ଯୁଦ୍ଧକାଳୀନ ଭିତ୍ତିରେ ଓଡ଼ିଆ ଭାଷାରେ କାମ କର : କଳାପତାକା ଅଭିଯାନ ଆରମ୍ଭ କରି ରାଜେନ୍ଦ୍ର ବିଶ୍ବାଳଙ୍କ ସରକାରଙ୍କୁ ଆହ୍ଵାନ

ନିଜ ଭାଷାରେ ନିଜ କାର୍ଯ୍ୟ ପାଇଁ ଓଡ଼ିଆ ପୂର୍ବଜମାନେ ଇଂରାଜୀ ସରକାର ସହ ତଥା ପ୍ରତିଯୋଗୀ ପଡୋଶୀ ପ୍ରଦେଶବାସୀଙ୍କ ସହ ସଂଗ୍ରାମ କରି ୧୯୩୬ରେ ସୃଷ୍ଟିକରିଥିଲେ ଓଡ଼ିଶା । ସ୍ଵାଧୀନତା ପରବର୍ତ୍ତୀ ପ୍ରଥମ ବିଧାନସଭା ଏହି ଉଦ୍ଦେଶ୍ୟରେ ପ୍ରଣୀତ ଓ ପ୍ରବର୍ତ୍ତିତ କରିଥିଲେ ଓଡ଼ିଶା ସରକାରୀ ଭାଷା ଆଇନ ୧୯୫୪ରେ । ଅଥଚ ଏହି ଆଇନକୁ ସ୍ଵୟଂ ସରକାର ମାନୁନାହାନ୍ତି । ଏହାର ପ୍ରତିକାର ପାଇଁ ଭାଷା ଆନ୍ଦୋଳନ ମାଧ୍ୟମରେ ଓଡ଼ିଆ ଜାତି ସଂଗ୍ରାମ କରୁଥିବା ବେଳେ, ଆଇନଟିକୁ ଭୁଲ ସଂଶୋଧନ ଦ୍ଵାରା ଅକର୍ମଣ୍ୟ କରାହୋଇଛି ।

ବିଶ୍ଵ ମାତୃଭାଷା ଦିବସରୁ ବ୍ୟାସନଗର ପୁନଶ୍ଚ ଆରମ୍ଭ କରିଛି ଆନ୍ଦୋଳନର କଳା ପତାକା ଅଭିଯାନ, ଯାହା କରୋନା କାଳରେ ସ୍ଥଗିତ ଥିଲା ।

ବ୍ୟାସନଗରର ମହାନ୍ ସ୍ଵେଚ୍ଛାସେବୀ ଅନୁଷ୍ଠାନ ‘ସହିଦ ଭଗତ ସିଂହ ଯୁବକ ସଂଘ’ ଯାହା ଓଡ଼ିଆ ଜାତିର ଏହି ସ୍ଵପ୍ନକୁ କାର୍ଯ୍ୟକାରୀ କରିବା ପାଇଁ ଆରମ୍ଭରୁ ଉଦ୍ୟମ ଚଳାଇଛି, ପୁନଃ ଆରମ୍ଭ କରିଛି ଏହି ଅଭିଯାନ ଉତ୍କଳମଣି ପଣ୍ଡିତ ଗୋପବନ୍ଧୁଙ୍କ ପୂଣ୍ୟ ବିଜେସ୍ଥଳୀରେ ।

ସଂଘର ସ୍ଥାୟୀ ସଭାପତି , ନିସ୍ଵାର୍ଥ ସମାଜସେବୀ ରାଜେନ୍ଦ୍ର ବିଶ୍ଵାଳ ଏହି ଅବସରରେ ସରକାରଙ୍କୁ ଆହ୍ଵାନ ଦେଇଛନ୍ତି ଓଡ଼ିଆ ଭାଷାକୁ ଯୁଦ୍ଧକାଳୀନ ଭିତ୍ତିରେ ସମସ୍ତ ଦପ୍ତରରେ ଅଲଙ୍ଘ୍ୟ କରିବା ପାଇଁ :::

୧୭୭୫ ଦିନରେ ଭାଷା ଆନ୍ଦୋଳନ// ବୀର ଓଡ଼ିଆ ଜାତି ପୁଣି ଆରମ୍ଭ କଲା କଳାପତାକା ଅଭିଯାନ

ସୁଭାଷ ଚନ୍ଦ୍ର ପଟ୍ଟନାୟକ

ଓଡ଼ିଆ ଜାତିର ଭାଷାଜନନୀକୁ ମାରିଦେବା ପାଇଁ ଅଣଓଡ଼ିଆ ଅଧ୍ୟୁଷିତ ରାଜ୍ୟ ସରକାର ଯେଉଁ ଚକ୍ରାନ୍ତ ଚଳାଇଛନ୍ତି , ତାର ପରିସମାପ୍ତି ପାଇଁ ବୀର ଓଡ଼ିଆ ଜାତି ଆଜି ଆନ୍ଦୋଳନର ୧୭୭୫ତମ ଦିବସରେ ଆରମ୍ଭ କରିଛି ନୀରବ କଳାପତାକା ଅଭିଯାନର ଅନ୍ତିମ ପର୍ଯ୍ୟାୟ । ଓଡ଼ିଆ ଭାଷାରେ ଓଡ଼ିଶା ରାଜ୍ୟ ଚାଲିବା ସୁନିଶ୍ଚିତ ହେବା ପର୍ଯ୍ୟନ୍ତ ଏହି ଅଭିଯାନ ଚାଲିବ ।
ରାଜଧାନୀ ଭୁବନେଶ୍ବର ସମେତ ରାଜ୍ୟର ବିଭିନ୍ନ ସ୍ଥାନରେ ଏବଂ ରାଜ୍ୟ ବାହାରେ ଏହି ଅଭିଯାନ ଆରମ୍ଭ ହୋଇଛି ।


ଗୁଜରାଟର ଭଦୋଦରାଠାରେ ଭାଇ ମହାନ ଭାଷାପ୍ରେମୀ ଭାଇ ବାପୀ ପାଲଟାସିଂହଙ୍କ ନେତୃତ୍ବରେ ନିଶବ୍ଦ କଳାପତାକା ତୋଳିଛନ୍ତି ଭାଇ ସର୍ବଶୀ ରୋହିତ ମହାରଣା, ଶୁଭ୍ରାଂଶୁ ସାହୁ, ସମୀର ବେହେରା ଓ ଅଜୟ ସେଠୀ ।


