶାମୁକ୍ତି ବିରୁଦ୍ଧରେ ଷଡଯନ୍ତ୍ର ?

ବସ୍ତୁତଃ, ବର୍ଷୀୟାନ ସ୍ଵାଧୀନତା ସଂଗ୍ରାମୀ ଓ ପ୍ରାକ୍ତନ ବିଧାୟକ ପଦ୍ମଚରଣ ନାୟକଙ୍କ ନେତୃତ୍ବରେ ବହୁବର୍ଷ ଧରି ଚାଲିଥିବା ମଦମୁକ୍ତି ଆନ୍ଦୋଳନ ସରକାରଙ୍କୁ ନାକେଦମ କଲାଣି । ମଦ ଓ ଅନ୍ୟ ନିଶାଦ୍ରବ୍ୟ କବଳରୁ ରାଜ୍ୟବାସୀଙ୍କୁ ରକ୍ଷା କରିବା ପାଇଁ ଓଡ଼ିଶାରେ କାର୍ଯ୍ୟରତ ୧୧୧ଟି ସଂଗଠନ ଏକତ୍ର ହୋଇ ମିଳିତ ଓଡ଼ିଶା ନିଶା ନିବାରଣ ଅଭିଯାନ (MONA) ଗଠନ କରିଛନ୍ତି, ଯାହାର ମୁଖ୍ୟ ପଦ୍ମଚରଣବାବୁ । ଏହି ସଂଗଠନ ଭାରତ ସରକାରଙ୍କ ଦୃଷ୍ଟି ମଧ୍ୟ ଆକର୍ଷଣ କରିପାରିଛି ଏବଂ ଭାରତର ଦୁଇଟି ପ୍ରଦେଶରେ ମଦମୁକ୍ତି ପାଇଁ ସରକାରୀ ପଦକ୍ଷେପ ଯେ ନିଆଯାଇପାରିଛି ତା ମୂଳରେ MONA ଏକ ଆଦର୍ଶ ଆଧାର ଭାବେ ବିବେଚିତ ହେଉଛି । ତେଣୁ ଏହି ଆନ୍ଦୋଳନ ମଦପ୍ରିୟ ମୁଖ୍ୟମନ୍ତ୍ରୀଙ୍କୁ ବଡ଼ ଅଡ଼ୁଆରେ ପକାଇଛି ଓଡ଼ିଶାରେ । ଏହି କାରଣରୁ ହୁଏତ ଏହାକୁ ଦୁର୍ବଳ କରିବା ପାଇଁ ପ୍ରଦ୍ୟୁମ୍ନ ଶତପଥୀଙ୍କୁ ପୁଣି ଥରେ ପୋଷାମନେଇ ପ୍ରୟୋଗ କରୁଥାଇପାରନ୍ତି ମୁଖ୍ୟମନ୍ତ୍ରୀ । ଭାଷା ଆନ୍ଦୋଳନକୁ ଭାଙ୍ଗିବା ପାଇଁ ଏହାଙ୍କୁ ପ୍ରୟୋଗ କରିପାରିଥିବା ହେତୁ, ମୁଖ୍ୟମନ୍ତ୍ରୀଙ୍କ ପକ୍ଷେ ଏହା ହୁଏତ ସହଜ ହୋଇଛି । ଏହି ମଉକାରେ ଶତପଥି ଠିକ୍ ସେହି ଚାଲ୍ ଖେଳିଛନ୍ତି ଯେଉଁ ଚାଲ୍ ୨୦୧୮ ମଇ ମାସରୁ ଜୁଲାଇ ଯାଏଁ ସେ ଖେଳିଥିଲେ । ସେତେବେଳେ ସେ ଯେପରି ସରକାରୀ କ୍ଵାଟର ଓ ସ୍ତ୍ରୀଙ୍କ ଚାକିରି କଥା ଉଠାଇଥିଲେ, ମଦମୁକ୍ତି ଆନ୍ଦୋଳନ କଥା କହି ଠିକ୍ ସେହିପରି ସରକାରୀ କ୍ଵାଟର ଓ ସ୍ତ୍ରୀଙ୍କ ୧୦ ବର୍ଷର ଦରମା ପ୍ରସଙ୍ଗ ଉଠାଇଛନ୍ତି ।

