Posts from the Pictures of resumed Black Flag Since 16 Aug 2016 Category

ନିଉଜ ସିଣ୍ଡିକେଟ

ଦୁଇଜଣ ଦଲାଲଙ୍କୁ ଲଗାଇ ଓଡ଼ିଆ ଜାତିକୁ ପ୍ରତାରିତ କରିବା ପାଇଁ ସରକାର ଯେଉଁ ଉଦ୍ୟମ କରିଥିଲେ ତାହା ଫସରଫାଟି ଯାଇଛି । ଯେଉଁ ନିୟାମବଳୀକୁ ଅଶୁଦ୍ଧ ବୋଲି କହି ଭାଷା ଆନ୍ଦୋଳନ ତାହାକୁ ମଞ୍ଜୁରୀ ନ ଦେବାକୁ ରାଜ୍ୟପାଳଙ୍କୁ କହିଥିଲା, ସେହି ଅଶୁଦ୍ଧ ନିୟମାବଳୀକୁ ରାଜ୍ୟପାଳ ମଞ୍ଜୁରୀ ଦେଇଛନ୍ତି ଓ ତାହା ତତ୍କାଳ ଅଧିସୂଚନା ଦ୍ଵାରା ପ୍ରବର୍ତ୍ତିତ ହୋଇଛି ।

ଯଦି ଜୁଲାଇ ୧୭ରେ ଭାଷା ଆଂଦୋଳନର ସଭାପତିମଣ୍ଡଳୀ ଆହ୍ଵାନରେ ଅନୁଷ୍ଠିତ ମାତୃଭାଷାପ୍ରେମୀ ସମ୍ମିଳନୀରେ ଆମ ଭାଷାକୁ ମାରିଦେବାପାଇଁ ଚାଲିଥିବା ସରକାରୀ ଚକ୍ରାନ୍ତକୁ ଭର୍ତ୍ସନା କରାଯାଇନଥାନ୍ତା ଏବଂ “ଆମ ଭାଷା ଆମ ଅଧିକାର” ଗୋଷ୍ଠୀ ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଏକ ସମୀକ୍ଷାତ୍ମକ ଭିଡ଼ିଓ ପ୍ରକାଶ କରିନଥାନ୍ତେ ତେବେ ହୁଏତ ଏ ନିୟମାବଳୀ ଏଯାଏଁ ରାଜ୍ୟପାଳଙ୍କ ମେଜ ଉପରକୁ ଆସିନଥାନ୍ତା । ଜୁଲାଇ ୧୭ ତାରିଖର ସମ୍ମିଳନୀ ତଥା ସୁଭାଷ ବାବୁଙ୍କ ସାକ୍ଷାତ୍କାର ସରକାରଙ୍କୁ ଏତେ ଅତର୍ଚ୍ଛାଇ ଦେଇଛି ଯେ, ନିସ୍ତାର ପାଇବା ପାଇଁ ପୋଷାମନା ଦଲାଲମାନଙ୍କୁ ଡାକି ସେହିମାନଙ୍କ ଦ୍ଵାରା ଭାଷା ନିୟମାବଳୀ ସଂଶୋଧନ ହୋଇଥିବା କଥା ସରକାର ପ୍ରଚାର କରାଇଛନ୍ତି । ଜନଚେତନରୁ ଜୁଲାଇ ୧୭ ମାତୃଭାଷାପ୍ରେମୀ ସମ୍ମିଳନୀ ଓ “ଆମ ଭାଷା ଆମ ଅଧିକାର” ପ୍ରସାର କରିଥିବା ଭିଡ଼ିଓର ପ୍ରଭାବ ହ୍ରାସ କରିବା ପାଇଁ ଏହା ଯୋଜନା ଅନୁସାରେ କରାଯାଇଥିବା ଏବେ ସମସ୍ତଙ୍କର ହୃଦ୍ବୋଧ ହେଲାଣି । ଏହି ପ୍ରେକ୍ଷାପଟରେ ନିୟମାବଳୀ ସଂଶୋଧନର ସରକାରୀ ନାଟକକୁ ଭାଷା ଆନ୍ଦୋଳନ ପ୍ରତ୍ୟାକ୍ୟାନ କରିଛି ଓ ଯଥାପୂର୍ବ କଳା ପତାକା ଅଭିଯାନ ଚାଲୁରହିଛି ।

ଆଜି ଥିଲା ତ୍ରିରଙ୍ଗା ପତାକାର ଦିବସ । ତେଣୁ, ଭାଷା ଆନ୍ଦୋଳନର କଳାପତାକା ରାଜଧାନୀରେ ବନ୍ଦ ଥିଲା ସବୁଥର ପରି । ଓଡ଼ିଆ ଭାଷାଜନନୀର ଶ୍ରେଷ୍ଠ ସନ୍ତାନମାନଙ୍କ ହାତରେ ଥିଲା ଦୁଇଟି ଫଳକ । ଗୋଟିକରେ ଲେଖା ଥିଲା –

“ସରକାରୀ ଷଡ଼ଯନ୍ତ୍ର ବନ୍ଦ ହେଉ
ଭାଷା ଆଇନ ନିର୍ଭୁଲ ହେଉ ”

ଓ ଅନ୍ୟଟିରେ ଲେଖା ହୋଇଥିଲା –

“ଓଡ଼ିଶା ଗଠିତ ଓଡ଼ିଆ ପାଇଁ
ଇଂରେଜୀ ରାଜୁତି ଚଳିବ ନାଇଁ ”

