ସରକାରଙ୍କ ଇଂରାଜୀ ପ୍ରୀତି ଆମ ଭାଷାକୁ ମରଣୋନ୍ମୁଖୀ କଲାଣି : ଭାଷା ଆନ୍ଦୋଳନର ଆଲୋଚନଚକ୍ରରେ ଆଶଙ୍କା

ସୂତ୍ର : ଆମ ଭାଷା ଆମ ଅଧିକାର 

ଗତ ରବିବାର(୦୪/୧୦/୨୦୨୦)ସନ୍ଧ୍ୟାରେ ଭର୍ଚୁଆଲ ଶୈଳୀରେ ଅନୁଷ୍ଠିତ ଭାଷା ଆନ୍ଦୋଳନର ସାପ୍ତାହିକ ଆଲୋଚନାଚକ୍ରରେ ସରକାରଙ୍କ ଇଂରାଜୀ ପ୍ରୀତି ଆମ ଭାଷାକୁ ମରଣୋନ୍ମୁଖୀ କଲାଣି ବୋଲି ମତ ପ୍ରକାଶ ପାଇଥିଲା ।                       ଶ୍ରୀଯୁକ୍ତ ଶ୍ରୀକାନ୍ତ ବେହେରାଙ୍କ ଙ୍କ ଦ୍ୱାରା ଭାଷା ବନ୍ଦନାରୁ ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା।

              *”ଓଡ଼ିଆ ଭାଷାର ସୁରକ୍ଷାରେ, ଆମର କର୍ତ୍ତବ୍ୟ” ଶୀର୍ଷକ ଉପରେ ସାରଗର୍ଭକ ଆଲୋଚନା କଲେ, ମୁଖ୍ୟ ଆଲୋଚକ;ଶ୍ରୀଯୁକ୍ତ ଅଶୋକ ମହାରଣା।
              * ଉପସ୍ଥିତ ସମସ୍ତ ବ୍ୟକ୍ତି ବିଶେଷ ଏହି ଆଲୋଚନା ଉପରେ ନିଜସ୍ୱ ମତାମତ ରଖିବ ସହ ସମ୍ପୂର୍ଣ୍ଣ ପରିବେଶକୁ ଅତ୍ୟନ୍ତ ବୌଦ୍ଧିକ କରିଦେଲେ।
               *ଅନ୍ତିମ ପର୍ଯ୍ୟାୟରେ ଏକ କବିତା ପାଠୋତ୍ସବ ଅନୁଷ୍ଠିତ ହୋଇଥିଲା।
              * ଶ୍ରୀକାନ୍ତ ବେହେରା,ସୁଶାନ୍ତ ମାହାଳି,ଦୀନବନ୍ଧୁ ପୋଇ,କୈଳାସ ଚନ୍ଦ୍ର ବେହେରା,ନଗେନ୍ଦ୍ର କୁମାର ରାଉତ,ଦୀପକ ରଂଜନ ଗ୍ରହାଚାର୍ଯ୍ୟ, କୈଳାଶ ଧଳ, ବି.କେ.କମଲ, ଶଶିକାନ୍ତ ପଣ୍ଡା ; ନିଜ ସ୍ୱ-ରଚିତ କବିତା ପାଠ କଲେ ।
              * ଓଡ଼ିଶାର କୋଣ ଅନୁକୋଣରୁ ଓଡ଼ିଆ ଭାଷା ଓ ସାହିତ୍ୟର ଅନେକ ସାରସ୍ୱତ ସାଧକ ଅଂଶଗ୍ରହଣ କରିଥିବା ଏହି ଆଲୋଚନାଚକ୍ରରେ ଭାଷା ଆନ୍ଦୋଳନର ପ୍ରତିଷ୍ଠାତା ଶ୍ରୀଯୁକ୍ତ ସୁଭାଷ ପଟନାୟକଙ୍କ ସହ ରଞ୍ଜନ ଦାସ,ରଞ୍ଜନ କୁମାର ସାହୁ,ବାପିନା ପାଲଟାସିଂହ, ବଳରାମ ସାହୁ,ଶ୍ରୀରାମ ରାଉତ,ମହେନ୍ଦ୍ର ତ୍ରିପାଠୀ, ସରୋଜ କୁମାର ମହାନ୍ତି,ସାଗର କୁମାର ପରିଡା,ସୁନିତା ରଣା, ସ୍ନେହଳତା ସିଂ ପ୍ରମୁଖ ଅଲୋଚନାରେ ଅଂଶ ଗ୍ରହଣ କରିଥିଲେ।

