Posts tagged Subhas Chandra Pattanayak

ସୁଭାଷ ଚନ୍ଦ୍ର ପଟ୍ଟନାୟକ

ଓଡ଼ିଶା ବିଧାନସଭାରେ ୧.୫.୨୦୧୮ରେ ପାରିତ ହୋଇଥିବା ଓଡ଼ିଶା ସରକାରୀ ଭାଷା (ସଂଶୋଧନ) ବିଧେୟକ,୨୦୧୮କୁ ଅନୁମୋଦନ ନ ଦେବା ପାଇଁ ମୁଁ ରାଜ୍ୟପାଳଙ୍କୁ ଦେଇଥିବା ପୂର୍ବ ସୂଚିତ ପତ୍ର ତିନୋଟି ମୁଖ୍ୟକାରଣ ଉପରେ ଆଧାରିତ ହୋଇଥିଲା । ଯଥା: (୧) ଏଥିରେ ଥିବା ୪କ ଧାରା ମୂଳ ଆଇନର ଉଦ୍ଦେଶ୍ୟ ପଣ୍ଡକାରକ ଓ ଜନବିରୋଧୀ, (୨) ବିଜୁ ପଟ୍ଟନାୟକ ୧୯୬୩ରେ ଖଞ୍ଜିଥିବା ୩କ ଧାରାର ବିଲୋପନ ପାଇଁ ମୋ ଦାବି ପ୍ରତି ଅବଜ୍ଞା ପ୍ରଦର୍ଶିତ ହୋଇଥିବା ହେତୁ “ସରକାରୀ ଭାଷା”ର ସଜ୍ଞା ସଙ୍କଟ ଗ୍ରସ୍ତ ଓ (୩) ଏହି ବିଧେୟକ ପାଇଁ ମୁଖ୍ୟମନ୍ତ୍ରୀ କ୍ୟାବିନେଟ୍ ସ୍କାମ୍ ପରି ଏକ ଅଭୂତପୂର୍ବ ରାଜନୈତିକ ଅପରାଧ କରି ବିଧାନସଭାକୁ ବିଭ୍ରାନ୍ତ କରିଥିବା ହେତୁ ବିଧେୟକଟି ଅବୈଧ ଓ ଅଗ୍ରାହ୍ୟ । ଏହି ତିନୋଟି କାରଣରୁ କୌଣସି ଗୋଟିକୁ ଖଣ୍ଡନ କରିବା ସରକାରଙ୍କ ପକ୍ଷେ ଥିଲା ଅସମ୍ଭବ ।

ମୋ ପତ୍ର ଉପରେ ରାଜ୍ୟପାଳ ଏହି ବିଧେୟକକୁ ନାମଞ୍ଜୁର କରିନଥିଲେ ମଧ୍ୟ, ତାଙ୍କ ହସ୍ତକ୍ଷେପ ହେତୁ ମୁଁ ଦର୍ଶାଇଥିବା ଉପରୋକ୍ତ ୧ମ ଓ ୨ୟ କାରଣର ଯଥାର୍ଥତା ସ୍ଵୀକାର କରି ସରକାର କିପରି ସେହି ୨୦୧୮ରେ ଭାଷା ଆଇନର ୨ୟ ସଂଶୋଧନ ଆଣିବାକୁ ବାଧ୍ୟ ହୋଇଥିଲେ, ତାହା ପରେ ଆଲୋଚନା କରିବା । ବର୍ତ୍ତମାନ ପାଇଁ ଏତିକି କୁହାଯାଇପାରେ ଯେ, ମୋ ପତ୍ର ଉପରେ ରାଜ୍ୟପାଳଙ୍କ ତନାଘନାରେ ଅତର୍ଛି , “ମୂଳୁ ମାରିଲେ ଯିବ ସରି” ନୀତିରେ ଯେ କୌଣସି ପ୍ରକାରେ ଭାଷା ଆନ୍ଦୋଳନକୁ ଭାଙ୍ଗିଦିଆଯିବା ଉପରେ ମୁଖ୍ୟମନ୍ତ୍ରୀ ଗୁରୁତ୍ଵ ଦେଇଥିଲେ । ଫଳରେ ୨୨.୫.୨୦୧୮ରୁ ଘୁମେଇ ପଡ଼ିଥିବା ଶ୍ରୀମତୀ ପ୍ରଦ୍ୟୁମ୍ନ ଶତପଥୀ (ମାନସୀ ଷଡଙ୍ଗୀ)ଙ୍କ ନଥି ୧୯.୬.୨୦୧୮ ଅପରାହ୍ନରେ ସକ୍ରିୟ ହୋଇଉଠିଲା ।

ଚାପ ପ୍ରୟୋଗ

ଉଚ୍ଚ ଶିକ୍ଷା ବିଭାଗର ଅତିରିକ୍ତ ଶାସନ ସଚିବ କୃପାସିନ୍ଧୁ ମିଶ୍ରଙ୍କ ଚାପରେ ଅନୁବିଭାଗ ଅଧିକାରୀ ପ୍ରତାପ କୁମାର ରାଉତ ନଥିଟିକୁ ପୁନଃକ୍ରିୟ କରିଥିଲେ ମଧ୍ୟ, ଏହା ହିଁ ଲେଖିଲେ ଯେ, ଅନୁସ୍ମାରକ ସତ୍ତ୍ୱେ ଉଚ୍ଚଶିକ୍ଷା ନିର୍ଦ୍ଦେଶକ ସରକାରଙ୍କ ୨୨.୬.୨୦୧୫ତାରିଖର୧୩୨୯୦ ପତ୍ରାଙ୍କସମ୍ପନ୍ନ ଆଦେଶ ଉପରେ କୌଣସି ଉତ୍ତର ଦେଇନାହାନ୍ତି (ଟିପ୍ପଣୀ ୩, ତାରିଖ ୧୯.୬.୨୦୧୮ , ସମୟ ଅପରାହ୍ନ ୩ଟା ୩୯ ମିନିଟ ୫୯ ସେକେଣ୍ଡ) । ଏହି ଟିପ୍ପଣୀ ସରକାରଙ୍କ ଅଭିସନ୍ଧିକୁ ସାହାଯ୍ୟ କରୁନଥିଲା । କାରଣ, ଏହା ଶ୍ରୀମତୀ ଷଡଙ୍ଗୀଙ୍କ ବିରୁଦ୍ଧରେ ଚାକିରି ଭଙ୍ଗ ଆଦେଶକୁ ପୁନରୁଜ୍ଜୀବୀତ କରୁଥିଲା । ଅପରପକ୍ଷେ ପୂର୍ବରୁ ପ୍ରଦତ୍ତ ଏକ ବିଧିବଦ୍ଧ ଆଦେଶ ରୂପେ ଏହା ଥିଲା ଅନତିକ୍ରମଣୀୟ ।

