Posts tagged Subhas Chandra Pattanayak

ସୁଭାଷ ଚନ୍ଦ୍ର ପଟ୍ଟନାୟକ

ବିଧାନସଭାକୁ ପ୍ରତାରିତ ଓ ବିଭ୍ରାନ୍ତ କରିଥିବା ହେତୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତଥା ସଂସଦୀୟ ବ୍ୟାପାର ବିଭାଗ ମନ୍ତ୍ରୀ ବିକ୍ରମ ଆରୁଖ ବିଧାନସଭାର ସ୍ବାଧୀକାର ଭଙ୍ଗ କରିଛନ୍ତି ବୋଲି ଦର୍ଶାଇ ବିଧାନସଭା ନିଜ ମର୍ଯ୍ୟାଦା ରକ୍ଷା କରିବା ପାଇଁ ଏ ଉଭୟଙ୍କ ବିରୁଦ୍ଧରେ ବିହିତ କାର୍ଯ୍ୟାନୁଷ୍ଠାନ କରୁ ବୋଲି ୪. ୯. ୨୦୧୮ ତାରିଖ ସନ୍ଧ୍ୟାରେ ଏକ ସାମ୍ବାଦିକ ସମ୍ମିଳନୀରେ ମୁଁ ଦାବି ରଖିଥିଲି । ସେହି ସମ୍ମିଳନୀରେ ଡଃ କୁଳମଣି ନାୟକ,କମଳଲୋଚନ ନାୟକ,ପ୍ରମୋଦ କୁମାର ଦେବ,ଭବାନୀ ଶଙ୍କର ପରିଜା ଓ ସଂଜୀବ ପତ୍ରୀ ପ୍ରମୁଖ ଉପସ୍ଥିତ ଥିଲେ ।
ନିମ୍ନରେ ଉପସ୍ଥାପିତ ହେଲା ମୁଁ ଜାରିକରିଥିବା ପ୍ରେସ ବିବୃତ୍ତିର ନକଲ:

ଭୁବନେଶ୍ୱର , ୪. ୯. ୨୦୧୮
ଚଳିତ ବିଧାନସଭା ଅଧିବେଶନ ପାଇଁ ସରକାର ଯେଉଁ ସମସ୍ତ ଆଇନ ପ୍ରଣୟନ / ସଂଶୋଧନର ପ୍ରସ୍ତାବ ରଖିଛନ୍ତି ତହିଁରେ ଓଡିଶା ସରକାରୀ ଭାଷା ଆଇନ ସଂଶୋଧନପାଇଁ କୌଣସି ପ୍ରସ୍ତାବ ନାହିଁ । ଏହା ସାବ୍ୟସ୍ତ କରୁଛି କି, ସରକାରୀ ଭାଷା ଆଇନର ଉଦ୍ଦେଶ୍ୟ ପଣ୍ଡ କରିବା ପାଇଁ ତହିଁରେ ସଂଶୋଧନ ଘଟାଇବା ଓ ତାହା ବିରୁଦ୍ଧରେ ଭାଷା ଆନ୍ଦୋଳନର କଣ୍ଠରୋଧ କରିବାକୁ ତହିଁର ଦୁଇଜଣ କର୍ମକର୍ତ୍ତାଙ୍କୁ ପୋଷା ମନାଇ କଳାପତାକା ଅଭିଯାନ ସ୍ଥଗିତ ହୋଇଗଲା ବୋଲି ସେମାନଙ୍କ ମୁହଁରେ ମିଥ୍ୟା ପ୍ରଚାର କରି ଓଡ଼ିଶାର ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଚେଷ୍ଟା ହୋଇଛି । ଏହା ସରକାରଙ୍କ ଘୋର ଓଡ଼ିଆ ବିରୋଧୀ ମାନସିକତାର ପରିଚାୟକ ।

ଏହି ପ୍ରେକ୍ଷାପଟରେ ଚଳିତ ବିଧାନସଭା ଅଧିବେଶନ ନିଜ ଆଡୁ ଓଡିଶା ସରକାରୀ ଭାଷା (ସଂଶୋଧନ) ବିଧେୟକ, ୨୦୧୮ ପ୍ରତି ଦୃଷ୍ଟି ଦେଇ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ତଥା ତାଙ୍କ ତରଫରୁ ସେହି ବିଧେୟକକୁ ବିଧାନସଭାରେ ଉପସ୍ଥାପିତ ଓ ପାରିତ କରାଇଥିବା ମନ୍ତ୍ରୀ ବିକ୍ରମ ଆରୁଖଙ୍କ ବିରୁଦ୍ଧରେ ସ୍ବାଧୀକାର ଭଙ୍ଗ ସକାଶେ ବିହିତ କାର୍ଯ୍ୟାନୁଷ୍ଠାନ କରିବା ଆବଶ୍ୟକ । କାରଣ ତଦ୍ଦ୍ଵାରା ହିଁ ଓଡିଶା ବିଧାନସଭା ନିଜ ସମ୍ମାନ ନିଜେ ରକ୍ଷା କରିପାରିବ ।

ଏହି ବିବାଦୀୟ ବିଧେୟକର ‘ଉଦ୍ଦେଶ୍ୟ ଓ କାରଣ କଥନ’ରେ ସରକାର ଏହା ୨୬. ୧୨.୨୦୧୭ର କ୍ୟାବିନେଟ ପ୍ରସ୍ତାବ ଉପରେ ଆଧାରିତ ବୋଲି କହିଛନ୍ତି । ଏତଦ୍ଦ୍ଵାରା ସରକାର ଜାଣିଶୁଣି ବିଧାନସଭାକୁ ୧୪. ୩ . ୨୦୧୮ରେ ଗୃହୀତ ହୋଇଥିବା କ୍ୟାବିନେଟ ପ୍ରସ୍ତାବ ସମ୍ପର୍କରେ ଅନ୍ଧକାରରେ ରଖିଛନ୍ତି । ୨୬. ୧ ୨. ୨୦୧୭ର କ୍ୟାବିନେଟ ପ୍ରସ୍ତାବରେ ଓଡ଼ିଶା ସରକାରୀ ଭାଷା ଆଇନର ପରିସର ସଂକୁଚିତ କରି ଆଇନଟିର ମୂଳ ଉଦ୍ଦେଶ୍ୟକୁ ପଣ୍ଡ କରିବା କୌଶଳ ଖଞ୍ଜା ହୋଇଥିଲା । ବ୍ୟାପକଭାବେ ଓଡ଼ିଆରେ କାମ ନକଲେ କର୍ମଚାରୀ ତଥା ବିଭାଗକୁ ଦଣ୍ଡିତ କରାଯିବ ବୋଲି କୁହା ହୋଇଥିଲା । କର୍ମଚାରୀଙ୍କ ଭୁଲ ହେତୁ ବିଭାଗକୁ ଦଣ୍ଡିତ କରାଗଲେ ତାହା ଟିକସଦାତା ଜନସାଧାରଣଙ୍କୁ ଦଣ୍ଡିତ କରିବା ସହ ସମାନ ବୋଲି ଆମ ପକ୍ଷରୁ ପ୍ରତିବାଦ କରାଗଲା ପରେ ୧୪. ୩ . ୨୦୧୮ରେ ପୁନର୍ବାର କ୍ୟାବିନେଟ ବସି ପ୍ରସ୍ତାବ କରିଥିଲେ କି, ଭାଷା ଆଇନର ଉଲ୍ଲଙ୍ଘନ ପାଇଁ କୌଣସି ବିଭାଗକୁ ଦଣ୍ଡିତ କରାଯିବ ନାହିଁ ; କେବଳ କର୍ମଚାରୀ ଓ ପଦାଧିକାରୀଙ୍କ ଦଣ୍ଡିତ କରାଯିବ ଏବଂ ଏଥିପାଇଁ ତୁରନ୍ତ ଭାଷା ଆଇନ ସଂଶୋଧିତ ହେବ ।