କଟକ ଜିଲ୍ଲାର ଆଠଗଡ଼ରେ ବିଶିଷ୍ଟ ସମାଜସେବୀ ଭାଇ ନିର୍ମଳ କୁମାର ପତ୍ରୀଙ୍କ ନେତୃତ୍ବରେ ବିଭିନ୍ନ ସ୍ଥାନରେ ଅଭିଯାନ ଆରମ୍ଭ ହୋଇ ଓଡ଼ିଆ ଭାଷାଜନନୀଙ୍କ ବିରୁଦ୍ଧରେ ଷଡଯନ୍ତ୍ର ବନ୍ଦ କରି ସମସ୍ତ କ୍ଷେତ୍ରରେ ଓଡ଼ିଆରେ କମ କରିବାକୁ ସରକାରଙ୍କୁ ନୀରବ ଆହ୍ଵାନ ଦିଆଯାଇଛି ।

 

 

ଏହି କ୍ରମରେ ସହର ସନ୍ନିକଟସ୍ଥ ରାଧଦର୍ଶନପୁରଠାରେ ଭାଇ ବିଚିତ୍ରାନନ୍ଦ ଜେନା, ଭରତ ପାଢୀ ଓ ଉମେଶ ଚନ୍ଦ୍ର ନାୟକ କଳା ପତାକା ତୋଳିଥିବା ବେଳେ ମୁଣ୍ଡଳି ଠାରେ ଭାଇ ସର୍ବଶୀ ହାଡିବନ୍ଧୁ ରାଉତ, ସୁଭାଷ ଚନ୍ଦ୍ର ଶେଠୀ, ସୁକାନ୍ତ ଭୋଇ ଏବଂ ଧୁରୁକୁଡିଆଠାରେ ଭାଇ ସର୍ବଶ୍ରୀ ଅରୂପନନ୍ଦ ମଲ୍ଲିକ, ପ୍ରତାପ ପାତ୍ରୀ, ମଦନ ଦେହୁରି ଓ ସ୍ଵୟଂ ନିର୍ମଳ କୁମାର ପତାକା ଉତ୍ତୋଳନ କରିଛନ୍ତି ।

କନ୍ଧମାଳର ଏକାଧିକ ସ୍ଥାନରେ ଓଡ଼ିଆ ଜାତିର ମୁକ୍ତିର ଏହି ଅଭିଯାନ ଆରମ୍ଭ ହୋଇଛି ।

ଫୁଲବାଣୀ ସହରରେ ଭାଷା ଜନନୀର ବିଜୟ କେତନ ଉତ୍ତୋଳନ କରିଛନ୍ତି ବରିଷ୍ଠ ସାମ୍ବାଦିକ ମହମ୍ମଦ ନଜିର ଅଖତାର , ସାମ୍ବାଦିକ ଡଃ ଅରୂପ କୁମାର ଜେନା ତଥା ରାଜ କିଶୋର ବେହେରା, ପ୍ରସନ୍ନ ସାହାଣୀ, ଅଶୋକ ପଟ୍ଟନାୟକ, ମନୋଜ ଚୌଧୁରୀ, ଉମେଶ ସାହୁ, ସଚ୍ଚି ପଟ୍ଟନାୟକ, ଗୌର ଚରଣ ସାହୁ, ପ୍ରମୋଦ ପଟ୍ଟନାୟକ, ବଟକୃଷ୍ଣ ଦିଗଳ, ଝିଲି ବେହେରା, ପୁଷ୍ପଳତା ବେହେରା ଓ ଭାଷା ଆନ୍ଦୋଳନର ତୁଙ୍ଗ ନେତା ଅଶୋକ କୁମାର ପରିଡ଼ା ପ୍ରମୁଖ ।


ସେହିପରି ବାଲିଗୁଡାରେ ନୀରବ କଳା ପତାକା ତୋଳିଛନ୍ତି ସର୍ବଶ୍ରୀ ଚନ୍ଦନ ଜେନା, ବିରେନ୍ଦ୍ର ଦିଗାଲ ପ୍ରମୁଖ ।

ଓଡ଼ିଆ ସଂସୃତିର ଅନ୍ୟତମ ସ୍ନାୟୁକେନ୍ଦ୍ର ବ୍ୟାସନଗରରେ ସହିଦ ଭଗତ ସିଂହ ଯୁବ ସଂଘ ସରକାରୀ ଷଡଯନ୍ତ୍ର କବଳରୁ ପ୍ରିୟ ମାତୃଭାଷାକୁ ରକ୍ଷା କରି ଓଡ଼ିଆ ଜାତିକୁ ଭାଷା ଅଧିକାର ଦେବାପାଇଁ କଳା ପତାକା ଅଭିଯାନର ଏହି ଚୁଡାନ୍ତ ସଂସ୍କରଣରେ ଆହ୍ଵାନ ଦେଇଛି ।

 

 

ଭାଷାଜନନୀର ବିଜୟ ଧ୍ଵଜା ତୋଳିଛନ୍ତି କବି ନାରାୟଣ ଚନ୍ଦ୍ର ନାୟକ, ପଣ୍ଡିତ ସୁବାସ ଚନ୍ଦ୍ର ପଣ୍ଡା, ସମୀର କୁମାର ରାୟ, ଚନ୍ଦ୍ରମଣି ସାମଲ, ବ୍ୟଙ୍ଗକବି ବାଇଧର ମାଝି, ସନାତନ ମଲ୍ଲିକ, ଭୁବନମୋହନ ମହାନ୍ତି, ମହେଶ୍ଵର ନାୟକ, ହେମନ୍ତ ଧୀର, ଜ୍ଞାନରଞ୍ଜନ ରାଉତ, ବିଜଯ କୁମାର ସାହୁ, ପଦ୍ମନାଭ ନାୟକ, ମଣିଭଦ୍ର ବଲ୍ଲୀକ, କଳିଙ୍ଗ ପହି, ସାହିତ୍ୟିକ ନନ୍ଦା ମହାନ୍ତି, ଉପେନ୍ଦ୍ର ମହାନ୍ତି ସଂଘର ସ୍ଥାୟୀ ସଭାପତି ରାଜେନ୍ଦ୍ର କୁମାର ବିଶ୍ଵାଳ ।


