ସୁଭାଷ ଚନ୍ଦ୍ର ପଟ୍ଟନାୟକ
ଭାଷା ଆନ୍ଦୋଳନର ଅବସାନ ବିନିମୟରେ ଦଶ ବର୍ଷ ତଳେ କାର୍ଯ୍ୟତଃ ଶେଷ ହୋଇଯାଇଥିବା ଚାକିରିରେ ତାଙ୍କ ସ୍ତ୍ରୀଙ୍କୁ ପୁନଃ ସଂସ୍ଥିତ କରାଇବାକୁ ପ୍ରତିଶ୍ରୁତି ଦେଇଥିବା ଅଣଓଡ଼ିଆ ଜି॰ଭି॰ଭି॰ଶର୍ମା ଭାଷା ଆଇନର ପ୍ରମାଦପୂର୍ଣ ସଂଶୋଧନ ହେବା ବାସିଦିନ ଉଚ୍ଚ ଶିକ୍ଷା ସଚିବ ପଦରୁ ବଦଳି ହୋଇଗଲେ । ସେ ବଦଳି ହେବାର ଦି ଦିନ ପୂର୍ବରୁ ୨୯.୪.୨୦୧୮ ତାରିଖରେ A fraud perpetrated by the CM on the Cabinet ଶୀର୍ଷକ ଏକ ରିପୋର୍ଟ ପ୍ରକାଶ କରି ୧.୫.୨୦୧୮ରେ ହେବାକୁଥିବା ସଂଶୋଧନ ପାଇଁ ମୁଖ୍ୟମନ୍ତ୍ରୀ କ୍ୟାବିନେଟ୍ ସ୍କାମ୍ ପରି ଏକ ଅଶ୍ରୁତପୂର୍ବ ରାଜନୈତିକ ଅପରାଧ କରିବାକୁ ଯାଉଛନ୍ତି ବୋଲି ମୁଁ ପଦାରେ ପକାଇ ଦେଇଥିଲି । ମାତ୍ର ବିଧାନସଭାରେ ମୁଖ୍ୟମନ୍ତ୍ରୀଙ୍କ ଅଭୂତପୂର୍ବ ସଂଖ୍ୟା ଗରିଷ୍ଠତା ତଥା ବିରୋଧୀ ଦଳର ଅମନଯୋଗୀତା ହେତୁ ସଂଶୋଧନ ବିଧେୟକଟି ପାରୀତ ହୋଇଗଲା ।
ଆମର ଉଚିତ ଥିଲା, କଳା ପତାକା ଅଭିଯାନ ଚଳାଇ ରଖିବା । ମାତ୍ର ସରକାରଙ୍କୁ ଭୁଲ ସୁଧାରିବାକୁ ସମୟ ଦେଇ ଜୁଲାଇ ପହିଲା ଶେଷ ଯାଏଁ କଳା ପତାକା କିପରି ସ୍ଥଗିତ ରଖାଗଲା ତାହାର ଆଂଶିକ ସୂଚନା ମୁଁ ପୂର୍ବରୁ ଦେଇଛି । ମୁଁ ଭାବିଥିଲି, ସାରା ଓଡ଼ିଶା ବୁଲି ସବୁ ଗୁରୁତ୍ଵପୂର୍ଣ ସ୍ଥାନରେ ଭାଷା ଆନ୍ଦୋଳନ ଆରମ୍ଭ କରିବାକୁ ଏହି ଏହି ଦୁଇ ମାସ ସମୟକୁ ବ୍ୟବହାର କରିହେବ । ସେଥିପାଇଁ ଏ ସଂଶୋଧନ ସତ୍ତ୍ୱେ କାହିଁକି ଆନ୍ଦୋଳନ ଆବଶ୍ୟକ, ତାହା ମୁଁ ଉପସ୍ଥାପିତ କରିଥିଲି ୩.୫.