 

ଭାଷା ନୀତି କୁଆଡେ ଗଲା? ପଚାରିଛନ୍ତି ଭାଷା ପ୍ରତିଷ୍ଠାନର ପୂର୍ବତନ ନିର୍ଦ୍ଦେଶିକା

ସୂତ୍ର: ଭାଷା ଅଧିକାର ଅଭିଯାନ

ଓଡ଼ିଶା କାର୍ଯ୍ୟାଳୟ ଭାଷା ଆଇନର କାର୍ଯ୍ୟକାରୀତା ପାଇଁ ଗଠିତ ମନ୍ତ୍ରୀସ୍ତରୀୟ କମିଟିରେ ତହିଁର ସଦସ୍ୟ ସୁଭାଷ ଚନ୍ଦ୍ର ପଟ୍ଟନାୟକ ୩ ସେପ୍ଟେମ୍ବର ୨୦୧୫ ତାରିଖରେ ଏକ ଲିଖିତ ଚିଠା ବିଧାନ ପ୍ରଦାନ କରି ତଦନୁଯାୟୀ ଆଇନ ସଂଶୋଧନ କରିବାକୁ ଓ ସେହି ଆଇନର ଅମାନ୍ୟକାରୀ ପ୍ରତି କଠିନ ଦଣ୍ଡବିଧାନ ସୁନିଶ୍ଚିତ କରିବାକୁ ପ୍ରସ୍ତାବ ଦେଇଥିଲେ । ମନ୍ତ୍ରୀସ୍ତରୀୟ କମିଟି ତାହାକୁ ଅନୁମୋଦନ କରିଥିଲା । ଓ ତା ପରେ ଭାଷା ଆଇନ ସଂଶୋଧନର ଯେଉଁ ନୂଆ ଯୁଗ ଆରମ୍ଭ ହୋଇଥିଲା, ତାହା ଅଦ୍ୟାବଧି ଅବ୍ୟାହତ ଅଛି, ଯଦିଓ ସରକାର ତାହାର କାର୍ଯ୍ୟକାରୀତା ପାଇଁ ଚାଲିଥିବା ଭାଷା ଆନ୍ଦୋଳନକୁ ଭଣ୍ଡୁର କରିବା ପାଇଁ ଅତି ଉତ୍କଟ ଷଡ଼ଯନ୍ତ୍ର ଚଳାଇଛନ୍ତି ।

ଏହି ପ୍ରେକ୍ଷାପଟରେ ମନ୍ତ୍ରୀସ୍ତରୀୟ କମିଟିରେ ସରକାରୀ ସଦସ୍ୟ ଥିବା ଓଡ଼ିଶା ସରକାରଙ୍କ ଭାଷା ପ୍ରତିଷ୍ଠାନର ପୂର୍ବତନ ନିର୍ଦ୍ଦେଶିକା ଡଃ ତମସାରାଣୀ ଦାସମହାପାତ୍ର ରଖିଥିବା ବୟାନରୁ ସ୍ପଷ୍ଟ ହୋଇଛି ଯେ, ଶ୍ରୀ ପଟ୍ଟନାୟକଙ୍କ ପ୍ରସ୍ତାବ ଅନୁରୂପ ବ୍ୟବସ୍ଥା ରଖି ପ୍ରତିଷ୍ଠାନ ବହୁ ବିଶିଷ୍ଟ ବିଷୟବିଶେଷଜ୍ଞମାନଙ୍କ ସହାୟତାରେ ଏକ ଭାଷା ନୀତିର ଚିଠା ପ୍ରଣୟନ କରି ସରକାରଙ୍କୁ ପ୍ରଦାନ କରି ଥିଲା ।