ନିମକହାରାମ ଜାଗିରି

“ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ: ମୁଖ୍ୟମନ୍ତ୍ରୀ ସଫେଇ ରଖନ୍ତୁ” ଶୀର୍ଷକରେ ଏହି ପୃଷ୍ଠାମାନଙ୍କରେ ମୁଁ ୩୩ଟି ପ୍ରାମାଣିକ ତଥ୍ୟସମ୍ପନ୍ନ ନିବନ୍ଧ ପ୍ରକାଶ କରିଛି ଯାହା ମୁଖ୍ୟମନ୍ତ୍ରୀଙ୍କ ଜାଣିବା ପାଇଁ ଇଂରାଜୀ ଭାଷାରେ ORISSA MATTERS ପୃଷ୍ଠାରେ ବି କେତେକ ନିବନ୍ଧରେ ରହିଛି । ମୁଖ୍ୟମନ୍ତ୍ରୀ ନିଜେ ସେହି ବେଆଇନ କାର୍ଯ୍ୟରେ ସମ୍ପୃକ୍ତ ଥିବା ସନ୍ଦେହ ଅଲଙ୍ଘ୍ୟଥିବା ହେତୁ ମୁଁ ରାଜ୍ୟପାଳଙ୍କ ହସ୍ତକ୍ଷେପ  ଦାବି କରିଥିଲି । ମୁଖ୍ୟମନ୍ତ୍ରୀଙ୍କ ସୁପାରି ପରି ତାଙ୍କ ସ୍ତ୍ରୀ ୧୦ ବର୍ଷର ସୌଖୀନ ଅନୁପସ୍ଥିତି ସତ୍ତ୍ୱେ ଚାକିରିରେ ପୁନଃସଂସ୍ଥିତ ହୋଇଥିବାବେଳେ ଏବଂ ଏହି ବେଆଇନ କାମରେ ସାହାଯ୍ୟକରିଥିବା ସବୁ ଅଫିସର ପଦୋନ୍ନତି ପାଇଥିବା ବେଳେ, ରାଜ୍ୟପାଳଙ୍କ ହସ୍ତକ୍ଷେପ ହେତୁ ସେହି ୧୦ ବର୍ଷ ପାଇଁ ତାଙ୍କ ସ୍ତ୍ରୀଙ୍କ ବେତନ ପ୍ରଦାନ ବନ୍ଦ ହୋଇଯାଇଛି । ମାତ୍ର ଆଇନତଃ ତାଙ୍କ ସ୍ତ୍ରୀ ଫେରିପାଇଥିବା ଚାକିରି ବାତିଲ ହେବାକୁ ବାଧ୍ୟ । ମୁଖ୍ୟମନ୍ତ୍ରୀ ତାହା କରିନାହାନ୍ତି ଏଯାଏଁ । ଓଡ଼ିଆ ଭାଷାସ୍ଵାର୍ଥକୁ ଛୁରୀ ମାରି ମୁଖ୍ୟମନ୍ତ୍ରୀଙ୍କ ଠାରୁ ନିମକହାରାମ ଜାଗିରି ସ୍ୱରୂପ ପ୍ରତିମାସରେ ପ୍ରାୟ ଲକ୍ଷେ ଟଙ୍କା  “ସାରା ବିଶ୍ଵରେ ବିଶ୍ଵାଏ ଭୂମିର ମଳିକାନଗିରି” ନଥିବା ପ୍ରଦ୍ୟୁମ୍ନ ଶତପଥୀ  ରୋଜଗାର କରୁଛନ୍ତି ସ୍ତ୍ରୀଙ୍କ ବେଆଇନ ନିଯୁକ୍ତି ମାଧ୍ୟମରେ ।