ରାଜଧାନୀ ଭୁବନେଶ୍ଵରରେ କୁଳଗୌରବ ମଧୁସୂଦନଙ୍କ ପୂଣ୍ୟ ବିଜେସ୍ଥଳୀରେ କଳା ପତାକା ତୋଳିଛନ୍ତି ସୁବିଦିତ ସମ୍ୟବାଦୀ ନେତା ଜନାର୍ଦ୍ଦନ ପତି , ବୈଜ୍ଞାନିକ ଡଃ ଅଶୋକ ମିଶ୍ର, ପୂର୍ବତନ ବ୍ୟାଙ୍କର ନିର୍ମଳ କୁମାର ବେହେରା, ଭାଷାପ୍ରାଣ ଆଶିଷ ବେହେରା, ଓଡ଼ିଆ ଜାତୀୟ ସମ୍ମିଳନୀର କାର୍ଯ୍ୟକାରୀ ସଭାପତି ଶ୍ରୀକାନ୍ତ ଦାଶ, ଚାଟାର୍ଡ ଆକାଉଣ୍ଟାଣ୍ଟ ରଞ୍ଜନ କୁମାର ସାହୁ, ଓଡ଼ିଶା ସୂଚନା ଅଧିକାର ଅଭିଯାନର ମୁଖ୍ୟ ପ୍ରଦୀପ କୁମାର ପ୍ରଧାନ, ପ୍ରଶାନ୍ତ କୁମାର ରାଉତରାୟ , ପ୍ରସନ୍ନ କୁମାର ଛୋଟରାୟ, ସାମ୍ବାଦିକ ମହେଶ ଦାସ, ସୂର୍ଯ୍ୟକାନ୍ତ ମାହାଲି , ନ୍ୟାୟ ପାଇଁ ସଂଘର୍ଷ ଚେତନାର ରୂପକଳ୍ପ ତପନ ପାଢୀ, ସାମ୍ବାଦିକ ତଥା ଜନସ୍ବାର୍ଥବାଡି ମାଧବାନନ୍ଦ ଭୋଇ, ସମାଜସେବୀ ମନ୍ଦରଧର ସ୍ଵାଇଁ ଓ ସୁଭାଷ ଚନ୍ଦ୍ର ପଟ୍ଟନାୟକ ।

ପ୍ରେମକୁଞ୍ଜରେ ପୋଲିସ : ଅନ୍ଧକାରରେ ଓଡ଼ିଆ

ସୁଭାଷ ଚନ୍ଦ୍ର ପଟ୍ଟନାୟକ

ବୁଧବାର ଆମକୁ ମିଳିଥିଲା କଟକ-ଭୁବନେଶ୍ଵର ଦ୍ଵୈତନଗରୀରେ ପୋଲିସ-ପ୍ରେମକୁଞ୍ଜର ଏକ ଲୋମହର୍ଷଣକାରୀ ବିବରଣୀ ସ୍ଵୟଂ ପୋଲିସ କମିସନରଙ୍କ ସୌଜନ୍ୟରୁ । ଭାଷା ଆଇନ ଅକାମି ହୋଇ ଓଡ଼ିଆ ଜାତି ଅନ୍ଧକାରରେ ପଡ଼ିଥିବା ବେଳେ ଇଂରାଜୀ ଭାଷାରେ ନିର୍ଯ୍ୟାତନା ଚଳାଇଥିବା ପୋଲିସର ଏହି ତୁଙ୍ଗ ଅଧିକାରୀ ଶ୍ରୀ ସୁଧାଂଶୁ ଷଡ଼ଙ୍ଗୀ ବଡ଼ ଗର୍ବର ସହ କହିଥିଲେ, ମାତ୍ର ବର୍ଷକ ଭିତରେ ୨୫ କୋଟି ଟଙ୍କା ଆଦାୟ ହୋଇଛି ଟ୍ରାଫିକ ନିୟମ ଉଲଂଘନକାରୀମାନଙ୍କଠାରୁ ଏବଂ ପୋଲିସକୁ ଆଖିମିଟିକା ମାରି ଯିଏ ଖସି ଯାଉଛି ତା ଘରେ ପହଞ୍ଚୁଛି “ପ୍ରେମପତ୍ର” ପୋଲିସ ମଞ୍ଜୁଷାକୁ ମଞ୍ଜୁଳତର କରିବା ପାଇଁ । ପ୍ରତ୍ୟହ ଏପରି ପ୍ରାୟ ୩୫୦ ପ୍ରେମପତ୍ର ଓଡ଼ିଆମାନଙ୍କ ଘରେ ପହଞ୍ଚୁଛି ବୋଲି ସେ କହିଥିଲେ । ସିସିଟିଭି ଜଗିଛି, ଖସିଯିବାର ଉପାୟ ନାହିଁ ।

କମିଶନର ଜାଣିଶୁଣି ହୁଏତ କହିନାହାନ୍ତି ବା କହିବାକୁ ଭୁଲି ଯାଇଛନ୍ତି ଯେ, ଗତ ବର୍ଷ – ଫେବୃଆରୀ ୨୦ରେ ବିଧାୟକ ସୌମ୍ୟ ରଞ୍ଜନ ପଟ୍ଟନାୟକଙ୍କ ଏକ ପ୍ରଶ୍ନର ଉତ୍ତର ଦେଇ ପରିବହନମନ୍ତ୍ରୀ ବିଧାନସଭାରେ କହିଥିଲେ, ୨୦୧୯ ସେପ୍ଟେମ୍ବରରୁ ୨୦୨୦ ଜାନୁଆରୀ ମଧ୍ୟରେ ଆଦାୟ ହୋଇଥିବା ଏହି “ପ୍ରେମ” ବଟିର ପରିମାଣ ଥିଲା ୩୮.୬୭ କୋଟି ଟଙ୍କା ।

ଅତଏବ ୨୦୧୯ ସେପ୍ଟେମ୍ବର ଓ ୨୦୨୧ ଜାନୁଆରୀ – ଏହି ୨୫ ମାସ ଭିତରେ ଟ୍ରାଫିକ ନିୟମ ଲଙ୍ଘନ କରିଥିବା କାରଣରୁ ଓଡ଼ିଆ ଲୋକଙ୍କଠାରୁ ପୋଲିସ ଆଦାୟ କରିଛି ୬୩.୬୭ କୋଟି ଟଙ୍କା ।

ଓଡ଼ିଆ ଲୋକଙ୍କ ଘରକୁ ପଠାଯାଉଥିବା ଜୋରିମାନା ଆଦେଶକୁ “ପ୍ରେମପତ୍ର” ବୋଲି କହି ସେମାନଙ୍କ ମଜା ଉଡ଼ାଉଥିବା ପୋଲିସ ଏଯାଏଁ କହିନି କେଉଁ ବର୍ଗର ଲୋକେ ଟ୍ରାଫିକ ନିୟମ ଅବଗତ ଥାଇ ବି ଉଲ୍ଲଂଘନ କରୁଛନ୍ତି । ଜଣେ ଅଶିକ୍ଷିତ ଅଟୋ ରିକ୍ସା ଚାଳକଙ୍କୁ ୨୦୧୯ ସେପ୍ଟେମ୍ବର ୪ ତାରିଖରେ ୫୨ ହଜାର ଟଙ୍କା ଜୋରିମାନା କରାହୋଇଥିଲା, ଯେତେବେଳେ ମାତ୍ର ୩ ଦିନ ପୂର୍ବରୁ ସେ ମାସ ପହିଲା ତାରିଖରେ ଏ ନିୟମ ପ୍ରବର୍ତ୍ତିତ ହୋଇଥିଲା ଓ ଖୁବ ଶିକ୍ଷିତ ଲୋକେ ବି ଏହା କଣ, ତାହା ଜାଣି ନଥିଲେ । ଅଜସ୍ର ଘଟଣାରୁ ଏହା ମାତ୍ର ଗୋଟିଏ ।