ଉଲ୍ଲେଖନୀୟ ଯେ, ଏହି ପ୍ରସ୍ତାବିତ ସଂଶୋଧନର ଉଦ୍ଦେଶ୍ୟ ଓ କାରଣ ମଧ୍ୟ ଏହି ୧୪. ୩ . ୨୦୧୮ କ୍ୟାବିନେଟ ବୈଠକରେ ଧାର୍ଯ୍ୟ କରାହୋଇ ଯେହେତୁ ଆଇନଟିର ଉଲ୍ଲଙ୍ଘନ ପାଇଁ ଦଣ୍ଡବିଧାନର ବ୍ୟବସ୍ଥା ନାହିଁ, ସେହେତୁ ଏହାକୁ କେହି ମାନୁନାହାନ୍ତି ବୋଲି କୁହା ହୋଇଥିଲା । ଅଥଚ ଗତ ବିଧାନସଭାର ଶେଷ ଦିନରେ ଆଗତ ଓ ପାରିତ ହୋଇଥିବା ଭାଷା ଆଇନ ସଂଶୋଧନରେ ଏହି ଗୁରୁତ୍ବପୂର୍ଣ କ୍ୟାବିନେଟ ନିଷ୍ପତ୍ତିକୁ ସମ୍ପୂର୍ଣ ଅନଧିକୃତ ଭାବେ କବର ଦିଆଯାଇ ୨୬.୧୨. ୨୦୧୭ର କ୍ୟାବିନେଟ ପ୍ରସ୍ତାବକୁ ସଂଶୋଧନର ‘ଉଦ୍ଦେଶ୍ୟ ଓ କାରଣ କଥନ’ର ଭିତ୍ତି କରାଯାଇଛି ଓ ତାହାକୁ ମଧ୍ୟ ବିକୃତ କରାଯାଇଛି । ଉଦାହରଣତଃ , ଏହି କ୍ୟାବିନେଟ୍ ପ୍ରସ୍ତାବରେ ଓଡ଼ିଆରେ କାମ ନକରିବା କର୍ମଚାରୀ ଓ ବିଭାଗକୁ ଦଣ୍ଡିତ କରାଯିବ ବୋଲି କୁହା ହୋଇଥିଲା ବେଳେ, ଉପସ୍ଥାପିତ ଓ ପାରିତ ହୋଇଥିବା ବିଧେୟକରେ କର୍ମଚାରୀ କିମ୍ବା ବିଭାଗକୁ ଦଣ୍ଡିତ କରାଯିବ ବୋଲି ଉଲ୍ଲେଖ ଅଛି । କ୍ୟାବିନେଟ ପ୍ରସ୍ତାବର ଏପରି ବିକୃତିକରଣକରିବା ଓ ସବୁଠୁ ଗୁରୁତ୍ବପୂର୍ଣ ତଥ୍ୟ ଗୋପନ ରଖି ବିଧାନସଭାକୁ ବିଧାନ ପ୍ରଣୟନ କ୍ଷେତ୍ରରେ ବିଭ୍ରାନ୍ତ କରିବା ଯଦି ଓଡିଶା ବିଧାନସଭାର ସ୍ବାଧୀକାର ଭଙ୍ଗ ଭାବେ ବିବେଚିତ ନ ହୁଏ, ବୁଝିବାକୁ ହେବ ଯେ, ପ୍ରଶାସନିକ କଳ ପାଖରେ ଆମ ରାଜନୈତିକ ଵିଜ୍ଞତା ବାମନ ହୋଇଗଲାଣି।

ଆମେ ଦାବି କରୁଛୁ କି,

(କ) ରାଜ୍ୟ କ୍ୟାବିନେଟ୍ ଗ୍ରହଣ କରିଥିବା ପ୍ରସ୍ତାବକୁ ଆଇନ ସଂଶୋଧନର ଚିଠା ପ୍ରସ୍ତୁତିରେ ଏପରି ସ୍ଵେଚ୍ଛାଚାରର ଶରବ୍ୟ କରିଥିବା ସମ୍ପୃକ୍ତ ପଦାଧିକାରୀଙ୍କୁ କଠିନ ଦଣ୍ଡ ଦିଆଯାଉ;
(ଖ) ନିଜେ କ୍ୟାବିନେଟ ବୈଠକରେ ଉପସ୍ଥିତ ଥାଇ ଗୃହୀତ କ୍ୟାବିନେଟ ପ୍ରସ୍ତାବକୁ କବର ଦିଆଯାଇଥିବା ଓ ବିକୃତ କରାଯାଇଥିବା ଜାଣି ମଧ୍ୟ ତାହାକୁ ସରକାରୀ ଭାଷା ଆଇନର ସଂଶୋଧନର ଭିତ୍ତି କରାଇ ବିଧାନସଭାକୁ ପ୍ରତାରିତ ଓ ବିଭ୍ରାନ୍ତ କରିଥିବା ମୁଖ୍ୟମନ୍ତ୍ରୀ ଓ ସାଂସଦୀୟ ବିଭାଗ ମନ୍ତ୍ରୀଙ୍କୁ ସ୍ବାଧୀକାର ଭଙ୍ଗ ଅଭିଯୋଗର ସମ୍ମୁଖୀନ କରାଯାଉ ଓ
(ଗ) ଓଡିଶା ସରକାରୀ ଭାଷା (ସଂଶୋଧନ)ଆଇନ, ୨୦୧୮କୁ ବିଲୋପ କରି, ଭାଷା ଆନ୍ଦୋଳନର ଅଧ୍ୟକ୍ଷ ଦେଇଥିବା ପ୍ରସ୍ତାବ ଅନୁସାରେ ସାନି ସଂଶୋଧନ କରାଯାଉ ।

http://bhashaandolan.com/assembly-misled-by-chief-minister/ ସରଣୀରେ ଏହା ଉପଲଭ୍ୟ ।

ଏହି ସାମ୍ବାଦିକ ସମ୍ମିଳନୀରେ ମୁଁ ରଖିଥିବା ବିବୃତ୍ତି NNS Odia Live ନାମକ ଏକ ୱେବ ଚ୍ଯାନେଲ ୟୁ ଟ୍ୟୁବ ମାଧ୍ୟମରେ ସିଧା ପ୍ରସାରଣ କରିଥିଲା । ସରକାରୀ ଚାପରେ ଏହାକୁ ସମ୍ପୃକ୍ତ ଚ୍ୟାନେଲଟି ବିଲୁପ୍ତ କରିବାକୁ ଯାଉଛି ବୋଲି ଖବର ପାଇ ମୁଁ ତାକୁ ନକଲ କରି ରଖିଦେଇଥିଲି । ଏହି ନକଲକୁ ମୁଁ ଏଠାରେ ଉପସ୍ଥାପିତ କରୁଛି –