ନୂଆ ଖସଡ଼ା

ସୁତରାଂ ଅତିରିକ୍ତ ଶାସନ ସଚିବ କୃପାସିନ୍ଧୁ ମିଶ୍ର ଉଚ୍ଚ କର୍ତ୍ତୃପକ୍ଷଙ୍କ ସହ ପରାମର୍ଶ କଲେ ଓ ସେଦିନ ରାତିରେ ଯେଉଁ ନୂଆ ଖସଡ଼ା ପ୍ରସ୍ତୁତ ହେଲା, ତଦନୁଯାୟୀ ତହିଁ ପରଦିନ ଅଫିସ ଖୋଲୁ ଖୋଲୁ ସରକାରଙ୍କ ୨୨.୬.୨୦୧୫ ତାରିଖର ଆଦେଶ ଉପରେ କୁଠାରାଘାତ କରିଥିଲେ । ଆଦେଶଟିର ମାନ୍ୟତା ଉପରେ ଦୃଷ୍ଟି ଆକର୍ଷଣ କରି ଅନୁବିଭାଗୀୟ ଅଧିକାରୀ ଦେଇଥିବା ପ୍ରଥମ ଟିପ୍ପଣୀଟିକୁ ଅକାମି କରିଦେବା ମତଲବରେ ସେ ତହିଁ ଉପରେ ଏକ ବ୍ୟାଖ୍ୟା ରଖିଲେ ଶାସନ ସଚିବଙ୍କ ଉଦ୍ଦେଶ୍ୟରେ , ଯେଉଁଥିରେ ସେ ନିଜ ଅଧ୍ୟକ୍ଷତାରେ ଏକ କମିଟି ଗଠନ କରି , ସେହି କମିଟି ଦିନକ ପରେ, ଅର୍ଥାତ୍ ୨୨.୬.୨୦୧୮ ତାରିଖରେ ଶ୍ରୀମତୀ ଷଡଙ୍ଗୀଙ୍କ କର୍ମକ୍ଷେତ୍ରରେ ଯୋଗଦାନ ବିଷୟରେ ସାନି ନିଷ୍ପତ୍ତି ନେବ ଓ ସେହିଦିନ ହିଁ ତହିଁ ଉପରେ ଆବଶ୍ୟକୀୟ ଆଦେଶ ପାଇଁ ତାହା ଶାସନ ସଚିବଙ୍କୁ ପ୍ରଦାନ କରାଯିବ ବୋଲି ଟିପ୍ପଣୀ ଦେଲେ (ଟିପ୍ପଣୀ ୪, ତାରିଖ ୨୦.୬.୨୦୧୮ , ସମୟ ସକାଳ ୧୦ଟା ୧୫ ମିନିଟ ୧୬ ସେକେଣ୍ଡ) । ଏପରି ପୂର୍ବ ନିର୍ଦ୍ଧାରିତ କାର୍ଯ୍ୟ ନିର୍ଘଣ୍ଟ ଅନୁସାରେ ନଥି ଚାଲିବା ଉଚ୍ଚ ଶିକ୍ଷା ବିଭାଗର ଜୀବନରେ କେବେ ଘଟିନଥିଲା ।

ଅସାଧାରଣ ତତ୍ପରତା

ଯେଉଁ ତତ୍ପରତାର ସହ ଏ ନଥି ଆଗେଇଲା ତାହା ଥିଲା ଅନନ୍ୟସାଧରଣ । ମାତ୍ର ଅଧଘଣ୍ଟାକରେ ଶାସନ ସଚିବ ବିଷ୍ଣୁପଦ ସେଠି “ଯଥା ପ୍ରସ୍ତାବିତ” ବୋଲି ଲେଖି ଧାର୍ଯ୍ୟ ପଥରେ ଆଗେଇଯିବାକୁ ଅତିରିକ୍ତ ଶାସନ ସଚିବଙ୍କୁ ଆଦେଶ ଦେଲେ (ଟିପ୍ପଣୀ ୫, ତାରିଖ ୨୦.୬.୨୦୧୮ , ସମୟ ସକାଳ ୧୦ଟା ୪୬ ମିନିଟ ୧୦ ସେକେଣ୍ଡ) । ଦି ଘଣ୍ଟା ବି ଯାଇନି, ଦିନ ୧୨ଟା୧୨ମିନିଟ ୪୮ ସେକେଣ୍ଡରେ ନିଜ ଅଧ୍ୟକ୍ଷତାରେ କମିଟି ଗଢି ତହିଁରେ ତାଙ୍କର ଆଜ୍ଞାଧୀନ ଜଣେ ଉପନିର୍ଦ୍ଦେଶକ (ବେସରକାରୀ କଲେଜ-୨)ଙ୍କୁ ତଥା ଅଡ଼ଶପୁର କଲେଜ ଅଧ୍ୟକ୍ଷଙ୍କୁ ସଭ୍ୟ ଭାବେ ସଂସ୍ଥିତ କରି ସେମାନଙ୍କୁ ୨୨.୬.୨୦୧୮ ତାରିଖରେ କମିଟି ବୈଠକରେ ଯୋଗଦେବାକୁ ନୋଟିସ୍ ଚିଠା କରି ପେଶ୍ କରିବାକୁ ଅନୁଭିବାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଲେ ଅତିରିକ୍ତ ଶାସନ ସଚିବ ମହୋଦୟ । ମାତ୍ର ୪୦ ମିନିଟରେ ଚିଠା ପେଶ୍ ହେଲା ଓ ତଦନୁସାରେ ବୈଠକ ବି ଅନୁଷ୍ଠିତ ହେଲା ।

ବୋଲେ ହୁଁ ଟି, ବୋଲେ ନା ଟି

ଆଜ୍ଞାଧୀନ ଉପନିର୍ଦ୍ଦେଶକ (ଜଣେ ସରକାରୀ କର୍ମଚାରୀ) ଶ୍ରୀମତୀ ଷଡଙ୍ଗୀଙ୍କୁ ସରକାର ସାହାଯ୍ୟ କରିବାକୁ ଚାହୁଁଥିବା ଜାଣି ଅତିରିକ୍ତ ଶାସନ ସଚିବଙ୍କ କଥାରେ ମୁଣ୍ଡ ଟୁଙ୍ଗାରୁଥିବା ବେଳେ ତାଙ୍କ ଯୋଗଦାନ (joining) ଅଡ଼ଶପୁର କଲେଜରେ ସମ୍ଭବ ନୁହେଁ ବୋଲି କଲେଜ ଅଧ୍ୟକ୍ଷ ସ୍ପଷ୍ଟ କରିଦେଇଥିଲେ । ଅନଧିକୃତ ଅନୁପସ୍ଥିତି କାରଣରୁ ତାଙ୍କ ନିଯୁକ୍ତି କାର୍ଯ୍ୟତଃ ସେହିଦିନ ଶେଷ ହୋଇସାରିଛି, ଯେଉଁ ଦିନ କଲେଜ ପରିଚାଳନା କର୍ତ୍ତୃପକ୍ଷ ସେଥିପାଇଁ ନିଷ୍ପତ୍ତି ନେଇ ଥିଲେ ବୋଲି କହିଥିଲେ ଅଧ୍ୟକ୍ଷ । ସେ ଦୃଢତାର ସହ କହିଥିଲେ, ପରିଚାଳନା କମିଟି ଗ୍ରହଣ କରିଥିବା ନିଷ୍ପତ୍ତିର ଅନୁମୋଦନ ପାଇଁ କଲେଜର ଚିଠି ଉପରେ ଉଚ୍ଚଶିକ୍ଷା ନିର୍ଦ୍ଦେଶକ ଶୋଇ ରହିବା ସେହି ନିଷ୍ପତ୍ତିର ବିଲୋପୀକରଣ ନୁହେଁ । ସୁତରାଂ ତାଙ୍କ କଲେଜରେ ଶ୍ରୀମତୀ ଷଡଙ୍ଗୀଙ୍କର ଆଦୌ ବିଧିମନ୍ୟ ସ୍ଥିତି ନଥିବା ବେଳେ, ସେଠି ତାଙ୍କ ଯୋଗଦାନ ପତ୍ର (joining report) କିଏ କେଉଁ ଅଧିକାରରେ ଗ୍ରହଣ କରିବ ବୋଲି ପ୍ରଶ୍ନ ଉଠାଇଥିଲେ ଅଧ୍ୟକ୍ଷ ।