ଆମ୍ଭେ ସେତେବେଳେ ଲେଖିଥିଲୁ, ଟ୍ରାଫିକ ନିୟମାବଳୀ ତୁରନ୍ତ ସାଧାରଣ ବୋଧଗମ୍ୟ ଓଡ଼ିଆରେ ଅନୁବାଦ କରି ସର୍ବତ୍ର ବଣ୍ଟନ କରାଯାଉ ଓ ଲୋକେ ତାହା ହୃଦୟଙ୍ଗମ କଲା ପରେ ଆଶା କରାଯାଉ ଯେ, ସେମାନେ ତାହା ପାଳନ କରିବେ । ଆଜି ଯାଏଁ ତାହା ହୋଇନି । ଅଥଚ ନିୟମ ଉଲ୍ଲଂଘନ ହେଲା ବୋଲି ପୋଲିସ ଜୁଲୁମ ଚାଲିଛି ଓ ଯଦୃଚ୍ଛା ଜୋରିମାନା ଜାରିକୁ “ପ୍ରେମପତ୍ର” କହି ଓଡ଼ିଆ ଜାତିର ଅସ୍ମିତା ପ୍ରତି ତାତ୍ସଲ୍ୟ ପ୍ରଦର୍ଶନ କରୁଛନ୍ତି ପୋଲିସ ।

ଏହି ଜୁଲୁମ ଜାରି “ପ୍ରେମପତ୍ର” ?

ଦେଶୀ-ଇଂରାଜିଆ ମୁଖ୍ୟମନ୍ତ୍ରୀ ଓ ତାଙ୍କ ଚାଟୁକାରମାନେ ଓଡ଼ିଆ ଜାତିକୁ ଆଉ କେତେ ଅପମାନ ଦେବେ ?

ଅରାଜକତା ହେତୁ କୋଟିଆ ଗଲା; ସୀମା ସଂକଟରେ ଓଡ଼ିଶା

ସୁଭାଷ ଚନ୍ଦ୍ର ପଟ୍ଟନାୟକ

ଆମ ପୂର୍ବପୁରୁଷଙ୍କ ବୀରତ୍ଵକୁ ଡରି ବ୍ରିଟିଶ ଅନୁପ୍ରବେଶକାରୀମାନେ ବକ୍ସି ଜଗବନ୍ଧୁଙ୍କ ସହ ସନ୍ଧି ସ୍ଥାପନ କରିଥିଲା ଓ ଗଡ଼ଜାତଗୁଡ଼ିକ ସହ ମିତ୍ରତା ସ୍ଥାପନ କରିଥିଲା ; କାରଣ ଖୁରୁଧାସୀନ ଜଏଣ୍ଟ ମାଜିଷ୍ଟ୍ରେଟ ଡବ୍ଲୁ . ଫରେଷ୍ଟର ରିପୋର୍ଟ କରିଥିଲେ, ଆମ ମାଟି ଏତେ ଦୁର୍ଦ୍ଧର୍ଷ ଓ ଆମ ଲୋକଙ୍କ ମିଜାଜ ଏତେ କଡ଼ା ଯେ, ସେମାନଙ୍କୁ ପୋଲିସ ବା ମିଲିଟାରୀ ବଳରେ ଆୟତ୍ତ କରିହେବ ନାହିଁ ।

ଏପରି ସନ୍ଧି ଓ ମିତ୍ରତା ପରେ ସେହି ବିଦେଶୀ ଅନୁପ୍ରବେଶକାରୀମାନେ ବିଚାରିଲେ, ରାଜା , ବଂଶାନୁକ୍ରମିକ ଜମିଦାର ଓ ଆଦିମ ଅଧିବାସୀମାନଙ୍କ ସ୍ୱାୟତ୍ତ ଦେଶମୟ ଏହି ଭୂମଣ୍ଡଳରେ କୌଣସି ଏକକ ଭୌଗୋଳିକ ଜାତୀୟତା ନଥିବାବେଳେ କେଉଁ ଶକ୍ତିବଳରେ ଓଡ଼ିଆ ଲୋକେ ଏପରି ଅପରାଜେୟ?

ସେମାନେ ଦେଖିଲେ, ଓଡ଼ିଆଭାଷା ହିଁ ସେମାନଙ୍କ ଏକମାତ୍ର ଶକ୍ତି, ଭୌଗୋଳିକ ଜାତୀୟତା ନଥାଇ ବି ଏହି ଭାଷା ହିଁ ସେମାନଙ୍କୁ ଭାଷା ଜାତୀୟତା ପରି ଏକ ନୈସର୍ଗିକ ଜାତୀୟତା ଦେଇଛି ଓ ଏହି ଭାଷାଜାତୀୟତା ହିଁ ସେମାନଙ୍କ ଐକ୍ୟ  ଓ ସଂହତିର ଏକମାତ୍ର ଆଧାର । ତେଣୁ ସେମାନେ ଆମ ଭାଷା-ଜାତୀୟତାକୁ ମାରିଦେବାକୁ ଚକ୍ରାନ୍ତ କଲେ । ସେମାନଙ୍କ ଦାପ୍ତରିକ ସୁବିଧା ଆଳରେ ଆମ ଭାଷାଭାଷୀ ଅଞ୍ଚଳକୁ ଭାଗ ଭାଗ କରି ପଡୋଶୀ ପ୍ରଦେଶମାନଙ୍କରେ ଯୋଖି ସେଠାରେ ଆମକୁ ଭାଷା ଭିତ୍ତିରେ ସଂଖ୍ୟାଲଘୁ କରାଇଦେଲେ ଓ ସେହି ପଡୋଶୀମାନଙ୍କ ଭାଷା ଆମ ଉପରେ ନଦିଦେଲେ । ଆମ ଭାଷା ଆମ ପରିଚାଳନାର ଭାଷା ହୋଇ ନରହିବାରୁ ଆମ ପରିଚୟ ଉଜୁଡ଼ିଯିବାକୁ ବସିଲା ।