ଧୂର୍ତ୍ତ ଅଭିସନ୍ଧି

ତେଣୁ, ପଦ୍ମଚରଣ ନାୟକଙ୍କ ନେତୃତ୍ଵାଧୀନ ନିଶାମୁକ୍ତି ଅଭିଯାନକୁ ଦୁର୍ବଳ କରିବା ପାଇଁ ମଦପ୍ରିୟ ମୁଖ୍ୟମନ୍ତ୍ରୀଙ୍କୁ ସହାୟତା ଦେବା ସକାଶେ ହୁଏତ ସିଏମଓ ବା ସୌମ୍ୟବାବୁଙ୍କ ଦ୍ଵାରା ଆହୁତ ହେବା ପରେ ସେ ସେହି ପୁରୁଣା ଚାଲ୍ ଚଳାଇ ତାଙ୍କ ସ୍ତ୍ରୀଙ୍କ ନିଷିଦ୍ଧ କରାହୋଇଥିବା ୧୦ ବର୍ଷର ପିଛିଲା ବେତନ ପ୍ରାୟ ଦେଢକୋଟି ଟଙ୍କା ପ୍ରଦାନ କରାଯିବା ଦୁହା ତୋଳିଛନ୍ତି ଓ ସରକାରୀ ଘର ହାତେଇବା ପାଇଁ ଅଧାରେ ରହିଯାଇଥିବା ମିଶନକୁ ଅଙ୍କୁରିତ କରିଛନ୍ତି ।

ଭାଷା ଆନ୍ଦୋଳନକୁ ନେଇ କ୍ଵାଟର ସଉଦା

ସରକାରୀ ଘର (କ୍ଵାଟର) ପାଇବା ପାଇଁ ସେ ଭାଷା ଆନ୍ଦୋଳନକୁ ଛୁରୀ ମାରିବାକୁ କିପରି ପ୍ରସ୍ତୁତ ଥିଲେ ତାହା ତାଙ୍କ ଅନୁଗତ ବନିଥିବା ପବିତ୍ର ମହାରଥା ଓ କମ୍ମ୍ୟୁନିଷ୍ଟ ପାର୍ଟି ଛାଡ଼ି ନବୀନ ପଟ୍ଟନାୟକଙ୍କ ପାଖଲୋକ ବନିଥିବା ସୁବାସ ସିଂ ଓଡ଼ିଆ ଜାତିର ବୃହତ୍ତର ସ୍ଵାର୍ଥ ଦୃଷ୍ଟିରୁ ପ୍ରକାଶ କରିଦେବା ଊଚିତ । ଘଟଣାଟି ଥିଲା ଏହିପରି :

ପିଏମଜି ଛକରେ ଥିବା ଏକ ଚା ଦୋକାନରେ ନିତିଦିନ ସକାଳେ ଖଟି କରୁଥିବା ପ୍ରଦ୍ୟୁମ୍ନ ଶତପଥୀ ସୁବାସ ସିଂଙ୍କ ସହ ଗଭୀର ଆଲୋଚନାରେ ଲିପ୍ତ ଥାଇ ଜାଣିପାରୁନଥିଲେ ଯେ, ସେହି ଖଟିରେ ପ୍ରତିଦିନ ହାଜରା ପକାଉଥିବା ପବିତ୍ର ମହାରଥା ତାଙ୍କ ପଛପଟେ ଠିଆ ହୋଇ ସବୁକଥା ଶୁଣୁଥିଲେ । ଶେଷ କଥୋପକଥନ ଥିଲା ଦିଆନିଆର କଥା ।