କାରସାଦି

ଅଧ୍ୟକ୍ଷଙ୍କର ଏହି ଯୁକ୍ତିଯୁକ୍ତ କଥାକୁ ଦସ୍ତାବିଜଭୁକ୍ତ ନ କରି, ଶ୍ରୀମତୀ ଷଡଙ୍ଗୀ ସେହି କଲେଜରେ ଯୋଗ ଦେବେ ଓ ସମ୍ପୃକ୍ତ କଲେଜ ଅଧ୍ୟକ୍ଷ ତାଙ୍କ ଯୋଗଦାନ ପତ୍ର ଗ୍ରହଣ କରିବେ ବୋଲି ସିଦ୍ଧାନ୍ତ ହୋଇଥିବା ଉଲ୍ଲେଖ କରି ଟିପ୍ପଣୀ ପେଶ୍ କରିବାକୁ ଅନୁବିଭାଗ ଅଧିକାରୀଙ୍କୁ କୁହାଗଲା ଓ ଏହି ଟିପ୍ପଣୀରେ ପୂର୍ବ ଆଦେଶ ରଦ୍ଦ ହୋଇଯାଇଥିବା କଥା ଉଲ୍ଲେଖ କରିବାକୁ ବି ନିର୍ଦ୍ଦେଶ ଦିଆଗଲା । ଅତିରିକ୍ତ ଶାସନ ସଚିବ ନିଜେ ଏପରି କାରସାଦି କରିଥିଲେ କି ଉପର ଚାପରେ? ତଦନ୍ତ ସାପେକ୍ଷ ।

ପ୍ରଣିଧାନ ଯୋଗ୍ୟ ଟିପ୍ପଣୀ

ଅନୁବିଭାଗୀୟ ଅଧିକାରୀ ଯେଉଁ ଟିପ୍ପଣୀ ଦରଜ କଲେ ତାହା ବିଶେଷ ପ୍ରଣିଧାନ ଯୋଗ୍ୟ । ଇଂରାଜୀ ଭାଷାରେ ଲିଖିତ ସେହି ଟିପ୍ପଣୀଟି ନିମ୍ନରେ ଅବିକଳ ଉଦ୍ଧୃତ୍ତ ହେଲା :

1. In supersession of all orders passed on the issue, Smt. Manasi Sarangi will be instructed by the DHE to join in her present place of posting i.e. U.N.(Auto) College , Adaspur within seven days of receipt of this order.
2. She will submit an undertaking through affidavit with her joining report before the Principal to abide by future Govt. decision regarding her absence period.
3. The Principal will be instructed to accept the joining of Smt. Sarangi and to allow her to work until further Govt. orders. (ଟିପ୍ପଣୀ ୯, ତାରିଖ ୨୨.୬.୨୦୧୮, ସମୟ : ଅପରାହ୍ନ ୩ଟା ୪୯ ମିନିଟ ୩୩ ସେକେଣ୍ଡ)

ଏହି ଟିପ୍ପଣୀଟି ସରକାରଙ୍କୁ ଅଧିକ ଅଡୁଆରେ ପକାଇଲା । କାରଣ, ୨୦୧୫ରେ ସରକାର ନେଇଥିବା ନିଷ୍ପତ୍ତିକୁ ଏପରି ଏକ କ୍ଷମତାହୀନ କମିଟି ବାତିଲ କରିବା ଥିଲା ଅସଙ୍ଗତ । ଅପରପକ୍ଷେ, ଶ୍ରୀମତୀ ଷଡଙ୍ଗୀଙ୍କ ପାଇଁ ୨ ନମ୍ବର ନିଷ୍ପତ୍ତିଟି ମଧ୍ୟ ଅଡୁଆଜନକ ଥିଲା । କାରଣ ତାଙ୍କ ଅନଧିକୃତ ଅନୁପସ୍ଥିତି ଉପରେ ସରକାର ଭବିଷ୍ୟତରେ ଯାହା ନିଷ୍ପତ୍ତି ନେବେ ତାହାକୁ ମାନିବାକୁ ସେ ଏକ ସତ୍ୟପାଠ ଭିତ୍ତିକ ଅଙ୍ଗୀକାର ପତ୍ର ଦାଖଲ କରିବାକୁ କୁହା ହୋଇଥିବାରୁ ଚାକିରିରେ ନିୟମିତ ହୋଇଯିବେ ବୋଲି ତାଙ୍କୁ ଯେଉଁ ଭରସା ଦିଆ ହୋଇଥିଲା ଏଥିରେ ତାହା ଅତୁଟ ରହିପାରୁ ନ ଥିଲା । ତେଣୁ, ସେ ଏହାକୁ ଗ୍ରହଣକରିବା ପାଇଁ ପ୍ରସ୍ତୁତ ନଥିଲେ । ସମୟ ଗଡିଯାଉଥିଲା ଓ କଳାପତାକା ଅଭିଯାନର ପୁନରାରମ୍ଭ ପାଖେଇ ଆସୁଥିଲା ।

ସରକାରୀ ସ୍ତରୀୟ ଦୃଶ୍ୟପଟ ଏହିପରି ଥିବା ବେଳେ, ୨୮.୬.୨୦୧୮ରେ ଭାଷା ଆଇନର ଭୁଲ ସଂଶୋଧନ ସାନି ସଂଶୋଧନ ଦ୍ଵାରା ସଜଡ଼ା ହେଉ ବୋଲି ମୁଁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲି । ୪.୭.୨୦୧୮ରେ “ଏ ମାସ ୧୬ରୁ ପୁନଶ୍ଚ କଳାପତାକା ଅଭିଯାନ : କାହିଁକି?” ଶୀର୍ଷକରେ ମୋର ଆଲୋଚନା ସରକାରଙ୍କ ଛାତିରେ ଛନକା ଭର୍ତ୍ତିକଲା । କାରଣ ବିଧାନସଭାର ବର୍ଷାକାଳୀନ ଅଧିବେଶନରେ ଭାଷା ଆଇନ ଉହାଡ଼ରେ ହୋଇଥିବା ତଞ୍ଚକତା ଓ କ୍ୟାବିନେଟ୍ ସ୍କାମ୍ ଦ୍ଵାରା ବିଧାନସଭାର ସ୍ଵାଧିକାର ଭଙ୍ଗ ଉପରେ ଆଲୋଚାନା ପାଇଁ ଯଥେଷ୍ଟ ଖୋରାକ ମୁଁ ଏହି ନିବନ୍ଧରେ ଭର୍ତ୍ତି କରିଥିଲି ।

ଅଡୁଆରେ ସରକାର

ସମ୍ଭାବ୍ୟ ସ୍ଵାଧିକାର ଭଙ୍ଗ ଅଭିଯୋଗରୁ ବଞ୍ଚିବା ପାଇଁ ମୁଖ୍ୟମନ୍ତ୍ରୀଙ୍କ ସକାଶେ ଏକମାତ୍ର ବାଟ ଥିଲା ବର୍ଷାକାଳୀନ ଅଧିବେଶନରେ ଭାଷା ଆଇନ ସମ୍ପର୍କୀୟ ଚର୍ଚ୍ଚା ଯେପରି ନ ହୁଏ ତା ପାଇଁ କୌଣସି ନା କୌଣସି ପ୍ରକାରେ କଳାପତାକା ଅଭିଯାନ ବନ୍ଦ କରାଇବା ।

ସେଥିପାଇଁ ସଉଦା

ସେଥିପାଇଁ ଆବଶ୍ୟକ ଥିଲା ଯେକୌଣସି ପ୍ରକାରେ ହେଉ ପଛେ, ମାନସୀ ଷଡଙ୍ଗୀଙ୍କୁ ଚାକିରି ଦିଆଇ ପ୍ରଦ୍ୟୁମ୍ନ ଶତପଥୀଙ୍କୁ କଳାପତାକା ପାଇଁ ଲୋକ ଯୋଗାଇବାରୁ ବିରତ କରାଇବା ।

ସୁତରାଂ, ୧୧.୭.୨୦୧୮ ତାରିଖରେ ଆରମ୍ଭ ହେଲା ଯେକୌଣସି ପ୍ରକାରେ ହେଉ ପଛେ ମାନସୀ ଷଡଙ୍ଗୀଙ୍କୁ ଚାକିରିରେ ପୁନଃ ସଂସ୍ଥିତା କରିବାର ପ୍ରକ୍ରିୟା ।