ଏକୁ ସଗର୍ବେ ଧାରଣ କରିଥିଲେ ଭାଇ ସୁଭାଷ ଚନ୍ଦ୍ର ପ୍ରଧାନ ଓ ଭାଇ ଶିଶିର କୁମାର ସାହୁ

ଭାଇ କମଳଲୋଚନ ନାୟକ ଆଜି ନେତୃତ୍ବ ଦେଇଥିଲେ । ସାଙ୍ଗରେ ଥିଲେ ବିଶିଷ୍ଟ ବୈଜ୍ଞାନିକ ଡଃ ଅଶୋକ ମିଶ୍ର ଓ କୃଷ୍ଣାନନ୍ଦ ସାହୁ ।

ଓଡ଼ିଆ ଜାତିକୁ ପ୍ରତାରିତ କରିବାକୁ ସରକାର ଯେତେ କଳକୌଶଳ ପ୍ରୟୋଗ କଲେ ସବୁ ବ୍ୟର୍ଥ ହୋଇଛି । ଆର୍ଥିକ ଫାଇଦା ପାଇଁ ସରକାରଙ୍କ ସହ ହାତ ମିଳାଇଥିବା ଦଲାଲ୍ ମାନେ ଭାଷା ଆନ୍ଦୋଳନର ନାମ ବ୍ୟବହାର କରି ଯେତେ ବୟାନ ଦେଲେ ମଧ୍ୟ ଓଡ଼ିଆ ଜାତି ତହିଁରେ ବିଭ୍ରାନ୍ତ ହେବାର ନାହିଁ ।

ସବୁ ଦିନପାଇଁ ଆମ ଭାଷାଜନନୀଙ୍କୁ ବିପଦମୁକ୍ତ କରିବାକୁ ଏ ଆନ୍ଦୋଳନ ଆଜି ଟପିଲା ୧୨୧୮ ଦିନ । ଏବଂ ଏ ଆନ୍ଦୋଳନ ଚାଲିବ ଯେଉଁଯାଏଁ ଆମ ଭାଷା ଆଇନରେ ଖଞା ହୋଇଥିବା ମାରକ ଧାରା ୪କ ବିଲୁପ୍ତ ନ ହୋଇଛି ଏବଂ ଓଡ଼ିଆବିରୋଧୀ ନିୟମାବଳୀ ପ୍ରତ୍ୟାହୃତ ହୋଇ ଆମ ଭାଷା ପାଇଁ ଅନୁକୂଳ ନିୟମାବଳୀ ପ୍ରଣୟନ ଓ ପ୍ରବର୍ତ୍ତନ ନ ହୋଇଛି ।

ଫୁଲବାଣୀରେ ମଧ୍ୟ ଆଜି କଳାପତାକା ଅଭିଯାନ ଯଥାପୂର୍ବ ଅନୁଷ୍ଠିତ ହୋଇଛି । ଭାଷା ଆନ୍ଦୋଳନକୁ ସମର୍ଥନ କରି ସରକାରୀ ତଞ୍ଚକତା ବିରୁଦ୍ଧରେ ପ୍ରତିବାଦ କରିଛନ୍ତି ଓଡ଼ିଆ ମାଟିର ତିନି ଶ୍ରେଷ୍ଠ ସନ୍ତାନ ସର୍ବଶ୍ରୀ ଅଶୋକ ପରିଡ଼ା, କାହ୍ନୁ ଚରଣ ଶତପଥୀ ଓ ସୁରେନ୍ଦ୍ର ମହାନ୍ତି ।

ସରକାର ସୁଧୁରି ଯାଆନ୍ତୁ ।

ସୁଭାଷ ଚନ୍ଦ୍ର ପଟ୍ଟନାୟକ

ଲଜ୍ଜା ! ଭାଷା ଆନ୍ଦୋଳନ ବନ୍ଦ ହୋଇ ସାରିଛି ବୋଲି ସରକାରଙ୍କୁ ଅବଗତ କରାଇ ଆର୍ଥିକ ଫାଇଦା ଅର୍ଜନ କରିଥିବା ପ୍ରଦ୍ୟୁମ୍ନ ଶତପଥୀ, ପବିତ୍ର ମହାରଥା ଓ ତାଙ୍କଦ୍ଵାରା ଦିଗଭ୍ରଷ୍ଟ ମୁଷ୍ଟିମେୟ ବ୍ୟକ୍ତି ଓଡ଼ିଆ ଭାଷାର ଏକ ଘୋର କ୍ଷତିକାରକ ସଂଶୋଧନକୁ ପୁନଶ୍ଚ ସ୍ଵାଗତ ଜଣାଇ ଓଡ଼ିଆ ଜାତିକୁ ବିଭ୍ରାନ୍ତ କରିବା ପାଇଁ ଭାଷା ଆଂଦୋଳନର ନାମ ବ୍ୟବହାର କରିଛନ୍ତି ଓ ଗଣମାଧ୍ୟମର ଦୁରୁପଯୋଗ କରିଛନ୍ତି ।

ସରକାରଙ୍କ ଏହି ତୋଷାମଦିଆମାନେ ମଧୁବାବୁଙ୍କ ଉକ୍ତି “ତୋଷାମଦିଆର କୁକୁର ପ୍ରକୃତି ଅଇଁଠାପତରେ ଧ୍ୟାନ” ବୁଝିପାରିବେ କି ନାଁ କିଏ କହିବ? ଏମାନେ ଏତିକି ବୁଝିପାରୁନାହାନ୍ତି ଯେ, ସରକାରଙ୍କ ପୋଷାମାନି ୧୬.୭.୨୦୧୮ସନ୍ଧ୍ୟାରେ ଏମାନେ କଳାପତାକା ଅଭିଯାନ ବନ୍ଦ ରଖିବାକୁ ଭାଷା ଆନ୍ଦୋଳନ ନିଷ୍ପତ୍ତି କରିଛି ବୋଲି ଏହି ପରି ଗଣମାଧ୍ୟମରେ ଯେଉଁ ପ୍ରଚାର କରିଥିଲେ ତାହା ଏମାନଙ୍କ ଅଧିକାର ବହିର୍ଭୂତ ଥିଲା ବୋଲି ଓଡ଼ିଆ ଜାତି ସାବ୍ୟସ୍ତ କରିଛି ଓ ସେହିଦିନଠାରୁ ଆଜି ପର୍ଯ୍ୟନ୍ତ ଏ ଅନନ୍ୟ ଆନ୍ଦୋଳନ ଚାଲିଛି ।