ସିଂ କହିଲେ, “ଆପଣ ଭାଷା ଆନ୍ଦୋଳନକୁ ଯେମିତି ହେଲେ ଭାଙ୍ଗନ୍ତୁ, ଆପଣଙ୍କୁ କ୍ଵାଟର ମିଳିବା ଦାୟିତ୍ଵ ମୋର ।“ ଶତପଥୀ କହିଲେ, “ତାହା ମୋର ବାମ ହାତର ଖେଳ । ମୁଁ ଲୋକ ଯୋଗଉଛି ବୋଲି ଆନ୍ଦୋଳନ ଚାଲିଛି । ମୁଁ ଯଦି ଲୋକ ନ ଯୋଗାଏ ସୁଭାଷ ପଟ୍ଟନାୟକ କଣ କରିବେ?”

କଥୋପକଥନ ପରେ ଯେତେବେଳେ ସିଂ ଉଠିଲେ, ସେତେବେଳେ ସେଠାରେ ପବିତ୍ରଙ୍କୁ ଦେଖି ଉଭୟେ ଚମକି ପଡ଼ିଥିଲେ । ପବିତ୍ର ସେହି ସଙ୍ଗେ ସଙ୍ଗେ ଆସିଥିବା କହି କିଛି ନଶୁଣିଥିବାର ଧାରଣ ତିଆରି କରାଇଥିଲେ , କିନ୍ତୁ ତାହାକୁ ହଜମ କରିବାକୁ ସକ୍ଷମ ନ ହୋଇ ସେ କଥାଟି କହିଦେଇଥିଲେ ବିଶିଷ୍ଟ ସାମ୍ବାଦିକ ଓ ସଂସ୍କୃତି ଆଲୋଚକ ଡଃ ଅସିତ ମହାନ୍ତିଙ୍କୁ ପ୍ରାୟତଃ ତୁରନ୍ତ “ଆମ ଓଡ଼ିଶା” ଅଫିସରେ । ଡଃ ମହାନ୍ତି ତାଙ୍କୁ ପଚାରିଥିଲେ, “ସୁଭାଷବାବୁଙ୍କୁ ଏହା କହିଛ?” “ସେ ଘରେ ନାହାନ୍ତି, ବାହାରକୁ ଯାଇଛନ୍ତି” ବୋଲି କହିଥିଲେ ପବିତ୍ର । ବସ୍ତୁତଃ ସେଦିନ ମୁଁ ସକାଳୁ ସକାଳୁ ଢେଙ୍କାନାଳ ଯାଇଥିଲି । ଫେରିଲା ପରେ ଅସିତବାବୁ ମୋତେ ଏହା କହିଥିଲେ ଓ ସନ୍ଧ୍ୟାବେଳେ କଳାପତାକା ଆରମ୍ଭ ପୂର୍ବରୁ ପବିତ୍ର ବି କହିଥିଲେ ।