ଏହି ପ୍ରେକ୍ଷାପଟରେ ଆରମ୍ଭ ହୋଇଥିଲା ଆମ ଭାଷାରେ ଆମ କାର୍ଯ୍ୟ ପାଇଁ ସ୍ଵତନ୍ତ୍ର ପ୍ରଦେଶ ସୃଷ୍ଟି ସକାଶେ ଆନ୍ଦୋଳନ ଓ ବ୍ରିଟିଶକୁ ଆମେ ବାଧ୍ୟ କରିଥିଲେ ଆମ ଭାଷାଭାଷୀ ଅଞ୍ଚଳକୁ ଏକାଠି କରି ଗଢିବା ପାଇଁ ଓଡ଼ିଶା । ସେହି ସମୟରୁ କୋଟିଆ ଗ୍ରାମପୁଞ୍ଜ ଓଡ଼ିଶାର । ସେହି ଗ୍ରାମପୁଞ୍ଜର ଅଧିବାସୀମାନେ ତେଲେଙ୍ଗାମାନଙ୍କ ସହ ଲଢେଇ କରି ନିଜ ମୌଳିକ ଓଡ଼ିଆ ପରିଚୟର ଭିତ୍ତି ଉପରେ ଓଡ଼ିଶାରେ ଥିଲେ ।

ସେହି କୋଟିଆବାସୀମାନେ ଆଜି ଯଦି ଆନ୍ଧ୍ର ସରକାରଙ୍କ ଆଧିପତ୍ୟ ପାଖରେ ମଥା ଅବନତ କରି ଆନ୍ଧ୍ର ପଞ୍ଚାଯତ ନିର୍ବାଚନରେ ଭୋଟ ଦେଇଛନ୍ତି ତାହା ପାଇଁ ଓଡ଼ିଶାର ଭାଷା ଅସ୍ମିତାକୁ ଭୟଙ୍କରଭାବେ ଜଖମ କରିଥିବା ନବୀନ ପଟ୍ଟନାୟକ ସମ୍ପୂର୍ଣ୍ଣତଃ ଦାୟୀ । ଓଡ଼ିଶାର ଭାଷା ଅସ୍ମିତା ଅକ୍ଷୁର୍ଣ୍ଣ ରଖିବା ପାଇଁ ଓଡ଼ିଶାର ପ୍ରଥମ ବିଧାନସଭା ଓଡ଼ିଶା ସରକାରୀ ଭାଷା ଆଇନ ତିଆରି କରିଥିଲା । ନବୀନ ପଟ୍ଟନାୟକ ଏହି ସରକାରୀ ଭାଷା ଆଇନକୁ ପ୍ରତିଦିନ ଜାଣିଶୁଣି ଉଲ୍ଲଂଘନ କରୁଛନ୍ତି କେବଳ ନୁହେଁ , ଏହାକୁ ଅକର୍ମଣ୍ୟ କରିଦେବା ପାଇଁ ଏଥିରେ ଧାରା ୪ ଓ ଧାରା ୪କ ଖଞ୍ଜିଛନ୍ତି ଜାଲିଆତି ବଳରେ ।

ଓଡ଼ିଆ ଜାତିର ଭାଷା ହିଁ ତାର ପରିଚୟ । ନବୀନ ପଟ୍ଟନାୟକ ଓଡ଼ିଆ ଭାଷାକୁ ରାଜ୍ୟ ପରିଚାଳନାର ଭାଷା ନକରାଇ ଓଡ଼ିଆ ଜାତିର ପରିଚୟକୁ ସଙ୍କଟ କବଳକୁ ଠେଲି ଦେଇଛନ୍ତି, ଯାହା ଉପାନ୍ତ ଓଡ଼ିଶାରେ ଓଡ଼ିଆ ଗରିମାକୁ ଅଧିକ ବିପର୍ଯ୍ୟସ୍ତ କରିଛି । ବଙ୍ଗ, ଝାଡଖଣ୍ଡ, ଛତିଶଗଡ ଓ ଆନ୍ଧ୍ର – ଏ ସମସ୍ତ ପ୍ରଦେଶ ଓଡ଼ିଶାରେ ଦେଖାଦେଇଥିବା ଏହି ଭାଷାହନନକାରୀ ଅରଜକତା ହେତୁ ଓଡ଼ିଶା ସୀମାରେ ହସ୍ତକ୍ଷେପ କରୁଛନ୍ତି । ଆନ୍ଧ୍ର ଆଜି ସୀମା ଲଙ୍ଘନ କରିଛି ।

ଦୁଃଖ ଓ ଲଜ୍ଜାର କଥା, ଥୋଡ଼େ ତୋଷାମଦିଆ ଓଡ଼ିଆ ଏପରି ଏକ ଲୋକକୁ ଆମ ଉପରେ ମୁଖ୍ୟମନ୍ତ୍ରୀ କରି ନଦିଛନ୍ତି, ଯେ କି ଆମ ସୀମା ସମସ୍ଯା ସମ୍ପର୍କରେ ସଚେତନ ନୁହନ୍ତି । ଏ ଲୋକ ଓଡ଼ିଆ ଭାଷାକୁ ମାରିଦେବା ପାଇଁ ଦଲାଲ ଲଗାଇଛନ୍ତି, କ୍ଯାବିନେଟ ସ୍କାମ ପରି ଅପରାଧ କରିଛନ୍ତି , ଜାଲିଆତି କରି କ୍ଯାବିନେଟ ପ୍ରସ୍ତାବ ବଦଳାଇଛନ୍ତି । ଯେଉଁ ଓଡ଼ିଆମାନେ ଆମ ଲୋକଙ୍କ ପାଖରେ ନେତାଗିରି ଦେଖାଉଛନ୍ତି ଓ ଏହି ଲୋକର ପଦଲେହନ କରୁଛନ୍ତି ସେ ସମସ୍ତେ ଆମ ଭାଷା ବିରୁଦ୍ଧରେ ନବୀନଙ୍କ ଏହି ସମସ୍ତ ଅପରାଧ ପାଇଁ ଓଡ଼ିଆ ଜାତି ପାଖରେ ଉତ୍ତରଦାୟୀ ।

କୋଟିଆ ଉପରେ ଆନ୍ଧ୍ରର ଆଧିପତ୍ୟ ବିସ୍ତାରର ଚରମ ସ୍ତରରେ ମଧ୍ୟ ନବୀନ ପଟ୍ଟନାୟକ ସେଠାକୁ ନିଜେ ଯାଇ ଆମ ଲୋକଙ୍କୁ ସେମାନଙ୍କ ଓଡ଼ିଆ ପରିଚୟ ଅକ୍ଷୁର୍ଣ୍ଣ ରଖିବାରେ ସାହାଯ୍ୟ କରିନାହାନ୍ତି । କୁଟିଆରେ ଘଟିଚାଲିଥିବା ଅଘଟଣ ସମ୍ପର୍କରେ ଓଡ଼ିଆ ଜାତିକୁ ସେ ଅବଗତ କରାଇନାହାନ୍ତି ।