ଭାଷା ଆନ୍ଦୋଳନର ଫେସ୍ ବୁକ୍ ମଞ୍ଚ ଭାଷା ମା ପାଇଁ ପଦେ ପୃଷ୍ଠାରୁ ଭାଷା ହିଁ ଜୀବନୀଶକ୍ତି ତତ୍ତ୍ଵ ଉପରେ ଉଦ୍ବୋଧନ ଦେଇ ଅକ୍ଟୋବର ୫ ତାରିଖରେ ଡଃ ଦାସମହାପାତ୍ର କହିଛନ୍ତି, ଏହା କାର୍ଯ୍ୟକାରୀ ହୋଇଥିଲେ “ହୁଏତ ଦଣ୍ଡ ଭୟରେ ଅନ୍ତତଃ ସରକାରୀ କାର୍ଯ୍ୟ ଓଡ଼ିଆରେ ଚାଲିଥାନ୍ତା । ବର୍ତ୍ତମାନ ଭୟାନକ କୋଭିଦ-୧୯ର ବିଭିନ୍ନ ମାର୍ଗଦର୍ଶିକା ଯଦି ଓଡ଼ିଆରେ ପ୍ରକାଶ କରାଯାଇ ଗାଁଗଣ୍ଡାର ଲୋକମାନଙ୍କୁ ସଚେତନ କରାଯାଇଥାନ୍ତା , ତେବେ ହୁଏତ ଲୋକେ ଏହାର ଭୟାବହତା ବୁଝି ସାବଧାନତା ଅବଲମ୍ବନ କରିଥାନ୍ତେ ଓ ବହୁ ବ୍ୟକ୍ତିଙ୍କ ଜୀବନ ବଞ୍ଚିଯାଇପାରିଥାନ୍ତା ।” ଅଥଚ, ଭାଷା ପ୍ରତିଷ୍ଠାନର ପ୍ରଣୀତ ସେହି ଭାଷାନୀତି ବାତତମାନଯାଏଁ କାର୍ଯ୍ୟକାରୀ ହେଲା ନାହିଁ । ତାହା କୁଆଡ଼େ ଗଲା?

ସିଧା ପ୍ରସାରିତ ହୋଇଥିବା ଡଃ ଦାସମହାପାତ୍ରଙ୍କ ଭାଷଣର ସଂପୂର୍ଣ୍ଣ ଲିଖିତ ରୂପ ପରେ ପ୍ରକାଶ ପାଇବ । ଏବେ ଏଠାରେ ଦେଖନ୍ତୁ ତହିଁର ୟୁ ଟ୍ୟୁବ୍ ସଂସ୍କରଣ :

ମାତୃଭାଷାରେ ଶିକ୍ଷା ହିଁ ଶିଶୁର ବୌଦ୍ଧିକ ବିକାଶ କରେ : ଭାଷା ଆନ୍ଦୋଳନ ପାଠଚକ୍ରରେ ଶିକ୍ଷାବିତଙ୍କ ମତ

ସୂତ୍ର : ଆମ ଭାଷା ଆମ ଅଧିକାର 

ସେପ୍ଟେମ୍ବର ୨୭ ତାରିଖ ରବିବାର ସନ୍ଧ୍ୟାରେ ସରୋଜ କୁମାର ମହାନ୍ତିଙ୍କ ସଂଯୋଜନାରେ ଭାଷା ଆନ୍ଦୋଳନର ସାପ୍ତାହିକ ଆଲୋଚନାଚକ୍ର ଭର୍ଚୁଆଲ ଶୈଳୀରେ ଅନୁଷ୍ଠିତ ହୋଇଯାଇଛି ।ଏହି ଆଲୋଚନାଚକ୍ରରେ ଓଡ଼ିଶାର କୋଣ ଅନୁକୋଣରୁ ଭାଷାପ୍ରେମୀମାନେ ଅଂଶଗ୍ରହଣ କରିଥିଲେ ।

