ଭାଷା କ୍ଷେତ୍ରରେ ମାଫିଆମତାଣ // ପ୍ରତିକାର ପାଇଁ ପ୍ରୟାସ ଆରମ୍ଭ

ସୂତ୍ର: ମାତୃଭାଷା ବାହିନୀ

କେନ୍ଦ୍ର ସରକାରଙ୍କ ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ ଭାଷା କ୍ଷେତ୍ରରେ ମାଫିଆ-ମତାଣକୁ ପ୍ରୋତ୍ସାହିତ କରୁଥିବା ଜଣା ପଡ଼ିଲା ପରେ ତାର ପ୍ରତିକାର ପାଇଁ ପ୍ରୟାସ ଆରମ୍ଭ ହୋଇଛି । ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ପରିଷଦ ଅଧ୍ୟକ୍ଷଙ୍କୁ ଆଜି ଏକ ପତ୍ର ଲେଖି ଓଡ଼ିଆ ଭାଷାରେ ଯାନ୍ତ୍ରିକ ଶିକ୍ଷା ପ୍ରଦାନ ପାଇଁ ଯଦି ପୁସ୍ତକ ପ୍ରଣୟନ ଦରକାର, ତେବେ ଓଡ଼ିଶା ସରକାରଙ୍କ ‘ରାଜ୍ୟ ପାଠ୍ୟ ପୁସ୍ତକ ପ୍ରଣୟନ ଓ ପ୍ରକାଶନ ସଂସ୍ଥା’ ତଥା ‘ଓଡ଼ିଆ ଭାଷା ପ୍ରତିଷ୍ଠାନ’କୁ ଦାୟିତ୍ଵ ଦେବାକୁ ଅନୁରୋଧ କରିଛନ୍ତି । କେନ୍ଦ୍ରର ନୂଆ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପ୍ରଭାବିତ କରି ‘ଓଡିଆ ଅଧ୍ୟୟନ ଓ ଗବେଷଣା ସଂସ୍ଥା’ ନାମକ ମଫିଆ ଗୋଷ୍ଠୀ ଏହି ଆଳରେ ୫ କୋଟି ଟଙ୍କାର ଲାଭକରୀ ବେପାର ହାତେଇବା ପାଇଁ ଉପରୋକ୍ତ ପରିଷଦକୁ ବାଧ୍ୟ କରିଥିବା ଖବର ଘୁରିବୁଲୁଛି ଓଡ଼ିଶା ରାଜଧାନୀରେ ।

ଏହି ସଂସ୍ଥା ତାର ବେପାର ପାଇଁ କିପରି ଓଡ଼ିଶା ସରକାରଙ୍କ ଦ୍ଵାରା ପ୍ରସ୍ତୁତ ହୋଇଥିବା ଶାସ୍ତ୍ରୀୟମାନ୍ୟତା ଯୁକ୍ତି ସନ୍ଦର୍ଭକୁ ଚୋରୀ କରିନେଇଛି ତାର ସବିଶେଷ ତଥ୍ୟ ସୁଭାଷ ଚନ୍ଦ୍ର ପଟ୍ଟନାୟକଙ୍କ ପ୍ରାମାଣିକ ଗ୍ରନ୍ଥ ‘ମିଛ କେବେ ସତ ହୁଏନା’ରେ ଖୋଦିତ ହୋଇଛି । ଶ୍ରୀ ପଟ୍ଟନାୟକ ପରିଷଦ ଅଧ୍ୟକ୍ଷଙ୍କୁ ତାହା ସୁଚାଇ, କେନ୍ଦ୍ରୀୟ ପାଣ୍ଠିକୁ ସନ୍ଦର୍ଭ ଚୋରଙ୍କ ଲାଭରେ ଲଗାଇବାରୁ ନିବୃତ୍ତ ହେବାକୁ ଅନୁରୋଧ କରିଛନ୍ତି ।

ଭାଷା କ୍ଷେତ୍ରରେ ମାଫିଆ-ମତାଣକୁ ପ୍ରତିହତ କରିବା ପାଇଁ ଆସନ୍ତା ବୁଧବାର ଭୁବନେଶ୍ଵରରେ ମାତୃଭାଷାପ୍ରେମୀମାନଙ୍କର ଏକ ଜରୁରୀ ବୈଠକ ଆହୁତ ହୋଇଛି ।

ଭାଷା ଜଗତରେ ମାଫିଆ ମତାଣ: ସନ୍ଦର୍ଭ ଚୋରଙ୍କ ପୃଷ୍ଠପୋଷକ କିଏ – ରାମଚନ୍ଦ୍ର କି ଧର୍ମେନ୍ଦ୍ର?

ସୁଭାଷ ଚନ୍ଦ୍ର ପଟ୍ଟନାୟକ

ଓଡ଼ିଆ ଭାଷା ଜଗତରେ ମଫିଆ ମତାଣ ସପ୍ରମାଣ ଚିତ୍ର ମୁଁ ଦେଇଛି ‘ମିଛ କେବେ ସତ ହୁଏନା’ ଶୀର୍ଷକ ମୋର ପୁସ୍ତକରେ । ମୁଁ ଦର୍ଶାଇଛି ଯେ,  ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ସପକ୍ଷରେ ଓଡ଼ିଶା ସରକାର ଯେଉଁ ଯୁକ୍ତି-ସନ୍ଦର୍ଭ ପ୍ରସ୍ତୁତ କରିଥିଲେ, ତାକୁ ଚୋରେଇନେଇ ଡ. ଦେବୀ ପ୍ରସନ୍ନ ପଟ୍ଟନାୟକ ଓ ତାଙ୍କ ସହଯୋଗୀ ସୁବ୍ରତ କୁମାର ପୃଷ୍ଟି  ନିଜ ନିଜକୁ ତାହାର ସ୍ରଷ୍ଟା ବୋଲି ଦେଖେଇ ନାନାବିଧ ଅବୈଧ ଆୟରେ ତାହାର  ଉପଯୋଗ କରୁଛନ୍ତି । 