ଏହି ଆନ୍ଦୋଳନରେ ଓଡ଼ିଶାର ଶ୍ରେଷ୍ଠ ସନ୍ତାନମାନେ ପ୍ରତିଦିନ କଳା ପତାକା ଅଭିଯାନ ଚଳାଇ ଭାଷା ମାଆର ସ୍ଵାର୍ଥ ପାଇଁ ଚାପ ପ୍ରୟୋଗ କରିଚାଲିଛନ୍ତି ଓ ଏହି ଚାପରେ ସରକାର ୨୦୧୮ସେପ୍ଟେମ୍ବରରେ ପୁଣି ଥରେ ଭାଷା ଆଇନ ସଂଶୋଧନ କରିଛନ୍ତି ଓ ୨୦୧୯ରେ ନିଯମାବଳୀ ସଂଶୋଧନ କରିଛନ୍ତି । ଏହା ହୋଇଛି ଲାଗିରହିଥିବା ଆନ୍ଦୋଳନର ପ୍ରଭାବରେ ।

କିନ୍ତୁ ଏକୁ ବି ଆମେ ଗ୍ରହଣ କରୁନାହୁଁ । ୨୦୧୮ରେ ହୋଇଥିବା ଭାଷା ଆଇନ ସଂଶୋଧନ ପ୍ରତ୍ୟାହୃତ ହୋଇ ସେହି ପ୍ରମାଦପୂର୍ଣ ସଂଶୋଧନ ମାଧ୍ୟମରେ ଖଞ୍ଜା ହୋଇଥିବା ୪କ ଧାରାର ବିଲୋପନ ନ ହେଲେ ଏବଂ ୨୦୧୬ ନିଯମାବଳୀ ସମ୍ପୂର୍ଣ ବିଲୁପ୍ତ ହୋଇ ୨୦୧୫ରେ ମୁଁ ଦେଇଥିବା ବିଧାନ ଅନୁରୂପେ ନିୟମାବଳୀ ପ୍ରଣୀତ ଓ ପ୍ରବର୍ତ୍ତିତ ନ ହେଲେ ଆମ ଭାଷା କେବେ ବି ବିପଦମୁକ୍ତ ହେବ ନାହିଁ ।

ଏମାନଙ୍କୁ ପୋଷା ମନାଇଲା ପରେ ମୁଁ ଦେଇଥିବା ବିଧାନକୁ ଲୋକ ଚକ୍ଷୁରୁ ଲୁଚାଇ ରଖିବା ପାଇଁ ମୁଖ୍ୟମନ୍ତ୍ରୀଙ୍କ ଗୋପନ ଆଦେଶରେ ସମ୍ପୃକ୍ତ ୱେବ ସାଇଟକୁ ସରକାର ଅଚଳ କରି ଦେଇଥିଲେ । ଗତମାସ ୧୭ ତାରିଖରେ ଭାଷା ଆନ୍ଦୋଳନ ଦ୍ଵାରା ଆହୂତ ମାତୃଭାଷାପ୍ରେମୀ ସମ୍ମିଳନୀରେ ଏ ସମ୍ପର୍କରେ ବ୍ୟାପକ ଚର୍ଚ୍ଚା ହୋଇ ତୁରନ୍ତ ତାହାକୁ ସର୍ବସାଧାରଣଙ୍କ ପାଇଁ ଉପଲଭ୍ୟ କରିବାକୁ ପ୍ରସ୍ତାବ ଗୃହୀତ ହେବା ପରେ ସରକାର ବାଧ୍ୟ ହୋଇଛନ୍ତି ତାହା ଉପରୁ ନିଷେଧାଦେଶ ପ୍ରତ୍ୟାହାର କରିବାକୁ । ଆପଣମାନେ ସମସ୍ତେ ଏବେ odia.odisha.gov.in ଖୋଲି ତା ଭିତରେ ମୁଁ ଦେଇଥିବା ପ୍ରସ୍ତାବିତ ନିଯମାବଳୀ ଦେଖିପାରିବେ, ଯାହାକୁ ଭଣ୍ଡୁର କରିବା ପାଇଁ ନବୀନ ପଟ୍ଟନାୟକ ଏହି ବିଶ୍ବାସଘାତକମାନଙ୍କୁ ଥୋପ ଗିଳାଇଥିଲେ ।