ଅନୁବିଭାଗୀୟ ଅଧିକାରୀ କୌଣସି ନୀତିବିରୁଦ୍ଧ କାମ କରିବାକୁ ମଙ୍ଗୁ ନଥିବା ହେତୁ, ସୂର୍ଯ୍ୟ ନାରାୟଣ ମହାପାତ୍ର ନାମକ ଜଣେ ଅନୁଶାସନ ସଚିବ ଏହି କାମ କଲେ । ତାଙ୍କ ହେତୁ ପ୍ରଶାସନିକ ଅଚଳାବସ୍ଥା ଦୂର ହୋଇଗଲା ଓ ୧୬.୭.୨୦୧୮ରେ ଶ୍ରୀମତୀ ଷଡଙ୍ଗୀଙ୍କୁ ଚାକିରିରେ ପୁନଃ ସଂସ୍ଥିତା କରିବା ପ୍ରସ୍ତାବ ଉପରେ ଉଚ୍ଚ ଶିକ୍ଷା ମନ୍ତ୍ରୀ ଅନନ୍ତ ଦାସ ଦିନ ୨ଟା ୧୧ ମିନିଟରେ ଦସ୍ତଖତ କଲେ । ସନ୍ଧ୍ୟାବେଳେ କଳା ପତାକା ଅଭିଯାନରୁ ଦୂରେଇ ରହି ଅର୍ଥମନ୍ତ୍ରୀ ଶଶୀ ବେହେରାଙ୍କ ମାଧ୍ୟମରେ ଏ ସମ୍ପର୍କରେ ସୁନିଶ୍ଚିତ ହେବା ପରେ କଳାପତାକା ଅଭିଯାନ ବର୍ଷା ଅଧିବେଶନ ପର୍ଯ୍ୟନ୍ତ ବନ୍ଦ ରହିଲା ବୋଲି ଘୋଷଣା କଲେ ପ୍ରଦ୍ୟୁମ୍ନ ଶତପଥୀ ସନ୍ଧ୍ୟା ୭ଟାରେ, ସରକାରଙ୍କ ସହ ହୋଇଥିବା ଗୋପନ ଚୁକ୍ତି ଅନୁସାରେ । (କ୍ରମଶଃ)

ନିଉଜ ସିଣ୍ଡିକେଟ
ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ଓଡ଼ିଶା ସରକାରୀ ଭାଷା ନିୟମାବଳୀ ଓଡ଼ିଆ ଭାଷା ପ୍ରତି ବିପଜ୍ଜନକ ହୋଇଥିବା ହେତୁ ତାହାକୁ ତୁରନ୍ତ ଲୋପ କରିବା ପାଇଁ ଓ ଓଡ଼ିଆରେ କମ କରୁନଥିବା ବ୍ୟକ୍ତି ବିରୁଦ୍ଧରେ ଦଣ୍ଡ ବିଧାନ ମାମଲା କରିବାକୁ ପ୍ରତ୍ଯେକ ଓଡ଼ିଆଙ୍କୁ ଅଧିକାର ଦିଆଯାଇ ସାନି ବିଧାନ ପ୍ରଣାୟକ କରିବାକୁ ଆଜି ଭୁବନେଶ୍ବର ନେହେରୁ ଯୁବ ପ୍ରତିଷ୍ଠାନରେ ଏକ ସାମ୍ବାଦିକ ସମ୍ମିଳନୀରେ ସରକାରଙ୍କୁ ଆହ୍ଵାନ ଦେଇଛନ୍ତି ।