ଏତଦ୍ଦୃଷ୍ଟିରୁ ଏହାହିଁ କୁହାଯାଇପାରେ ଯେ, ଭାଷା ଆଇନକୁ ନେଇ ସରକାରଙ୍କ ବେଆଇନ ଆଚରଣ ବିଧାନସଭା ସଦସ୍ୟମାନଙ୍କ ଅବଗତିରେ ଥିଲା । ଅଥଚ ସେମାନେ ଏ ସମ୍ପର୍କରେ ପାଟି ଫିଟାଇଲେ ନାହିଁ । (କ୍ରମଶଃ)

୫.୮.୨୦୧୯

ଯଦି ବିଧାନସଭାର ମାନ୍ୟବର ସଦସ୍ୟମାନେ କହନ୍ତି ଯେ, ଭାଷା ଆନ୍ଦୋଳନକୁ ନେଇ ଅର୍ଥମନ୍ତ୍ରୀଙ୍କ ଭୂମିକା ସନ୍ଦେହଘେରରେ ବୋଲି ଗଣମାଧ୍ୟମରେ ପ୍ରକାଶ ପାଇଥିବା ଖବର ସେମାନେ ଜାଣନ୍ତି ନାହିଁ ତେବେ ଧରିନେବାକୁ ପଡ଼ିବ ଯେ ରାଜ୍ୟରେ ରାଜନୈତିକ ପ୍ରାସଙ୍ଗିକତା ଥିବା ବିଷୟ ପ୍ରତି ସେମାନେ ସ୍ପୃହା ରଖନ୍ତିନାହିଁ । କିନ୍ତୁ ବସ୍ତୁତଃ ସରିଯାଇଥିବା ବିଧାନସଭାର ସବୁ ସଦସ୍ୟ ଭାଷା ଆନ୍ଦୋଳନ ପ୍ରତି ନିଘା ରଖିଥିଲେ ଓ ବିଧାନସଭା ବିତର୍କରେ ବହୁବାର ଏହାର ଝଲକ ଦେଖିବାକୁ ମିଳୁଥିଲା । ତେଣୁ ଅର୍ଥମନ୍ତ୍ରୀଙ୍କ ଆଚରଣ ପ୍ରତି ସନ୍ଦେହ ଆରୋପ କରି “ଭାଷା ଆନ୍ଦୋଳନ: ଅର୍ଥମନ୍ତ୍ରୀଙ୍କ ଭୂମିକା ସନ୍ଦେହଘେରରେ” ଶୀର୍ଷକରେ ୨୮ ଅଗଷ୍ଟ ୨୦୧୮ ରେ ପ୍ରକାଶିତ ରିପୋର୍ଟ ସେମାନେ ଅବଗତ ଥିବା ସ୍ଵାଭାବିକ ଥିଲା ।

ପ୍ରାସଙ୍ଗିକତା ଦୃଷ୍ଟିରୁ ତାହାକୁ ଉଦ୍ଧୃତ୍ତି ରୂପେ ସ୍ଥାନିତ କରାଗଲା-
“ଓଡ଼ିଆ ଭାଷାରେ ଓଡ଼ିଶାର ପରିଚାଳନା ଅପରିହାର୍ଯ୍ୟ କରିବା ପାଇଁ ଓଡିଶା ସରକାରୀ ଭାଷା ଆଇନର ଉପଯୁକ୍ତ ସଂଶୋଧନ ସକାଶେ ଚାଲିଥିବା କଳାପତାକା ଅଭିଯାନ ଯେତେବେଳେ ଆହୁରି ସଘନ ହେବା ଆବଶ୍ୟକ ଥିଲା, ସେତେବେଳେ ଏହି ଅଭିଯାନ ସହ ଜଡ଼ିତ ଦୁଇଜଣ ବ୍ୟକ୍ତି – ପ୍ରଦ୍ୟୁମ୍ନ ଶତପଥୀ ଓ ପବିତ୍ର ମହାରଥା – ଅଭିଯାନ ଅନିର୍ଦ୍ଦିଷ୍ଟ କାଳ ଯାଏଁ ବନ୍ଦ ରହିଲା ବୋଲି ୧୬. ୭. ୨୦୧୮ ସନ୍ଧ୍ୟାରେ ଏକ ପ୍ରେସ ବିବୃତ୍ତିରେ ଘୋଷଣା କଲେ । ସେମାନଙ୍କ କାମ ଥିଲା ପତାକା ଧରିବାକୁ ପ୍ରତିଦିନ ଚାରିଜଣ ସାଥୀ ଯୋଗେଇବା ଓ ଗଣମାଧ୍ୟମରେ ତଥା ସରକାରୀ ସ୍ତରରେ ପ୍ରସଙ୍ଗ ଉପସ୍ଥାପନା ତଥା ଆଲୋଚନା କାଳରେ ଅଧ୍ୟକ୍ଷ ସୁଭାଷ ଚନ୍ଦ୍ର ପଟ୍ଟନାୟକଙ୍କୁ ସହଯୋଗ କରିବା, ଯାହା ସେମାନେ ନିଷ୍ଠାର ସହ କରିଆସିଥିଲେ । ଅଭିଯାନ ବନ୍ଦ ରହିଲା ବୋଲି ଘୋଷଣା କରିବା ପାଇଁ ସେମାନେ ଅଧିକୃତ ନ ଥିଲେ । ଫଳରେ ମାତୃଭାଷାଭକ୍ତ ଓଡ଼ିଆ ଜାତି ସେମାନଙ୍କ ଏହି ଅନଧିକୃତ ଘୋଷଣାକୁ ପ୍ରତ୍ୟାଖ୍ୟାନ କରିଛି ଓ କଳାପତାକା ଅଭିଯାନ ଅଧିକ ଶାଣିତ ଆବେଗରେ ଯଥାରୀତି ଚାଲିଛି ।

କିନ୍ତୁ ଶତପଥୀ ଓ ମହାରଥା ଜାରିକରିଥିବା ପ୍ରେସ ବିବୃତ୍ତି ଜନସାଧାରଣଙ୍କ ଦ୍ଵାରା ପ୍ରତ୍ୟାଖ୍ୟାତ ହୋଇଯାଇଥିବା ହେତୁ ଓ କଳାପତାକା ଅଭିଯାନ ବନ୍ଦ ରଖିବାକୁ ସେମାନେ ଅବକାରୀ ଓ ଅର୍ଥ ବିଭାଗଦ୍ଵୟର ମନ୍ତ୍ରୀ ଶଶିଭୂଷଣ ବେହେରାଙ୍କୁ ଦେଇଥିବା ପ୍ରତିଶ୍ରୁତି ଅକାମି ହୋଇଯାଇଥିବା ହେତୁ ତାଙ୍କ ସ୍ତ୍ରୀ ଓ ଝିଅଙ୍କ ଜୀବନ ବିପଦାପନ୍ନ ବୋଲି ସାମାଜିକ ଗଣମାଧ୍ୟମ ଫେସ ବୁକ ପୃଷ୍ଠାରେ ଉଲ୍ଲେଖ କରି ପବିତ୍ର ମହାରଥା ମନ୍ତ୍ରୀ ଶ୍ରୀ ବେହେରାଙ୍କ ଭୂମିକାକୁ ସନ୍ଦେହ ଘେରକୁ ଟାଣି ଆଣିଛନ୍ତି ।

ଏହି ପ୍ରେକ୍ଷାପଟରେ ମନ୍ତ୍ରୀ ଶ୍ରୀ ବେହେରା ନିଜ ସ୍ଥିତି ସ୍ପଷ୍ଟ କରିବାକୁ ଭାଷା ଆନ୍ଦୋଳନର ଅଧ୍ୟକ୍ଷ ସୁଭାଷ ଚନ୍ଦ୍ର ପଟ୍ଟନାୟକ ତାଙ୍କୁ ଏକ ପତ୍ର ପ୍ରେରଣ କରିଛନ୍ତି ।

