ଭାଷା ଆନ୍ଦୋଳନର ସାପ୍ତାହିକ ଆଲୋଚନାଚକ୍ର: ଭାଷା ଅଧିକାର ହେଉ ମୌଳିକ ଅଧିକାର

(ସୂତ୍ର : ଆମ ଭାଷା ଆମ ଅଧିକାର )

ରାଜ୍ୟର ଭାଷା ରାଜ୍ୟବାସୀଙ୍କ ମୌଳିକ ଅଧିକାରଭୁକ୍ତ ହେଉ ବୋଲି ଗତ ରବିବାର(୦୬/୦୯/୨୦୨୦)ସନ୍ଧ୍ୟାରେ, ଭାଷା ଆନ୍ଦୋଳନର ଭର୍ଚୁଆଲ ସାପ୍ତାହିକ ଆଲୋଚନାଚକ୍ରରେ ପ୍ରସ୍ତାବିତ ହୋଇଛି ।ଏହି ଆଲୋଚନାଚକ୍ରରେ ଓଡ଼ିଶାର କୋଣ ଅନୁକୋଣରୁ ଭାଷାପ୍ରେମୀ ମାନେ ଅଂଶଗ୍ରହଣ କରିଥିଲେ।

ଭାଷା ଆନ୍ଦୋଳନର ପ୍ରତିଷ୍ଠାତା ଶ୍ରୀଯୁକ୍ତ ସୁଭାଷ ଚନ୍ଦ୍ର ପଟନାୟକଙ୍କ ଦ୍ୱାରା ଭାଷା ବନ୍ଦନାରୁ ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା ।  ତତ୍ପରେ ଶ୍ରୀ ବାପିନା ପାଲଟାସିଂହ ସ୍ୱରଚିତ କବିତା ଆବୃତି କରିଥିଲେ । ଆଲୋଚନାର ମୁଖ୍ୟ ବିଷୟବସ୍ତୁ ଥିଲା,”ଭାଷା ଆନ୍ଦୋଳନର ଇତିହାସ, ବର୍ତ୍ତମାନ ଓ ଭବିଷ୍ୟତ”। ଶ୍ରୀ ରଂଜନ କୁମାର ସାହୁ ଏହି ବିଷୟରେ ନିଜ ଆଲୋଚନା ମାଧ୍ୟମରେ ନିମ୍ନ କେତୋଟି ମୁଖ୍ୟ ଦିଗ ପ୍ରତି ଆଲୋକପାତ କରିଥିଲେ । ସେଗୁଡିକ ହେଲା-

୧.ଓଡ଼ିଆ ଭାଷାର ସୁରକ୍ଷା ବିଷୟରେ ଇତିହାସକୁ ଅବଲୋକନ କଲେ, ଆମ ସାମ୍ନାକୁ ଆସନ୍ତି ଶ୍ରୀଯୁକ୍ତ ନବକୃଷ୍ଟ ଚୌଧୁରୀ, ଶ୍ରୀଯୁକ୍ତ ଲିଙ୍ଗରାଜ ମିଶ୍ର ଓ ଶ୍ରୀଯୁକ୍ତ ଜାନକୀ ବଲ୍ଲଭ ପଟ୍ଟନାୟକ।କାରଣ ଓଡ଼ିଆ ଭାଷାକୁ ରାଜ-ଭାଷା /ପ୍ରଶାସନିକ ଭାଷା କରିବାର ପ୍ରକ୍ରିୟା ରେ,ସେମାନଙ୍କ ଅବଦାନ ଅତୁଳନୀୟ।
୨.ବର୍ତ୍ତମାନର ସମୟ ହେଉଛି, ଓଡ଼ିଆ ଭାଷା ସୁରକ୍ଷାର ଏକ ନିର୍ଣ୍ଣାୟକ ସମୟ। ଆଜି ଯଦି ଆମ ଭାଷା ଜନନୀର ସୁରକ୍ଷା ପାଇଁ କିଛି ନକରି ପାରିବା, ତେବେ ଆମ ଜାତି ଭବିଷ୍ୟତରେ ତାର ଅସ୍ମିତା କୁ ହରାଇବ।
୩.ଆମ ଭାଷାର ସୁରକ୍ଷା ରେ ହିଁ ଆମର ସାମାଜିକ ସୁରକ୍ଷା, ଅର୍ଥନୈତିକ ପ୍ରଗତି, ବୌଦ୍ଧିକ ବିକାଶ ସମ୍ଭବ ହୋଇପାରିବ।
ଏହି ଆଲୋଚନାଚକ୍ରରେ ଭାଗ ନେଇଥିବା ଭାଷାପ୍ରେମୀ ସୌଭାଗ୍ୟ ରାଉତ,ଶଶିକାନ୍ତ ପଣ୍ଡା,ମହେନ୍ଦ୍ର ତ୍ରିପାଠୀ, ସୁଶାନ୍ତ ମାହାଳି,ସରୋଜ କୁମାର ମହାନ୍ତି , କୁନାଲ ପତ୍ରି,ଚିରଞ୍ଜୀବ ମାହାଳି ଓ ପ୍ରିୟ ନିର୍ମଳ ଭାଇ ନିଜ ନିଜ ମତାମତ ପ୍ରଦାନ କରିଥିଲେ।