ପ୍ରଥମେ କବି ଶ୍ୟାମଘନ ମହାରଣାଙ୍କ ଦ୍ୱାରା ଭାଷା ବନ୍ଦନାରୁ, ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା । ଅଲୋଚନାଚକ୍ରର ମୁଖ୍ୟ ବିଷୟ ବସ୍ତୁ ଥିଲା “ଶିଶୁର ବୌଦ୍ଧିକ ବିକାଶରେ ମାତୃଭାଷାର ଭୂମିକା”। 

ସୁଦୂର କୋଲକାତାରେ ଦୀର୍ଘ ୨୫ବର୍ଷ ଧରି ଶିକ୍ଷକତା କରିବା ସହ ସାହିତ୍ୟ ପତ୍ରିକା “ଅଭିଯାନ”ର ସମ୍ପାଦନା କରି ଆସୁଥିବା ଶ୍ରୀଯୁକ୍ତ ଶଂଭୂନାଥ ଦାସ ଆଲୋଚକ ଭାବେ, ନିଜ ବକ୍ତବ୍ୟ ଉପସ୍ଥାପନ କଲେ । ତାଙ୍କ ମତରେ,”ନବଜାତ ଶିଶୁର ଶାରୀରିକ ସ୍ୱାସ୍ଥ୍ୟ ପାଇଁ ମା କ୍ଷୀର ଯେପରି ସର୍ବାଧିକ ସହାୟକ, ସେହିପରି ତାର ମାନସିକ ସ୍ୱାସ୍ଥ୍ୟ ତଥା ଶୈକ୍ଷିକ ଓ ବୌଦ୍ଧିକ ବିକାଶ ପାଇଁ ମାତୃଭାଷା ହିଁ ସର୍ବାଧିକ ସହାୟକ ।  ଶିଶୁର ପରିବାର-ପରିବେଶ-ସାଙ୍ଗସାଥି-ବିଦ୍ୟାଳୟର ବ୍ୟବହାରିକ ଭାଷାର ପ୍ରଭାବ, ତାର ମାନସିକ-ବୌଦ୍ଧିକ-ଆବେଗିକ ବିକାଶରେ ମୁଖ୍ୟ ଭୂମିକା ଗ୍ରହଣ କରେ”।

ଏହି ଆଲୋଚନାରେ ଭାଗ ନେଇଥିବା ଓ ନିଜେ ଅଧ୍ୟାପନା ବୃତ୍ତିରେ ଥିବା ଶ୍ରୀଯୁକ୍ତ ପ୍ରକାଶ ସାମଲ କହିଥିଲେ,” ଶିଶୁର ବିକାଶରେ ସବୁଠାରୁ ଅଧିକ ଗୁରୁତ୍ୱପୂର୍ଣ୍ଣ ଭୂମିକା ଥାଏ ଅଭିଭାବକମାନଙ୍କର । ଅଭିଭାବକମାନେ ହିଁ ଆମ ଭାଷା ସୁରକ୍ଷାର ମୂଳ ସୂତ୍ରଧର”।

ବୃତ୍ତିରେ ଜଣେ ଶିକ୍ଷକ ଓ ଶିଶୁ-ସାହିତ୍ୟିକ ଶ୍ରୀଯୁକ୍ତ ଦିଲ୍ଲୀପ କୁମାର ତ୍ରିପାଠୀଙ୍କ ମତରେ,” ପିଲାଙ୍କ ଭିତରେ ଥିବା ସୃଜନଶୀଳତାକୁ ପରିପ୍ରକାଶ କରିବାର ଉପଯୁକ୍ତ ପରିବେଶ ସୃଷ୍ଟି କରିଥାଏ ମାତୃଭାଷା । ଓଡ଼ିଆ ଶିଶୁର ମନ ଉପରେ ଓଡ଼ିଆ ଶିଶୁ-ସାହିତ୍ୟର ପ୍ରଭାବ ଅସୀମ ଓ ସେହେତୁ ଆମ ଶିଶୁ-ସାହିତ୍ୟ ଆହୁରି ଅଧିକ ସମୃଦ୍ଧ ହେବା ଉଚିତ”।