ଲୌହ ପରଦା ଅନ୍ତରାଳରେ ରହି ନିଜକୁ ସମ୍ରାଟ ମନେକରୁଥିବା ଭୋଟଭିକାରୀଙ୍କ ହେତୁ ଓଡ଼ିଶା ଆଜି ଘୋର ଦୁର୍ଦ୍ଦିନରେ । ଚାରିଆଡ଼େ ଅରାଜକତା । ଆମ ଚଉସୀମାରେ ସୀମା ସଙ୍କଟ । ଅଣଓଡ଼ିଆଙ୍କ ସହ ହାତ ମିଳାଇ ଆମ ମୁଖ୍ୟମନ୍ତ୍ରୀ ଆମ ଭାଷାକୁ ଅକାମୀ କରିଦେଇଛନ୍ତି ; ଏହା କରିବାକୁ ବିଧାନସଭାରେ ବିଲ୍ ବଦଳାଇଛନ୍ତି, ୧୪.୩.୨୦୧୮ ତାରିଖରେ ରାଜ୍ୟ ମନ୍ତ୍ରୀମଣ୍ଡଳ ଗ୍ରହଣ କରିଥିବା ଓଡ଼ିଆଭାଷା ପାଇଁ ଅନୁକୂଳ ପ୍ରସ୍ତାବକୁ ଅନଧିକୃତ ଭାବେ କବର ଦେଇଛନ୍ତି; ନବବାବୁ ଦେଇଯାଇଥିବା ଆଇନକୁ ଶକ୍ତିଶାଳୀ ଓ ଅଲଙ୍ଘ୍ୟ  କରିବା ପାଇଁ ଆମେ ଆନ୍ଦୋଳନ କରୁଥିବା ବେଳେ ସେହି ଆଇନର ଶକ୍ତିହ୍ରାସ ପାଇଁ ଏ ବାବୁ ଭୟଙ୍କର ଜାଲିଆତି ପ୍ରୟୋଗ କରିଛନ୍ତି ; ଏହି ଜାଲିଆତି ଲୁଚାଇବାକୁ ଆମ ଆନ୍ଦୋଳନକାରୀମାନଙ୍କୁ ପୋଷା ମନାଇବା ପାଇଁ ଆର୍ଥିକ ଅମୋଘ ଅସ୍ତ୍ର ପ୍ରୟୋଗ କରିଛନ୍ତି ଓ ଯେଉଁ ଲୋକ ଓଡ଼ିଆରେ କାମ ନକରିବ ତାକୁ ପୁରସ୍କୃତ କରିବାକୁ ତଥା ଯିଏ ବାରମ୍ବାର ଆଇନ ଖିଲାପ ନ  କରିବ ତାକୁ ଦଣ୍ଡ ନ ଦେବାକୁ ଆଇନ କରିଛନ୍ତି ।

ଏହାଙ୍କ ଅରାଜକତା ହେତୁ କୋଟିଆ ଗଲା , ଓଡ଼ିଶାର ଚଉସୀମା ଏବେ ସଙ୍କଟରେ ।

ମୁଁ ତମ ପଛ ଆଉଁସୁଛି, ତମେ ମୋ ପଛ ଆଉଁସ: The Intellectsର “ପ୍ରବାସୀ ଭାଷା ସମ୍ମାନ -୨୦୨୧”

ସୁଭାଷ ଚନ୍ଦ୍ର ପଟ୍ଟନାୟକ

ମୁଁ ତମ ପଛ ଆଉଁସୁଛି, ତମେ ମୋ ପଛ ଆଉଁସ । ଯେଉଁ ଇଂରାଜୀ ଅପଭାଷା (slang)ରୁ ମୁଁ ଏହା ଆମଦାନୀ କରିଛି, ତାର ଆକ୍ଷରିକ ଅର୍ଥ ମୁଁ ଦେଇପାରୁନି, କାରଣ ତାହା ମୋ ବିଚାରରେ ଅତି ଅଶ୍ଳୀଳ । ମୁଁ କିନ୍ତୁ ଯାହା ଲେଖିବାକୁ ଯାଉଛି ତାହା ଏହି ଅବଧାରଣା ଉପରେ ଆଧାରିତ ।

ଦିଲ୍ଲୀରେ ଥିବା The Intellects ନାମକ ଗୋଷ୍ଠୀର ଅଧ୍ୟକ୍ଷ ଶ୍ରୀ ଦେବେନ୍ଦର ନାଥ ରାଉତ (Debendera Nath Rout)ଙ୍କଠାରୁ ମୁଁ ଏକ ପତ୍ର ପାଇଛି ଯହିଁରୁ ଜଣାଯାଏ – “ଓଡ଼ିଆ ଭାଷା ପ୍ରତି ପ୍ରତିବଦ୍ଧିତ” ହୋଇଥିବା ହେତୁ “ବରିଷ୍ଠ ସାମ୍ବାଦିକ ଶ୍ରୀ ପ୍ରଦ୍ୟୁମ୍ନ ଶତପଥି”ଙ୍କୁ “ପ୍ରବାସୀ ଭାଷା ସମ୍ମାନ -୨୦୨୧” ପ୍ରଦାନ ପାଇଁ ନିଷ୍ପତ୍ତି ହୋଇଛି । ସଂଗଠନର ଅଧ୍ୟକ୍ଷ ଶ୍ରୀ ଦେବେନ୍ଦର ନାଥ ରାଉତଙ୍କ ଆବାହକତ୍ଵରେ ଡଃ ଭଗବାନ ପ୍ରକାଶ, ଶ୍ରୀ ଅମରେନ୍ଦ୍ର ଖଟୁଆ ଓ ପ୍ର.ଉଦୟନାଥ ସାହୁଙ୍କୁ ନେଇ ଗଠିତ ବିଚାରକ ମଣ୍ଡଳୀ ଏହି ଚୟନ କରିଛନ୍ତି ଓ ବିଶ୍ଵ ଓଡିଆ ସଂସ୍ଥାନ ତଥା ଓଡିଆ ସୋସାଇଟି ଅଫ ଆମେରିକାର ଅଧ୍ୟକ୍ଷା ଶ୍ରୀମତୀ କୁକୁ ଦାସ, ଦିଲ୍ଲୀ ବିଶ୍ଵବିଦ୍ୟାଳୟର ପ୍ରାଧ୍ୟାପିକା ଡଃ ସୁବାସିନୀ ବାରିକ ଓ ସଂଗଠନର ସମ୍ପାଦକ ଶ୍ରୀ ଶ୍ୟାମାନୁଜ ଦାସଙ୍କ ଉପସ୍ଥିତିରେ ଏହି ନିଷ୍ପତ୍ତି ନିଆ ହୋଇଛି । ଏହି ଚୟନକାରୀମାନଙ୍କ ମଧ୍ୟରେ ଏପରି କିଛି ବ୍ୟକ୍ତି ଅଛନ୍ତି ଯାହାଙ୍କ ଚରିତ୍ର ପ୍ରଶ୍ନାତୀତ ନୁହେଁ । ଭବିଷ୍ୟତରେ ତାହା ଆଲୋଚିତ ହେବ ।