ତହିଁରେ ସେ ଲେଖିଛନ୍ତି, “ଉପରୋକ୍ତ ଦୁଇଜଣ ବ୍ୟକ୍ତି ଏହାକୁ (କଳାପତାକା ଅଭିଯାନକୁ) ସ୍ଥଗିତ ରଖିବା ପାଇଁ ଯେହେତୁ ଆପଣଙ୍କ ନାମ ବ୍ୟବହାର କରିଥିଲେ , ଅଥଚ ଗତ କ୍ୟାବିନେଟ ବୈଠକରେ ଆପଣ ସେମାନଙ୍କୁ ଦେଇଥିବା ପ୍ରତିଶ୍ରୁତିର କୌଣସି ଝଲକ ବି ଦେଖିହେଲାନାହିଁ, ସେ ହେତୁ ଆପଣଙ୍କ ନାମ ସେମାନେ ଅଧିକୃତ ଭାବେ ବ୍ୟବହାର କରିଥିଲେ କି ଅନଧିକୃତ ଭାବେ ତାହା ଜାଣିବା ପାଇଁ ସେମାନେ ଜାରିକରିଥିବା ପ୍ରେସ ବିବୃତ୍ତିର ନକଲ ମୁଁ ଏଥି ସହ ସଂଯୁକ୍ତ କଲି । ମୁଁ ଆଶା କରୁଛି ଆପଣ ଏହା ଅନୁଧ୍ୟାନ କରିବେ ଓ ନିଜ ଭୂମିକା ସ୍ପଷ୍ଟ କରି ମୋତେ ଆପଣଙ୍କ ଉତ୍ତର ଦେବେ । ଆପଣ ଯେଉଁ ଉତ୍ତର ଦେବେ ତାହା ମୁଁ ଓଡ଼ିଶାର ଜନସାଧାରଣଙ୍କ ସମ୍ମୁଖରେ ରଖିବି ଓ ଯଦି କୌଣସି ଉତ୍ତର ନ ଦିଅନ୍ତି ତାହା ବି ମୁଁ ଜନସାଧାରଣଙ୍କୁ ଜଣାଇବି । କାରଣ ପରୋକ୍ଷରେ ପବିତ୍ର ମହାରଥା ଏପରି ଏକ ଧାରଣା ସୃଷ୍ଟି କରିଛନ୍ତି ଯହିଁରୁ ଜଣା ପଡୁଛି ସତେ ଯେମିତି କଳାପତାକା ଅଭିଯାନ ବନ୍ଦ କରିବା ପାଇଁ ମୋଟା ଧରଣର ଆର୍ଥିକ ପ୍ରଲୋଭନ ଦ୍ଵାରା ତାଙ୍କୁ ପ୍ରଲୋଭିତ କରାଯାଇଥିଲା । ଏହା ଏକ ଅତ୍ୟନ୍ତ ଦୁଃଖଦାୟକ ବିଭାବନା । ଆମ ରାଜ୍ୟର କୌଣସି ମାନ୍ୟବର ମନ୍ତ୍ରୀ ଏପରି ଏକ ବିଭାବନାର ନାଭିକେନ୍ଦ୍ରରେ ସଂସ୍ଥିତ ହେବା – ତାଙ୍କ ଜ୍ଞାତସାରରେ ହେଉ ବା ଅଜ୍ଞାତରେ – ଆଦୌ କାମ୍ୟ ନୁହେଁ ।”

ପ୍ରେସ ବିବୃତ୍ତିଟିକୁ ଅନୁଧ୍ୟାନ କରିବାକୁ ଶ୍ରୀ ବେହେରାଙ୍କୁ ଅନୁରୋଧ କରି ଶ୍ରୀ ପଟ୍ଟନାୟକ ତାଙ୍କଠାରୁ ତିନି ଗୋଟି ପ୍ରଶ୍ନର ଉତ୍ତର ଚାହିଁଛନ୍ତି । ସେଗୁଡିକ ହେଲା :
(୧) ଏଥିରେ କୁହାହୋଇଥିବା ପରି ବିଧାନସଭାରେ ଭାଷା ଆଇନର ନିର୍ଭୁଲ ସଂଶୋଧନ ପାଇଁ ପ୍ରତିଶ୍ରୁତି ଆପଣ ଦେଇଥିଲେ କି ?
(୨) ଏପରି ପ୍ରତିଶ୍ରୁତି ଦେବାକୁ ଆପଣଙ୍କୁ ଭାଷା ଆଇନର ଦାୟିତ୍ବରେ ଥିବା ମାନ୍ୟବର ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ କି ?
(୩) ଯଦି ଦେଇଥିଲେ, ଗତ କ୍ୟାବିନେଟ୍ ବୈଠକରେ ତାହା ପ୍ରସ୍ତାବିତ ନ ହେବାର କାରଣ କଣ?

ଅର୍ଥ ମନ୍ତ୍ରୀଙ୍କ ଉତ୍ତର ଯେତେ ଶୀଘ୍ର ମିଳେ ସେତେ ଭଲ ।”

ଲେଖାଟିର ସାରଣୀ: http://bhashaandolan.com/finance-minister-asked-to-clarify/

ଅର୍ଥମନ୍ତ୍ରୀଙ୍କ ବିରୁଦ୍ଧରେ ଏହି ଆହ୍ଵାନକାରୀ ଅଭିଯୋଗ ଯଥେଷ୍ଟ ଥିଲା ଆମ ବିଧାନସଭାର ସଦସ୍ୟମାନଙ୍କୁ ବିଷୟଟି ଉପରେ ବିତର୍କ କରିବା ପାଇଁ । କାରଣ, ପ୍ରସଙ୍ଗ ଥିଲା ଆମ ଜାତିର ଭାଷା, ଯେଉଁ ଭାଷା ଓଡ଼ିଶା ପ୍ରଦେଶକୁ ଜନ୍ମ ଦେଇଛି । ଦୁଃଖର କଥା ସେମାନେ ତାହା କଲେ ନାହିଁ (କ୍ରମଶଃ)