ସେ କହିଛନ୍ତି,

ଓଡ଼ିଆ ସରକାରୀ ଭାଷା (ସଂଶୋଧନ) ନିୟମାବଳୀ, ୨୦୧୯ ଓଡ଼ିଆ ଜାତିର ଭାଷା ଅଧିକାରକୁ ବିପଦାପନ୍ନ କରୁଛି । ମୁଁ ତା’ର ତୁରନ୍ତ ବିଲୋପନ ଦାବି କରୁଛି ।
ଓଡ଼ିଆ ଜାତିର ସମସ୍ତ ଦାପ୍ତରିକ କାମ ଓଡ଼ିଆ ଭାଷାରେ ହେବା ସକାଶେ ଓଡ଼ିଆ ଜାତି ୧୮୭୦ରୁ ୧୯୩୬ ପର୍ଯ୍ୟନ୍ତ ସଂଗ୍ରାମ କରି ଓଡ଼ିଶା ପ୍ରଦେଶ ସୃଷ୍ଟ କରିଛି । ଓଡ଼ିଶା ପ୍ରଦେଶ ସୃଷ୍ଟିର ଏକମାତ୍ର ଉଦ୍ଦେଶ୍ୟ ହେଲା ଓଡ଼ିଆରେ ଶାସନ ।
ସେହେତୁ, ସ୍ଵାଧୀନତା ଲାଭ ପରେ ଏହି ଉଦ୍ଦେଶ୍ୟ କାର୍ଯ୍ୟକାରୀ କରିବାକୁ ଓଡ଼ିଶାର ପ୍ରଥମ ବିଧାନସଭା ୧୯୫୪ରେ ଓଡ଼ିଶା ସରକାରୀ ଭାଷା ଆଇନ ପ୍ରଣୟନ କରିଥିଲା । ଏହି ଆଇନର ଧାରା ୧ର ଉପଧାରା (୨) ଓ ଉପଧାରା (୩) ବଳରେ ଏହା ସମଗ୍ର ଓଡ଼ିଶାରେ ତତ୍କାଳ ବଳବତ୍ତର ହୋଇଥିଲା । ଏହାର ଧାରା ୨ର ଉପଧାରା (୧) ଅନୁସାରେ ଓଡ଼ିଶାରେ ସମ୍ପୂର୍ଣତଃ ସମସ୍ତ ଓ ଯେକୌଣସି ଦାପ୍ତରିକ କାମ ଓଡ଼ିଆରେ ହେବା ଧାର୍ଯ୍ୟ କରା ହୋଇଥିଲା ।
ମାତ୍ର ୨୦୧୯ରେ ରାଜ୍ୟ ସରକାର ଯେଉଁ ନିୟମାବଳୀ ପ୍ରବର୍ତ୍ତନ କରିଛନ୍ତି ତାହା ମୂଳ ଭାଷା ଆଇନ ସୃଷ୍ଟି କରିଥିବା ଏହି ଭାଷା ଅଧିକାରକୁ ପଣ୍ଡ କରୁଛି । ଯଥା, ନିୟମ ୫-କ (୧) ରେ ଅଛି, “ସରକାରୀ କାର୍ଯ୍ୟରେ ଓଡ଼ିଆ ଭାଷାର ବ୍ୟାପକ ବ୍ୟବହାର କରୁଥିବା କର୍ମଚାରୀଙ୍କୁ ପୁରସ୍କୃତ କରାଯିବ । ଏହାର ଅର୍ଥ ହେଲା , ଯେଉଁ କର୍ମଚାରୀମାନେ ସମ୍ପୂର୍ଣ ଭାବେ ଓଡ଼ିଆରେ କାମ ନ କରିବେ ସେମାନଙ୍କୁ ରାଜ୍ୟ ସରକାର ପୁରସ୍କାର ଦେବେ । ସେହିପରି ନିୟମ ୫-କ(୨) ଓଡ଼ିଆରେ କାମ ନକରିବା କର୍ମଚାରୀଙ୍କ ବିରୁଦ୍ଧରେ ଯେପରି କୌଣସି ଆଇନଗତ କାର୍ଯ୍ୟାନୁଷ୍ଠାନ ହୋଇନପାରେ ତାର ବ୍ୟବସ୍ଥା କରିଛି । ଏଥିରେ କୁହା ହୋଇଛି “ଓଡ଼ିଆ ଭାଷାର ପର୍ଯ୍ୟାପ୍ତ ବ୍ୟବହାରରେ ବାରମ୍ବାର ଖିଲାପ କଲେ ,ଖିଲାପକାରୀ କର୍ମଚାରୀଙ୍କ ବିରୁଦ୍ଧରେ ଓଡ଼ିଶା ବେସାମରିକ ସେବା ଅଧିନିୟମ, ୧୯୬୨ ଅନୁଯାୟୀ ଆବଶ୍ୟକ କାର୍ଯ୍ୟାନୁଷ୍ଠାନ ହେବ”। ଅଥଚ “ପର୍ଯ୍ୟାପ୍ତ ବ୍ୟବହାର” ସଜ୍ଞାୟିତ ହୋଇନାହିଁ କି “ବାରମ୍ବାର ଖିଲାପ” କାହାକୁ କୁହାଯିବ ତାହା ମଧ୍ୟ ସଜ୍ଞାୟିତ ହୋଇନାହିଁ । ଏପରି ଅବସ୍ଥାରେ , ଏହି ନିୟମାବଳୀରେ ଯେଉଁ କାର୍ଯ୍ୟାନୁଷ୍ଠାନ କଥା କୁହା ହୋଇଛି ତାହା ମଧ୍ୟ ହେବ ନାହିଁ ।
“ଓଡ଼ିଶା ବେସାମରିକ ସେବା ଅଧିନିୟମ, ୧୯୬୨ ଅନୁଯାୟୀ ଆବଶ୍ୟକ କାର୍ଯ୍ୟାନୁଷ୍ଠାନ ହେବ” ବୋଲି ଯାହା କୁହା ହୋଇଛି, ତାହା ନୂଆ ବୋତଲରେ ପୁରୁଣା ମଦ । ୧୯୬୩ରେ ବିଜୁ ପଟ୍ଟନାୟକ ଓଡ଼ିଆ ଭାଷାକୁ ଛୁରି ମାରି ଭାଷା ଆଇନରେ ସଂଶୋଧନ ଦ୍ଵାରା ଇଂରାଜୀ ଭାଷାକୁ ଓଡ଼ିଶା ଉପରେ ନଦି ଦେବା ପରେ ସରକାରୀ ଭାଷା ଭାବେ ଓଡ଼ିଆ ଭାଷା ଯେଉଁ ସଙ୍କଟର ସମ୍ମୁଖୀନ ହୋଇଥିଲା ତହିଁର ପ୍ରତିକାର ପାଇଁ ରାଜେନ୍ଦ୍ରନାରାୟଣ ସିଂହ ଦେଓଙ୍କ ସରକାର ୬।୪।୧୯୬୮ ତାରିଖରେ ୭୧୧୩ ସଂଖ୍ୟକ ଅଧିସୂଚନା ଜାରିକରିଥିଲେ, ଯେଉଁଥିରେ ଲେଖା ହୋଇଥିଲା, ୧୪।୪।୧୯୬୮ ତାରିଖରୁ ଯେଉଁମାନେ ଓଡ଼ିଆରେ କାମ ନ କରିବେ ସେମାନଙ୍କ ବିରୁଦ୍ଧରେ ଓଡ଼ିଶା ବେସାମରିକ ସେବା ଅଧିନିୟମ ଅନୁସାରେ କାର୍ଯ୍ୟାନୁଷ୍ଠାନ ହେବ । ଏପରି ବହୁ ବାର ଏହି ଏକା ଆଦେଶ ହୋଇଛି । ଆଜିଯାଏଁ କାହାରି ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । କାରଣ ଆଇନ ଅମାନ୍ୟକାରୀ କୌଣସି କର୍ମଚାରୀ ନିଜକୁ ନିଜେ ଦଣ୍ଡିତ କରେନାହିଁ ।
ତେଣୁ ଓଡ଼ିଆରେ କାମ ନକରିବା କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନର ଅଧିକାର ସାଧାରଣ ଲୋକର ରହିବା ଆବଶ୍ୟକ । ଭାଷା ଅଧିକାର ଏକ ସହଜାତ ଅଧିକାର ହୋଇଥିବା ହେତୁ , ଏହା ଏକ ଅଲିଖିତ ମୌଳିକ ଅଧିକାର । ଅନ୍ୟ ମୌଳିକ ଅଧିକାରର ସୁରକ୍ଷା ସକାଶେ ଯେକୌଣସି ବ୍ୟକ୍ତି ବିଧିକ ପଦକ୍ଷେପ ନେବା ପାଇଁ ଯେମିତି ଅଧିକୃତ, ଠିକ ସେମିତି ଭାଷା ଅଧିକାରର ଖଣ୍ଡନ ହେଲେ ତା ବିରୁଦ୍ଧରେ ବିଧିକ ପଦକ୍ଷେପ ନେବା ପାଇଁ ଯେକୌଣସି ଓଡ଼ିଆ ଆଇନତଃ ଅଧିକୃତ ହେବା ଦରକାର ।

ନିଉଜ ସିଣ୍ଡିକେଟ

ଦୁଇଜଣ ଦଲାଲଙ୍କୁ ଲଗାଇ ଓଡ଼ିଆ ଜାତିକୁ ପ୍ରତାରିତ କରିବା ପାଇଁ ସରକାର ଯେଉଁ ଉଦ୍ୟମ କରିଥିଲେ ତାହା ଫସରଫାଟି ଯାଇଛି । ଯେଉଁ ନିୟାମବଳୀକୁ ଅଶୁଦ୍ଧ ବୋଲି କହି ଭାଷା ଆନ୍ଦୋଳନ ତାହାକୁ ମଞ୍ଜୁରୀ ନ ଦେବାକୁ ରାଜ୍ୟପାଳଙ୍କୁ କହିଥିଲା, ସେହି ଅଶୁଦ୍ଧ ନିୟମାବଳୀକୁ ରାଜ୍ୟପାଳ ମଞ୍ଜୁରୀ ଦେଇଛନ୍ତି ଓ ତାହା ତତ୍କାଳ ଅଧିସୂଚନା ଦ୍ଵାରା ପ୍ରବର୍ତ୍ତିତ ହୋଇଛି ।

ଯଦି ଜୁଲାଇ ୧୭ରେ ଭାଷା ଆଂଦୋଳନର ସଭାପତିମଣ୍ଡଳୀ ଆହ୍ଵାନରେ ଅନୁଷ୍ଠିତ ମାତୃଭାଷାପ୍ରେମୀ ସମ୍ମିଳନୀରେ ଆମ ଭାଷାକୁ ମାରିଦେବାପାଇଁ ଚାଲିଥିବା ସରକାରୀ ଚକ୍ରାନ୍ତକୁ ଭର୍ତ୍ସନା କରାଯାଇନଥାନ୍ତା ଏବଂ “ଆମ ଭାଷା ଆମ ଅଧିକାର” ଗୋଷ୍ଠୀ ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଏକ ସମୀକ୍ଷାତ୍ମକ ଭିଡ଼ିଓ ପ୍ରକାଶ କରିନଥାନ୍ତେ ତେବେ ହୁଏତ ଏ ନିୟମାବଳୀ ଏଯାଏଁ ରାଜ୍ୟପାଳଙ୍କ ମେଜ ଉପରକୁ ଆସିନଥାନ୍ତା । ଜୁଲାଇ ୧୭ ତାରିଖର ସମ୍ମିଳନୀ ତଥା ସୁଭାଷ ବାବୁଙ୍କ ସାକ୍ଷାତ୍କାର ସରକାରଙ୍କୁ ଏତେ ଅତର୍ଚ୍ଛାଇ ଦେଇଛି ଯେ, ନିସ୍ତାର ପାଇବା ପାଇଁ ପୋଷାମନା ଦଲାଲମାନଙ୍କୁ ଡାକି ସେହିମାନଙ୍କ ଦ୍ଵାରା ଭାଷା ନିୟମାବଳୀ ସଂଶୋଧନ ହୋଇଥିବା କଥା ସରକାର ପ୍ରଚାର କରାଇଛନ୍ତି । ଜନଚେତନରୁ ଜୁଲାଇ ୧୭ ମାତୃଭାଷାପ୍ରେମୀ ସମ୍ମିଳନୀ ଓ “ଆମ ଭାଷା ଆମ ଅଧିକାର” ପ୍ରସାର କରିଥିବା ଭିଡ଼ିଓର ପ୍ରଭାବ ହ୍ରାସ କରିବା ପାଇଁ ଏହା ଯୋଜନା ଅନୁସାରେ କରାଯାଇଥିବା ଏବେ ସମସ୍ତଙ୍କର ହୃଦ୍ବୋଧ ହେଲାଣି । ଏହି ପ୍ରେକ୍ଷାପଟରେ ନିୟମାବଳୀ ସଂଶୋଧନର ସରକାରୀ ନାଟକକୁ ଭାଷା ଆନ୍ଦୋଳନ ପ୍ରତ୍ୟାକ୍ୟାନ କରିଛି ଓ ଯଥାପୂର୍ବ କଳା ପତାକା ଅଭିଯାନ ଚାଲୁରହିଛି ।