ଭାଷା ଆନ୍ଦୋଳନର ସ୍ଥିତି ସମୀକ୍ଷା ଓ ଭବିଷ୍ୟତ କାର୍ଯ୍ୟପନ୍ଥା ନିର୍ଦ୍ଧାରଣ ପରେ, ଆଲୋଚନା ଶେଷ ହେଲା।

ଦଲାଲଙ୍କ ଦବ୍ଦବାରେ ଓଡ଼ିଶା : ଭାଷା ଆନ୍ଦୋଳନରେ ହିଁ ନିହିତ ମୁକ୍ତିର ମାର୍ଗ

ସୁଭାଷ ଚନ୍ଦ୍ର ପଟ୍ଟନାୟକ

ଛାତିକି ଯେତେ ବାଧିଲେ ବି ଏହାହିଁ ସତ , ଆମ ରାଜ୍ୟଟି ଆରମ୍ଭରୁ ଅଣଓଡ଼ିଆ ଦଲାଲମାନଙ୍କ ଦ୍ୱାରା ଅଧ୍ୟୁଷିତ ହୋଇ ଆସିଛି | ୧୯୬୬ରୁ ଆମ ଓଡ଼ିଶାର ରାଜନେତାମାନଙ୍କ ଉପରେ ନଜର ରଖିବାର ସୁଯୋଗ ମତେ ମିଳିଛି ଓ ଯେହେତୁ ମୁଁ କାହା ସହ ମିଶେ ନାହିଁ , ସେହେତୁ ସେମାନଙ୍କ ଆଚରଣର ନିଷ୍କମ୍ପ ଅନୁଶୀଳନ ମୋ ପାଇଁ ସମ୍ଭବ ହୋଇଛି | ଡ଼ଃ ମହତାବ , ନବକୃଷ୍ଣ ଚୌଧୁରୀ, ବିଜୁ-ବିରେନଙ୍କ ଶାସନର ନିର୍ଭରଯୋଗ୍ୟ ତଥ୍ୟ ମୁଁ ସଂଗ୍ରହ କରିଛି | ସେହି ଭିତ୍ତିରେ ମୁଁ କହିପାରେ, କେବଳ ନବବାବୁ , ସଦାଶିବ ବାବୁ ଓ ବିନାୟକ ବାବୁଙ୍କ ସମୟକୁ ଛାଡ଼ି ଅବଶିଷ୍ଟ ସବୁ ମୁଖ୍ୟମନ୍ତ୍ରୀଙ୍କ କାଳରେ ଦଲାଲମାନେ ହିଁ ନିଜ ନିଜ ଅଙ୍ଗୁଠି ଅଗରେ ଚଳାଇଛନ୍ତି ଓଡ଼ିଶାକୁ | ଓ ସେହି ଦଲାଲି ହେତୁ ହିଁ ଅଣଓଡ଼ିଆମାନେ ଆମ ରାଜ୍ୟକୁ ନିଜ କବ୍ଜାକୁ ଏପରିଭାବେ ନେଇଯାଇଛନ୍ତି ଯେ, ଆମ ଭାଷାକୁ ଅକର୍ମଣ୍ୟ କରି ଶତକଡ଼ା ୯୦ ଭାଗ ଓଡ଼ିଆଙ୍କ ଗରିମା ନଷ୍ଟ ପାଇଁ ଚେଷ୍ଟା କରିଛନ୍ତି, କାରଣ ଆମ ଗରିମା ଭାଙ୍ଗି ନଗଲେ କାଳେ ସେମାନଙ୍କ ଦଲାଲୀ ବିରୁଦ୍ଧରେ ସ୍ଵର ଉଠିବ ଓ ଆମ ବଜାର ସେମାନଙ୍କ ହାତରୁ ଖସିଯିବ ।

ସାମାନ୍ୟ ଝଲକ

ଖାଦ୍ୟ ବଜାର ଯେହେତୁ ଏକ ଅପରିହାର୍ଯ୍ୟ ବଜାର ଓ ଓଡ଼ିଶାର କୃଷି ଉତ୍ପାଦନ ଉଜୁଡ଼ି ନ ଗଲେ ଅଣଓଡ଼ିଆ ରାଜ୍ୟମାନେ ଯେହେତୁ ଓଡ଼ିଶାକୁ ତାଙ୍କ ବଜାର କରିପାରିବେନି , ସେହେତୁ ସରକାରରେ ଥିବା ସେହିମାନଙ୍କ ଦଲାଲମାନେ ଓଡ଼ିଶାର କୃଷକଙ୍କୁ ବି ଆଗେଇବାକୁ ଦେଉ ନାହାନ୍ତି | ଓଡ଼ିଶା ବଜାର ଉପରେ ପଶ୍ଚିମ ବଙ୍ଗର ଆଳୁ ବେପାରୀଙ୍କ କବ୍ଜା କାଏମ ରହିବା ପାଇଁ ଓଡ଼ିଶାରେ ଶୀତଳ ଭଣ୍ଡାର ହେଉନାହିଁ |