୪.୭.୨୦୧୮

    ପବିତ୍ର ମହାରଥା: ସୌମ୍ୟ ନାୟକଙ୍କ ଠାରୁ ସତୀଶ ମିଶ୍ରଙ୍କ ଯାଏଁ

ସୁଭାଷ ଚନ୍ଦ୍ର ପଟ୍ଟନାୟକ

ମୁଁ ଏହି ଆଲୋଚନାର ପ୍ରଥମ କିସ୍ତିରେ କହିଛି କି, ଭାଷା ଆନ୍ଦୋଳନକୁ ସମଗ୍ର ଓଡ଼ିଶାକୁ ପରିବ୍ୟାପ୍ତ କରିବା ସକାଶେ ଆମମାନଙ୍କ ଗସ୍ତ ପାଇଁ ଆର୍ଥିକ ଆବଶ୍ୟକତା ଥିବା ହେତୁ ଆମେ ଚିନ୍ତା କରିଥିଲୁ ଏକ ସ୍ମରଣିକା ପ୍ରକାଶ କରି ତହିଁରେ ବିଜ୍ଞାପନ ପାଇଁ ସ୍ଥାନ ବିନିମୟରେ କିଛି ଅର୍ଥ ଉପାର୍ଜନ କରିବୁ ଓ ସେହି ଅର୍ଥ ଉପଯୋଗ କରି ଆନ୍ଦୋଳନଟିକୁ ରାଜ୍ୟ ତମାମ ପ୍ରସାରିତ କରିବୁ । ତୁଷାରକାନ୍ତ ଶତପଥୀ ଓ ପ୍ରଦ୍ୟୁମ୍ନ ଶତପଥୀ ଏଥିପାଇଁ ଯଥାକ୍ରମେ ଭାରତୀୟ ଷ୍ଟେଟ ବ୍ୟାଙ୍କ ଓ ଅଚ୍ୟୁତ ସାମନ୍ତଙ୍କ ଠାରୁ ବିଜ୍ଞାପନ ପାଇଁ ସମର୍ଥ ନ ହେବା ପରେ ପବିତ୍ର ମୋତେ କହିଲେ କି, ମୁଁ ଯଦି ଜଣେ ବ୍ୟକ୍ତିଙ୍କୁ କହିପାରନ୍ତି ତେବେ କେନ୍ଦ୍ର ସରକାରଙ୍କ ସୂତ୍ରରୁ ଯଥେଷ୍ଟ ବିଜ୍ଞାପନ ମିଳନ୍ତା । ମୁଁ ସେ ବ୍ୟକ୍ତିଙ୍କୁ ନ ଜାଣିଥିଲେ ମଧ୍ୟ ଆମ ଆନ୍ଦୋଳନର ସ୍ଵାର୍ଥ ଦୃଷ୍ଟିରୁ ପବିତ୍ରଙ୍କ ସାଥିରେ ଯାଇ ତାଙ୍କୁ କହିଲି ଓ ସେ ସାହାଯ୍ୟ କରିବାକୁ ଦୃଢ଼ ପ୍ରତିଶ୍ରୁତି ଦେଲେ ।

ପବିତ୍ର ନିଜ ମାଲିକାନାରେ ଥିବା ଶବ୍ଦସ୍ପର୍ଶ ଦ୍ଵାରା ‘ଭାଷା ପାଇଁ ଗଣ ଓ ଗଣମାଧ୍ୟମ’ ଶୀର୍ଷକ ଆମ ସ୍ମରଣିକାଟିକୁ ପ୍ରକାଶ କରି ତାହା ପାଇଁ ଆସିଥିବା ସମସ୍ତ ବିଜ୍ଞାପନ ଆୟ ତୋଷରପାତ କରିଛନ୍ତି ଓ ଏଥିପାଇଁ ନାନାବିଧ ଜାଲିଆତି କରିଛନ୍ତି । ଏହା ଧରା ପଡିଲା ପରେ ମୁଁ ତାଙ୍କୁ କୈଫିୟତ ମାଗିବାରୁ ସେ ଅନ୍ଦୋଲନ ପାଇଁ ୮ ଲକ୍ଷ ଟଙ୍କା କରଜ କରିଛନ୍ତି ଓ ତାହା ଭାଷା ଅନ୍ଦୋଲନ ତାଙ୍କୁ ନ ଦେଲେ ପତ୍ନୀ ଓ ପିଲା ସହ ଆତ୍ମହତ୍ୟା କରିବେ ବୋଲି କହି, କୌଣସି ହିସାବ ନ ଦେଇ, ଏକ ନାହିଁନଥିବା ବିଭ୍ରାନ୍ତି ସୃଷ୍ଟି କରିଛନ୍ତି ।

ଉଲ୍ଲେଖନୀୟ ହେଲା, ଏହି ଅପରାଧରେ ପବିତ୍ରଙ୍କ ସହ ହାତ ମିଳାଇଛନ୍ତି ପ୍ରଦ୍ୟୁମ୍ନ ଶତପଥୀ । ଏକ ବଡ଼ ପରିମାଣର ସୁପାରି ବିନିମୟରେ ଭାଷା ଆନ୍ଦୋଳନକୁ ଭାଙ୍ଗିଦେବାକୁ ଏମାନେ ତଦାନୀନ୍ତନ ଅର୍ଥମନ୍ତ୍ରୀଙ୍କୁ ବଚନ ଦେଇଥିବା ଓ ତଦନୁଯାୟୀ କାମ କରିବାକୁ ଯାଇ, ଭାଷା ଆନ୍ଦୋଳନ ବନ୍ଦ ରହିଲା ବୋଲି ୧୬.୭.୨୦୧୮ ସନ୍ଧ୍ୟାରେ ସମ୍ପୂର୍ଣ ଅନଧିକୃତ ଭାବେ ମିଥ୍ୟା ପ୍ରଚାର କରିଥିବା ବେଳେ ପ୍ରଦ୍ୟୁମ୍ନ ଶତପଥୀ ଆଉ ପାହାଚେ ଆଗେଇ ଯାଇ ୨୦୦୮ରୁ ଦୀର୍ଘ ଦଶ ବର୍ଷ କାଳ ଘରେ ବସିରହିଥିବା ପତ୍ନୀଙ୍କୁ ସେହି ଏକା ଅର୍ଥମନ୍ତ୍ରୀ ଶଶୀଭୂଷଣ ବେହେରାଙ୍କ ପ୍ରଭାବାଧୀନ ବାଲିପାଟଣା କଲେଜକୁ ବଦଳି କରି ନିୟମିତ କରାଇବା ପ୍ରକ୍ରିୟାରେ ପ୍ରାୟ କୋଟିଏ ଟଙ୍କାର ଆର୍ଥିକ ଆୟର ବାଟ ଫିଟାଇଛନ୍ତି ।

ଭାଷା ଆନ୍ଦୋଳନକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୁଦ୍ଧରେ ଏକ ରାଜନୈତିକ ଅସ୍ତ୍ର ଭାବେ ବ୍ୟବହାର କରିବା ପାଇଁ କେନ୍ଦ୍ରୀୟ କ୍ଷମତାରେ ଥିବା ବିଜେପି ପବିତ୍ରଙ୍କ ମାଧ୍ୟମରେ କେନ୍ଦ୍ରୀୟ ବିଜ୍ଞାପନର ପରଦା ଉହାଡ଼ରେ ଚେଷ୍ଟା କରୁଥିଲା ବୋଲି ସତୀଶ ମିଶ୍ର ତାଙ୍କ ଟିଭି ଚ୍ୟାନେଲରେ ଯେଉଁ ଉଚ୍ଚାରଣ ରଖିଛନ୍ତି ତାହା ବିଚାର ସାପେକ୍ଷ । କିନ୍ତୁ କଳା ପତାକା ଅଭିଯାନ ସ୍ଥଗିତ ରହିଲା ବୋଲି ଏ ଉଭୟେ ଓ ସେମାନଙ୍କ କରତଳିଆମାନେ ଯେଉଁ ପ୍ରଚାର କରିଥିଲେ ତାହା ଯେ ଥିଲା ଅମୂଳକ ଓ ମନଗଢ଼ା ମିଥ୍ୟା ଏବଂ ସମ୍ପୂର୍ଣ ମନ୍ଦ ଉଦ୍ଦେଶ୍ୟ ପ୍ରଣୋଦିତ ତାହା ସତୀଶବାବୁଙ୍କ ଉପସ୍ଥାପନା ପ୍ରଦର୍ଶିତ କରିଛି , କାରଣ ତହିଁରେ ଅଛି କଳା ପତାକା ଅଭିଯାନ ବନ୍ଦ ନ ରହି ଦୃଢ଼ ଭାବେ ଚାଲିଥିବାର କ୍ୟାମେରା ତୋଳିଥିବା ଚିତ୍ର ।
ଏବେ ଏହା ଦେଖାଯାଉ –