୨୦୧୮ରେ ମୋ ପ୍ରକାଶିତ Amended Language law pregnant with mischief: Bhasha Andolan gives the Govt two months ଶୀର୍ଷକ ଲେଖାରେ । ଏହା ସାଙ୍ଗକୁ ମୋର ଓଡ଼ିଆ ନିବନ୍ଧ “ଭାଷା ଆଇନ ସଂଶୋଧନ ପୁନଶ୍ଚ ସଂଶୋଧିତ ହେବା ଦରକାର” ୧୧.୫.୨୦୧୮ ତାରିଖର ତତ୍କାଳୀନ ପ୍ରଭାବଶାଳୀ ଦୈନିକ ‘ନିତିଦିନ’ରେ ପ୍ରକାଶ ପାଇ ସରକାରଙ୍କୁ ଅଡୁଆରେ ପକାଇଲା ।ଫଳରେ, ଶର୍ମା ଦେଇଥିବା ପ୍ରତିଶ୍ରୁତି, ଯାହା କଥାରେ ହିଁ ଲଟକି ରହିଥିଲା, କାର୍ଯ୍ୟତଃ କରି ପ୍ରଦ୍ୟୁମ୍ନ ଶତପଥୀଙ୍କୁ ମନେଇବାକୁ ଉଦ୍ୟମ ଚାଲିଲା।
ସଚିବାଳୟର ତୃତୀୟ ମହଲା ଶତପଥୀଙ୍କ ସହ କଥା ହେଲା ପରେ ୧୮.୫.୨୦୧୮ରେ ଆରମ୍ଭ ହୋଇଗଲା ପ୍ରଶାସନିକ ବ୍ୟାୟାମ । ଉପବିଭାଗ ଅଧିକାରୀଙ୍କୁ କୁହାଗଲା କଟକ ଅଡ଼ଶପୁର ସ୍ଥିତ ଉଦୟନାଥ ବିଜ୍ଞାନ ଓ ବୈଷୟିକ କଲେଜ (ଅଡ଼ଶପୁର କଲେଜ)ର ଉଦ୍ଭିଦ ବିଜ୍ଞାନ ଅଧ୍ୟାପିକା ମାନସୀ ଷଡ଼ଙ୍ଗୀଙ୍କ କର୍ମସ୍ଥାନରେ ଯୋଗଦାନ ପାଇଁ ନଥି ପ୍ରସ୍ତୁତ କରିବାକୁ । ପ୍ରଥମ ଟିପ୍ପଣୀରେ ହିଁ ଉପବିଭାଗ ଅଧିକାରୀ ପ୍ରଦୀପ କୁମାର ରାଉତ ଲେଖିଲେ, “ଏହା ଦୃଷ୍ଟିଗୋଚର ହୋଇଛି କି, ଶ୍ରୀମତୀ ଷଡଙ୍ଗୀ ୨.୭.୨୦୦୮ ତାରିଖରୁ ତାଙ୍କ କାମ କରୁନାହାନ୍ତି ।……..ସରକାରଙ୍କ ନିଷ୍ପତ୍ତି ଉଚ୍ଚ ଶିକ୍ଷା ନିର୍ଦ୍ଦେଶକଙ୍କୁ ଜଣାଇ ଦିଆଯାଇଛି ଓ ଦୁଇ ଥର ଅନୁସ୍ମାରକ ବି ପଠା ହୋଇଛି । କିନ୍ତୁ ତାଙ୍କ ଠାରୁ କୌଣସି ଉତ୍ତର ଆସିନି । ଏକ ଅନୁସ୍ମାରକ ସାନି ପଠାଯାଇପାରେ” (ପ୍ରଦୀପ କୁମାର ରାଉତ, ଅନୁବିଭାଗ ଅଧିକାରୀ, ଉଚ୍ଚ ଶିକ୍ଷା, ଟିପ୍ପଣୀ ସମୟ : ୧୮.୫.୨୦୧୮: ୧୩:୩୯:୦୧) ।
ଏ କି ନିଷ୍ପତ୍ତି?