ମୁଁ ଲଜ୍ଜିତ ଯେ, ଏମାନେ ଏକଦା ମୋର ସହକର୍ମୀ ଥିଲେ । ଏମାନଙ୍କ ବିଷାକ୍ତ ଚରିତ୍ର ସମ୍ପର୍କରେ ମୋତେ ବହୁ ବନ୍ଧୁ ସତର୍କ କରାଇଦେଇଥିଲେ । କିନ୍ତୁ ଏମାନେ ମୋର ଏତେ ଅନୁଗତ ଥିଲେ ଯେ, ମୁଁ ବିଶ୍ଵାସ କରିପାରୁନଥିଲି ଯେ, ଭିତରେ ଭିତରେ ଏମାନେ ନିଜ ଅର୍ଥୀକ ଫାଇଦା ପାଇଁ ସରକାରଙ୍କ ଶ ହାତ ମିଳାଇ ଥିଲେ । ଏମାନଙ୍କ ମୋତେ ସତର୍କ କରାଇ ଦେଇଥିବା ବନ୍ଧୁମାନଙ୍କ କଥା ମୁଁ ଯଦି ମାନିଥାନ୍ତି, ତେବେ ମୁଁ ପ୍ରତିଷ୍ଠା କରିଥିବା ଭାଷା ଆନ୍ଦୋଳନକୁ ନିଜ ଆନ୍ଦୋଳନ କହି ଏବେ ବି ଏମାନେ ଏତେ ନିର୍ଲ୍ଲଜ ଭାବେ ଓଡ଼ିଆ ବିରୋଧୀ ଏକ ସରକାରୀ ଷଡ଼ଯନ୍ତ୍ରକୁ ଏପରି ସ୍ଵାଗତ ଜଣାଇ ନଥାନ୍ତେ ।

ପ୍ରିୟ ଭାଇ ଓ ଭଉଣୀମାନେ, ଆମ ଲୋକମାନଙ୍କୁ ପ୍ରତାରିତ କରିବା ପାଇଁ ଏମାନେ ସରକାରଙ୍କ ଠିକା ନେଇଛନ୍ତି । କଣ ସଂଶୋଧନ ହେଲା ଏମାନେ ଜାଣନ୍ତି ନାହିଁ । ଏମାନଙ୍କୁ ମୁଁ ବାରମ୍ବାର ଖୋଲା ବିତର୍କକୁ ଆହ୍ଵାନ କରିଛି । ଏମାନେ କେବେ ବିତର୍କକୁ ଆସିନାହାନ୍ତି । ମୁଁ ଯେଉଁ ବିଧାନ ପ୍ରସ୍ତାବ କରିଥିଲି ତଦନୁଯାୟୀ ୨୦୧୬ ମଇ ମାସରେ ସରକାର ଆଇନ ସଂଶୋଧନ କଲେ । ମାତ୍ର ମୁଁ ଦେଇଥିବା ନିୟମାବଳୀକୁ ବିଧିଭୁକ୍ତ ନ କରିବା ପାଇଁ ସେ ବର୍ଷ ଅଗଷ୍ଟ ୧୨ ତାରିଖରେ ଯେଉଁ ନିୟମାବଳୀ କଲେ ତହିଁରେ ଆମ ଭାଷାକୁ ମାରିଦେବାର ବୀଜ ରୋପିତ ହୋଇଥିଲା । ତାକୁ ମୁଁ ସମ୍ପୂର୍ଣ ବିରୋଧ କରିବା ଫଳରେ ୨୦୧୮ରେ ମୂଳ ଆଇନଟିକୁ ଖର୍ବ କରିବା ପାଇଁ ଭାଷା ଆଇନର ସଂଶୋଧନ କରାଗଲା ଓ ତହିଁରେ ଥିବା ତ୍ରୁଟିକୁ ମୁଁ ଧରା ପକାଇ ଦେବା ଫଳରେ ସରକାର ଆର୍ଥିକ ମାୟାଜାଲରେ ପବିତ୍ର-ପ୍ରଦ୍ୟୁମ୍ନ ଯୋଡ଼ିଙ୍କୁ କଏଦ କରି ଆମ ଜାତି ବିରୁଦ୍ଧରେ ପ୍ରୟୋଗ କରୁଛନ୍ତି । ଏହି ଭୟଙ୍କର ଦୁର୍ନୀତି ଉପରେ ମୁଁ ତ bhashaandolan.com ଓ orissamatters.com ତଥା ଏହି ସାମାଜିକ ଗଣମାଧ୍ୟମରେ ସମସ୍ତ ତଥ୍ୟପ୍ରମାଣଭିତ୍ତିକ ଆଲୋଚନା ରଖୁଛି । ଆହୁରି ବି ରଖିବି , କାରଣ ଆମ ଭାଷା ଆମ ମା ଓ ତାକୁ ବିପଦମୁକ୍ତ କରିବା ଆମ କର୍ତ୍ତବ୍ୟ ।

ଡ॰ ଅଶୋକ ମିଶ୍ର , ସୁଭାଷ ଚନ୍ଦ୍ର ପ୍ରଧାନ, କମଳ ଲୋଚନ ନାୟକ, ଗିରିଜାକାନ୍ତ ମିଶ୍ର, ଅର୍ଜୁନ ଚରଣ ସାମନ୍ତରାୟ, ଧ୍ରୁବ ଚରଣ ମହାନ୍ତି ପ୍ରମୁଖଙ୍କୁ ନେଇ ଗଠିତ ଭାଷା ଆଂଦୋଳନର କର୍ମରତ ସଭାପତିମଣ୍ଡଳୀ ଖୁବ ଶୀଘ୍ର ଏହି ତଞ୍ଚକତା ଉପରେ ଗଣମାଧ୍ୟମକୁ ଅବଗତ କରାଇବ ।

ସେ ପର୍ଯ୍ୟନ୍ତ, ଦିଦିନ ତଳେ ଜାରି ହୋଇଥିବା ମୋର ଏହି ଭିଡିଓଟି ଦେଖନ୍ତୁ ଓ ଏହି ଚାଣୁର ମୁଷ୍ଟିକ ଯୋଡ଼ିଙ୍କ କବଳରୁ ନିଜ ଭାଷା ଜନନୀଙ୍କୁ ରକ୍ଷା କରିବା ପାଇଁ କ୍ରମାଗତ କଳା ପତାକା ଅଭିଯାନକୁ କିପରି ସମ୍ପ୍ରସାରିତ କରାଯିବ ସେଥିପାଇଁ ମନ ସ୍ଥିର କରନ୍ତୁ ।