ଆର୍ଥିକ ଅପରାଧୀଙ୍କ ଗୋଠ ଗଠନ : ବିପଦରେ ଭାଷା ଆନ୍ଦୋଳନ
(୨୦.୯.୨୦୧୮ରେ orissamatters॰comରେ ପ୍ରକାଶିତ
Corrupt fellows combine:Bhasha Andolan at the crossroadsର ଓଡ଼ିଆ ରୂପାନ୍ତର)

ସୁଭାଷ ଚନ୍ଦ୍ର ପଟ୍ଟନାୟକ

ମୁଁ ଯେତେବେଳେ ମୋ ପରିସୃଷ୍ଟ ନୀରବ କଳା ପତାକା ପଦ୍ଧତ୍ତି ଭିତ୍ତିରେ ଭାଷା ଆନ୍ଦୋଳନ ପ୍ରତିଷ୍ଠା କଲି ସେତେବେଳେ ମୋର ବିଶ୍ଵସ୍ତ ଅନୁଚର ବନିଥିବା ପବିତ୍ର ମହାରଥା ଯେ ଜାଲିଆତି, ଅର୍ଥ ତୋଷରପାତ ଓ ଆପରାଧିକ ବିଶ୍ଵାସଘାତକତା ପରି ଆର୍ଥିକ ଅପରାଧ କରି ଭାଷା ଆଂଦୋଳନର ସାଙ୍ଗଠନିକ ବିସ୍ତାର ପାଇଁ ସୃଷ୍ଟି କରାହୋଇଥିବା ବହୁ ଲକ୍ଷ ଟଙ୍କା ହଡଫ କରିବେ ଓ ଆମ ତିନିଜଣ କର୍ମକର୍ତ୍ତାଙ୍କ ମଧ୍ୟରୁ ଅନ୍ୟତମ ସଦସ୍ୟ ପ୍ରଦ୍ୟୁମ୍ନ ଶତପଥୀ ଏହି ଅପରାଧକୁ ଢାଙ୍କୁଣୀ ଦେବା କାମ କରିବସିବେ ତାହା ମୋର କଲ୍ପନା ବାହାରେ ଥିଲା ।

ଏହି ଜଘନ୍ୟ ଅପରାଧ ଅବଗତ ହେବା ପରେ ଭାଷା ଆଂଦୋଳନର ପ୍ରତିଷ୍ଠାତା ଭାବେ ମୁଁ ପବିତ୍ରଙ୍କୁ ସେହି ଟଙ୍କାର ଏବଂ ସେ କରିଥିବା ଖର୍ଚ୍ଚାଦିର ସବିଶେଷ ହିସାବ ମାଗିଲି, ଯାହା ସେ ଦେଲେନାହିଁ । ପ୍ରଦ୍ୟୁମ୍ନ ଶତପଥୀ ତାଙ୍କ ସହ ହାତ ମିଳାଇଲେ । ଭାଷା ଆଂଦୋଳନର ଅଧ୍ୟକ୍ଷ ଭାବେ ମୁଁ ଏହି ଅପରାଧ ଉପରେ ପୋଲିସକୁ ଅବଗତ କରାଇଲି । ଭାଷା ଆନ୍ଦୋଳନ ସହ ଜଡ଼ିତ ସୌମ୍ୟରଞ୍ଜନ ନାୟକ ନାମକ ଜଣେ ସମ୍ବାଦିକତା ଛାତ୍ର, ପବିତ୍ରଙ୍କ ଜାଲିଆତି ଓ ଅର୍ଥ ତୋଷରପାତର ଜୀବନ୍ତ ସଞ୍ଚାରଣ କଲେ ସାମାଜିକ ଗଣମାଧ୍ୟମ ଫେସବୁକରେ ଯାହାକୁ କି ଅନ୍ୟ କେତେକ ଗଣମାଧ୍ୟମ ଉପଯୋଗ କରିଥିଲେ ।

ଏହି ଦୁଇ ଅସାଧୁ ବ୍ୟକ୍ତି ସେତେବେଳେ ମୁଖ୍ୟମନ୍ତ୍ରୀଙ୍କ ନିକଟତମ ଥିବା ଅର୍ଥମନ୍ତ୍ରୀ ଶଶିଭୂଷଣ ବେହେରାଙ୍କ ସହ ଗୋପନ ସଂଯୋଗ ସ୍ଥାପନ କରି ଭାଷା ଆନ୍ଦୋଳନକୁ ଭାଙ୍ଗିବା ପାଇଁ ପ୍ରତିଶ୍ରୁତି ପ୍ରଦାନ କରିଥିଲେ । ଶୁଣିବା କଥା, ଏମାନେ ଅନ୍ୟ ସହକର୍ମୀମାନଙ୍କୁ କାବୁ କରିବା ପାଇଁ ପ୍ରଚୁର ସୁପାରି ଓ ବ୍ୟକ୍ତିଗତ ଆର୍ଥିକ ମୁନଫା ବି ହାସଲ କରିଥିଲେ । ଯାହା ଦେଖାଗଲା, ସାଙ୍ଗରେ ଆଉ କେଇଜଣ କାବୁକରା ସହଯୋଗୀଙ୍କୁ ଧରି ଏମାନେ ସମ୍ପୂର୍ଣ ଅବୈଧ ଓ ଅନଧିକୃତ ଭାବେ ୧୬.୭.୨୦୧୮ ସନ୍ଦ୍ୟାରେ ଭାଷା ଆନ୍ଦୋଳନ ନିଷ୍ପତ୍ତିକ୍ରମେ ପରବର୍ତ୍ତୀ ବିଧାନସଭା ଅଧିବେଶନ ପର୍ଯ୍ୟନ୍ତ କଳାପତାକା ଅଭିଯାନ ବନ୍ଦ ରହିଲା ବୋଲି ଘୋଷଣା କଲେ । ସେହିଦିନ ପବିତ୍ର ମହାରଥା ଆନ୍ଦୋଳନ ଆୟବ୍ୟୟର ହିସାବ ଦେବା କଥା ଥିଲା । ସେ ବାତାବରଣ ଆଉ ରହିଲା ନାହିଁ । ଏହି ଜଘନ୍ୟ ଅର୍ଥନୈତିକ ଅପରାଧ ବିରୁଦ୍ଧରେ ମୁଁ ରାଜଧାନୀ ଥାନାରେ ଏତଲା ଦେଲି । ସରକାରଙ୍କ ସହ ବୁଝାବଣା ହେତୁ ରାଜନୈତିକ ଚାପ ପଡ଼ି ସେ ଏତଲା ଉପରେ ଶୋଇ ରହିଲା ପୋଲିସ ।

ଓଡ଼ିଶାର ଜଣେ ତୀକ୍ଷ୍ନ ସାମାଜସଚେତନ ସାମ୍ବାଦିକ ସତୀଶ ମିଶ୍ର ପ୍ରତିଜ୍ଞା ଟିଭିରେ ନିଜସ୍ଵ ଲୋକପ୍ରିୟ ‘ଛାଇ’ ଧାରାବାହିକରେ ଏମାନଙ୍କ ଦୁରାଚାରର ବିବରଣୀ ଦେଲେ କେବଳ ନୁହେଁ, କଳାପତାକା ପଦ୍ଧତ୍ତି ହେତୁ ସାରା ଓଡ଼ିଶାରେ ଉଲ୍ଲେଖନୀୟ ହୋଇ ଉଠିଥିବା ଭାଷା ଆନ୍ଦୋଳନକୁ ହଡଫ କରିବା ପାଇଁ ବିଜେପି ଜାଲ ବିସ୍ତାର କରିଥିବା ଦିଗ ଉପରେ ଆଲୋଚନାତ୍ମକ ଆଲୋକପାତ ବି କଲେ ।