ମାତ୍ର ଯେଉଁମାନେ ଏପରି ସମ୍ମାନ ପ୍ରଦାନର ବ୍ୟବସାୟ ଚଳାଇଛନ୍ତି, ସେମାନେ ଓଡ଼ିଆ ଭାଷା ନାମରେ ଏ ବ୍ୟବସାୟ କଲାବେଳେ ଭାଷାକୁ କ୍ଷତି ପହଞ୍ଚାଇଥିବା କୌଣସି ବ୍ୟକ୍ତିକୁ “ଭାଷା ପ୍ରତି ପ୍ରତିବଦ୍ଧିତ” ବୋଲି କହି ସମ୍ବର୍ଦ୍ଧନା ଜଣାଇବା ଓଡ଼ିଆ ଜାତିର ଜାତୀୟ ଅସ୍ମିତା ଉପରେ ଯେ ଅତ୍ୟନ୍ତ କୁତ୍ସିତ ପଦାଘାତ, ତାହା ପ୍ରଶ୍ନାତୀତ ।

ଏହି ସମ୍ମାନ ଘୋଷଣା ପ୍ରେକ୍ଷାପଟରେ ଓଡ଼ିଆ ଭାଷାର ଗୋଛି କାଟୁଥିବା ଅଣଓଡ଼ିଆମାନେ ପରସ୍ପରକୁ ନିଶ୍ଚୟ ମଉଜମଉଜରେ କହୁଥିବେ : “ହେଇରେ ଦେଖ, ଓଡ଼ିଆ ଭାଷା ଆନ୍ଦୋଳନକୁ ସରକାରଙ୍କ ସୁପାରି ଖାଇ ଯିଏ ଛୁରୀ ମାରିଲା, ଦିଲ୍ଲୀ ଓ ବିଦେଶବାସୀ ପଲେ ଓଡ଼ିଆ ତାକୁ ଭାଷା ପାଇଁ ପ୍ରତିବଦ୍ଧତା କାରଣରୁ ସମ୍ମାନିତ କରୁଛନ୍ତି !” ଲଜ୍ଜା ! ଲଜ୍ଜା ! ଲଜ୍ଜା !

ଆମ ଭାଷାରେ ଆମ ରାଜ୍ୟ ପରିଚାଳନା ପାଇଁ ମୁଁ ଦେଇଥିବା ଆଇନ ସଂଶୋଧନ ପ୍ରସ୍ତାବ ଅନୁଯାୟୀ ବିଧେୟକ ପ୍ରସ୍ତୁତ କରିବାକୁ ରାଜ୍ୟ ମନ୍ତ୍ରୀମଣ୍ଡଳ ୧୪.୩.୨୦୧୮ ତାରିଖରେ ନିଷ୍ପତ୍ତି ନେଲା ପରେ ସେହି ପ୍ରସ୍ତାବ ଅନୁସାରେ ପ୍ରସ୍ତୁତ ଚିଠା ବିଧେୟକକୁ  ହଡଫ କରି ଏକ ଚିଠା ବିଧେୟକ ତା ସ୍ଥାନରେ ରଖି ୧.୫.୨୦୧୮ ତାରିଖରେ ସେହି ଜାଲ୍ ବିଧେୟକକୁ ସଂଖ୍ୟାଗରିଷ୍ଠତା ବଳରେ ପାରିତ କରାଇ ୪କ ନାମକ ଏପରି ଏକ କ୍ଷତିକାରକ ବ୍ୟବସ୍ଥା ଭାଷା ଆଇନରେ ଖଞ୍ଜିଦେଲେ ଆମ ମୁଖ୍ୟମନ୍ତ୍ରୀ ଯେ, ବିଧାନସଭା ତାଙ୍କ ବିରୁଦ୍ଧରେ ସ୍ଵାଧିକାର ଭଙ୍ଗ ବିଚାର କରୁବୋଲି ମୁଁ ସର୍ବ ସମ୍ମୁଖରେ ଦାବି କରିଥିଲି । ତେଣୁ, ଫୁଙ୍ଗୁଳା ହୋଇଯିବା ପୂର୍ବରୁ ଭାଷା ଆନ୍ଦୋଳନକୁ ଭାଙ୍ଗି ଦେବା ପାଇଁ ସେ ଓ ତାଙ୍କ ଅଣଓଡ଼ିଆ ଅମଲାପଲ ଷଡ଼ଯନ୍ତ୍ର ଚଳାଇଲେ । ଭାଷା ଆନ୍ଦୋଳନର ଯେଉଁ କଳାପତାକାଧାରୀମାନେ ତାଙ୍କ ଥୋପ ଗିଳିଲେ, ସେମାନଙ୍କ ଅଗ୍ରଗଣ୍ୟ ଆତତାୟୀ ଥିଲେ ପ୍ରଦ୍ୟୁମ୍ନ ଶତପଥି ।

ସେ ମୋର ଜଣେ ପୁରୁଣା ବନ୍ଧୁ ଓ ପ୍ରଶଂସକ ଥିଲେ । ଏହି କାରଣରୁ ମୁଁ ତାଙ୍କୁ ମୋ ପ୍ରତିଷ୍ଠିତ ଭାଷା ଆନ୍ଦୋଳନର ସଭାପତି ପଦ ଦେଇଥିଲି । ଏହି ପଦବି ବ୍ୟବହାର କରି ଭାଷା ଆନ୍ଦୋଳନ ବନ୍ଦ ହୋଇଗଲା ବୋଲି ସେ ଘୋଷଣା କଲେ, ଯେତେବେଳେ ମୁଖ୍ୟମନ୍ତ୍ରୀଙ୍କ ଜାଲିଆତି କବଳରୁ ଆମ ଭାଷାମାଆକୁ ରକ୍ଷା କରିବା ପାଇଁ ଆମକୁ ଆନ୍ଦୋଳନର ଚରମ ପର୍ଯ୍ୟାୟ ଆରମ୍ଭ କରିବାର ଥିଲା । ଆମ ଭାଷା ପ୍ରତି ଏପରି ବିଶ୍ଵାସଘାତକତା ଓଡ଼ିଶା ଇତିହାସରେ କେବେ ବି ଘଟିନାହିଁ । ମୁଁ ଏହି ସମସ୍ତ ତଥ୍ୟ ରାଜ୍ୟପାଳଙ୍କ ସମ୍ମୁଖରେ ରଖିଲା ପରେ ସେ ପାଇବାକୁ ଯାଉଥିବା କୋଟିଏରୁ ଉର୍ଦ୍ଧ୍ଵ ଟଙ୍କା ଅବଶ୍ୟ ଅଟକିଥିଲା । ତହିଁର ଶେଷ ସ୍ଥିତି ଜାଣିବାକୁ ମୁଁ ରାଜ୍ୟପାଳଙ୍କୁ ଲେଖିଛି ।