ଭାଷା ଆନ୍ଦୋଳନ ବିରୁଦ୍ଧରେ ଥୋପଗିଳା

ପ୍ରଦ୍ୟୁମ୍ନ ଶତପଥୀ ନିଜ ସ୍ଵାର୍ଥ ପାଇଁ ଭାଷା ଆନ୍ଦୋଳନକୁ ଭାଙ୍ଗି ଦେବାକୁ ସମ୍ମତ ବୋଲି ସୁବାସ ସିଂଙ୍କଠାରୁ ଅବଗତ ହେଲା ପରେ ତାଙ୍କୁ ପୋଷାମନେଇବାକୁ ମୁଖ୍ୟମନ୍ତ୍ରୀଙ୍କ ଦପ୍ତର ବ୍ୟଗ୍ର ହୋଇଉଠିଥିଲା । ଯୋଗକୁ ତାଙ୍କ ସ୍ତ୍ରୀଙ୍କ ବିରୁଦ୍ଧରେ ଶିକ୍ଷା ବିଭାଗ ଦେଇଥିବା ଶେଷ ଆଦେଶର ପୁନର୍ବିଚାର ପାଇଁ ଶ୍ରୀମତୀ ଶତପଥୀ (ମାନସୀ ଷଡଙ୍ଗୀ) ଦେଇଥିବା ଦରଖାସ୍ତ ଶିକ୍ଷା ସଚିବ ଜି॰ ଭି॰ ଭି॰ ଶର୍ମାଙ୍କ ପରି ଓଡ଼ିଆବିଦ୍ଵେଷୀ ଅଫିସରଙ୍କ ହାତରେ ଥିଳା । ଭାଷା ଆନ୍ଦୋଳନକୁ ଭାଙ୍ଗିଦେଲେ ସେ ତାଙ୍କ ସ୍ତ୍ରୀଙ୍କୁ ସାହାଯ୍ୟ କରିବେ ବୋଲି ପଦ୍ୟୁମ୍ନ ଶତପଥୀଙ୍କୁ ଥୋପ ଗିଲାଇଲେ ଓ ତା ପରେ ଯାହା ହେଲା, ସେ ସମସ୍ତ ମୁଁ ଉପର ସୂଚିତ ନିବନ୍ଧମାନଙ୍କରେ ସପ୍ରମାଣ ଉଲ୍ଲେଖ କରିଛି ।

ହାଇକୋର୍ଟ ନାମରେ ବି ମିଛ 

ମୁଁ ଉଠାଇଥିବା ପ୍ରମାଣସିଦ୍ଧ ଅଭିଯୋଗ ଉପରେ ଅନେକ ମାସ ଆଲେଜିଆ ହୋଇ ପଡ଼ିରହି ପ୍ରଦ୍ୟୁମ୍ନ ଶତପଥୀ ଲୋକଙ୍କୁ ଜଣାଇବାକୁ ଚେଷ୍ଟା କରିଛନ୍ତି ଯେ, ହାଇକୋର୍ଟଙ୍କ ଆଦେଶ ବଳରେ ତାଙ୍କ ସ୍ତ୍ରୀ ଚାକିରି ଫେରି ପାଇଛନ୍ତି ଓ ସମସ୍ତ ପିଛିଲା ଦରମା ସହ ତାଙ୍କ ସ୍ତ୍ରୀଙ୍କୁ (ମାନସୀ ଷଡଙ୍ଗୀଙ୍କୁ) ପୁନଃସଂସ୍ଥିତ କରିବାକୁ ହାଇକୋର୍ଟ ରାୟ ଦେଇଥିଲେ ମଧ୍ୟ ସରକାର ତାଙ୍କ ପିଛିଲା ଦରମା ଦେଇନାହାନ୍ତି । ମିଛ କଥା । ହାଇକୋର୍ଟ ସେପରି କୌଣସି ରାୟ ଦେଇନାହାନ୍ତି । ତାର ସବିଶେଷ ବିବରଣୀ ମୁଁ ସୂଚିତ କରିଥିବା ନିବନ୍ଧମାଳାରେ ପ୍ରକାଶିତ ହୋଇଛି ।

ମୁଖ୍ୟମନ୍ତ୍ରୀଙ୍କ ନୀରବତା ହିଁ ତାଙ୍କ ଦୋଷ ବଖାଣେ

ଭାଷା ଆନ୍ଦୋଳନ ବିରୁଦ୍ଧରେ ପ୍ରଦ୍ୟୁମ୍ନ ଶତପଥୀଙ୍କୁ ମୁଖ୍ୟମନ୍ତ୍ରୀ ଦେଇଥିବା ସୁପାରି ସ୍ୱରୂପ ତାଙ୍କ ସ୍ତ୍ରୀ ପୁନଃସଂସ୍ଥିତା ହୋଇଥିବା ଚାକିରି ଅବିଳମ୍ବେ ରଦ୍ଦ କରିବାକୁ ମୁଁ ତୋଳିଥିବା ଦାବି ଉପରେ ମୁଖ୍ୟମନ୍ତ୍ରୀ କାହିଁକି ଶୋଇରହିଛନ୍ତି ତାହା ତାଙ୍କ ଦପ୍ତର ସର୍ବ ସମ୍ମୁଖରେ ରଖୁ । ତାଙ୍କ ନୀରବତା ହିଁ ତାଙ୍କ ଦୋଷ ବଖାଣୁଛି ।