ମା ଓଡ଼ିଶାର ଏବଂ ମାତୃଭକ୍ତ ଓଡ଼ିଆ ଜାତିର ଜୟ ହେଉ ।

ନିଉଜ ସିଣ୍ଡିକେଟ
ଭାଷାଜୀବୀ ଓ ଭାଷାନୁରକ୍ତ ସମାନ ନୁହନ୍ତି । ସାହିତ୍ୟିକମାନେ , ଯେଉଁମାନେ ଆମ ଭାଷାକୁ ଉପଯୋଗ କରି ଅର୍ଥ ଉପାର୍ଜନ କରୁଛନ୍ତି ସେମାନେ ଭାଷାଜୀବୀ । ମାତ୍ର ଆମ ମାତୃଭାଷାକୁ ବିଦେଶୀ ଭାଷାର ଆଧିପତ୍ୟ କବଳରୁ ବଞ୍ଚାଇବା ପାଇଁ ଯେଉଁମାନେ ନିଜର ସମସ୍ତ ସୁଖ ସ୍ବାଚ୍ଛନ୍ଦ୍ୟ ଭୁଲି ପ୍ରତିଦିନ କଳାପତାକା ଅଭିଯାନ ଚଳାଇଛନ୍ତି ସେମାନେ ଭାଷାନୁରକ୍ତ ।

ଆମ ଭାଷାରେ ଆମ ରାଜ୍ୟ ପରିଚାଳନା ପାଇଁ ଚାଲିଥିବା ନିଶବ୍ଦ କଳାପତାକା ଅଭିଯାନର ଏଇ ୧୨୧୭ ଦିନରେ ଆଜି ଯେଉଁ ଦୁଇ ଶ୍ରେଷ୍ଠ ଓଡ଼ିଆ ନିଜର ଭାଷାନୁରକ୍ତି ପ୍ରଦର୍ଶନ କରିଛନ୍ତି ସେମାନେ ହେଲେ ଭାଇ କମଳ ଲୋଚନ ନାୟକ ଓ ଭାଇ ସୁଭାଷ ଚନ୍ଦ୍ର ପ୍ରଧାନ । ସମଗ୍ର ଓଡ଼ିଆ ଜାତି ସାଙ୍କେତିକତଃ ଏହି ଦୁଇ ଭାଇଙ୍କ ଭିତରେ ସଂସ୍ଥିତ । ଡ॰ ଅଶୋକ ମିଶ୍ର ଏହି ଉଭୟ ଭାଷାନୁରକ୍ତଙ୍କ ଫଟୋ ଉଠାଇ ଆପଣମାନଙ୍କ ପାଇଁ ପଠାଇଛନ୍ତି ।

ଫୁଲବାଣୀ

କଳାପତାକା ଅଭିଯାନ ଭୁବନେଶ୍ଵର ବାହାରେ ସବୁଠୁ ଅଧିକ ଦିନ ଚାଲିଛି ଫୁଲବାଣୀ ସହରରେ । ଆଜି ଭାଇ ଅଶୋକ ପରିଡ଼ା ଓ ସୁରେନ୍ଦ୍ର ମହାନ୍ତି ଓଡ଼ିଆ ଜାତିର ଭୀଷ୍ମ ପ୍ରତିଜ୍ଞା ଜଣାଇ ଦେଇଛନ୍ତି ସରକାରଙ୍କୁ, ଯାହା ଭାଶାନୁରକ୍ଟିର ଶକ୍ତିରେ ଶକ୍ତିମାନ ।

ଓଡ଼ିଶାର ଭାଷାଜୀବୀମାନେ ଯଦି ଭାଷାନୁରକ୍ତ ହୋଇପାରନ୍ତେ ଓଡ଼ିଆ ଭାଷା ତା ନିଜ ପରିସୃଷ୍ଟ ପ୍ରଦେଶରେ ସରକାରୀ ଷଡ଼ଯନ୍ତ୍ର କବଳରୁ ନିସ୍ତାର ପାଇପାରନ୍ତା ।

ସୁଭାଷ ଚନ୍ଦ୍ର ପଟ୍ଟନାୟକ

ବୁଦ୍ଧଙ୍କର ଜନ୍ମସ୍ଥାନକୁ ଅପବିତ୍ର କରି ବୌଦ୍ଧ ଧର୍ମର ମୂଳ ଉତ୍ସକୁ ନଷ୍ଟ କରିବା ପାଇଁ ମଗଧର ଚଣ୍ଡାଶୋକ ଆମକୁ ଆକ୍ରମଣ କରିଥିଲେ । ଶୋଚନୀୟ ପରାଜୟ ଭୋଗିଲେ ଓ ଯେଉଁ ବୌଦ୍ଧ ଧର୍ମକୁ ମାରା କରିବାକୁ ଆସିଥିଲେ, ଜୀବନ ବଞ୍ଚାଇବାକୁ ସେହି ଧର୍ମରେ ଦୀକ୍ଷା ନେଇ ଫେରିଗଲା ପରେ ମଗଧରେ ପ୍ରୌଢୀ ଦେଖାଇ କହିଲେ, ଯୁଦ୍ଧର ବିଭୀଷିକା ଦେଖି ତାଙ୍କ ହୃଦୟ ତରଳିଗଲା ଓ ସେ ବୌଦ୍ଧ ଧର୍ମ ଗ୍ରହଣ କରିଗଲେ।