ଅଧ୍ୟାପନା ବୃତ୍ତିରେ ଥିବା, ଶ୍ରୀଯୁକ୍ତ ଅଶୋକ ମହାରଣାଙ୍କ ମତରେ, “ଶିଶୁର ବିକାଶରେ ବିଦ୍ୟାଳୟ ଓ ଶିକ୍ଷା-ବ୍ୟବସ୍ଥାର ଗଭୀର ପ୍ରଭାବ ଥାଏ । ଆଜିକାଲି ଇଂରାଜୀ ମାଧ୍ୟମ ବିଦ୍ୟାଳୟର ଶିକ୍ଷାଦାନ ପଦ୍ଧତି ,ଶିଶୁର ମସ୍ତିସ୍କ ଉପରେ ଅଧିକ ଚାପ ପ୍ରୟୋଗ କରୁଛି । ତହିଁର ପ୍ରତିବିଧାନ ପାଇଁ ବର୍ତ୍ତମାନ ସମୟରେ ବିଶେଷ କରି ଓଡ଼ିଆ ବର୍ଣ୍ଣବୋଧର ବାଧ୍ୟତାମୂଳକ ବ୍ୟବହାରର ଆଵଶ୍ୟକତା ରହିଛି।”

ଶ୍ରୀଯୁକ୍ତ ମହେନ୍ଦ୍ର ତ୍ରିପାଠୀ ନିଜ ଶିକ୍ଷକ ଜୀବନର ଅଭିଜ୍ଞତାରୁ ଅନେକ ଉପାଦେୟ ତଥ୍ୟ ଓ ମତ ଉପସ୍ଥାପନ କଲେ ।

ଭାଷା ଆନ୍ଦୋଳନର ପ୍ରତିଷ୍ଠାତା ଶ୍ରୀଯୁକ୍ତ ସୁଭାଷ ଚନ୍ଦ୍ର ପଟ୍ଟନାୟକ କହିଥିଲେ, ଓଡ଼ିଆ ଭାଷା ପ୍ରତି ସରକାରୀ ବିମୁଖତା ଓଡ଼ିଆ ଜାତିର ଭବିଷ୍ୟ ପିଢିକୁ ମଧ୍ୟ କ୍ଷତିଗ୍ରସ୍ତ କରିବାକୁ ଯାଉଛି; କାରଣ ନିଜ ଭାଷା ପ୍ରତି ଆକର୍ଷଣ ନରହିଲେ, ଓଡ଼ିଆ ଜାତିର ଯୁଗଯୁଗର ଆହାରିତ ଜ୍ଞାନ ଓ ତାର ସ୍ଵାଭାବିକ ସୃଜନଶୀଳତା ତାକୁ ଉପଲବ୍ଧ ହେବନାହିଁ । ବୌଦ୍ଧିକ ବିକାଶ ଏକ ସ୍ଵାଭାବିକ ପ୍ରକ୍ରିୟା ଯାହା ମାତୃଭାଷାରେ ସହଜ ସମ୍ଭବ, ବିଦେଶୀ ଭାଷାରେ ନୁହେଁ ; କାରଣ ଶିଶୁ ପାଇଁ ତାର ମାତୃଭାଷା ସ୍ଵାଭାବିକ ହୋଇଥିବା ବେଳେ ଅନ୍ୟ ଭାଷା ଅସ୍ୱାଭାବିକ । ଓଡ଼ିଶାରେ ଶିଶୁର ବୌଦ୍ଧିକ ବିକାଶ ନିଷ୍କଣ୍ଟକ କରିବାକୁ ହେଲେ ଓଡ଼ିଆ ଭାଷାକୁ ତାର ପ୍ରଥମିକତା ଦେବାକୁ ହେବ ଓ ଓଡ଼ିଶାରେ ଓଡ଼ିଆ ଭାଷା ପ୍ରଥମିକତା ପାଇବାକୁ ହେଲେ ତାହାକୁ କାର୍ଯ୍ୟାଳୟର ଭାଷା କରିବାକୁ ହେବ । ଏହା କରିବାକୁ ଓଡ଼ିଶା  କାର୍ଯ୍ୟାଳୟ ଭାଷା ଆଇନର ପୁନଃ ସଂଶୋଧନ ଉପରେ ସେ ଗୁରୁତ୍ୱାରୋପ କରିଥିଲେ।