ଆମ ରାଜ୍ୟର ଅଣ୍ଡା ବଜାର ଉପରେ ଆନ୍ଧ୍ର କୁକୁଡ଼ା ଚାଷୀଂକ କବ୍ଜା ଅତୁଟ ରଖିବା ପାଇଁ ବାର୍ଡଫ୍ଲୁର ମିଛ ବାହାନାରେ ଆମ ରାଜ୍ୟର କୁକୁଡ଼ା ବଂଶ ନିପାତ କରା ହେଉଛି |

ସେହିପରି ଫୁଲ ଚାଷ କଥା | ଏ ଲବି ଏପରି ଯେ ଓଡ଼ିଶାର କୌଣସି ଫୁଲ ଚାଷୀ ଆମ ରାଜ୍ୟରେ ଫୁଲ ବିକି ପାରୁନି | ଫୁଲ ବେପାରୀଏ ଓଡ଼ିଆ ଚାଷୀଙ୍କଠୁ ଫୁଲ କିଣୁ ନାହାନ୍ତି | ଆମ ଲୋକେ ବଙ୍ଗାଳି ବେପାରୀଙ୍କୁ ଫୁଲ ବିକିବାକୁ ବାଧ୍ୟ ହେଉଛନ୍ତି ଅଗତ୍ୟା କମ ଦରରେ ଓ ସେହି ଫୁଲ ଓଡ଼ିଶାକୁ ନେଉଟି ଆମ ଲୋକଙ୍କୁ ବିକା ହେଉଛି ଅଧିକ ଦାମରେ |

ଅର୍କିଡ଼ ଏକ ଅତି ମୂଲ୍ୟବାନ ଫୁଲ | ଆମ ଶିମିଳିପାଳରେ ପୃଥିବୀର ଅର୍କିଡ଼ମାନଂକ ମଧ୍ୟରୁ ଇଂ. ଶରତ ମିଶ୍ର ୧୧ କିସମର ନୂଆ ଅର୍କିଡ଼ ଆବିଷ୍କାର କରିଥିଲେ ଓ ସେ ବାରିପଦାରେ ନିର୍ମାଣ ବିଭାଗର ନିର୍ବାହୀ ଯନ୍ତ୍ରୀ ଥିବାବେଳେ ତାଙ୍କ ଛୁଟି ସମୟ ଖଟେଇ ଏକ ଅର୍କିଡ଼ ଉପବନ ତିଆରି କରିଥିଲେ | ବଙ୍ଗାଳି ଲୁଟେରାମାନେ ଶିମିଳିପାଳକୁ ବହୁଧା ଲୁଟ କରନ୍ତି | ସେମାନେ ଏହି ସମ୍ପଦକୁ ଉଜାଡ଼ି ଦେବାକୁ ଚାହିଁଲେ | ବିଜୁ ବାବୁ ମୁଖ୍ୟମନ୍ତ୍ରୀ | ତାଙ୍କର ବଂଗାଳୀପ୍ରୀତି କିଏ ବା ନ ଜାଣେ ? ପୂର୍ତ୍ତ ମନ୍ତ୍ରୀ ନଳିନୀ ମହାନ୍ତି ଆଦେଶ ପାଇଲେ ଶରତ ମିଶ୍ରଙ୍କୁ ତୁରନ୍ତ ବାରିପଦାରୁ ଅପସାରଣ କରିବା ପାଇଁ | ସେ ଭୁବନେଶ୍ୱର ଆସିଲେ ଓ ଶିମିଳିପାଳର ଅର୍କିଡ଼ ଜଗତ ଉଜୁଡ଼ି ଗଲା | କଲିକତାରୁ ଆସୁଥିବା ଅର୍କିଡ଼ ଫୁଲ ଓଡିଶା ବଜାରକୁ ମାଡ଼ି ବସିଛି |

ଦୁଷ୍ମନ୍ତ ଦାସଙ୍କ କଖାରୁ ଚାଷର ଅନୁଭୂତି ଆମେ ଜାଣିବା ଉଚିତ | ଏବର୍ଷ ଅନ୍ୟତମ  ସର୍ବଶ୍ରେଷ୍ଠ ବିଧାୟକ ହୋଇଥିବା ପ୍ରଣବ ପ୍ରକାଶ ଦାସଙ୍କ ବଡ଼ ମାଉସୀଙ୍କ ଦିଅର ଦୁଷ୍ମନ୍ତ ଦାସ ଯେଉଁବର୍ଷ ନିଜ ଜମିରେ କଖାରୁ ଚାଷ କଲେ , ସେ ବର୍ଷ କଖାରୁ କିଲୋ ଭୁବନେଶ୍ବରରେ ଥିଲା ଅନ୍ୟୁନ୍ୟ ୨୫ ଟଙ୍କା | ସେ ଏକ ଟ୍ରକ ଭରା କଖାରୁ ଆଣି ଭୁବନେଶ୍ୱରରେ ପହଞ୍ଚିଲେ | ଏଠିକାର କଖାରୁ ହୋଲସେଲର କହିଲେ କୁଇଂଟାଲ ଦେଢ଼ଶହ ଟଙ୍କାରୁ ଅଧିକ ହେବ ନାହିଁ | ସେ ବହୁ କଷ୍ଟରେ କୁଇଂଟାଲ ୨୦୦ଟଙ୍କାରେ ଦେଇ କାନମୁଣ୍ଡା ଆଉଁସି ଘରକୁ ଗଲେ |