ଆଜି ଥିଲା ତ୍ରିରଙ୍ଗା ପତାକାର ଦିବସ । ତେଣୁ, ଭାଷା ଆନ୍ଦୋଳନର କଳାପତାକା ରାଜଧାନୀରେ ବନ୍ଦ ଥିଲା ସବୁଥର ପରି । ଓଡ଼ିଆ ଭାଷାଜନନୀର ଶ୍ରେଷ୍ଠ ସନ୍ତାନମାନଙ୍କ ହାତରେ ଥିଲା ଦୁଇଟି ଫଳକ । ଗୋଟିକରେ ଲେଖା ଥିଲା –

“ସରକାରୀ ଷଡ଼ଯନ୍ତ୍ର ବନ୍ଦ ହେଉ
ଭାଷା ଆଇନ ନିର୍ଭୁଲ ହେଉ ”

ଓ ଅନ୍ୟଟିରେ ଲେଖା ହୋଇଥିଲା –

“ଓଡ଼ିଶା ଗଠିତ ଓଡ଼ିଆ ପାଇଁ
ଇଂରେଜୀ ରାଜୁତି ଚଳିବ ନାଇଁ ”

ଏକୁ ସଗର୍ବେ ଧାରଣ କରିଥିଲେ ଭାଇ ସୁଭାଷ ଚନ୍ଦ୍ର ପ୍ରଧାନ ଓ ଭାଇ ଶିଶିର କୁମାର ସାହୁ

ଭାଇ କମଳଲୋଚନ ନାୟକ ଆଜି ନେତୃତ୍ବ ଦେଇଥିଲେ । ସାଙ୍ଗରେ ଥିଲେ ବିଶିଷ୍ଟ ବୈଜ୍ଞାନିକ ଡଃ ଅଶୋକ ମିଶ୍ର ଓ କୃଷ୍ଣାନନ୍ଦ ସାହୁ ।

ଓଡ଼ିଆ ଜାତିକୁ ପ୍ରତାରିତ କରିବାକୁ ସରକାର ଯେତେ କଳକୌଶଳ ପ୍ରୟୋଗ କଲେ ସବୁ ବ୍ୟର୍ଥ ହୋଇଛି । ଆର୍ଥିକ ଫାଇଦା ପାଇଁ ସରକାରଙ୍କ ସହ ହାତ ମିଳାଇଥିବା ଦଲାଲ୍ ମାନେ ଭାଷା ଆନ୍ଦୋଳନର ନାମ ବ୍ୟବହାର କରି ଯେତେ ବୟାନ ଦେଲେ ମଧ୍ୟ ଓଡ଼ିଆ ଜାତି ତହିଁରେ ବିଭ୍ରାନ୍ତ ହେବାର ନାହିଁ ।

ସବୁ ଦିନପାଇଁ ଆମ ଭାଷାଜନନୀଙ୍କୁ ବିପଦମୁକ୍ତ କରିବାକୁ ଏ ଆନ୍ଦୋଳନ ଆଜି ଟପିଲା ୧୨୧୮ ଦିନ । ଏବଂ ଏ ଆନ୍ଦୋଳନ ଚାଲିବ ଯେଉଁଯାଏଁ ଆମ ଭାଷା ଆଇନରେ ଖଞା ହୋଇଥିବା ମାରକ ଧାରା ୪କ ବିଲୁପ୍ତ ନ ହୋଇଛି ଏବଂ ଓଡ଼ିଆବିରୋଧୀ ନିୟମାବଳୀ ପ୍ରତ୍ୟାହୃତ ହୋଇ ଆମ ଭାଷା ପାଇଁ ଅନୁକୂଳ ନିୟମାବଳୀ ପ୍ରଣୟନ ଓ ପ୍ରବର୍ତ୍ତନ ନ ହୋଇଛି ।

ଫୁଲବାଣୀରେ ମଧ୍ୟ ଆଜି କଳାପତାକା ଅଭିଯାନ ଯଥାପୂର୍ବ ଅନୁଷ୍ଠିତ ହୋଇଛି । ଭାଷା ଆନ୍ଦୋଳନକୁ ସମର୍ଥନ କରି ସରକାରୀ ତଞ୍ଚକତା ବିରୁଦ୍ଧରେ ପ୍ରତିବାଦ କରିଛନ୍ତି ଓଡ଼ିଆ ମାଟିର ତିନି ଶ୍ରେଷ୍ଠ ସନ୍ତାନ ସର୍ବଶ୍ରୀ ଅଶୋକ ପରିଡ଼ା, କାହ୍ନୁ ଚରଣ ଶତପଥୀ ଓ ସୁରେନ୍ଦ୍ର ମହାନ୍ତି ।

ସରକାର ସୁଧୁରି ଯାଆନ୍ତୁ ।

ସୁଭାଷ ଚନ୍ଦ୍ର ପଟ୍ଟନାୟକ

ଲଜ୍ଜା ! ଭାଷା ଆନ୍ଦୋଳନ ବନ୍ଦ ହୋଇ ସାରିଛି ବୋଲି ସରକାରଙ୍କୁ ଅବଗତ କରାଇ ଆର୍ଥିକ ଫାଇଦା ଅର୍ଜନ କରିଥିବା ପ୍ରଦ୍ୟୁମ୍ନ ଶତପଥୀ, ପବିତ୍ର ମହାରଥା ଓ ତାଙ୍କଦ୍ଵାରା ଦିଗଭ୍ରଷ୍ଟ ମୁଷ୍ଟିମେୟ ବ୍ୟକ୍ତି ଓଡ଼ିଆ ଭାଷାର ଏକ ଘୋର କ୍ଷତିକାରକ ସଂଶୋଧନକୁ ପୁନଶ୍ଚ ସ୍ଵାଗତ ଜଣାଇ ଓଡ଼ିଆ ଜାତିକୁ ବିଭ୍ରାନ୍ତ କରିବା ପାଇଁ ଭାଷା ଆଂଦୋଳନର ନାମ ବ୍ୟବହାର କରିଛନ୍ତି ଓ ଗଣମାଧ୍ୟମର ଦୁରୁପଯୋଗ କରିଛନ୍ତି ।