ଏହି ଅଲୋଚନାରେ ସୁଦୂର ଗୁଜୁରାଟରୁ ବାପିନା ପାଲଟାସିଂହ ଓ ରାୟଗଡ଼ାରୁ ଶ୍ରୀଯୁକ୍ତ ସରୋଜ ମହାନ୍ତି ଯୋଗଦାନ କରିଥିଲେ । ଶ୍ରୀଯୁକ୍ତ ମହାନ୍ତି ଅଲୋଚନା ସଂଯୋଜନ କରିବା ସଙ୍ଗେ ସଙ୍ଗେ , ଭାଷା ଆନ୍ଦୋଳନର ଦାବି ଅନୁରୂପ ରେଡିଓ ଏବଂ ଦୂରଦର୍ଶନ ମାଧ୍ୟମରେ ଶିକ୍ଷା ଦାନ ପାଇଁ ସରକାର ଘୋଷଣା କରିଥିବା ହେତୁ ସରକାରଙ୍କୁ ସାଧୁବାଦ ଜଣାଇଥିଲେ ଓ ଏଏହି ପଦକ୍ଷେପ ତଥାକଥିତ ‘ଅନଲାଇନ’ ଶିକ୍ଷାଜନିତ ଅବ୍ୟବସ୍ଥାକୁ ଲାଘବ କରିବ ବୋଲି ମତ ଦେଇଥିଲେ । 

ଆଲୋଚନା ପରେ ଶ୍ରୀଯୁକ୍ତ ଶ୍ରୀକାନ୍ତ ବେହେରା ଓ ଶ୍ରୀଯୁକ୍ତ ପ୍ରକାଶ ସାମଲ ସ୍ୱରଚିତ କବିତା ପାଠ କରି ସମଗ୍ର ପରିବେଶକୁ ମନ୍ତ୍ରମୁଗ୍ଧ କରିଦେଇଥିଲେ।

ସର୍ଵଶେଷରେ ଗୁଜୁରାଟରୁ ଶ୍ରୀଯୁକ୍ତ ସୁଶାନ୍ତ ମାହାଳୀ ସମସ୍ତଙ୍କୁ ଧନ୍ୟବାଦ ଅର୍ପଣ ସହ ସଂଯୋଜକଙ୍କ ସମ୍ମତିରେ ଆଲୋଚନା ଚକ୍ରକୁ ସମାପ୍ତ ଘୋଷଣା କରିଥିଲେ।

ଓଡ଼ିଶା ସରକାରଙ୍କ ଦୋଷରୁ ଓଡ଼ିଆମାନେ ଉପଯୁକ୍ତ ବ୍ୟାଙ୍କ୍ ସେବାରୁ ବଞ୍ଚିତ : ବ୍ୟାଙ୍କ୍ ବିଶେଷଜ୍ଞ ନିର୍ମଳ କୁମାର ବେହେରା