ଭାଷା ଆନ୍ଦୋଳନ ଆଣିବ ପରିବର୍ତ୍ତନ

ଶାସନ ଗାଦିରେ ଦଲାଲମାନେ ଥିବାଯାଏଁ ଅଣଓଡ଼ିଆଏ ଆଳୁ ପିଆଜଠୁ ଅଣ୍ଡା , ପନିପରିବା ଓ ଫୁଲ – ସବୁଥିର ବଜାର ନିଜ କବ୍ଜାରେ ରଖିଥିବେ ଓ ଆମେ କିଛି ବି କରିପାରିବାନି | ଓଡ଼ିଆ ଜାତିର ଅସ୍ମିତା ଫେରିଲେ ଅଣଓଡ଼ିଆ ଆଧିପତ୍ୟ ହଟିବ | ଏହି ଅସ୍ମିତା ଫେରିବା ସମ୍ଭବ ହେବ ସେତିକି ବେଳେ ଯେତେବେଳେ ଆମେ ଚଳାଇଥିବା ଭାଷା ଆନ୍ଦୋଳନ ସଫଳ ହେବ ଓ ଅଣଓଡ଼ିଆ ଭାଷାଧିପତ୍ୟ କବଳରୁ ଓଡିଶା ମୁକ୍ତ ହେବ | ଏହା ହେଲେ,  ଅଣଓଡିଆଂକ ଦଲାଲି କରୁଥିବା ଲୋକେ ଦବିଯିବେ ଓ ଆମ ରାଜ୍ୟରେ ଶୀତଳ ଭଣ୍ଡାର ହୋଇପାରିବ , ନଦୀପଠାମାନଙ୍କରେ ଆଳୁ ଚାଷ ହୋଇପାରିବ , କୁକୁଡ଼ା ଚାଷ ଉଜୁଡ଼ି ଯିବନି , ମାଛ ଚାଷ ବୃଦ୍ଧି ପାଇବ , ଫୁଲ ଚାଷ ବୃଦ୍ଧି ପାଇବ , ଆମ ବଜାର ଆମର ହେବ |

ଭାଷା ଆଂଦୋଳନକୁ ସଫଳ କରିବାକୁ ହେଲେ କଳା ପତାକା ଅଭିଯାନକୁ ସମସ୍ତେ ଆପଣେଇନେବା ଆବଶ୍ୟକ | ତା ନହେଲେ ଆମେ କେବଳ ଏମିତି କାନ୍ଦୁଥିବା , କିଛି ହେଉ ନଥିବ |

ଏବେ ନିଷ୍ପତ୍ତି ନେବାର ବେଳ ।

ଓଡ଼ିଆ କବିତାରେ ଜ୍ଞାନ ବିଜ୍ଞାନ -୧

[ଜ୍ଞାନ ବିଜ୍ଞାନ ଅବଗତ ହେବା ପାଇଁ ପ୍ରଥମ ଶ୍ରେଣୀରୁ ଇଂରାଜୀ ଅଧ୍ୟୟନ ଉପରେ ଓଡ଼ିଶା ସରକାର ଯେଉଁ ଗୁରୁତ୍ଵ ଦେଉଛନ୍ତି ତାହା ଯେ ଆମ ଜାତିକୁ କକ୍ଷଚ୍ୟୁତ କରିବାକୁ ଏକ ଭୟଙ୍କର ଦେଶୀ-ଇଂରାଜୀଆ  ଷଡ଼ଯନ୍ତ୍ର ତହିଁରେ ଆମର ସନ୍ଦେହ ନାହିଁ । ଆମ ଭାଷାରେ , ଶିଶୁମାନଙ୍କ ମନକୁ ଛୁଇଁବା ଶୈଳୀରେ କବିତା ମାଧ୍ୟମରେ ଜ୍ଞାନ ବିଜ୍ଞାନ ପରିବେଶନର ଉଦ୍ୟମ କରିଛନ୍ତି କଡ଼ାଗଞ୍ଚୀ, କାଲାବୁରାଗି, କର୍ଣ୍ଣାଟକ-୫୮୫୩୬୭ରେ ପ୍ରତିଷ୍ଠିତ କର୍ଣ୍ଣାଟକ କେନ୍ଦ୍ରୀୟ ବିଶ୍ୱ ବିଦ୍ୟାଳୟର ପଦାର୍ଥ ବିଜ୍ଞାନ ବିଭାଗର ସହକାରୀ ପ୍ରଫେସର ଡ଼ଃ ସୁଚିସ୍ମିତା ସାହୁ । ତାଙ୍କର ଏହି ପ୍ରଥମ କବିତାରୁ ଆମେ ଆରମ୍ଭ କରୁଛୁ ଏହି ଆଲୋକବର୍ଷୀ ଅଧ୍ୟାୟ ।]