ମୁଖ୍ୟମନ୍ତ୍ରୀଙ୍କ ପାଖଲୋକମାନେ ତାଙ୍କୁ କହନ୍ତୁ ଯେ, ପ୍ରଦ୍ୟୁମ୍ନ ଶତପଥୀଙ୍କ ପତ୍ନୀଙ୍କୁ ନିଷିଦ୍ଧ କରାହୋଇଥିବା ପିଛିଲା ବେତନ ତ ଦୂରର କଥା, ତାଙ୍କୁ ଦିଆହୋଇଥିବା ଅବୈଧ ନିଯୁକ୍ତିକୁ ଯଦି ସେ ରଦ୍ଦ ନକରନ୍ତି ତେବେ ତାହା କରିବାକୁ ମୁଁ ତାଙ୍କୁ ବାଧ୍ୟ କରିବି । କାରଣ, ଆମ ଭାଷାକୁ ଛୁରୀ ମାରିଥିବା ମାୟାବୀର ସ୍ଵାର୍ଥସିଦ୍ଧି କାରସାଦିକୁ ବରଦାସ୍ତ କରିବା ଭାଷା ଆନ୍ଦୋଳନ ପ୍ରତି ଅନ୍ୟାୟ ହେବ ।

କେନ୍ଦ୍ରାପଡ଼ାରେ କଳାପତାକା ଅଭିଯାନ ଓ ଭାଷା ପାଇଁ ସ୍ମାରକପତ୍ର ପ୍ରଦାନ

ବିଶେଷ ପ୍ରତିନିଧି

ଭାଷା ଆନ୍ଦୋଳନର କେନ୍ଦ୍ରାପଡ଼ା ଜିଲ୍ଲା ସଂଯୋଜକ ରଞ୍ଜନ କୁମାର ଦାସଙ୍କ ଆହ୍ବାନ କ୍ରମେ କେନ୍ଦ୍ରାପଡ଼ା ସହରର ତିନିମୁହାଣୀ ଛକସ୍ଥ ଯଦୁମଣି ମଙ୍ଗରାଜଙ୍କ ପ୍ରତିମୂର୍ତ୍ତି ସମ୍ମୁଖରୁ ଗୁରୁବାର ପୂର୍ବାହ୍ନରେ ଆନ୍ଦୋଳନର କଳାପତାକା ଅଭିଯାନ ଆରମ୍ଭ ହୋଇ ସମଗ୍ର ସହର ପରିକ୍ରମା କରି ଜିଲ୍ଲାପାଳଙ୍କୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଛି ।

ଓଡ଼ିଶା ସରକାରୀ ଭାଷା ଆଇନ,୧୯୫୪ରେ ଖଞ୍ଜା ହୋଇଥିବା ଧାରା ୪-କ ଓଡ଼ିଆ ଜାତିର ଭାଷା ଅଧିକାରକୁ ଅକାମି କରିଛି । ସୁତରାଂ ତାକୁ ବିଲୁପ୍ତ କରାଯାଇ ସାନି ସଂଶୋଧନ ଦ୍ଵାରା ତାର ଉଲ୍ଲଙ୍ଘନକାରୀକୁ କଠିନ ଦଣ୍ଡବିଧାନର ବ୍ୟବସ୍ଥା କରାଯାଉ ବୋଲି ଭାଷା ଆନ୍ଦୋଳନର ସଭାପତିମଣ୍ଡଳୀ ଗତ ୯.୧୧.୨୦୧୮ ତାରିଖରେ ମୁଖ୍ୟମନ୍ତ୍ରୀଙ୍କୁ ଯେଉଁ ଚରମପତ୍ର ଦେଇଥିଲେ, ତାହା ସପକ୍ଷରେ ଜିଲ୍ଲା ଶାଖା ପକ୍ଷରୁ ଏହି ସ୍ମାରକପତ୍ର ପ୍ରଦାନ କରିଛନ୍ତି ଜିଲ୍ଲାର ବିଶିଷ୍ଟ ଜନନେତା, ପ୍ରକୃତିପ୍ରେମୀ ଓ ଭାଷାପ୍ରେମୀମାନେ ।