ଶାସ୍ତ୍ରୀୟ ଓଡ଼ିଆ ପାଇଁ ଉଭୟେ ରାଷ୍ଟ୍ରପତି ସମ୍ମାନ ସକାଶେ ଆଶାୟୀ ଥିବା ବେଳେ, ସୁବ୍ରତ ହିଁ  ରାଷ୍ଟ୍ରପତିଙ୍କ ମହର୍ଷି ବଦରାୟଣ ବ୍ୟାସ ସମ୍ମାନ ଅକ୍ତିଆର କରିଛନ୍ତି ।  ଏହି ସମ୍ମାନ ପାଇଁ ତାଙ୍କର ଆବଶ୍ୟକୀୟ ଯୋଗ୍ୟତା ନଥିବା ବେଳେ କେନ୍ଦ୍ର ସରକାରଙ୍କ ମାନବ ସମ୍ବଳ ବିକାଶ ବିଭାଗ ଓ ରାଷ୍ଟ୍ରପତିଙ୍କ ଦପ୍ତର ଭ୍ରଷ୍ଟତା ଦ୍ଵାରା ପ୍ରଭାବିତ ହୋଇ ତାଙ୍କୁ ଏହି ସମ୍ମାନ ଦିଆଇଥିବା ସୁସ୍ପଷ୍ଟ  ।

ଓଡ଼ିଶାର ଦୁଇଜଣ ରାଜନେତା ଏହି କାମରେ ସୁବ୍ରତଙ୍କୁ ପୃଷ୍ଠପୋଷକତା ଦେଇଥିବା ସନ୍ଦେହ  । ଜଣେ ହେଲେ  ପୂର୍ବତନ ସାଂସଦ ରାମଚନ୍ଦ୍ର ଖୁଣ୍ଟିଆ ଯେ କି ସୁବ୍ରତ କରିଥିବା ସରକାରୀ ସନ୍ଦର୍ଭ ଚୋରିର ଉପଭୋକ୍ତା ଓ ଅନ୍ୟ ଜଣକ ହେଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ , ଯାହାଙ୍କ ପ୍ରଭାବ ଉପରୋକ୍ତ ଦୁଇ ଦପ୍ତରକୁ ବାଟବଣା କରିଥିବା ଦିଲ୍ଲୀର ଏକ ବିଶ୍ଵସ୍ତ ସୂତ୍ରରୁ ଜଣା ପଡିଛି । 

ଏହି ସମ୍ମାନ ପାଇଁ ଯୋଗ୍ୟତାର ଯେଉଁ ମାନଦଣ୍ଡ ଧାର୍ଯ୍ୟ ହୋଇଛି ସେ ଦୃଷ୍ଟିରୁ ଏହି ସମ୍ମାନ ପାଇବାକୁ ସୁବ୍ରତ ସଂପୂର୍ଣ୍ଣ ଅଯୋଗ୍ୟ । ତାଙ୍କ ବିରୁଦ୍ଧରେ ଅଶ୍ଳୀଳତା ଅଭିଯୋଗରେ ଭୁବନେଶ୍ବରର ଏକ ଫୌଜଦାରୀ ମକଦ୍ଦମା ବିଚାରାଧୀନ ଅଛି । ଆଇନତଃ , ଏପରି କୌଣସି ମକଦ୍ଦମାରେ ବିଚାରାଧୀନ ଥିବା କୌଣସି ବ୍ୟକ୍ତି ରାଷ୍ଟ୍ରପତିଙ୍କ ଦ୍ଵାରା ପ୍ରଦତ୍ତ ଏହି ସମ୍ମାନ ପାଇପାରିବେ ନାହିଁ । ଅତଏବ ଏହା ହିଁ ସ୍ପଷ୍ଟ ଯେ, ରାଷ୍ଟ୍ରପତିଙ୍କୁ ମିଥ୍ୟା ତଥ୍ୟ ଦେଇ ବିଭ୍ରାନ୍ତ  କରା ହୋଇଛି । 

ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ପାଇଁ ସୁବ୍ରତଙ୍କର କୌଣସି ଅବଦାନ ନଥିବା ଓଡ଼ିଶା ସରକାରଙ୍କ ବିଶେଷଜ୍ଞ କମିଟି ପୂର୍ବରୁ ଘୋଷଣା କରିଛନ୍ତି । ଉଲ୍ଲେଖଯୋଗ୍ୟ ଯେ, ଏହି କମିଟିରେ ଜଣେ ବିଶେଷଜ୍ଞ ଥିଲେ ଅଧ୍ୟାପକ ପ୍ରସନ୍ନ କୁମାର ମହାନ୍ତି ଯାହାଙ୍କ ଅଧୀନରେ ଶାସ୍ତ୍ରୀୟ ମାନ୍ୟତା ପାଇଁ ଯୁକ୍ତି ସନ୍ଦର୍ଭ ପ୍ରସ୍ତୁତ ହୋଇଥିଲା ।  ସେ ଏହି କମିଟିରେ ନିଜ ଅଭିଜ୍ଞତା ଦୃଷ୍ଟିରୁ ଯେଉଁ ବୟାନ ଦେଲେ, ତାହା ସ୍ପଷ୍ଟ କରିଦେଲା ଯେ, ଓଡ଼ିଆ ଭାଷାର ଶାସ୍ତ୍ରୀୟତା ସମ୍ପର୍କରେ ସୁବ୍ରତଙ୍କର କୌଣସି ଉଲ୍ଲେଖନୀୟ ଗବେଷଣାତ୍ମକ ଅବଦାନ ନାହିଁ । ତେଣୁ,  ଶାସ୍ତ୍ରୀୟ ପୁରସ୍କାର ପାଇବା ପାଇଁ ତାଙ୍କ ନାମ ରାଷ୍ଟ୍ରପତିଙ୍କୁ ସୁପାରିଶ କରାଯାଇ ପାରିବନାହିଁ ବୋଲି ନିଷ୍ପତ୍ତି କରି ତାଙ୍କ ଦରଖାସ୍ତ ସରକାର ବରଖାସ୍ତ କରିଦେଇଥିଲେ । ଏହା ସୁବ୍ରତ ଜାଣନ୍ତି । କିନ୍ତୁ ଏକଥା ନିଶ୍ଚୟ ରାଷ୍ଟ୍ରପତିଙ୍କୁ ଲୁଚେଇ ରଖାଯାଇଛି । ଅତଏବ, ତାଙ୍କ ସପକ୍ଷରେ ରାଷ୍ଟ୍ରପତିଙ୍କୁ ଦିଆଯାଇଥିବା ସୁପାରିଶ ପତ୍ର ସୁନିଶ୍ଚିତ ଜାଲିଆତିପ୍ରସୂତ  । 

ଶାସ୍ତ୍ରୀୟ ମାନ୍ୟତା ସପକ୍ଷରେ ଓଡ଼ିଶା ସରକାର ତିଆରି କରିଥିବା ଯୁକ୍ତି ସନ୍ଦର୍ଭ ଚୋରି କରି ଓଡ଼ିଶାରେ ହଟଚମଟ ସୃଷ୍ଟିକରିଥିବା ଦେବୀ ପ୍ରସନ୍ନ ପଟ୍ଟନାୟକ ଓ ସୁବ୍ରତ କୁମାର ପୃଷ୍ଟିଙ୍କ ଭିତରେ ଏବେ ବାଡ଼ିଆପିଟା ଚାଲିଛି ।  ଓଡ଼ିଶା ସରକାରଙ୍କ ସାଧାରଣ ପ୍ରଶାସନ ବିଭାଗର ୨୧.୮.୨୦୧୯ ତାରିଖର  ୨୩୫୭୧ ସଂଖ୍ୟକ ପତ୍ରରୁ ପ୍ରକାଶ ଯେ, ଏମାନଙ୍କ ବିରୁଦ୍ଧରେ ସର୍ବସତ୍ତ୍ଵ ସଂରକ୍ଷିତ ସରକାରୀ ସନ୍ଦର୍ଭ ଚୋରି ଅଭିଯୋଗ ଉପରେ ଓଡ଼ିଆ ଭାଷା ସାହିତ୍ୟ ଓ  ସଂସ୍କୃତି ବିଭାଗ ତଦନ୍ତ କରୁଛି । ଏ ସମ୍ପର୍କରେ ରାଷ୍ଟ୍ରପତିଙ୍କୁ ଅବଗତ କରାଯାଇଥିଲେ ମଧ୍ୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରଭାବ ଟାଳି ପ୍ରଶାସନିକ କଳ ତାଙ୍କ ପାଖରେ ଏ ତଥ୍ୟ ପହଞ୍ଚାଇ ପାରି ନାହିଁ  ।     

ଓଡ଼ିଆ ଭାଷାର ଉତ୍କର୍ଷତା ଏହି ମାଫିଆ ମତାଣ ଦ୍ଵାରା ଯେପରି ନିଷ୍ପ୍ରଭ ହୋଇନଯାଏ ତାହା ଦେଖିବା ପ୍ରତି ଓଡ଼ିଆର ପ୍ରାଥମିକ କର୍ତ୍ତବ୍ୟ  ।  

 

ତପୋବନର ତପସ୍ଵୀ

ସୁଭାଷ ଚନ୍ଦ୍ର ପଟ୍ଟନାୟକ

ଭାଷା ଆନ୍ଦୋଳନ ସହ ଜଡ଼ିତ ସମସ୍ତେ କବି ଓ ଅଧିବକ୍ତା ଗଜାନନ ମିଶ୍ରଙ୍କୁ ଜାଣନ୍ତି । ଓଡ଼ିଆ ଭାଷାରେ ଓଡ଼ିଶାର ନ୍ୟାୟ ନିଶାପ ପରିଚାଳନା ପାଇଁ ସେ ଆମରଣ ଅନଶନ କରିଥିଲେ ୨୦୧୫ ଜୁଲାଇ ପହିଲାରେ, ଯାହା ଆମ ଭାଷା ଇତିହାସର ଏକ ସ୍ଵତନ୍ତ୍ର ଅଧ୍ୟାୟର ଅଧିକାରୀ । ସରକାର ଏବେ ଯେଉଁ ଓଡ଼ିଆ ବିଶ୍ୱବିଦ୍ୟାଳୟ କରିଛନ୍ତି ତାହାର ପ୍ରଥମ ସ୍ଵପ୍ନ ଦେଖିଥିଲେ ଗଜାନନ ମିଶ୍ର । ପରବର୍ତ୍ତୀ ସମୟରେ ଆମେ ତାହା ଉପରେ ଆଲୋଚନା କରିବା । ଏବେ ଦେଖିବା, ସେ ଏଇ ମୁହୂର୍ତ୍ତରେ କଣ କରୁଛନ୍ତି ।

ଶିକ୍ଷା ଦ୍ଵାରା ସାଧାରଣ ମଣିଷକୁ ଶକ୍ତିଶାଳୀ କରିବାକୁ ସ୍ଵପ୍ନ ଦେଖିଥିବା ଗଜାନନ ତାଙ୍କ ଟିଟିଲାଗଡ଼ ଜମି ଉପରେ ପ୍ରତିଷ୍ଠା କରିଛନ୍ତି ତପୋବନ ଏକାଡ଼େମୀ ଯାହାକୁ କାଳକ୍ରମେ ଉପାଧି କଲେଜରେ ପହଞ୍ଚାଇବା ତାଙ୍କ ଲକ୍ଷ୍ୟ ରହିଛି ।  ଏହା ସମ୍ପର୍କରେ ବି ପରବର୍ତ୍ତୀକାଳରେ ଆମେ ଆଲୋଚନା କରିବା । 

କିନ୍ତୁ ଯାହା ଏହି କ୍ଷଣି ଆଲୋଚ୍ୟ ତାହା ହେଲା ତିତିଲାଗଡ଼ର ଶୁଖାମାଟିର ଚାଷୀମାନଙ୍କୁ କୃଷିକର୍ମଣ ପାଇଁ ଉତ୍ସାହିତ କରିବା ସକାଶେ ତାଙ୍କ ତପୋବନ ପରିସରରେ ଗଢି ତୋଳିଥିବା କ୍ଷେତ । ଲୋକଙ୍କୁ ଆତ୍ମନିର୍ଭରଶୀଳତା ଶିଖାଇବା ସକାଶେ ସେ ନିଜେ ଜମି କମଣ କରି ଫସଲ ଉତ୍ପାଦନ କରୁଛନ୍ତି । ଚାଷ ଜମିରେ ବସି କବିତା ବି ଲେଖୁଛନ୍ତି । ଗରିବ ଲୋକଙ୍କୁ ଆଇନ ସହାୟତା ଦେଉଛନ୍ତି ।  ତାଙ୍କ ପାଇଁ ସ୍ଵପ୍ନର ଶେଷ ନାହିଁ, ଶ୍ରମର ଶେଷ ନାହିଁ , କବିତାର ଶେଷ ନାହିଁ , ସଙ୍ଘର୍ଷର ଶେଷ ନାହିଁ । 

ତାଙ୍କ ଏହି ତପସ୍ୟାସ୍ଥଳର କେତୋଟି ଚିତ୍ର ସବୁ ଓଡ଼ିଆଙ୍କ ପାଇଁ: 

ତପୋବନ ନିକଟସ୍ଥ ଏହି ପାହାଡ଼ ପରି ଅଟଳ ଆଦର୍ଶସମ୍ପନ୍ନ  କବି ଗଜାନନ ସମଗ୍ର ଓଡ଼ିଆ ଜାତି ପାଇଁ ଅନୁକରଣୀୟ ।    

ଫକୀରମୋହନଙ୍କ ଉପରେ ମାଫିଆ ଆଖି? ଡ. ଡି ପି ପଟ୍ଟନାୟକଙ୍କ ବିରୁଦ୍ଧରେ ଅଦାଲତରେ ମାମଲା

ସୁଭାଷ ଚନ୍ଦ୍ର ପଟ୍ଟନାୟକ

ଫକୀରମୋହନଙ୍କ ଅପ୍ରକାଶିତ ହାତଲେଖା ଆତ୍ମଜୀବନୀର ଅସୀମ ଆୟକାରୀ ମୂଲ୍ୟ ଅଛି । କାରଣ ଯେଉଁ ଜୀବନୀ ପ୍ରକାଶିତ, ତାହା ସମ୍ପାଦିତ ।

ସୃଜନିକାରେ ଏହାର ଫଟୋମୁଦ୍ରଣ ଆଂଶିକତଃ ପ୍ରକାଶ ପାଇବା ପରେ ଘଟଣାଟି ଅଦାଲତକୁ ଯାଇଛି । ଜଣେ ବିଶିଷ୍ଟ ସାହିତ୍ୟିକଙ୍କ ଫେସବୁକ ପୃଷ୍ଠାରେ ଏହି ବିବାଦ ପାଇଁ ପ୍ରକଟିତ ଉଦ୍ବେଗ ଉପରେ ମତ ରଖି ମୁଁ ସୃଜନିକାକୁ ସମର୍ଥନ ଜ୍ଞାପନ କଲା  ପରେ ଅବଗତ ହେଲି କି , ଫେସବୁକରେ ଯାହା ଲେଖା ହୋଇଥିଲା କଥାଟି କେବଳ ତାହା ହିଁ ନୁହେଁ ।

ଏପରି ପ୍ରକାଶନ ବିରୁଦ୍ଧରେ ସ୍ଵର ତୋଳିଛନ୍ତି ଫକୀରମୋହନଙ୍କ ନାତୁଣୀ ମୀନାକ୍ଷୀ ଦତ୍ତ । ତାଙ୍କ ପାଖରେ ସାଇତା ହୋଇ ରହିଥିବା ଫକୀରମୋହନଙ୍କ ହାତଲେଖା ପାଣ୍ଡୁଲିପିର ଫଟୋମୁଦ୍ରଣ ପାଇଁ ଡ.  ଦେବୀ ପ୍ରସନ୍ନ ପଟ୍ଟନାୟକ ତାଙ୍କ ଠାରୁ ଏକ ଲକ୍ଷ ଟଙ୍କା ନେଇଥିଲେ । ତାହାର କିୟଦଂଶ ସୃଜନିକାରେ ପ୍ରକାଶ ପାଇ ତହିଁର ସମ୍ପାଦକ ଡ. ପଟ୍ଟନାୟକଙ୍କର ହେଉ ବା ସୃଜନିକାର ହେଉ, ସତ୍ତ୍ଵାଧିକାର ସୃଷ୍ଟି ହେଲା ତାହାକୁ ଏ ପର୍ଯ୍ୟନ୍ତ ସାଇତି ରଖିଥିବା ମୀନାକ୍ଷୀଙ୍କ ଅଜ୍ଞାତରେ ।

ଦେବୀବାବୁ ଗଣମାଧ୍ୟମକୁ କହିଛନ୍ତି କି ପୁସ୍ତକ ସମ୍ପର୍କୀୟ ସତ୍ତ୍ଵାଧିକାର ଆଇନ ଅନୁସାରେ ଏହା ମିନାକ୍ଷୀଙ୍କର ସତ୍ତ୍ଵାଧିକାର ଅନ୍ତର୍ଗତ ନୁହେଁ । ଏଥିରୁ ଏହା ହିଁ ସ୍ପଷ୍ଟ ଯେ, ମିନାକ୍ଷୀଙ୍କ ଠାରୁ ପାଣ୍ଡୁଲିପି ନେବା ପୂର୍ବରୁ ସେ ଜାଣିଥିଲେ ଯେ, ସେହି ପାଣ୍ଡୁଲିପି ଉପରେ ସେ ଯଦି ନିଜର ବା ସୃଜନିକାର ସତ୍ତ୍ଵାଧିକାର ଜାରି କରାଇବେ, ତେବେ ତାହା ଦାବିଦାରହୀନ ସମ୍ପତ୍ତି ଦଖଲକଲା ପରି ହେବ । କେହି ତାକୁ ବିରୋଧ କରିପାରିବେନି । ତାଙ୍କ ସହ ଯୋଡ଼ି ହୋଇଛନ୍ତି ରାଷ୍ଟ୍ରୀୟ ଅଭିଲେଖାଗାରର ସହନିର୍ଦ୍ଦେଶକ ଲଲାଟେନ୍ଦୁ ଦାସ ମହାପାତ୍ର । ଓଡ଼ିଶାର ଭାଷା କ୍ଷେତ୍ରରେ ମାଫିଆ ମତାଣର ଏହା ଆଉ ଏକ ଦୃଷ୍ଟାନ୍ତ । ଶାସ୍ତ୍ରୀୟ ମାନ୍ୟତା ସନ୍ଦର୍ଭ କ୍ଷେତ୍ରରେ ଦେବୀବାବୁଙ୍କ ନେତୃତ୍ବରେ ଯେଉଁ ମାଫିଆ ମତାଣ ହୋଇଥିଲା ତାହା ମୋ ବହି ‘ମିଛ କେବେ ସତ ହୁଏନା’ରେ ଲିପିବଦ୍ଧ ହୋଇଛି ।

ପ୍ରସଙ୍ଗକୁ ଆସିବା । ପ୍ରକାଶିତ ପୁସ୍ତକ ଉପରେ ଲେଖକୀୟ ସତ୍ତ୍ଵାଧିକାର ବା ଲେଖକଙ୍କ ଉତ୍ତରାଧିକାରୀଙ୍କ ସତ୍ତ୍ଵାଧିକାର ଅବଶ୍ୟ  ଆଇନଗତ ଅବଧି ଦ୍ଵାରା ପ୍ରଭାବିତ । ଯେଉଁ ପାଣ୍ଡୁଲିପି ପ୍ରକାଶିତ ହୋଇନାହିଁ , ଲେଖକଙ୍କ ପାଖରେ ବା ତାଙ୍କ ମୃତ୍ୟୁ ପରେ ତାଙ୍କ ଉତ୍ତରାଧିକାରୀ ପାଖରେ ଅପ୍ରକାଶିତ ଅବସ୍ଥାରେ ଅଛି ତାହା କେବଳ ତାଙ୍କରି ସତ୍ତ୍ଵାଧିକାର ଅନ୍ତର୍ଭୁକ୍ତ । ତାହାକୁ ତାଙ୍କଠୁ ଫଟୋମୁଦ୍ରଣ ପାଇଁ ଆଣି ଦେବୀବାବୁ ତହିଁ ଉପରେ ନିଜର ବା ସୃଜନିକାର ସତ୍ତ୍ଵାଧିକାର ଠିଆ କରାଇବେ  କିପରି? ଫକୀରମୋହନଙ୍କ ଅପ୍ରକାଶିତ ପାଣ୍ଡୁଲିପି, ଯାହା ତାଙ୍କ ନାତୁଣୀଙ୍କ ପାଖରେ ଥିଲା, ତାହା କୌଣସି ବେୱାରିଶ ସମ୍ପତ୍ତି ନଥିଲା । ତେଣୁ ତାହା କାହାର ବ୍ୟକ୍ତିଗତ ସମ୍ପତ୍ତି ନୁହେଁ ବୋଲି କହିବା ମାଫିଆମୀ ଭିନ୍ନ କିଛି ବି ନୁହେଁ ।

ଅଧିକନ୍ତୁ, ତାହାର ଫଟୋମୁଦ୍ରଣ ପାଇଁ ଦେବୀବାବୁ ରାଜି ହେବାରୁ ମୀନାକ୍ଷୀ ତାଙ୍କୁ ଏକ ଲକ୍ଷ ଟଙ୍କା ସେହି କାମ ପାଇଁ ପ୍ରଦାନ କରିଛନ୍ତି (ସମ୍ବାଦ, ଅଗଷ୍ଟ ୧,୨୦୦୧୨୧) । ତେଣୁ ଦେବୀବାବୁ ଓ ତାଙ୍କ ସହ ଏହି କାମରେ ଯୋଡ଼ି ହୋଇଥିବା ଦାସମହାପାତ୍ରଙ୍କର କର୍ତ୍ତବ୍ୟ ଥିଲା, ଫଟୋମୁଦ୍ରଣରେ କେତେ ଟଙ୍କା ଖର୍ଚ୍ଚ ହେଲା, ତାର ଟିକିନିଖି ହିସାବ ସହ ପାଣ୍ଡୁଲିପି ଓ ତାର ଫଟୋମୁଦ୍ରିତ ଅବତାରକୁ ଫକୀରମୋହନଙ୍କ ନାତୁଣୀଙ୍କୁ ଅର୍ପଣ କରିବା । ତାହା ନକରି  ଫୌଜଦାରୀ ଓ ଦେୱାନୀ – ଉଭୟବିଧ ଅପରାଧ କରିଛନ୍ତି ଏହି ଦୁଇବ୍ୟକ୍ତି ।

ଓଡ଼ିଶାର ଭାଷାପ୍ରିୟ ବ୍ୟକ୍ତିମାନେ ଏହି ମାଫିଆମତାଣକୁ ବିରୋଧ କରିବା ଉଚିତ । ମୁଁ କରୁଛି ଓ ଫକୀରମୋହନଙ୍କ ନାତୁଣୀଙ୍କୁ ପୂର୍ଣ୍ଣ ସମର୍ଥନ ଦେଉଛି । 

“ଅଣ୍ଟାଭିଡ଼ା” ଛାଡ଼, ଭାଷା ଆଇନ ସଜାଡ଼

ସୁଭାଷ ଚନ୍ଦ୍ର ପଟ୍ଟନାୟକ

ଆମ ଭାଷା ବିରୁଦ୍ଧରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚଳାଇଥିବା ଷଡ଼ଯନ୍ତ୍ର ଯେତେବେଳେ ଫୁଙ୍ଗୁଳା ହୋଇଯାଏ, ଭାଷାପ୍ରେମ ଦେଖାଇ ତହିଁରୁ ଜନସାଧାରଣଙ୍କ ଦୃଷ୍ଟି ଅପସାରଣ କରିବାକୁ ସେ ପ୍ରତାରଣାର ଏକ ନୂଆ ଚାଲ୍ ଚଳାନ୍ତି । ଜୁଲାଇ ୨୭ ତାରିଖରେ ତଥାକଥିତ ଐତିହ୍ୟ କ୍ୟାବିନେଟର ୩ ବର୍ଷ ତଳର ନିଷ୍ପତ୍ତି ଉପରେ ମୁଖ୍ୟ ଶାସନ ସଚିବଙ୍କ ପ୍ରକାଶିତ “ଅଣ୍ଟାଭିଡ଼ା” (ସମ୍ବାଦ ୨୮.୭.୨୦୨୧ , ପୃଷ୍ଠା ୩) ଏହି ପରି ଏକ ଚାଲ୍ । 

ଏ ଭିତରେ ଦୁଇଟି ପୁସ୍ତକ ମୁଁ ପ୍ରକାଶ କରିଛି ଯହିଁରେ ଓଡ଼ିଆ ଭାଷା ବିରୁଦ୍ଧରେ ମୁଖ୍ୟମନ୍ତ୍ରୀ ଏବଂ ତାଙ୍କର ବିଶ୍ଵସ୍ତ ମୁଷ୍ଟିମେୟ ଅଫିସର ଯେଉଁ ଦୁରାଚରଣ କରିଛନ୍ତି ତାହା ନିରାଭରିତ ହୋଇଛି । ଭାଷା ଆନ୍ଦୋଳନକୁ ଭାଙ୍ଗିବା ପାଇଁ ମୁଖ୍ୟମନ୍ତ୍ରୀ ମୋର ତତ୍କାଳୀନ ଦୁଇ ଘନିଷ୍ଠ ସହଯୋଗୀଙ୍କ ଅର୍ଥଲୋଭର ଦୁରୁପଯୋଗ କରିଥିଲେ । ତାହା କରିବାପାଇଁ ଓଡ଼ିଶା ରାଜକୋଷରୁ ପ୍ରାୟ ଦେଢ କୋଟି ଟଙ୍କାର ଲୁଟ୍ ବ୍ୟବସ୍ଥା ବି କରିଥିଲେ । ଯଦିଓ ଏହି ଦେଢ କୋଟି ଟଙ୍କାର ସୁପାରି ଦିଆ ହେଉ ହେଉ ରାଜ୍ୟପାଳଙ୍କ ହସ୍ତକ୍ଷେପ ହେତୁ ଅଟକି ଗଲା, ପ୍ରଦ୍ୟୁମ୍ନ ଶତପଥିଙ୍କୁ ତାଙ୍କ  ସ୍ତ୍ରୀଙ୍କ ମାଧ୍ୟମରେ ସଂପୂର୍ଣ୍ଣ ବେଆଇନ ଭାବେ ପ୍ରତିମାସରେ ଲକ୍ଷ୍ୟାଧିକ ଟଙ୍କା ଦିଆଚାଲିଛି ।  ସେ ନିଜକୁ ଭାଷା ଆନ୍ଦୋଳନର ସଭାପତି ବୋଲି କହି , ଯେଉଁ ପରିଚୟ ମୁଁ ତାଙ୍କୁ ଦେଇଥିଲି ସେହି ପରିଚୟ ବ୍ୟବହାର କରି , ଓଡ଼ିଶା ଲୋକଙ୍କୁ ଯେମିତି କହିବେ ଯେ ଭାଷା ଆଇନ ସଜାଡ଼ି ହୋଇଯାଇଛି ସେହିକାମରେ ତାଙ୍କୁ ନିୟୋଜିତ କରିଛନ୍ତି ମୁଖ୍ୟମନ୍ତ୍ରୀ – ଏହା ମୁଁ  ‘ଦାନାର ତୋବଡ଼ା’ ଶୀର୍ଷକ ପୁସ୍ତକରେ ସପ୍ରମାଣ ପ୍ରକାଶ କରିଛି । ମୁଖ୍ୟମନ୍ତ୍ରୀ ଓ ତାଙ୍କ ଅମଲାମାନଙ୍କ ଭିତରୁ ଯେଉଁମାନଙ୍କୁ ମୁଁ ଏହି ବହିରେ ନାମିତ କରିଛି , ସେମାନେ କେହି ବି  କୌଣସି ପ୍ରକାଶିତ ପ୍ରମାଣକୁ ଖଣ୍ଡନ କରିବାକୁ ସମର୍ଥ ହୋଇନାହାନ୍ତି ।  