ଆଲୋକର ରଙ୍ଗ

                  ଡ଼ଃ ସୁଚିସ୍ମିତା ସାହୁ

କୁହ ବନ୍ଧୁ ବେଗେ ମନେ ଉଠିଛି ଜିଜ୍ଞାସା
ସୂର୍ଯ୍ୟଙ୍କ ପ୍ରକୃତ ରଙ୍ଗ କି ଅଟେ ସହସା ।
କେବେ ଦିଶେ ନାଲି କେବେ କମଳା ରଙ୍ଗକୁ
କେବେ ପୁଣି ଦିଶେ ଧଳା ବେନି ନୟନକୁ ।
ବନ୍ଧୁଙ୍କ ମୁଖରୁ ଏମନ୍ତ ପ୍ରଶ୍ନକୁ ଯେ ଶୁଣି
ଉତ୍ତର ଦେଲି ମୁଁ ବନ୍ଧୁ ମନକଥା ଜାଣି ।
ସୂର୍ଯ୍ୟ ନିଜ ମଧ୍ୟେ ସବୁ ରଙ୍ଗ ଧରିଥାଇ
ସବୁରଙ୍ଗ ମିଶି ନେତ୍ରେ ଧବଳ ଦିଶଇ ।
ଯେବେ ସୂର୍ଯ୍ୟ ରଶ୍ମି ବସ୍ତୁ ଉପରେ ପଡ଼ଇ
ସେଥିରୁ ଆଂଶିକ ବସ୍ତୁ ଶୋଷଣ କରଇ ।
ବାକି ରଶ୍ମି ବାହାରକୁ ଲେଉଟି ଆସଇ
ପ୍ରତିଫଳିତ ହୋଇଣ ନେତ୍ରରେ ପଡ଼ଇ ।
ଶୋଷିତ, ପ୍ରତିଫଳିତ ଏ ଦୁଇ ନାମରେ
ଏହି ରଶ୍ମି ଜଣାଶୁଣା ବିଜ୍ଞାନ ଭାଷାରେ ।
ଯେଉଁ ରଶ୍ମି ବସ୍ତୁ ଠାରୁ ଆସେ ବାହାରକୁ
ବସ୍ତୁଟି ସେହି ରଙ୍ଗର ଦିଶେ ନୟନକୁ ।
ନ କରେ ଶୋଷଣ ସୂର୍ଯ୍ୟ କୌଣସି ରଶ୍ମିକୁ
ସବୁ ଆଲୋକକୁ ଛାଡେ ବାହ୍ୟ ଜଗତକୁ ।
ସେହି ରୂପେ ଇନ୍ଦ୍ର ଧନୁ ସୂର୍ଯ୍ୟର କିରଣ
ଯାହା ସାତ ରଙ୍ଗରେ ବିଭକ୍ତ ବୋଲି ଜାଣ ।
ଏବେ ନିଶ୍ଚେ ପ୍ରଶ୍ନ ଆସୁଥିବ ତୁମ୍ଭ ମନେ
କି ଗୁଢ଼ ତଥ୍ୟ ରହିଛି ରଙ୍ଗର କିରଣେ ?
ବନ୍ଧୁ ଙ୍କ ମୁଖରୁ ଏହି ଜିଜ୍ଞାସା କୁ ପାଇ
କହିଲି ମୁଁ ବନ୍ଧୁ ତୁମେ ଶୁଣ ମନଦେଇ ।
ଆଲୋକ ଯେ ପ୍ରକୃତରେ ତରଙ୍ଗ ଅଟଇ
ଯାହାର ବିବିଧ ଦୈର୍ଘ୍ୟ ପ୍ରକାରରେ ଥାଇ ।
ତରଙ୍ଗ ଦୈର୍ଘ୍ୟ ନାମରେ ତା ହା ଜଣାଶୁଣା
ଯହିଁ ରୁ ବିବିଧ ରଙ୍ଗ ସ୍ଥିର ହୁଏ ସିନା ।
ନାଲିର ତରଙ୍ଗଦୈର୍ଘ୍ୟ ଅଟେ ସର୍ବାଧିକ
ତେଣୁ ତାହା ଦିଶୁଥାଇ ଦୂରକୁ ଅଧିକ ।
ବାଇଗଣୀର ତରଙ୍ଗ ଦୈର୍ଘ୍ୟ ଅଟେ ସର୍ବନିମ୍ନ
ଆଲୋକ ର ଏହି ତଥ୍ୟ ମନଦେଇ ଶୁଣ ।
ଆଉ ଯେ ପ୍ରଶ୍ନ ରହିଲା ତୋହରି ମନକୁ
ରାଣ ଅଛି କହିବି ମୁଁ ଆର ଅଧ୍ୟାୟକୁ ।