ଯାହା ହେଉ , ଏ ବିଭୀଷିକା ବର୍ଣନା କରିବାକୁ ସେ ଯେଉଁ ଦୃଶ୍ୟପଟର ଅବତାରଣା କରିଥିଲେ, କପୋଳ କଳ୍ପିତ କିମ୍ବଦନ୍ତୀ ହେଉ ପଛେ ,ତାହା ଆମକୁ ଦିଏ ଅଶୋକଙ୍କ ମାନସପଟରେ ଥିବା ଆମ ଜାତୀୟ ଚରିତ୍ରର ଏକ ଚିତ୍ର । ତାହା ହେଲା, ଧଉଳିଗିରି ପାଦଦେଶରେ ମରି ପଡ଼ିଛନ୍ତି ଆମର ସବୁ ସୈନ୍ୟ ; ଦୟାନଦୀର ନୀଳ ପାଣି ସେମାନଙ୍କ ରକ୍ତରେ ଲାଲ । ଚଣ୍ଡାଶୋକ ଅଟ୍ଟହାସ୍ୟ କରି କହି ଉଠିଲେ – ଯେଉଁ ଜାତି ଏଯାଏଁ ଥିଲା ଅପରାଜେୟ ତାହାକୁ ମୁଁ ଜୟ କରିଗଲି ! ତାଙ୍କୁ ଲାଗିଲା , ମୃତ୍ୟୁର ସେହି ମହା ନିସ୍ତବ୍ଧତା ଭେଦ କରି କିଏ ଯେମିତି କିଛି କହୁଛି । ସେହି ଶବ୍ଦ ଆସୁଥିବା ଦିଗକୁ ଦୃଷ୍ଟି ପକାଇ ସେ ଦେଖିଲେ, ପଡ଼ିରହିଥିବା ଜଣେ ସୈନିକର କଷ୍ଟେମଷ୍ଟେ ଉପରକୁ ଉଠିଥିବା ଗୋଟାଏ ହାତରେ ପଟେ ତଲୱାର ଝଲସି ଉଠୁଛି ଘନକୃଷ୍ଣ ମେଘ ଦେହରେ ବିଦ୍ୟୁତ ଚହଟିଲା ପରି । କୌତୁହଳ ସମ୍ଭରଣ କରିନପାରି ସେ ତା ପାଖକୁ ଗଲେ । ଭୟଙ୍କର ଭାବେ କ୍ଷତାକ୍ତ ହୋଇ ତଳେ ପଡ଼ିଥିବା ସେହି ମୁମୂର୍ଷୁ ସୈନିକ ତଲୱାର ଚହଟାଇ କହୁଥିଲା, “ମୂର୍ଖ ଅଶୋକ, ମୁଁ ତ ଏଯାଏଁ ବଞ୍ଚିଛି , ମୋ ଜାତି ହାରିଗଲା କେତେବେଳେ?”

ଅଶୋକ ଏହା ଦେଖି ଅଭିଭୂତ ହୋଇଗଲେ ଓ ଚିତ୍କାର କରି କହିଲେ, “ଯେଉଁ ଜାତିର ଜଣେ ବି ବ୍ୟକ୍ତି ମୃତ୍ୟୁ ମୁଖରେ ବି ଏକାକୀ ତାର ମାତୃଭୂମି ଓ ତାର ଆଦର୍ଶ ସହ ଅଟଳ ଥାଏ ସେ ଜାତି କେବେ ବି ପରାଜିତ ହୋଇ ନପାରେ ।” ଏବଂ ଏହା କହି, ସେହି ଚଣ୍ଡାଶୋକ ନିଜକୁ ଧିକ୍କାର କଲେ ଓ ଅନୁତାପ ବହ୍ନିରେ ଝାସ ଦେଲେ ।

ପରମ ଦୟାଳୁ ବୁଦ୍ଧଙ୍କର ଜଣେ ଶିଷ୍ୟ ତାଙ୍କୁ ପାପମୁକ୍ତ କରିବା ପାଇଁ ବୌଦ୍ଧ ଧର୍ମରେ ଦୀକ୍ଷା ଦେଲେ ।

ଏହାହିଁ ହେଉଛି ଓଡ଼ିଆ ଜାତିର ଗରିମାର ଏକ ଚିତ୍ର ।

ସେଦିନ ପରି ଆଜି ବି ଜଣେ ଓଡ଼ିଆ ଏ ଭୟଙ୍କର ବର୍ଷାରେ ଏକୁଟିଆ କଳା ପତାକା ତୋଳି ଭାଷା ଜନନୀଙ୍କ ବିଜୟଯାତ୍ରାକୁ ଅବ୍ୟାହତ ରଖିଛନ୍ତି । ଏହି ସର୍ବଶ୍ରେଷ୍ଠ ଓଡ଼ିଆ ହେଲେ ଭାଇ ସୁଭାଷ ଚନ୍ଦ୍ର ପ୍ରଧାନ ।

ଆଜି ଥିଲା ଆମ ଆଂଦୋଳନର ୧୨୧୫ ତମ ଦିବସ । ଏହିପରି ଏକଦା କଳା ପତାକା ଧରି ଏକାକୀ ଚାଲିଥିବା ବୈଜ୍ଞାନିକ ଡଃ ଅଶୋକ ମିଶ୍ର ଆଜିର ଏ ଅଭିଯାନ ମନୀଷୀ ନବକୃଷ୍ଣ ଚୌଧୁରୀଙ୍କ ସମ୍ମୁଖରେ ଆରମ୍ଭ କରାଇଥିଲେ ଓ ଭାଷାପ୍ରାଣ ରଞ୍ଜନ କୁମାର ସାହୁ ଓଡ଼ିଆ ଜାତି ପାଇଁ ଏ ବିରଳ ଦୃଶ୍ୟ ଉତ୍ତୋଳନ କରିବା ସଙ୍ଗେ ସଙ୍ଗେ କୁଳବୃଦ୍ଧ ମଧୁସୂଦନଙ୍କ ସମ୍ମୁଖରେ ଭାଷା ବନ୍ଦନାରେ ସହଯୋଗ କରିଥିଲେ ଭାଇ ସୁଭାଷଙ୍କ ସହ ।