ଭାଷା ଆନ୍ଦୋଳନକୁ ଛୁରୀ ମାରି ପ୍ରଦ୍ୟୁମ୍ନ ଶତପଥୀ ଅବୈଧ ଶୈଳୀରେ ହାତେଇଥିବା ପାରିବାରିକ ଅର୍ଥାଗମର ଯେଉଁ ତଥ୍ୟ ମୁଁ ରାଜ୍ୟପାଳଙ୍କୁ ଦେଇ ତାଙ୍କର ହସ୍ତକ୍ଷେପ ଚାହିଁଥିଲି, ତାହା ସେତେବେଳେ ମୋ ନଭମଞ୍ଚରେ ପ୍ରକାଶିତ ହୋଇ ଓଡ଼ିଆ ଜାତି ଭିତରେ ସୁବିସ୍ତୃତ ପ୍ରସାରିତ ହୋଇଥିଲା । ତାହାକୁ ମୁଁ ଏଠାରେ ସଂଯୁକ୍ତ କରୁଛି । ବିଶ୍ଵାସ କରୁଛି, The Intellects ପରି ଇଂରାଜୀ ପରିଚୟସମ୍ପନ୍ନ ଓଡ଼ିଆଗୋଷ୍ଠୀ ଏହା ଅନୁଧ୍ୟାନ କରିବେ ଓ ଏଥିରେ ଥିବା ଅଭିଯୋଗକୁ ପାରିବେ ଯଦି ଖଣ୍ଡନ କରିବେ । ତା ନହେଲେ, ଓଡ଼ିଆ ଭାଷାଜନନୀର ସୁପାରି-ଆତତାୟୀ ପ୍ରଦ୍ୟୁମ୍ନ ଶତପଥୀଙ୍କୁ “ଓଡ଼ିଆ ଭାଷା ପ୍ରତି ପ୍ରତିବଦ୍ଧିତ” ଘୋଷଣା କରିଥିବାରୁ ଓଡ଼ିଆ ଜାତି ପାଖରେ କ୍ଷମା ଭିକ୍ଷା କରିବେ ।

ତାଙ୍କୁ ଚୟନ କରିଥିବା ବ୍ୟକ୍ତିଙ୍କ ଭିତରେ ଡଃ ଭଗବାନ ପ୍ରକାଶ ଅଛନ୍ତି, ଯେ ଜଣେ ସୁବିଦିତ ଓଡ଼ିଆ । ଓଡ଼ିଶା ସରକାରୀ ଭାଷା ଆଇନର କାର୍ଯ୍ୟକାରୀତା ପାଇଁ ଗଠିତ ମନ୍ତ୍ରୀସ୍ତରୀୟ କମିଟିରେ ମୋ ପରି ସେ ବି ଜଣେ ସଦସ୍ୟ ଥିଲେ । ଥରକ ପାଇଁ କମିଟି ବୈଠକରେ ଯୋଗ ଦେଇନଥିଲେ କି ସରକାରଙ୍କୁ କମିଟି ଜ୍ଞାତସାରରେ କୌଣସି ପରାମର୍ଶ ଦେଇନଥିଲେ । କିନ୍ତୁ ସେ ଜଣେ ଗଣ୍ୟମାନ୍ୟ ଓଡ଼ିଆ । ମୁଁ ଆଶା କରିବି, ଏପରି ଅବାଞ୍ଛିତ ସମ୍ମାନ ବାଣ୍ଟିବାରେ ତାଙ୍କ ହାତ ଥିବା ହେତୁ, ଏଠି ସଲଗ୍ନ ଲେଖାଟି ପାଠ କରି, ଏବଂ ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ : ମୁଖ୍ୟମନ୍ତ୍ରୀ ସଫେଇ ରଖନ୍ତୁ ଶୀର୍ଷକରେ ପ୍ରକାଶିତ ମୋର ୩୩ଟି ପ୍ରାମାଣିକ ନିବନ୍ଧ ପଢି ସେ ନିଜର ଭୁଲ ଅନୁଭବ କରିବେ ବା ନିଜ ଭୁଲ ସପକ୍ଷରେ ଯୁକ୍ତି ବାଢି ନିଜର ଭାବମୂର୍ତ୍ତି ଅକ୍ଷୁର୍ଣ୍ଣ ରଖିବେ ।

ମନେ ରଖିବାକୁ ହେବ ଯେ, ସରକାରଙ୍କଠାରୁ ସୁପାରି ନେଇ ଭାଷା ଆନ୍ଦୋଳନକୁ ଛୁରୀ ମାରିଥିବା ପ୍ରଦ୍ୟୁମ୍ନ ଶତପଥୀଙ୍କୁ ଭାଷା ପାଇଁ ପ୍ରତିବଦ୍ଧତାର ସମ୍ମାନ ପ୍ରଦାନ କରିବା ଆମ ଭାଷା ସ୍ଵାର୍ଥରେ ଆଦୌ ଗ୍ରହଣୀୟ ନୁହେଁ । ଯଦି ଏଥିରେ ନାମିତ ଲୋକମାନଙ୍କର ଅଣୁ ପ୍ରମାଣେ ଭାଷାପ୍ରେମ ଥାଏ ଓ ପରମାଣୁ ପ୍ରମାଣେ ମୁଖଲଜ୍ଜା ଥାଏ, ଅଣଓଡ଼ିଆଙ୍କ ଆଖିରେ ଓଡ଼ିଆ ଜାତିକୁ ଉପହସିତ କରାଇବାର ଏହି କୁତ୍ସିତ କୌଶଳ ପ୍ରତ୍ୟାହୃତ ହେବ । ଏହା ଉପରେ କେହି ଯଦି ବିତର୍କ କରନ୍ତି ମୁଁ ସ୍ଵାଗତ କରିବି ।

ସମ୍ମାନ ପ୍ରଦାନ ଯଦି ମୁଁ ତମ ପଛ ଆଉଁସୁଛି, ତମେ ମୋ ପଛ ଆଉଁସର କଳାକୌଶଳ ହୁଏ, ଏ ଜାତି ପାଇଁ ତା’ଠୁ ବଳି ଲଜ୍ଜାକର ଆଉ କିଛି ବି ହେବନି ।