କନକ ନ୍ୟୁଜ୍ ବିରୁଦ୍ଧରେ କ୍ରାଇମ୍ ବ୍ରାଞ୍ଚ୍ କାର୍ଯ୍ୟାନୁଷ୍ଠାନ ଆବଶ୍ୟକ

ସୁଭାଷ ଚନ୍ଦ୍ର ପଟ୍ଟନାୟକ

ଅତୀତରେ ଭାଷା ଆନ୍ଦୋଳନ ଉପରେ ନାନା ବିଭ୍ରାନ୍ତିକର ଅପପ୍ରଚାର କରିଥିବା କନକ ନ୍ୟୁଜ୍ ଜଣେ ଓଡ଼ିଆ ଝିଅର ଇଜ୍ଜତ ଉପରେ ସେପ୍ଟେମ୍ବର ୪ ତାରିଖରେ ଯେଉଁ କୁତ୍ସିତ ଖେଳ ଖେଳିଛି ତାହା ଓଡ଼ିଆ ଅସ୍ମିତା ପ୍ରତି ଅବମାନନା ପ୍ରଦର୍ଶନ କେବଳ ନୁହେଁ, କ୍ରାଇମ୍ ବ୍ରାଞ୍ଚ୍ ତଦନ୍ତର କାର୍ଯ୍ୟ ଧାରା ଉପରେ କୁଠାରଘାତ ମଧ୍ୟ । କ୍ରାଇମ୍ ବ୍ରାଞ୍ଚ୍ ନିରବଦ୍ରଷ୍ଟା ହୋଇ ନରହି, ତାର ତଦନ୍ତ ପ୍ରକ୍ରିୟାକୁ ପ୍ରଭାବିତ କରିଥିବା ଏହି ସାମ୍ବାଦିକୀୟ ସୀମା ଲଙ୍ଘନ ବିରୁଦ୍ଧରେ କାର୍ଯ୍ୟାନୁଷ୍ଠାନ କରିବା ଦରକାର ।

ଗତ କେଇଦିନ ତଳେ ଏକ ସ୍ଵେଚ୍ଛାସେବୀ ସଂଗଠନର ପ୍ରତିଷ୍ଠାତାଙ୍କ ମୃତ ଦେହ ଭୁବନେଶ୍ଵରର ଏକ ରେଳ ଷ୍ଟେସନ ଇଲାକାରେ ରେଳ ଧାରଣାରୁ ଜବତ ହୋଇଥିଲା । ତାହା ଆତ୍ମହତ୍ୟାଜନିତ କି ହତ୍ୟାଜନିତ ତହିଁର ନିରୂପଣ ପାଇଁ ଓ କିଏ ସେଥିପାଇଁ ଦାୟୀ ଠାବ କରିବା ପାଇଁ ରାଜ୍ୟ କ୍ରାଇମ୍ ବ୍ରାଞ୍ଚ୍ ତଦନ୍ତ କରୁଛି । କନକ ନ୍ୟୁଜ୍ ଚ୍ୟାନେଲ ଏହି ତଦନ୍ତ ପ୍ରକ୍ରିୟାକୁ ପ୍ରଭାବିତ କରିବାପରି କାମ କରିଛି ସିଧା ପ୍ରସାରିତ ଏକ ଖୋଲା ଜେରାରେ, ଯାହା ନିମ୍ନସ୍ଥ ସଂଯୋଗ ସରଣୀ (link) ଆପଣଙ୍କୁ ଅବଗତ କରାଇବ । କ୍ରାଇମ୍ ବ୍ରାଞ୍ଚ୍ ଅପରାଧିକ ନ୍ୟାୟ ବ୍ୟବସ୍ଥାର ଏକ ଗୁରୁତ୍ତ୍ୱପୂର୍ଣ୍ଣ ଅଙ୍ଗ, ଯାହାର ନିରୂପଣ ଅଦାଲତକୁ ସାହାଯ୍ୟ କରିଥାଏ ଅପରାଧୀକୁ ଦଣ୍ଡ ଦେଇ ଜନସମାଜକୁ ନିଶଙ୍କ ରଖିବାରେ । ଏହି ଚ୍ୟାନେଲ ତହିଁରେ ହସ୍ତକ୍ଷେପ କରିଛି ।

ମୃତ ସ୍ଵେଚ୍ଛାସେବୀଙ୍କ ସହ ନୈକଟ୍ୟ ଥିବା ଦର୍ଶାଇ ଜଣେ ଯୁବତୀଙ୍କୁ ଏହା ସିଧା ପ୍ରସାରିତ କାର୍ଯ୍ୟକ୍ରମରେ ଏପରି ସବୁ ପ୍ରଶ୍ନ ପଚାରିଛି ଯାହା ତାଙ୍କର ବ୍ୟକ୍ତିଗତ, ଗୋପନୀୟ ଜୀବନରେ ଅନଧିକୃତ ହସ୍ତକ୍ଷେପ ଓ ସାମ୍ବାଦିକୀୟ ସ୍ଵାଧୀନତାର ଅବାଞ୍ଛିତ ଅପପ୍ରୟୋଗ ଭିନ୍ନ କିଛି ନୁହେଁ ।  