ନିଉଜ ସିଣ୍ଡିକେଟ

ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଦୁଇ ଘନିଷ୍ଠ ସହଯୋଗୀଙ୍କୁ ପୋଷା ମନାଇ ଓଡ଼ିଶାର ଓଡ଼ିଆବିଦ୍ଵେଷୀ ସରକାର ଭାବିଥିଲେ, ଭାଷା ଆନ୍ଦୋଳନ ଭାଙ୍ଗିଯିବ ଓ ଓଡ଼ିଆ ଭାଷା ମାଆକୁ ବିପତ୍ତିମୁକ୍ତ କରିବାପାଇଁ ଚାଲିଥିବା ଶେଷ ସଂଗ୍ରାମ ସରିଯିବ । ତାହା ଭୁଲ ପ୍ରମାଣିତ ହୋଇଛି ଓ କତିପୟ ଆତ୍ମକୈନ୍ଦ୍ରିକ ବ୍ୟକ୍ତିଙ୍କୁ ଛାଡି ସମଗ୍ର ଓଡ଼ିଆ ଜାତି ଏହି ଆନ୍ଦୋଳନ ସହ ଜଡ଼ିତ ହୋଇଛି ।

ଓଡ଼ିଆ ଜାତିକୁ ତାର ଭାଷା ଅଧିକାରରୁ ବଞ୍ଚିତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ଵାରା ଓଡ଼ିଶା ସରକାରୀ ଭାଷା ଆଇନରେ ଯେଉଁ ପ୍ରମାଦପୂର୍ଣ ସଂଶୋଧନ କରାଯାଇଛି ତହିଁର ବିଲୋପନ ଏବଂ ସୁଭାଷ ବାବୁ ଦେଇଥିବା ନିଯମାବଳୀ ବିଧିଭୁକ୍ତ କରାଯିବାର ଆବଶ୍ୟକତା ଉପରେ ଆଲୋଚନା ଓ କର୍ତ୍ତବ୍ୟ ନିରୂପଣ ପାଇଁ ପ୍ରତିଷ୍ଠିତ ମାତୃଭାଷାପ୍ରେମୀମାନଙ୍କ ଏହି ସମ୍ମିଳନୀ ଆଂଦୋଳନର ସଭାପତିମଣ୍ଡଳୀ ପକ୍ଷରୁ ଜୁଲାଇ ୧୭ରେ ଭୂବନେଶ୍ଵରସ୍ଥ ଲୋହିଆ ଏକାଡ଼େମୀ କକ୍ଷରେ ଅନୁଷ୍ଠିତ ହୋଇ ୪ଟି ଗୁରୁତ୍ବପୂର୍ଣ ପ୍ରସ୍ତାବ ଗ୍ରହଣ କରିଥିବା ସଂବାଦ ପୂର୍ବରୁ ପ୍ରକାଶ ପାଇଛି ।

ଉଲ୍ଲେଖନୀୟ ଯେ, ଭାଷା ଆଇନର କାର୍ଯ୍ୟକାରୀତା ପାଇଁ ଆନ୍ଦୋଳନ ଏବଂ ତା ପ୍ରଭାବରେ ତିନି ତିନି ଥର ଆଇନଟିର ସଂଶୋଧନ ସରିଯାଇଥିବା ପଞ୍ଚଦଶ ବିଧାନସଭା କାଳରେ ହିଁ ଘଟିଛି ଏବଂ ସେହି ବିଧାନସଭା ହିଁ ଆଇନଟିର ଭୁଲ ସଂଶୋଧନ ଘଟାଇବାରେ ସରକାରଙ୍କୁ ସାହାଯ୍ୟ କରିଛି । ତହିଁର ତାତ୍ତ୍ଵିକ ଓ ତଥ୍ୟନିଷ୍ଠ ଚିତ୍ର ରଖିଛନ୍ତି ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ‘ସରିଯାଇଥିବା ବିଧାନସଭା ଓ ଆମ ଭାଷା’ ଶୀର୍ଷକ ପୁସ୍ତକରେ । ଏହି ଅବସରରେ ପୁସ୍ତକଟି ଲୋକାର୍ପିତ ହୋଇଥିଲା ବିଶ୍ଵପ୍ରସିଦ୍ଧ ମାନବଅଧିକାରବାଦୀ ପ୍ରଫୁଲ୍ଲ ସାମନ୍ତରାୟଙ୍କ ଦ୍ଵାରା, ବିଶ୍ବବିଖ୍ୟାତ ବୈଜ୍ଞାନିକ ଡଃ ଅଶୋକ ମିଶ୍ରଙ୍କ ଅଧ୍ୟକ୍ଷତାରେ,ଅଧ୍ୟାପକ ବିଶ୍ବରଞ୍ଜନ ଓ ଅଧ୍ୟାପକ କମଳାପ୍ରସାଦ ମହାପାତ୍ରଙ୍କ ଅମୂଲ୍ୟ ଗହଣରେ । ସଭା କକ୍ଷରେ ଉପସ୍ଥିତ ଥିଲେ ଅନ୍ୟମାନଙ୍କ ମଧ୍ୟରେ ଭାଷା ଆଂଦୋଳନର ପ୍ରଥମ ପରମର୍ଶଦାତା ସୁବିଖ୍ୟାତ ପରିବେଶବିତ୍ ବିଶ୍ଵଜିତ ମହାନ୍ତି, ଭାଷା ଆଂଦୋଳନର ସଭାପତି ମଣ୍ଡଳୀ ସଦସ୍ୟ ସର୍ବଶ୍ରୀ ଅର୍ଜୁନ ଚରଣ ସାମନ୍ତରାୟ, କମଳଲୋଚନ ନାୟକ, ଗିରିଜକାନ୍ତ ମିଶ୍ର ।