କେନ୍ଦ୍ରୀୟ ସଭାପତି ମଣ୍ଡଳୀର ସଦସ୍ୟ ସର୍ବଶ୍ରୀ କମଳଲୋଚନ ନାୟକ, ସୁଭାଷ ଚନ୍ଦ୍ର ପ୍ରଧାନ ଓ ଗିରିଜାକାନ୍ତ ମିଶ୍ର ତଥା ଭାଷାପ୍ରାଣ ବ୍ରହ୍ମାନନ୍ଦ ବେହେରା ଏବଂ ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଉପସ୍ଥିତିରେ ଜିଲ୍ଲାପାଳଙ୍କ ପକ୍ଷରୁ ଉପଜିଲ୍ଲାପାଳ ସ୍ମାରକପତ୍ର ଗ୍ରହଣ କରିଛନ୍ତି ।

କଳାପତାକା ଅଭିଯାନରେ ଯୋଗଦେଇ ଭାଷା ବନ୍ଦନାରେ ଅଂଶଗ୍ରହଣ କରିବା ସଙ୍ଗେ ସଙ୍ଗେ ସ୍ମାରକପତ୍ର ପ୍ରଦାନରେ ଅଗ୍ରଣୀ ଭୂମିକା ନିର୍ବାହ କରିଛନ୍ତି ପ୍ରାକ୍ତନ ବିଧାୟକ ଚିନ୍ମୟ ପ୍ରସାଦ ବେହୁରା, ଜନନେତା ରବୀନ୍ଦ୍ର କୁମାର ବେହେରା, ବିଶିଷ୍ଟ ପରିବେଶବିତ୍ ଉଦୟନାଥ ଚୌଧୁରୀ, କାଜଲ୍ ଚୌଧୁରୀ, ମୃତ୍ୟୁଞ୍ଜୟ ତ୍ରିପାଠୀ, ବସନ୍ତ କୁମାର ମଲ୍ଲିକ, ନିରଞ୍ଜନ ପରିଡ଼ା,ସଞ୍ଜୟ କୁମାର ମହାପାତ୍ର, ପ୍ରଭାତ ଦାସ,ସଞ୍ଜୟ କୁମାର ସାହୁ, ସଞ୍ଜୟ ରାଉତ ଓ ମୀର୍ ମୁର୍ସିଦ ପ୍ରମୁଖ । ଚିତ୍ରୋତ୍ତଳନ ଦାୟିତ୍ବ ନିର୍ବାହ କରିଛନ୍ତି ଆଶିଷ କୁମାର ବେହେରା ।

କେନ୍ଦ୍ରାପଡ଼ା ଜିଲ୍ଲାରେ ଅନୁଷ୍ଠିତ ଏହି ଅଭୂତପୂର୍ବ ପ୍ରଦର୍ଶନର କେତେକ ଫଟୋଚିତ୍ର ପ୍ରଦାନ କରିଛନ୍ତି ଆଶିଷ କୁମାର ବେହେରା ।

ସ୍ମାରକପତ୍ର ଦିଆସରିବା ପରେ ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ସମବେତ ଭାଷାପ୍ରେମୀମାନଙ୍କୁ ଆନ୍ଦୋଳନର ଗୁରୁତ୍ବ ଓ ଭବିଷ୍ୟତ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ ।