ଗତ ମାସ ୬ ତାରିଖରେ ଭାଷା ଆନ୍ଦୋଳନର ସଭାପତି ମଣ୍ଡଳୀ ଓଡ଼ିଶାରେ ସକ୍ରିୟ ଥିବା ସବୁ ରାଜନୈତିକ ଦଳମାନଙ୍କୁ ଅନୁରୋଧ କରିଥିଲା କି, ଓଡ଼ିଶାରେ ଓଡ଼ିଆ ଭାଷାର ରାଜୁତି ପାଇଁ ସେମାନେ ନିଜ ନିଜ ନିର୍ବାଚନ ଇସ୍ତାହାରରେ ସ୍ପଷ୍ଟ ପ୍ରତିଶ୍ରୁତି ଦିଅନ୍ତୁ ।
ଏହି ପ୍ରେକ୍ଷାପଟରେ ଓଡ଼ିଶା ପ୍ରଦେଶ କଙ୍ଗ୍ରେସ ସଭାପତି ଶ୍ରୀ ନିରଞ୍ଜନ ପଟ୍ଟନାୟକ ଚିନ୍ତାଶୀଳ ବ୍ୟକ୍ତିମାନଙ୍କୁ ପଠାଇଥିବା ଏକ ନିବେଦନ ପତ୍ର ଉଲ୍ଲେଖନୀୟ । ସମସ୍ତଙ୍କ ଅବଗତି ପାଇଁ orissamatters.comରୁ ଆହରଣ କରି
ଏହାକୁ ଏଠାରେ ସ୍ଥାନିତ କରାଗଲା ।
ସୁଭାଷ ଚନ୍ଦ୍ର ପଟ୍ଟନାୟକ
ଭାଷା ଆନ୍ଦୋଳନର ସଭାପତି ମଣ୍ଡଳୀ ଓଡ଼ିଶାରେ ନିର୍ବାଚନ ଲଢ଼ୁଥିବା ସମସ୍ତ ରାଜନୈତିକ ଦଳଙ୍କୁ ଗତ ମାସ ୬ ତାରିଖରେ ପତ୍ର ଲେଖି ଓ ସାକ୍ଷାତ କରି ସେମାନଙ୍କ ନିର୍ବାଚନ ଇସ୍ତାହାରରେ “ଓଡିଶା ସରକାରୀ ଭାଷା ଆଇନ,୧୯୫୪କୁ ଅକ୍ଷୁର୍ଣ୍ଣ ରଖି ତହିଁର ଉଲ୍ଲଙ୍ଘନ ବିରୁଦ୍ଧରେ କଠିନ ଦଣ୍ଡ ବିଧାନ ବ୍ୟବସ୍ଥା ପାଇଁ” ପ୍ରତିଶ୍ରୁତି ଦେବାକୁ ଅନୁରୋଧ କରିଥିଲେ । ଏ ପର୍ଯ୍ୟନ୍ତ କେବଳ ଭାରତୀୟ ଜନତା ପାର୍ଟି ନେତୃତ୍ବ ସାର୍ବଜନୀନ ସଭାରେ ଏହି ପ୍ରତିଶୃତି ଦେଇଥିଲେ ମଧ୍ୟ ନିର୍ବାଚନ ଇସ୍ତାହାର ପ୍ରକାଶ ପାଇଲେ ହିଁ ଏହାର ପ୍ରକୃତ ଆଭିମୁଖ୍ୟ ଜଣାଯିବ ।
ଉତ୍କଳ ସମ୍ମିଳନୀ, ପ୍ରଗତି ଉତ୍କଳ ସଂଘ ଓ ଓଡ଼ିଆ ଭାଷା ବିକାଶ ମଞ୍ଚ ମିଳିତ ଭାବେ ରାଉରକେଲାରୁ ଓଡ଼ିଶାବାସୀଙ୍କୁ ଆହ୍ବାନ ଦେଇଛନ୍ତି କି, ଓଡ଼ିଆ ଭାଷା ସ୍ଵାର୍ଥକୁ ନିର୍ବାଚନ ଇସ୍ତାହାରରେ ନ ରଖିବା ଦଳକୁ ଭୋଟ ଦିଆ ନ ଯାଉ ।
ସୁଖର କଥା, ସୂର୍ଯ୍ୟପ୍ରଭାର ସମ୍ପାଦକ, ସୁଲେଖକ ଓ ଚିନ୍ତକ ରବି କାନୁନଗୋ “ଓଡ଼ିଆ ଭାଷା ନିର୍ବାଚନୀ ପ୍ରସଙ୍ଗ ହେବ କି?” ବୋଲି ଆଜିର ସମ୍ପାଦକୀୟରେ ଉତ୍ଥାପିତ କରିଛନ୍ତି ଏହି ପ୍ରସଙ୍ଗ ।
ସରକାରୀ ବିଜ୍ଞାପନପୁଷ୍ଟ ଓଡ଼ିଶାର ଖବରକାଗଜଗୁଡ଼ିକ ମୁଖ୍ୟମନ୍ତ୍ରୀଙ୍କ ରୋଷ ଭୟରେ ଭାଷା ଆନ୍ଦୋଳନର ଅନାହଟ ଥିବା କଳାପତାକା ଅଭିଯାନକୁ ଲୋକଚକ୍ଷୁରୁ ଲୁଚାଇରଖିବା ପରି ସାମ୍ବାଦିକୀୟ କୃଷ୍ଟି ବିରୋଧୀ କୁତ୍ସିତ ଆଚରଣ ପ୍ରଦର୍ଶନ କରିବାକୁ ଲଜ୍ଜ୍ୟାବୋଧ କରୁନଥିଲେ ମଧ୍ୟ ମାତୃଭାଷା ଓଡ଼ିଆର ସ୍ଵାର୍ଥ ରକ୍ଷା ପାଇଁ ରବିବାବୁ ଦେଖାଇଥିବା ମାର୍ଗରେ ଚାଲିପାରିବେ ବୋଲି ଆଶା କରିବା ଦୁରାଶା ହୋଇନପାରେ ।