ସୂତ୍ର : ଆମ ଭାଷା ଆମ ଅଧିକାର

ଦୀର୍ଘ ୩୦ ବର୍ଷରୁ ଊର୍ଦ୍ଧ୍ଵକାଳ ଭାରତର ଭିନ୍ନ ଭିନ୍ନ ଅଠୋଟି ପ୍ରଦେଶରେ ପ୍ରାୟ ଦୁଇ ଡଜନ ଦାୟିତ୍ବରେ ରହି ବ୍ୟାଙ୍କ୍ କାରବାରରେ ଗଭୀର ଜ୍ଞାନ ଅର୍ଜନ କରିଥିବା ଅବସରପ୍ରାପ୍ତ ବ୍ୟାଙ୍କର ନିର୍ମଳ କୁମାର ବେହେରା କହିଛନ୍ତି, ବିଭିନ୍ନ ବ୍ୟାଙ୍କ୍ ଓଡ଼ିଆ ଲୋକଙ୍କୁ ଯେଉଁ ସେବା ଦେବା କଥା ତାହା ଦେଉନାହାନ୍ତି , କାରଣ ଓଡ଼ିଶା ସରକାରଙ୍କର ଓଡ଼ିଆ ଭାଷା ପ୍ରତି ଥିବା ଅବଜ୍ଞା ଭାବ ସେମାନଙ୍କୁ ସୁହାଉଛି ।

ଓଡ଼ିଆ ଭାଷାରେ ଓଡ଼ିଶାର ପରିଚାଳନା ଅଲଙ୍ଘ୍ୟ କରିବାକୁ ଆଇନଗତ ବ୍ୟବସ୍ଥା ସକାଶେ ଚାଲିଥିବା ଭାଷା ଆନ୍ଦୋଳନର ଫେସବୁକ ଅନ୍ତର୍ଗତ ବୌଦ୍ଧିକ ମଞ୍ଚ ‘ଭାଷା ମାଆ ପାଇଁ ପଦେ’ରୁ ସେପ୍ଟେମ୍ବର ୨୮ରେ ସିଧା ପ୍ରସାରିତ ବିଷୟ ‘ବ୍ୟାଙ୍କ୍ ବ୍ୟବହାର ପାଇଁ ମାତୃଭାଷା’ ବ୍ୟାଖ୍ୟା କରି ଶ୍ରୀ ବେହେରା ସ୍ପଷ୍ଟ କରିଛନ୍ତି ଯେ, ଜଣେ ଓଡ଼ିଆ ବ୍ୟାଙ୍କକୁ ଗଲେ ସେଠାରେ ଥିବା କର୍ମଚାରୀ ତାଙ୍କ ସହ ଓଡ଼ିଆ ଭାଷାରେ କଥା ହେବା ଓ ତାଙ୍କୁ ସେ ଚାହୁଁଥିବା ସେବା ଓଡ଼ିଆ ଭାଷାରେ ପ୍ରଦାନ କରିବାକୁ ବାଧ୍ୟ । ଜଣେ ଜମାକାରୀ ବ୍ୟାଙ୍କରୁ କେଉଁ କେଉଁ ସେବା ପାଇବାକୁ ହକ୍ଦାର୍ ତାହା ତାଙ୍କ ରାଜ୍ୟ ଭାଷାରେ ତାଙ୍କୁ ନିଶ୍ଚୟ ଅବଗତ କରାଯିବ , ଖାସ୍ ଏଇଥିପାଇଁ ପ୍ରତି ରାଜ୍ୟରେ ସେହି ରାଜ୍ୟର ଲୋକଙ୍କୁ ବ୍ୟାଙ୍କ୍ ସେବାରେ ନିଯୁକ୍ତ କରାଯାଇଥାଏ ।