କିନ୍ତୁ ଭାଷା ଆନ୍ଦୋଳନ ବନ୍ଦ କରିବା ପାଇଁ ଏହି ଦୁଇ ଅପରାଧୀ ସକ୍ଷମ ହେଲେ ନାହିଁ । ଅର୍ଥମନ୍ତ୍ରୀଙ୍କ ଅଭୟ ଦାନ ଫିକା ପଡ଼ିଯାଉଥିବା ଆଶଙ୍କା କରି ରକ୍ଷା ପାଇବାର ଅନ୍ୟାନ୍ୟ ଉପାୟ ସନ୍ଧାନରେ ରହିଲେ । ଏହି କ୍ରମରେ ମୋ ପରିବର୍ତ୍ତେ ଭାଷା ଆଂଦୋଳନର ଅଧ୍ୟକ୍ଷ ଭାବେ ଚକ୍ରଧର ମହାନ୍ତ ନାମକ ବ୍ୟକ୍ତି ସ୍ଥାନିତ ହୋଇଛନ୍ତି ବୋଲି ଏମାନେ ପ୍ରଚାର ଚଳାଇଲେ । କାରଣ , ଏମାନଙ୍କ ବିଶ୍ଵାସ ଯେ, ଏତଦ୍ଦ୍ବାରା ଭାଷା ଆଂଦୋଳନର ଅଧ୍ୟକ୍ଷ ଭାବେ ମୁଁ ଦେଇଥିବା ଏତଲା ପଥଭ୍ରଷ୍ଟ ହୋଇଯିବ ।

ଏହି ଚକ୍ରଧର ମହାନ୍ତ କିଏ ଓ କାହିଁକି ସେ ଏମାନଙ୍କ ସହ ହାତ ମିଳାଇଛନ୍ତି?

ମୁଁ ଏହି କୌତୁହଲୋଦ୍ଦୀପକ ସ୍ଥିତି ପ୍ରତି ଦୃଷ୍ଟିପାତ କରି ଦେଖୁଛି, ଏ ବ୍ୟକ୍ତି ଜଣେ ଅର୍ଥନୈତିକ ଅପରାଧୀ ଯେ କି ଜଳସେଚନ ବିଭାଗର ଅଧିକ୍ଷଣ ଯନ୍ତ୍ରୀ ଥିବା ବେଳେ ଦୁର୍ନୀତି ନିବାରଣ ଆଇନ ବଳରେ ଦୋଷୀ ସାବ୍ୟସ୍ତ ହୋଇ ସ୍ବତନ୍ତ ଭିଜିଲାନ୍ସ ଅଦାଲତରେ ସମ୍ପତ୍ତି ବାଜ୍ୟାପ୍ତିକରଣର ସମ୍ମୁଖୀନ ହୋଇଛନ୍ତି (Vigilance P.S. Case No. 43, Dt. 22-11-2006) ଓ ସରକାରଙ୍କ ସହ ହାତ ମିଳାଇ ଭାଷା ଆନ୍ଦୋଳନରେ ସଙ୍କଟ ସୃଷ୍ଟିକଲେ ସରକାର ଏହି ମକଦ୍ଦମା ଉଠାଇ ନେବେ ବୋଲି ତାଙ୍କୁ ମୌଖିକ ପ୍ରତିଶ୍ରୁତି ମିଳିଛି ।

ଏହି ଜଘନ୍ୟ ଦୁର୍ନୀତିଗ୍ରସ୍ତ ଲୋକମାନଙ୍କ ଗୋଠ ଗଠନ ଭାଷା ଆନ୍ଦୋଳନକୁ ସଙ୍କଟଗ୍ରସ୍ତ କରାଇବାକୁ ଉଦ୍ଦିଷ୍ଟ । (କ୍ରମଶଃ)
୨୯.୬.୨୦୧୯

ସୁଭାଷ ଚନ୍ଦ୍ର ପଟ୍ଟନାୟକ

ଓଡ଼ିଶାର ସର୍ବତ୍ର ଭାଷା ଆନ୍ଦୋଳନକୁ ବ୍ୟାପକ କରିବା ପାଇଁ ଅର୍ଥର ଆବଶ୍ୟକତା ଥିଲା । ଏହି ପାଣ୍ଠି ସୃଷ୍ଟି ପାଇଁ ଆମେ ଏକ ସ୍ମରଣିକା ପ୍ରକାଶ କରିବାକୁ ଚିନ୍ତା କରିଥିଲୁ, କାରଣ ତା ପାଇଁ ବିଜ୍ଞାପନ ସଂଗ୍ରହ କରି ତହିଁରୁ ବଳକା ଅର୍ଥ ଆନ୍ଦୋଳନର ସମ୍ପ୍ରସାରଣରେ ବ୍ୟବହୃତ ହୋଇପାରିବ ବୋଲି ଆମେ ଚିନ୍ତା କରିଥିଲୁ । ଯେହେତୁ କୌଣସି ଆନ୍ଦୋଳନ ନାମରେ ବିଜ୍ଞାପନ ସଂଗ୍ରହ ସମ୍ଭବ ନ ଥିଲା, ଆମ ଆବାହକ ପବିତ୍ର ମହାରଥାଙ୍କ ପୁସ୍ତକ ପ୍ରକାଶନ ସଂସ୍ଥା ‘ଶବ୍ଦ ସ୍ପର୍ଶ’ ନାମରେ ଏହା କରାଗଲା । ସ୍ମରଣିକାଟିର ମୁଦ୍ରଣ ଖର୍ଚ୍ଚ କାଟିରଖି ଅବଶିଷ୍ଟ ସମସ୍ତ ଟଙ୍କା ସେ ଆନ୍ଦୋଳନକୁ ଦେବା ପରେ ଏକ ବ୍ୟାଙ୍କ ଜମାଖାତା ଖୋଲି ତହିଁରେ ତାହା ରଖାଯିବ ଓ ଆନ୍ଦୋଳନ କାମରେ ଭୁବନେଶ୍ଵର ବାହାରକୁ ଯାଉଥିବା ବେଳେ ତହିଁରୁ ଖର୍ଚ୍ଚ କରାଯିବ ବୋଲି ନିଷ୍ପତ୍ତି ହୋଇଥିଲା । ବହୁ ବିଜ୍ଞାପନ ଆସିଥିଲା ଓ ତଥ୍ୟାଭିଜ୍ଞ ବ୍ୟକ୍ତିମାନଙ୍କ ଆକଳନ ଅନୁସାରେ ତହିଁର ମୁଦ୍ରାମୂଲ୍ୟ ପ୍ରାୟ ଅଧକୋଟି ଟଙ୍କା । ଯେହେତୁ ‘ଶବ୍ଦ ସ୍ପର୍ଶ’ ନାମରେ ବିଜ୍ଞାପନଗୁଡ଼ିକ ଆସିଥିଲା, ପବିତ୍ର ମହାରଥା ଭାଷା ଆନ୍ଦୋଳନ ପ୍ରତି ବିଶ୍ବାସଘାତକତା କରି ଏହି ସମଗ୍ର ପାଣ୍ଠି ତୋଷରପାତ କଲେ । ଏହା ଜଣା ପଡ଼ିଲା ପରେ ମୁଁ ତାଙ୍କୁ ଯେତେବେଳେ ହିସାବ ମାଗିଲି ସେ ଫାଙ୍କିମାରିବାକୁ ନାନା କୌଶଳ ପ୍ରୟୋଗ କଲେ ।