“ଓଡ଼ିଆଭାଷା,ସାହିତ୍ୟ ଓ ସଂସ୍କୃତିକୁ ପ୍ରାଧାନ୍ୟ ପ୍ରଦାନକରି ଏହାକୁ ସୁରକ୍ଷା ପ୍ରଦାନ ପାଇଁ ଆଗାମୀ ନିର୍ବାଚନରେ ଯେଉଁ ଯେଉଁ ରାଜନୈତିକଦଳମାନେ ସେମାନଙ୍କ ନିର୍ବାଚନୀ ଇସ୍ତାହାରରେ ସ୍ଥାନିତ ନ କରିବେ, ସେହି ରାଜନୈତିକଦଳମାନଙ୍କୁ ଭୋଟ ବର୍ଜନ ସକାଶେ” ଓଡ଼ିଶାର ଜନସାଧାରଣଙ୍କୁ ଆହ୍ବାନ ଦେଇଛି ରାଉରକେଲା ।
ଗୃହୀତ ପ୍ରସ୍ତାବର ଶେଷ ପୃଷ୍ଠା =
ସୁଭାଷ ଚନ୍ଦ୍ର ପଟ୍ଟନାୟକ
ଯେଉଁମାନେ ଆମ ଭାଷାଜନନୀଙ୍କ ଏହି ଚରମ ଦୁର୍ଦ୍ଦିନରେ ନିଜ ଜାତିର ଅସ୍ମିତା ପାଇଁ କଳାପତାକା ତୋଳି ସଗର୍ବେ ଚାଲିପାରୁଛନ୍ତି ରାଜଧାନୀର ରାଜରାସ୍ତାରେ, ସେହିମାନେ ହିଁ ବାଧ୍ୟ କରିଛନ୍ତି ଅହଂକାରୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଥା ନତ କରି, ଆମ ଭାଷାରେ ଆମକୁ ସେବା ପ୍ରଦାନ କରିବା ପାଇଁ ଏଯାଏଁ ଅସହଯୋଗ କରିଆସିଥିବା କର୍ମଚାରୀଙ୍କୁ ଦଣ୍ଡବିଧାନ ପାଇଁ ନିୟମାବଳୀର ସଂଶୋଧନ କରିବାକୁ । ଏହି ସାଫଲ୍ଯ ସତ୍ତ୍ବେ ଆନ୍ଦୋଳନ ଚାଲିରହିବ , କାରଣ ଆମ ଜାତୀୟ ସ୍ବାର୍ଥର ସମ୍ପୂର୍ଣ୍ଣ ପରିପନ୍ଥୀ ଧାରା ୪-କ ଆମ ଭାଷା ଆଇନରୁ ଏଯାଏଁ ଉଚ୍ଛେଦ ହୋଇ ନାହିଁ ।
ଦୁଇ ଜଣ ବିଶ୍ବାସଘାତକ ସରକାରଙ୍କ ଦଲାଲ୍ ସାଜି ଭାଷା ଆନ୍ଦୋଳନକୁ ଛୁରୀ ମାରି ଏହା ପ୍ରତ୍ୟାହୃତ ହୋଇସାରିଛି ବୋଲି ମିଥ୍ଯା ପ୍ରଚାର କଲାପରେ ଆମେ ସିଦ୍ଧାନ୍ତ କଲୁ, ସେହି ଦୁଇ ଜଣଙ୍କ ପାପକୁ ପଦାଘାତ କରି ଏଣିକି ଦୁଇ ଜଣ ଶ୍ରେଷ୍ଠ ଓଡ଼ିଆ ହିଁ ପ୍ରତ୍ୟହ କଳାପତାକା ତୋଳି ଭାଷା ମାଆର ବିଜୟ ଅଭିଯାନ ଚଳାଇବେ ।
ଆଜିର ଦୁଇ ଶ୍ରେଷ୍ଠ ଓଡ଼ିଆ ହେଲେ: ସୁଭାଷ ଚନ୍ଦ୍ର ପ୍ରଧାନ ଓ ଆଶିଷ କୁମାର ବେହେରା ।
୨।୩।୨୦୧୯
ଗତ ତିନି ତାରିଖରେ ଦୁଇ ଜଣ ପ୍ରତିବଦ୍ଧ ଭାଷାପ୍ରେମୀଙ୍କ ହାତରେ କଳାପତାକା ଦେଇସାରି ସୁଭାଷ ଚନ୍ଦ୍ର ପଟ୍ଟନାୟକ ଦେଇଥିବା ବାର୍ତ୍ତା