ଅନ୍ୟମାନଙ୍କ ମଧ୍ୟରେ ଥିଲେ ସର୍ବଶ୍ରୀ ଅଶୋକ ପରିଡ଼ା ,ବିଚିତ୍ର ମହାପାତ୍ର, ସଞ୍ଜୟ ସାହୁ, ବୀରକିଶୋର ବେହେରା, ପ୍ରଫେସର ଗୁରୁ ଚରଣ ଜେନା, ଶତ୍ରୁଘ୍ନ ସାସମଲ,ନାଗେନ କୁମାର ନାୟକ, ଆଶାରାଣୀ ମିଶ୍ର, ବିବେକାନନ୍ଦ ଦାଶ, ବିଶ୍ଵଜିତ ଲେଙ୍କା, ପ୍ରଫେସର ମନୋରଞ୍ଜନ ଦାସ, ସାରଦା ପ୍ରସାଦ ମହାପାତ୍ର, ସରଳ ଦାସ, ସୌମ୍ୟରଞ୍ଜନ ପ୍ରଧାନ, ଶିଶିର ରଞ୍ଜନ ମହାନ୍ତି, ପୂଜା ଦାସ, ଭୁବନମୋହନ ମହାନ୍ତି, ଶିଶିର କୁମାର ସାହୁ, ହରେକୃଷ୍ଣ ଦଳବେହେର, ବିବୁଧେନ୍ଦ୍ର ବିଦ୍ୟାଧର,ପ୍ରଫେସର ଗୀତା କାନୁନଗୋ, ସୌଭାଗ୍ୟ ମହାନ୍ତି, ହରେକୃଷ୍ଣ ପଟ୍ଟନାୟକ, ଲଡୁକିଶୋର ପଢିଆରୀ , ଜଗନ୍ନାଥ ସ୍ଵାଇଁ, ତପନ ସାହୁ, ପୂର୍ଣ ଚନ୍ଦ୍ର ଦାସ, ଗିରିଜା ପ୍ରସାଦ ପଟ୍ଟନାୟକ, ସଂବିତ ଚନ୍ଦ୍ର ଶେଖର ସେଠୀ, ଅଶ୍ଵିନୀ କୁମାର ପ୍ରଧାନ, ଅଧ୍ୟାପକ ପ୍ରକାଶ ଚନ୍ଦ୍ର ବେହେରା, ସିପିଏମ ନେତା ପ୍ରଦୀପ୍ତ ନାୟକ, ବୈପ୍ଳବିକ ବୁଦ୍ଧିଜୀବୀ ତୁଷାରକାନ୍ତ ଶତପଥୀ, ନିରାକାର ସାହୁ, ସଂସାରୀ ସାହୁ, ସାଗର କୁମାର ଜେନା, ରାକେଶ ରଞ୍ଜନ ପଣ୍ଡା, ରାମଶଙ୍କର, ବିଶ୍ବଭୂଷଣ ମହାପାତ୍ର, ଇଂ ପ୍ରଭାତ କୁମାର ବେହେରା, ବିମ୍ବାଧର ଶ୍ରୀଚନ୍ଦନ, ଶ୍ୟାମସୁନ୍ଦର , ରଞ୍ଜିତ କୁମାର ସାହୁ, ବିଶ୍ଵଜିତ ରାଉତ, ସୁବ୍ରତ କୁଣ୍ଡୁ, ଭୁବନ ଚାନ୍ଦ ହାତୀ, ମଧୁସୂଦନ ଛୋଟରାୟ , ନରେନ୍ଦ୍ର କୁମାର ସାହୁ, ବିଜଯ କେତନ ଶତପଥୀ ,ଦେବିପ୍ରସନ୍ନ ନାୟକ, ପ୍ରଦୀପ କୁମାର ସ୍ଵାଇଁ, ଇଂ ସୁବୋଧ କୁମାର ଢଳ, ଅମିତ ଅଭିଜିତ ସାମଲ, ରଞ୍ଜନ କୁମାର ସାହୁ, ଲିଙ୍ଗରାଜ ସାହୁ ପ୍ରମୁଖ ।

ଏଠାରେ ଏହି ଐତିହାସିକ ସମ୍ମିଳନୀର ସାମାନ୍ୟ କେତେକ ଫଟୋ ଚିତ୍ର –

(କେତେକ ସକ୍ରିୟ ଆନ୍ଦୋଳନକାରୀ)

(ସଭା କକ୍ଷରେ ସମବେତ ମାତୃଭାଷାପ୍ରେମୀ)

(ସୁଭାଷ ଚନ୍ଦ୍ର ପଟ୍ଟନାୟକଙ୍କ ଦ୍ଵାରା ଭିତ୍ତିପତ୍ର ଉପସ୍ଥାପନା)

(ସରିଯାଇଥିବା ବିଧାନସଭା ଓ ଆମ ଭାଷା ପୁସ୍ତକ ଉନ୍ମୋଚନ)