ନୈତିକତା ଦୃଷ୍ଟିରୁ, ସବୁ ଶ୍ଲାଘ୍ୟ ଉଦ୍ୟମ ନିଷ୍ଫଳ ହେବା ପରେ, ମୁଁ ରାଜଧାନୀ ଥାନାରେ ଏହି ଦୁରାଚର ବିରୁଦ୍ଧରେ ଏକ ଏତଲା ଦେଲି । ପୋଲିସ କବଳରୁ ରକ୍ଷା ପାଇବା ପାଇଁ ସେ ସରକାରୀ ଓକିଲ ବିଭୁ ପ୍ରସାଦ ତ୍ରିପାଠୀଙ୍କ ଶରଣାପନ୍ନ ହେଲେ । ବିଭୁବାବୁ ମୋତେ ଫୋନ କରି ପବିତ୍ର ବିଜ୍ଞାପନ ବାବଦରେ ମାତ୍ର ୩ ଲକ୍ଷ ଟଙ୍କା ପାଇଛନ୍ତି ଓ ସେ ସବୁ ଟଙ୍କା ସ୍ମରଣିକା ପ୍ରକାଶନରେ ଖର୍ଚ୍ଚ ହୋଇଯାଇଥିବା ହେତୁ ମୁଁ ତାଙ୍କୁ କ୍ଷମା କରିଦେବା ଉଚିତ ବୋଲି କହିଲେ । ସେମାନେ ଉଭୟେ ପରସ୍ପରର ବନ୍ଧୁ ଓ ପବିତ୍ରଙ୍କ ମାଧ୍ୟମରେ ମୁଁ ବିଭୁବାବୁଙ୍କୁ ଜାଣିଥିଲି । ମୁଁ ତାଙ୍କୁ କହିଲି ଯେ, ସମସ୍ତ ଟଙ୍କାର ସେ ହିସାବ ଦିଅନ୍ତୁ ଓ ଯଦି ମୋର ହୃଦବୋଧ ହୁଏ ଯେ, ସେ କୌଣସି ଅପରାଧ କରିନାହାନ୍ତି , ମୁଁ ଏତଲା ପ୍ରତ୍ୟାହାର କରିନେବି । ତା ତ ହେଲା ନାହିଁ , ପୋଲିସ ମଧ୍ୟ କୌଣସି କାର୍ଯ୍ୟାନୁଷ୍ଠାନ କଲାନାହିଁ । ନାମ ଗୋପନ ରଖିବା ସର୍ତ୍ତରେ ଜଣେ ପୋଲିସ ବଡ଼ପଣ୍ଡା ମୋତେ କହିଲେ ଯେ, ଉପର ମହଲାର ନିର୍ଦ୍ଦେଶ ଆସିଥିଲା ପବିତ୍ରଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନ କରିବାକୁ ।

ମୁଁ କାଳେ ଅଦାଲତରେ ମକଦ୍ଦମା ଦାଏର କରିବି ଏହି ଭୟରେ ପବିତ୍ରଙ୍କ ବନ୍ଧୁ ଓ ପ୍ରଦ୍ୟୁମ୍ନ ଶତପଥୀଙ୍କ ସମ୍ପର୍କୀୟ ଉପରୋକ୍ତ ଓକିଲ ବିଭୁ ପ୍ରସାଦ ତ୍ରିପାଠୀ ତାଙ୍କୁ ବତାଇଲେ କି, ଭାଷା ଆଂଦୋଳନର ଅଧ୍ୟକ୍ଷ ଭାବେ ଅନ୍ୟ ଜଣଙ୍କ ନାମ ସେମାନେ ଘୋଷଣା କରିଦିଅନ୍ତୁ; କାରଣ ତଦ୍ଦ୍ଵାରା ଏକ ବିଧିକ ବିଭ୍ରାନ୍ତି ତିଆରି ହୋଇଯାଇ ପାରିବ ଏବଂ ମୁଁ ଯେହେତୁ ଅଧ୍ୟକ୍ଷ ଭାବେ ପବିତ୍ରଙ୍କ ବିରୁଦ୍ଧରେ ଏତଲା ଦେଇଛି, ମକଦ୍ଦମା କଲେ ଅଦାଲତକୁ ପ୍ରଥମେ ଠିକାଇବାକୁ ପଡ଼ିବ କିଏ ଅଧ୍ୟକ୍ଷ ଓ ସେଥିରେ ଏତେ ସମୟ ଲାଗିଯିବ ଯେ, ପାଣ୍ଠି ତୋଷରପାତ ବିଚାର ଆରମ୍ଭ ହୁଏତ ସୁଭାଷ ଚନ୍ଦ୍ର ପଟ୍ଟନାୟକଙ୍କ ପରି ବୟସ୍କ ବ୍ୟକ୍ତିଙ୍କ ଜୀବଦ୍ଦଶାରେ ସମ୍ଭବ ହେବ ନାହିଁ । ତ୍ରିପାଠୀଙ୍କ ଚ୍ୟାମ୍ବରରେ ସେତେବେଳେ ଉପସ୍ଥିତ ଥିବା ଜଣେ ନିର୍ଭରଯୋଗ୍ୟ ବ୍ୟକ୍ତି ନାମ ଗୋପନ ରଖିବା ସର୍ତ୍ତରେ ମୋତେ ଏହା କହିଛନ୍ତି ।

ଚକ୍ରଧର ମାହୁନ୍ତ ନାମକ ଜଣେ ଭିଜିଲାନ୍ସ ଆସାମୀ ଭାଷା ଆଂଦୋଳନର ଅଧ୍ୟକ୍ଷ ସାଜିଥିବା କଥା ପ୍ରଦ୍ଯୁମ୍ନ ଶତପଥୀଙ୍କ ଆତ୍ମରକ୍ଷା ପାଇଁ ବ୍ୟାକୁଳତା ଜର୍ଜରିତ ଏକ ପତ୍ରରୁ ମୁଁ ଅବଗତ ହେଲି ।

ଏ କଥା ମୁଁ ଯେତେବେଳେ ଓଡ଼ିଶାବାସୀଙ୍କ ସମ୍ମୁଖରେ ରଖିଲି ସେତେବେଳକୁ ଓକିଲ ବିଭୁ ପ୍ରସାଦ ତ୍ରିପାଠୀଙ୍କ ଏହି ପରମର୍ଶର ଖବର ମୋ ପାଖରେ ପହଞ୍ଚି ନଥିଲା । ଭାଷା ପାଇଁ ଓଡ଼ିଆ ଜାତିର ଏ ଅନନ୍ୟ ଆଂଦୋଳନର ଇତିହାସ ନିର୍ଭୁଲ ରଖିବା ପାଇଁ ବିଭୁ ବାବୁ ମୁଁ ଉପରେ ଦେଇଥିବା ଦୃଶ୍ୟପଟ ଉପରେ ନିଜ ମତ ରଖିବା ଆବଶ୍ୟକ , କାରଣ ଆମେ କେହି ସମାଜ ଓ ସମୟର ଉର୍ଦ୍ଧ୍ଵରେ ନୁହେଁ । (କ୍ରମଶଃ)
୨୭.୬.୨୦୧୯