ଯାହା ଆଗରୁ ସୂଚାଇଛି, ଅନଧିକୃତ ଅନୁପସ୍ଥିତିକୁ ଏକ ସାଂଘାତିକ ବିଶୃଙ୍ଖଳା ଭାବେ ବିବେଚନା କରି ଶ୍ରୀମତୀ ଷଡଙ୍ଗୀଙ୍କ ବିରୁଦ୍ଧରେ ଆଇନାନୁଯାୟୀ କାର୍ଯ୍ୟାନୁଷ୍ଠାନ ସକାଶେ ୨୨.୬.୨୦୧୫ ତାରିଖର ଆଦେଶ ପତ୍ରାଙ୍କ ୧୩୨୯୦ରେ ସରକାର ନିଷ୍ପତ୍ତି ନେଇଥିଲେ ।
ଅନଧିକୃତ ଅନୁପସ୍ଥିତି ହେତୁ ୨.୭.୨୦୦୮ ତାରିଖରୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସେ ଉଚ୍ଚଶିକ୍ଷା ନିର୍ଦ୍ଦେଶକଙ୍କ ଚିହ୍ନିତ ସ୍ଥାନରେ ଯୋଗ ଦେବା ପର୍ଯ୍ୟନ୍ତ ସମଗ୍ରକାଳ ଚାକିରି ଭଙ୍ଗ ଭୋଗିବେ, ସେହି ସମୟପାଇଁ କୌଣସି ବେତନ ଓ ଆନୁଷଙ୍ଗିକ ସୁବିଧା ଦାବି କରିବେନି ବୋଲି ସତ୍ୟପାଠ ଦାଖଲ କରିବେ ଓ ଉଚ୍ଚଶିକ୍ଷା ନିର୍ଦ୍ଦେଶକ ତାଙ୍କଠାରୁ ଏହି ସତ୍ୟପାଠ ଗ୍ରହଣ କରି ତାଙ୍କୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବାକୁ ଭୁବନେଶ୍ଵର ବା ତହିଁ ସନ୍ନିକଟସ୍ଥ କୌଣସି ଏକ କଲେଜରେ ଯୋଗ ଦେବାକୁ ଆଦେଶ ଦେବେ । ଏହା ହିଁ ଥିଲା ସେହି ନିଷ୍ପତ୍ତି ।
ଏହି ନିଷ୍ପତ୍ତିକୁ କାର୍ଯ୍ୟକାରୀ କରିବା ପାଇଁ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କୁ ୨୨.୫.୨୦୧୮ର ଆଦେଶ (ଟିପ୍ପଣୀ-୨) ମୁତାବକ ୩ୟ ଅନୁସ୍ମାରକ ପଠାଇ ଉଚ୍ଚଶିକ୍ଷା ବିଭାଗ ଘୁମେଇ ପଡ଼ିଥିଲା ।
ରାଜ୍ୟପାଳଙ୍କୁ ପତ୍ର
ମାତ୍ର ଯେତେବେଳେ ଓଡ଼ିଶା ସରକାରୀ ଭାଷା (ସଂଶୋଧନ) ବିଧେୟକ, ୨୦୧୮କୁ ଅନୁମୋଦନ ନ ଦେଇ ସାନି ବିଚାରପାଇଁ ତାହାକୁ ବିଧାନସଭାକୁ ଫେରାଇ ଦିଅନ୍ତୁ ବୋଲି ୨୪.୫.୨୦୧୮ରେ ମୁଁ ରାଜ୍ୟପାଳଙ୍କୁ ପତ୍ର ଲେଖିଲି ଓ ତାହା ଉପରେ ରାଜ୍ୟପାଳ ଖୋଳତାଡ଼ କଲେ ଏବଂ ସଚିବାଳୟର ତୃତୀୟ ମହଲାରେ ତାହା କମ୍ପନ ସୃଷ୍ଟି କଲା, ସେତେବେଳେ ସରକାର ତତ୍ପର ହୋଇଉଠିଲେ ପ୍ରଦ୍ୟୁମ୍ନ ଶତପଥୀଙ୍କ ସ୍ତ୍ରୀ ମାନସୀଙ୍କୁ ଯେ କୌଣସି ପ୍ରକାରେ ହେଉ ବି ଚାକିରିରେ ସଂସ୍ଥାପିତ କରି ଭାଷା ଆନ୍ଦୋଳନର ଶକ୍ତି ଭାଙ୍ଗିବାକୁ । ଏହି ଅଭିସନ୍ଧି ଭାଷା ଆନ୍ଦୋଳନକୁ ଯେତିକି କ୍ଷତି ପହଞ୍ଚାଇଛି ତତୋଧିକ କ୍ଷତାକ୍ତ କରିଛି ଶାସନକଳର ଶୃଙ୍ଖଳାକୁ । (କ୍ରମଶଃ)