ସରକାରଙ୍କ ଏହି ତୋଷାମଦିଆମାନେ ମଧୁବାବୁଙ୍କ ଉକ୍ତି “ତୋଷାମଦିଆର କୁକୁର ପ୍ରକୃତି ଅଇଁଠାପତରେ ଧ୍ୟାନ” ବୁଝିପାରିବେ କି ନାଁ କିଏ କହିବ? ଏମାନେ ଏତିକି ବୁଝିପାରୁନାହାନ୍ତି ଯେ, ସରକାରଙ୍କ ପୋଷାମାନି ୧୬.୭.୨୦୧୮ସନ୍ଧ୍ୟାରେ ଏମାନେ କଳାପତାକା ଅଭିଯାନ ବନ୍ଦ ରଖିବାକୁ ଭାଷା ଆନ୍ଦୋଳନ ନିଷ୍ପତ୍ତି କରିଛି ବୋଲି ଏହି ପରି ଗଣମାଧ୍ୟମରେ ଯେଉଁ ପ୍ରଚାର କରିଥିଲେ ତାହା ଏମାନଙ୍କ ଅଧିକାର ବହିର୍ଭୂତ ଥିଲା ବୋଲି ଓଡ଼ିଆ ଜାତି ସାବ୍ୟସ୍ତ କରିଛି ଓ ସେହିଦିନଠାରୁ ଆଜି ପର୍ଯ୍ୟନ୍ତ ଏ ଅନନ୍ୟ ଆନ୍ଦୋଳନ ଚାଲିଛି ।

ଏହି ଆନ୍ଦୋଳନରେ ଓଡ଼ିଶାର ଶ୍ରେଷ୍ଠ ସନ୍ତାନମାନେ ପ୍ରତିଦିନ କଳା ପତାକା ଅଭିଯାନ ଚଳାଇ ଭାଷା ମାଆର ସ୍ଵାର୍ଥ ପାଇଁ ଚାପ ପ୍ରୟୋଗ କରିଚାଲିଛନ୍ତି ଓ ଏହି ଚାପରେ ସରକାର ୨୦୧୮ସେପ୍ଟେମ୍ବରରେ ପୁଣି ଥରେ ଭାଷା ଆଇନ ସଂଶୋଧନ କରିଛନ୍ତି ଓ ୨୦୧୯ରେ ନିଯମାବଳୀ ସଂଶୋଧନ କରିଛନ୍ତି । ଏହା ହୋଇଛି ଲାଗିରହିଥିବା ଆନ୍ଦୋଳନର ପ୍ରଭାବରେ ।

କିନ୍ତୁ ଏକୁ ବି ଆମେ ଗ୍ରହଣ କରୁନାହୁଁ । ୨୦୧୮ରେ ହୋଇଥିବା ଭାଷା ଆଇନ ସଂଶୋଧନ ପ୍ରତ୍ୟାହୃତ ହୋଇ ସେହି ପ୍ରମାଦପୂର୍ଣ ସଂଶୋଧନ ମାଧ୍ୟମରେ ଖଞ୍ଜା ହୋଇଥିବା ୪କ ଧାରାର ବିଲୋପନ ନ ହେଲେ ଏବଂ ୨୦୧୬ ନିଯମାବଳୀ ସମ୍ପୂର୍ଣ ବିଲୁପ୍ତ ହୋଇ ୨୦୧୫ରେ ମୁଁ ଦେଇଥିବା ବିଧାନ ଅନୁରୂପେ ନିୟମାବଳୀ ପ୍ରଣୀତ ଓ ପ୍ରବର୍ତ୍ତିତ ନ ହେଲେ ଆମ ଭାଷା କେବେ ବି ବିପଦମୁକ୍ତ ହେବ ନାହିଁ ।

ଏମାନଙ୍କୁ ପୋଷା ମନାଇଲା ପରେ ମୁଁ ଦେଇଥିବା ବିଧାନକୁ ଲୋକ ଚକ୍ଷୁରୁ ଲୁଚାଇ ରଖିବା ପାଇଁ ମୁଖ୍ୟମନ୍ତ୍ରୀଙ୍କ ଗୋପନ ଆଦେଶରେ ସମ୍ପୃକ୍ତ ୱେବ ସାଇଟକୁ ସରକାର ଅଚଳ କରି ଦେଇଥିଲେ । ଗତମାସ ୧୭ ତାରିଖରେ ଭାଷା ଆନ୍ଦୋଳନ ଦ୍ଵାରା ଆହୂତ ମାତୃଭାଷାପ୍ରେମୀ ସମ୍ମିଳନୀରେ ଏ ସମ୍ପର୍କରେ ବ୍ୟାପକ ଚର୍ଚ୍ଚା ହୋଇ ତୁରନ୍ତ ତାହାକୁ ସର୍ବସାଧାରଣଙ୍କ ପାଇଁ ଉପଲଭ୍ୟ କରିବାକୁ ପ୍ରସ୍ତାବ ଗୃହୀତ ହେବା ପରେ ସରକାର ବାଧ୍ୟ ହୋଇଛନ୍ତି ତାହା ଉପରୁ ନିଷେଧାଦେଶ ପ୍ରତ୍ୟାହାର କରିବାକୁ । ଆପଣମାନେ ସମସ୍ତେ ଏବେ odia.odisha.gov.in ଖୋଲି ତା ଭିତରେ ମୁଁ ଦେଇଥିବା ପ୍ରସ୍ତାବିତ ନିଯମାବଳୀ ଦେଖିପାରିବେ, ଯାହାକୁ ଭଣ୍ଡୁର କରିବା ପାଇଁ ନବୀନ ପଟ୍ଟନାୟକ ଏହି ବିଶ୍ବାସଘାତକମାନଙ୍କୁ ଥୋପ ଗିଳାଇଥିଲେ ।

ମୁଁ ଲଜ୍ଜିତ ଯେ, ଏମାନେ ଏକଦା ମୋର ସହକର୍ମୀ ଥିଲେ । ଏମାନଙ୍କ ବିଷାକ୍ତ ଚରିତ୍ର ସମ୍ପର୍କରେ ମୋତେ ବହୁ ବନ୍ଧୁ ସତର୍କ କରାଇଦେଇଥିଲେ । କିନ୍ତୁ ଏମାନେ ମୋର ଏତେ ଅନୁଗତ ଥିଲେ ଯେ, ମୁଁ ବିଶ୍ଵାସ କରିପାରୁନଥିଲି ଯେ, ଭିତରେ ଭିତରେ ଏମାନେ ନିଜ ଅର୍ଥୀକ ଫାଇଦା ପାଇଁ ସରକାରଙ୍କ ଶ ହାତ ମିଳାଇ ଥିଲେ । ଏମାନଙ୍କ ମୋତେ ସତର୍କ କରାଇ ଦେଇଥିବା ବନ୍ଧୁମାନଙ୍କ କଥା ମୁଁ ଯଦି ମାନିଥାନ୍ତି, ତେବେ ମୁଁ ପ୍ରତିଷ୍ଠା କରିଥିବା ଭାଷା ଆନ୍ଦୋଳନକୁ ନିଜ ଆନ୍ଦୋଳନ କହି ଏବେ ବି ଏମାନେ ଏତେ ନିର୍ଲ୍ଲଜ ଭାବେ ଓଡ଼ିଆ ବିରୋଧୀ ଏକ ସରକାରୀ ଷଡ଼ଯନ୍ତ୍ରକୁ ଏପରି ସ୍ଵାଗତ ଜଣାଇ ନଥାନ୍ତେ ।