ସେହିପରି , ଜୁଲାଇ ୨୩ରେ ମୁଁ ପ୍ରକାଶ କରିଛି ‘ମିଛ କେବେ ସତ ହୁଏନା’ । ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ଅର୍ଜନରେ ବ୍ୟବହୃତ ଐତିହାସିକ ଦସ୍ତାବିଜ ଓ ସେ ସକଳର ବିଶ୍ଳେଷଣ ସମ୍ବଳିତ ସନ୍ଦର୍ଭ , ଯାହା ରାଜ୍ୟବାସୀଙ୍କ ରାଜକୋଷରୁ ବ୍ୟୟ କରି ଓଡ଼ିଆ ଭାଷା ପ୍ରତିଷ୍ଠାନ ପ୍ରସ୍ତୁତ କରିଥିଲା, କିପରି ରାଜ୍ୟବାସୀଙ୍କୁ ଅନୁପଲଭ୍ୟ କରାଯାଇଛି ତାହା ସପ୍ରମାଣ ଏହି ପୁସ୍ତକରେ ଅଛି । ଓଡ଼ିଶା କାର୍ଯ୍ୟାଳୟ ଭାଷା ଆଇନର ଅପସଂଶୋଧନ କରାଯାଇ ଓଡ଼ିଆ ଜାତିର ଭାଷା ଅଧିକାରକୁ ଜଖମ କରାଯାଇଥିବା ବେଳେ ତା ଭାଷାର ପ୍ରାଚୀନ ବୈଭବ ଓ ଭାଷାତାତ୍ତ୍ଵିକ ବଶିଷ୍ଟ୍ୟ ସମ୍ପର୍କରେ ତାକୁ ଅନ୍ଧକାରରେ ରଖିବାକୁ ହୋଇଥିବା ଚକ୍ରାନ୍ତକୁ କିପରି ମୁଖ୍ୟମନ୍ତ୍ରୀ ଘଣ୍ଟଘୋଡ଼ାଇ ରଖିଛନ୍ତି ତହିଁର ସବିଶେଷ ସପ୍ରମାଣ ଆଲୋଚନା ହୋଇଛି ଏହି ବହିରେ ।  

ଏହି ଦୁଇ ବହି ଓଡ଼ିଆ ଭାଷା ବିରୁଦ୍ଧରେ ମୁଖ୍ୟମନ୍ତ୍ରୀଙ୍କ ଷଡ଼ଯନ୍ତ୍ରକୁ ପଦାରେ ପକାଇଛି । ବିଧାନସଭାର ଆଗାମୀ ଅଧିବେଶନ ଆସନ୍ନ । ଭାଷା ଆଇନର ଅପସଂଶୋଧନ ସମ୍ପର୍କରେ ଆଲୋଚନା ହୋଇପାରେ । ଗତ ଅଧିବେଶନରେ ବିଧାନସଭାକୁ ଅଧିସୂଚିତ  ହୋଇଥିବା ଭାଷା ଆଇନ ସଂଶୋଧନ ପାଇଁ ଘରୋଇ ବିଧେୟକ ଏହି ଅଧିବେଶନରେ ଅଲୋଚନାକୁ ଆସିବାର ସମ୍ଭାବନା ଅଛି । 

ଅପରପକ୍ଷେ କାର୍ଯ୍ୟନିର୍ବାହୀ ସରକାରର ମୁଖ୍ୟଙ୍କୁ ଜୁଲାଇ ୭ ତାରିଖରେ ଏକ  ଚିଠି ଦେଇ  ଭାଷା ନିୟମାବଳୀ ଅନୁସାରେ ତାଙ୍କ ଅଧ୍ୟକ୍ଷତାରେ କାମ କରୁଥିବା “କମିଟି” ଗଠିତ ହେବା ଦିନଠାରୁ ଏ ପର୍ଯ୍ୟନ୍ତ କେତେ ଥର କେବେ କେବେ ବସିଛି ଓ କେତେ ଥର କେଉଁ କେଉଁତାରିଖରେ ସମୀକ୍ଷା ରିପୋର୍ଟ ଦେଇଛି ବୋଲି ମୁଁ ପଚାରିଥିଲି ।  ଚିଠିଟି  ହେଲା :

ମୁଖ୍ୟ ଶାସନ ସଚିବ, ଓଡ଼ିଶା
ମହାଶୟ
ଅତ୍ୟନ୍ତ ଜରୁରୀ ଥିବା ହେତୁ ମୁଁ ଆପଣଙ୍କୁ ଏହି ଇ-ମେଲ କରୁଛି ।
ଓଡ଼ିଶା କାର୍ଯ୍ୟାଳୟ ଭାଷା ନିୟମାବଳୀ, ୨୦୧୬ ଅନୁସାରେ ଆପଣଙ୍କ ଅଧ୍ୟକ୍ଷତାରେ କାମ କରୁଥିବା “କମିଟି” ଗଠିତ ହେବା ଦିନଠାରୁ ଏ ପର୍ଯ୍ୟନ୍ତ କେତେ ଥର କେବେ ବସିଛି ଓ କେତେ ଥର ସମୀକ୍ଷା ରିପୋର୍ଟ ଦେଇଛି, କେଉଁ କେଉଁ ତାରିଖରେ ? ଭାଷା ପ୍ରଭାଗ ଏହି କମିଟିର କାର୍ଯ୍ୟଧାରା ଉପରେ କେବେ ଓ କେତେଥର ସମୀକ୍ଷା ଓ ପର୍ଯ୍ୟାଲୋଚନା କରିଛି ଓ ତାର ଫଳ କ’ଣ ? ଏହା ଯେହେତୁ ମୋର ଆଗାମୀ ପୁସ୍ତକରେ ସ୍ଥାନିତ ହେବ, ମୋତେ ତିନିଦିନ ଭିତରେ ଏ ତଥ୍ୟ ଦେବାକୁ ଅନୁରୋଧ । ତାହା ନହେଲେ, ଏପରି କୌଣସି ବୈଠକ / ସମୀକ୍ଷା ଓ ପର୍ଯ୍ୟାଲୋଚନା ହୋଇନାହିଁ ବୋଲି ଉଲ୍ଲେଖ କରାଯିବ ।
ଧନ୍ୟବାଦ ଘେନାକରନ୍ତୁ ।
ସୁଭାଷ ଚନ୍ଦ୍ର ପଟ୍ଟନାୟକ
୭.୭.୨୦୨୧