ଓଡ଼ିଆ ଜାତୀୟ ସ୍ଵାର୍ଥ ଦୃଷ୍ଟିରୁ ଦେଖିଲେ ଏହା ଓଡ଼ିଆ ସାମାଜିକ କୃଷ୍ଟି ପ୍ରତି ଘୋର ତାତ୍ସଲ୍ୟ ପ୍ରଦର୍ଶକ । ଯେଉଁ ଭୟପ୍ରଦ କଣ୍ଠରେ ଉତ୍ତରଗର୍ଭିତ ପ୍ରଶ୍ନମାନ ପଚରାଯାଇଛି ତାହା ଝିଅଟିର ମାନବିକ ଅଧିକାରକୁ ମଧ୍ୟ ଘୋର ସଙ୍କଟଗ୍ରସ୍ତ କରିଛି । ଝିଅଟି ଏପରି କିଛି କଥା ଖୋଲିବାକୁ ବାଧ୍ୟ ହୋଇଛି, ଯାହା ସେ ନିଜ ସପକ୍ଷରେ କ୍ରାଇମ୍ ବ୍ରାଞ୍ଚ୍ ତଦନ୍ତରେ ବା ଅଦାଲତରେ ଦୃଢ ଭାବେ ବ୍ୟବହାର କରିପାରିଥାନ୍ତା । ମୋ ମତରେ ମାନବିକ ଅଧିକାର କମିଶନ ନିଜ ଆଡୁ ଏଥିରେ ହସ୍ତକ୍ଷେପ କରି ଝିଅଟିର ମାନବିକ ଅଧିକାର ବିପର୍ଯ୍ୟସ୍ତ କରିଥିବା ହେତୁ କନକ ନ୍ୟୁଜ୍ ବିରୁଦ୍ଧରେ କାର୍ଯ୍ୟାନୁଷ୍ଠାନ କରିବା ଉଚିତ । ଏ ସମ୍ପର୍କରେ orissamatters.com ପୃଷ୍ଠାରେ ମୁଁ ଯେଉଁ ଅଲୋଚନା କରିଛି ଏବଂ ଏଥିପାଇଁ ମୋ ଫେସବୁକ ଟାଇମ୍ ଲାଇନ୍ ଉଲ୍ଲେଖନ ଯେଉଁ ପ୍ରତିକ୍ରିୟା ଅର୍ଜନ କରିଛି ତାହା ପ୍ରଣିଧାନଯୋଗ୍ୟ । ଆମେ ଓଡ଼ିଆଏ ଯଦି ନିଜ କୃଷ୍ଟିର ରକ୍ଷା ନିଜେ ନକରିବା କିଏ ଆଉ କରିବ ?

ଏବେ କନକ ନ୍ୟୁଜ୍ ଆମ ସାମାଜିକ ସୌନ୍ଦର୍ଯ୍ୟବୋଧ ଉପରେ ଯେଉଁ କଦର୍ଯ୍ୟ ଖେଳ ଖେଳିଛି ଓ  କ୍ରାଇମ୍ ବ୍ରାଞ୍ଚ୍ ତଦନ୍ତକୁ ବାଟବଣା କରିବାକୁ ସମ୍ବାଦିକୀୟ ସ୍ଵାଧୀନତାର ଯେଉଁ ଦୁରୁପଯୋଗ କରିଛି ତାହା ଅନୁଧ୍ୟାନ କରାଯାଉ ।

କନକ ନ୍ୟୁଜରେ ‘ରହସ୍ୟମୟୀ’ ମହିଳା

#KanakNews_Exclusive #BigNews କନକ ନ୍ୟୁଜରେ ‘ରହସ୍ୟମୟୀ’ ମହିଳାଆଦିତ୍ୟଙ୍କ ସହ କିଭଳି ଥିଲା ସଂପର୍କ?ଚିହ୍ନୟୀ ମହାପାତ୍ରLIVE

Posted by Kanak News on Friday, September 4, 2020

 

ଭାଷା ଆନ୍ଦୋଳନର ସାପ୍ତାହନ୍ତ ସିଦ୍ଧାନ୍ତ: ବ୍ୟଙ୍ଗ ସାହିତ୍ୟକୁ ବିଧିକ ମାନ୍ୟତା ପ୍ରଦାନ ହେଉ

(ସୂତ୍ର: ଆମ ଭାଷା ଆମ ଅଧିକାର )

ଗତ ରବିବାର(୩୦/୦୮/୨୦୨୦)ସନ୍ଧ୍ୟାରେ, ଭାଷା ଆନ୍ଦୋଳନର ସାପ୍ତାହିକ ଆଲୋଚନାଚକ୍ର ପୂର୍ବ ଥର ପରି ଭର୍ଚୁଆଲ ଶୈଳୀରେ ଅନୁଷ୍ଠିତ ହୋଇଥିଲା । ଏହି ଆଲୋଚନାଚକ୍ରରେ ଓଡ଼ିଶାର କୋଣ ଅନୁକୋଣରୁ ଭାଷାପ୍ରେମୀମାନେ ଅଂଶଗ୍ରହଣ କରିଥିଲେ । 

ଶ୍ରୀଯୁକ୍ତ ଶ୍ୟାମଘନ ମହାରଣାଙ୍କ ଦ୍ୱାରା ଭାଷା ବନ୍ଦନାରୁ ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା।
ଆଲୋଚନାର ମୁଖ୍ୟ ବିଷୟବସ୍ତୁ ଥିଲା “ଓଡ଼ିଆ ଭାଷା-ସାହିତ୍ୟ ପ୍ରତି ଯୁବ-ସମାଜର ଆଭିମୁଖ୍ୟ।”

ମହାନ ଆମ ମାତୃଭାଷା ସଂଗଠନ ର ପ୍ରତିଷ୍ଠାତା ଶ୍ରୀ ରାଜେଶ କୁମାର ଶତପଥୀ ନିଜ ଆଲୋଚନା ମାଧ୍ୟମରେ ନିମ୍ନ କେତୋଟି ମୁଖ୍ୟ ଦିଗ ପ୍ରତି ଆଲୋକପାତ କରିଥିଲେ। ସେଗୁଡିକ ହେଲା-

୧.ମହାବିଦ୍ୟାଳୟ/ବିଶ୍ୱବିଦ୍ୟାଳୟ ଗୁଡିକରେ ମାତୃଭାଷା ଶିକ୍ଷା ଢାଞ୍ଚାରେ ଏକ ବ୍ୟାପକ ପରିବର୍ତ୍ତନ ଆବଶ୍ୟକ;
୨. ଯୁବ-ସମାଜର ଆଶା ଓ ଆକାଂକ୍ଷାକୁ ଓଡ଼ିଆ ଭାଷା-ସାହିତ୍ୟ ନିଜ ବକ୍ଷରେ ସ୍ଥାନ ଦେବା ଦରକାର;
୩. ଛନ୍ଦ-ମୟ, ରାଗ-ରାଗିଣୀ ଯୁକ୍ତ,ଅଳଙ୍କାର ଯୁକ୍ତ ତଥା ସରଳ ଓ ସାଧାରଣ ମଣିଷର ବୋଧଗମ୍ୟ ହେଲା ଭଳି କାବ୍ୟ କବିତା ସୃଷ୍ଟି ହେବା ଉଚିତ; ଏବଂ ୪.ଯୁବ-ସମାଜକୁ ଭାଷାର ଆଵଶ୍ୟକତା ବିଷୟରେ ଅବଗତ/ସଚେତନ କରାଯିବା ଆବଶ୍ୟକ ।

ଏହି ଆଲୋଚନାଚକ୍ରରେ ଭାଗ ନେଇଥିବା ଭାଷାପ୍ରେମୀ ସୁଶାନ୍ତ କୁମାର ମାହାଳି,ଶ୍ୟାମଘନ ମହାରଣା,ସୌଭାଗ୍ୟ ରାଉତ,ମହେନ୍ଦ୍ର ତ୍ରିପାଠୀ, ସୁଶାନ୍ତ ସେଠୀ, ସରୋଜ କୁମାର ମହାନ୍ତି,ଜନ୍ମେଜୟ ପୁରୋହିତ,ନମାକ୍ଷୀ ପୁରୋହିତ,ଶ୍ରୀଲଷ୍ମୀ ନାୟକ,ଦୁର୍ଯ୍ୟୋଧନ ଦାସ, ନିଜ ନିଜ ମତାମତ ପ୍ରଦାନ କରିଥିଲେ।

ପରିଶେଷରେ ଭାଷା ଆନ୍ଦୋଳନର ପ୍ରତିଷ୍ଠାତା ଶ୍ରୀଯୁକ୍ତ ସୁଭାଷ ଚନ୍ଦ୍ର ପଟ୍ଟନାୟକ  ଦୁଇଟି ନୂତନ ଯୋଜନା ବିଷୟରେ ଆଲୋଚନା କରିଥିଲେ ।

୧.ଓଡିଶା ସାହିତ୍ୟ ଏକାଡେମୀ ଦ୍ୱାରା ଏକ Facebook page ସୃଷ୍ଟି କରି, ନୂତନ ପ୍ରତିଭାମାନକୁ ସୁଯୋଗ ଦେବା  ଓ ୨.ବ୍ୟଙ୍ଗାତ୍ମକ ଲେଖାଗୁଡ଼ିକୁ ବିଦ୍ଧିବଦ୍ଧ ସାହିତ୍ୟର ସ୍ୱୀକୃତି ପ୍ରଦାନ କରିବା ଉପରେ ଭାଷା ଆନ୍ଦୋଦାନଳନର ଗୁରୁତ୍ବ ପ୍ରଦାନ ।

ଏହି ପ୍ରସ୍ତାବଗୁଡ଼ିକୁ  ଉପସ୍ଥିତ ସମସ୍ତେ ସମର୍ଥନ କରିଥିଲେ । ଧନ୍ୟବାଦ ଅର୍ପଣ ସହ ଆଲୋଚନାଚକ୍ର ଶେଷ ହୋଇଥିଲା।