ପ୍ରିୟ ଭାଇ ଓ ଭଉଣୀମାନେ, ଆମ ଲୋକମାନଙ୍କୁ ପ୍ରତାରିତ କରିବା ପାଇଁ ଏମାନେ ସରକାରଙ୍କ ଠିକା ନେଇଛନ୍ତି । କଣ ସଂଶୋଧନ ହେଲା ଏମାନେ ଜାଣନ୍ତି ନାହିଁ । ଏମାନଙ୍କୁ ମୁଁ ବାରମ୍ବାର ଖୋଲା ବିତର୍କକୁ ଆହ୍ଵାନ କରିଛି । ଏମାନେ କେବେ ବିତର୍କକୁ ଆସିନାହାନ୍ତି । ମୁଁ ଯେଉଁ ବିଧାନ ପ୍ରସ୍ତାବ କରିଥିଲି ତଦନୁଯାୟୀ ୨୦୧୬ ମଇ ମାସରେ ସରକାର ଆଇନ ସଂଶୋଧନ କଲେ । ମାତ୍ର ମୁଁ ଦେଇଥିବା ନିୟମାବଳୀକୁ ବିଧିଭୁକ୍ତ ନ କରିବା ପାଇଁ ସେ ବର୍ଷ ଅଗଷ୍ଟ ୧୨ ତାରିଖରେ ଯେଉଁ ନିୟମାବଳୀ କଲେ ତହିଁରେ ଆମ ଭାଷାକୁ ମାରିଦେବାର ବୀଜ ରୋପିତ ହୋଇଥିଲା । ତାକୁ ମୁଁ ସମ୍ପୂର୍ଣ ବିରୋଧ କରିବା ଫଳରେ ୨୦୧୮ରେ ମୂଳ ଆଇନଟିକୁ ଖର୍ବ କରିବା ପାଇଁ ଭାଷା ଆଇନର ସଂଶୋଧନ କରାଗଲା ଓ ତହିଁରେ ଥିବା ତ୍ରୁଟିକୁ ମୁଁ ଧରା ପକାଇ ଦେବା ଫଳରେ ସରକାର ଆର୍ଥିକ ମାୟାଜାଲରେ ପବିତ୍ର-ପ୍ରଦ୍ୟୁମ୍ନ ଯୋଡ଼ିଙ୍କୁ କଏଦ କରି ଆମ ଜାତି ବିରୁଦ୍ଧରେ ପ୍ରୟୋଗ କରୁଛନ୍ତି । ଏହି ଭୟଙ୍କର ଦୁର୍ନୀତି ଉପରେ ମୁଁ ତ bhashaandolan.com ଓ orissamatters.com ତଥା ଏହି ସାମାଜିକ ଗଣମାଧ୍ୟମରେ ସମସ୍ତ ତଥ୍ୟପ୍ରମାଣଭିତ୍ତିକ ଆଲୋଚନା ରଖୁଛି । ଆହୁରି ବି ରଖିବି , କାରଣ ଆମ ଭାଷା ଆମ ମା ଓ ତାକୁ ବିପଦମୁକ୍ତ କରିବା ଆମ କର୍ତ୍ତବ୍ୟ ।

ଡ॰ ଅଶୋକ ମିଶ୍ର , ସୁଭାଷ ଚନ୍ଦ୍ର ପ୍ରଧାନ, କମଳ ଲୋଚନ ନାୟକ, ଗିରିଜାକାନ୍ତ ମିଶ୍ର, ଅର୍ଜୁନ ଚରଣ ସାମନ୍ତରାୟ, ଧ୍ରୁବ ଚରଣ ମହାନ୍ତି ପ୍ରମୁଖଙ୍କୁ ନେଇ ଗଠିତ ଭାଷା ଆଂଦୋଳନର କର୍ମରତ ସଭାପତିମଣ୍ଡଳୀ ଖୁବ ଶୀଘ୍ର ଏହି ତଞ୍ଚକତା ଉପରେ ଗଣମାଧ୍ୟମକୁ ଅବଗତ କରାଇବ ।

ସେ ପର୍ଯ୍ୟନ୍ତ, ଦିଦିନ ତଳେ ଜାରି ହୋଇଥିବା ମୋର ଏହି ଭିଡିଓଟି ଦେଖନ୍ତୁ ଓ ଏହି ଚାଣୁର ମୁଷ୍ଟିକ ଯୋଡ଼ିଙ୍କ କବଳରୁ ନିଜ ଭାଷା ଜନନୀଙ୍କୁ ରକ୍ଷା କରିବା ପାଇଁ କ୍ରମାଗତ କଳା ପତାକା ଅଭିଯାନକୁ କିପରି ସମ୍ପ୍ରସାରିତ କରାଯିବ ସେଥିପାଇଁ ମନ ସ୍ଥିର କରନ୍ତୁ ।

ମା ଓଡ଼ିଶାର ଏବଂ ମାତୃଭକ୍ତ ଓଡ଼ିଆ ଜାତିର ଜୟ ହେଉ ।

ନିଉଜ ସିଣ୍ଡିକେଟ
ଭାଷାଜୀବୀ ଓ ଭାଷାନୁରକ୍ତ ସମାନ ନୁହନ୍ତି । ସାହିତ୍ୟିକମାନେ , ଯେଉଁମାନେ ଆମ ଭାଷାକୁ ଉପଯୋଗ କରି ଅର୍ଥ ଉପାର୍ଜନ କରୁଛନ୍ତି ସେମାନେ ଭାଷାଜୀବୀ । ମାତ୍ର ଆମ ମାତୃଭାଷାକୁ ବିଦେଶୀ ଭାଷାର ଆଧିପତ୍ୟ କବଳରୁ ବଞ୍ଚାଇବା ପାଇଁ ଯେଉଁମାନେ ନିଜର ସମସ୍ତ ସୁଖ ସ୍ବାଚ୍ଛନ୍ଦ୍ୟ ଭୁଲି ପ୍ରତିଦିନ କଳାପତାକା ଅଭିଯାନ ଚଳାଇଛନ୍ତି ସେମାନେ ଭାଷାନୁରକ୍ତ ।

ଆମ ଭାଷାରେ ଆମ ରାଜ୍ୟ ପରିଚାଳନା ପାଇଁ ଚାଲିଥିବା ନିଶବ୍ଦ କଳାପତାକା ଅଭିଯାନର ଏଇ ୧୨୧୭ ଦିନରେ ଆଜି ଯେଉଁ ଦୁଇ ଶ୍ରେଷ୍ଠ ଓଡ଼ିଆ ନିଜର ଭାଷାନୁରକ୍ତି ପ୍ରଦର୍ଶନ କରିଛନ୍ତି ସେମାନେ ହେଲେ ଭାଇ କମଳ ଲୋଚନ ନାୟକ ଓ ଭାଇ ସୁଭାଷ ଚନ୍ଦ୍ର ପ୍ରଧାନ । ସମଗ୍ର ଓଡ଼ିଆ ଜାତି ସାଙ୍କେତିକତଃ ଏହି ଦୁଇ ଭାଇଙ୍କ ଭିତରେ ସଂସ୍ଥିତ । ଡ॰ ଅଶୋକ ମିଶ୍ର ଏହି ଉଭୟ ଭାଷାନୁରକ୍ତଙ୍କ ଫଟୋ ଉଠାଇ ଆପଣମାନଙ୍କ ପାଇଁ ପଠାଇଛନ୍ତି ।

ଫୁଲବାଣୀ

କଳାପତାକା ଅଭିଯାନ ଭୁବନେଶ୍ଵର ବାହାରେ ସବୁଠୁ ଅଧିକ ଦିନ ଚାଲିଛି ଫୁଲବାଣୀ ସହରରେ । ଆଜି ଭାଇ ଅଶୋକ ପରିଡ଼ା ଓ ସୁରେନ୍ଦ୍ର ମହାନ୍ତି ଓଡ଼ିଆ ଜାତିର ଭୀଷ୍ମ ପ୍ରତିଜ୍ଞା ଜଣାଇ ଦେଇଛନ୍ତି ସରକାରଙ୍କୁ, ଯାହା ଭାଶାନୁରକ୍ଟିର ଶକ୍ତିରେ ଶକ୍ତିମାନ ।

ଓଡ଼ିଶାର ଭାଷାଜୀବୀମାନେ ଯଦି ଭାଷାନୁରକ୍ତ ହୋଇପାରନ୍ତେ ଓଡ଼ିଆ ଭାଷା ତା ନିଜ ପରିସୃଷ୍ଟ ପ୍ରଦେଶରେ ସରକାରୀ ଷଡ଼ଯନ୍ତ୍ର କବଳରୁ ନିସ୍ତାର ପାଇପାରନ୍ତା ।