କାର୍ଯ୍ୟନିର୍ବାହୀ ସରକାରର ମୁଖ୍ୟଙ୍କ ପାଖରେ ମୁଁ ପଚାରିଥିବା ପ୍ରଶ୍ନର କୌଣସି ଉତ୍ତର ନାହିଁ  । 

ଏପରି ଅବସ୍ଥାରେ ମୁଖ୍ୟମନ୍ତ୍ରୀଙ୍କ ମୁଖରକ୍ଷା କିପରି ହେବ?   ସରକାର ଯେଉଁ ଭୁଲ କରିଛନ୍ତି ତାକୁ ଘୋଡ଼ାଇବା ପାଇଁ  ଯେତେ ଆଣ୍ଟ କରି ଅଣ୍ଟା ଭିଡ଼ିଲେ ବି  ପରିବେନି । 

ମୋର ଆଗାମୀ ବହିରେ ଆମ ଭାଷାକୁ ମାରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେଇଜଣ ଦରମାଖିଆ ନୌକର ଯାହା ଯାହା କରିଛନ୍ତି ସେ ସବୁର ପ୍ରାମାଣିକ ତଥ୍ୟ ମୁଁ ପ୍ରକାଶ କରିବି । ମୁଖ୍ୟମନ୍ତ୍ରୀଙ୍କୁ କେଉଁ ଅମଲା କି ସାଞ୍ଜୁ ଯୋଗାଇବ, ଦେଖିବା । 

ସମ୍ବାଦର ସମ୍ପାଦକ ବାବୁ ସୌମ୍ୟ ରଞ୍ଜନ ପଟ୍ଟନାୟକ ଏକଦା ଭାଷା ଆନ୍ଦୋଳନର ଦୃଢ ସମର୍ଥକ ଥିଲେ । ମୁଖ୍ୟମନ୍ତ୍ରୀ ମୋର ଦୁଇଜଣ ଘନିଷ୍ଠ ସହକର୍ମୀଙ୍କ ଅର୍ଥ ଲୋଭ ଚରିତାର୍ଥ କରି ଓଡ଼ିଆ ଜାତିକୁ କୁହା କରିଲେ କି, ଭାଷା ଆଇନର ନିର୍ଭୁଲ ସଂଶୋଧନ ହୋଇଛି । ସୌମ୍ୟବାବୁଙ୍କ ରାଜନୈତିକ ଲୋଭ ଚରିତାର୍ଥ କରି ଭାଷା ଆନ୍ଦୋଳନକୁ ସେ ଦେଉଥିବା ସାମ୍ବାଦିକୀୟ ସହଯୋଗ ଲୋପ କରାଇଦେଲେ । ସେହି ସୌମ୍ୟବାବୁଙ୍କ ସେହି ସମ୍ବାଦ କାଗଜ ଭାଷା ଆଇନ କାର୍ଯ୍ୟକାରୀ କରାଇବାରେ ସରକାରଙ୍କ ଆନ୍ତରିକତାର ଅଭାବ ପ୍ରତି କଟାକ୍ଷପାତ କରି ମୁଖ୍ୟ ଶାସନ ସଚିବଙ୍କ ନିଦ୍ରାଭଙ୍ଗର ଶୀର୍ଷକ କରିଛି “୩ ବର୍ଷ ପରେ ମନେ ପଡ଼ିଲା ଐତିହ୍ୟ କ୍ୟାବିନେଟ୍ କଥା” ।  ମୁଖ୍ୟମନ୍ତ୍ରୀଙ୍କୁ ବିଶ୍ଵାସ କରି ଭାଷା ଆନ୍ଦୋଳନରୁ ସମର୍ଥନ ପ୍ରତ୍ୟାହାର କରିଥିବା ବାବୁ ସୌମ୍ୟ ରଞ୍ଜନ ଏଇ ତିନି ବର୍ଷ ଭିତରେ ଭାଷା ଆଇନର କାର୍ଯ୍ୟକରିତା ପାଇଁ କି କି ପରାମର୍ଶ ସରକାରଙ୍କୁ ଦେଇଛନ୍ତି ତାହା କହିଥିଲେ ତାଙ୍କ କାଗଜର ଉପରୋଦ୍ଧୃତ୍ତ ଶୀର୍ଷକ ଅଧିକ ପରିପୁଷ୍ଟ ହୋଇଥାନ୍ତା ।

କହିବାକୁ କିଛି ଥିଲେ ତ?

ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀଙ୍କୁ ଓ ତାଙ୍କ ମୁଖ୍ୟ ଶାସନ ସଚିବଙ୍କୁ ଆମ୍ଭେ ଯେଉଁ ପରାମର୍ଶ ଦେବାକୁ ଚାହୁଁ ତାହା ହେଲା – ଓଡ଼ିଆ ଜାତିକୁ ପୁନଶ୍ଚ ପ୍ରତାରିତ କରିବା ପାଇଁ  “ଅଣ୍ଟାଭିଡ଼ା” ଛାଡ଼, ଭାଷା ଆଇନ ସଜାଡ଼ ।