ମାତ୍ର ଆମ ରାଜ୍ୟ ସରକାରଙ୍କ ଓଡ଼ିଆ ଭାଷା ବିରୋଧୀ ମନୋଭାବ ହେତୁ ପ୍ରଶାସନରେ ଯେହେତୁ ଓଡ଼ିଆ ଭାଷା ଅକାମୀ ହୋଇ ପଡ଼ିଛି, ସେହେତୁ ବ୍ୟାଙ୍କମାନେ ଏହାର ସୁଯୋଗ ନେଇ ସେମାନଙ୍କ ନିଜ ନିଜ କ୍ଷେତ୍ରରେ ଓଡ଼ିଆ ଭାଷା ପ୍ରୟୋଗ ନ କାରୀ ଏକ ମହାଭୁଲର ଜାଲ ବିଛାଇଛନ୍ତି । ଏହାର ଶିକାର ଓଡ଼ିଶାର ୪ କୋଟି ନିରୀହ ଜନତା ହେଉଛନ୍ତି, ଯେଉଁମାନେ କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ବିଭିନ୍ନ ସୁବିଧା ପାଇବା ପାଇଁ ବ୍ୟାଙ୍କରେ ଖାତା ଖୋଲିଛନ୍ତି । ସେମାନଙ୍କୁ ଉପଯୁକ୍ତ ନ୍ୟାୟ ଦିଆଯାଉନାହିଁ । ଆମ ମାତୃଭାଷା ଓଡ଼ିଆରେ କହିବା, ଲେଖିବା ଓ ସବୁ ପ୍ରକାର ଭାବର ଆଦାନ ପ୍ରଦାନ କରିବା ଉପରେ ରାଜ୍ୟ ସରକାର, ବ୍ୟାଙ୍କ୍ ଓ ବ୍ୟାଙ୍କିଙ୍ଗ ଶିଲ୍ପ ସଂସ୍ଥା ଯଥା, ଭାରତୀୟ ରିଜର୍ଭ ବ୍ୟାଙ୍କ୍, ନାବାର୍ଡ, ବ୍ୟାଙ୍କିଙ୍ଗ ଆମ୍ବୁସ୍ମ୍ୟାନ ଇତ୍ଯାଦିଙ୍କୁ ଅଧିକାର ପ୍ରଦାନ କରାଯାଇଥିବା ସତ୍ତ୍ୱେ ଏହାକୁ ସମସ୍ତେ ଉଲ୍ଲଙ୍ଘନ କରୁଛନ୍ତି ଓ ଏଥିରେ ସମସ୍ତଙ୍କ ମଧ୍ୟରେ ମୁଖ୍ୟ ଉଲ୍ଲଂଘନକାରୀ ହେଉଛନ୍ତି ଏ ରାଜ୍ୟର ରାଜ୍ୟ ସରକାର, ଯେ କି ଆମ ମାତୃଭାଷାର କଣ୍ଠରୋଧ କରି ବିଦେଶୀ ଇଂରାଜୀ ଭାଷାର ଆଧିପତ୍ୟ ତଳେ ଆମ ଓଡ଼ିଶାର ଭାଗ୍ୟ ରବିକୁ ଅସ୍ତମିତ କାରୀ ରଖିଛନ୍ତି ।

ଭାଷା ଆନ୍ଦୋଳନ ହିଁ ଏହି ଦୁର୍ଭାଗ୍ୟ କବଳରୁ ଓଡ଼ିଶାକୁ ଉଦ୍ଧାର କରିପାରେ ।

ଶ୍ରୀ ବେହେରାଙ୍କ ସିଧା ପ୍ରସାରିତ ଭାଷଣ ଏଠାରେ ଉପସ୍ଥାପିତ ହେଲା :

ରଞ୍ଜନ କୁମାର ଦାସଙ୍କୁ ମରାଯିବାର ମୂଳ କାରଣ ତାଙ୍କ ଭାଷାପ୍ରେମ: ସିବିଆଇ ତଦନ୍ତ ଆବଶ୍ୟକ

ସୁଭାଷ ଚନ୍ଦ୍ର ପଟ୍ଟନାୟକ

ମୋର ଦୁଇଜଣ ମୁଖ୍ୟ ସହଯୋଗୀଙ୍କ ଅର୍ଥଲୋଭର ଉପଯୋଗ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାଷା ଆନ୍ଦୋଳନକୁ ଭାଙ୍ଗି ଦେବାପାଇଁ ଜୁଲାଇ ୧୬, ୨୦୧୮ ସନ୍ଧ୍ୟାରେ ବସ୍ତୁତଃ ସକ୍ଷମ ହୋଇଥିଲେ । ଏକ ସାମ୍ବାଦିକ ସମ୍ମିଳନୀ ଡାକି ଏ ଦୁହେଁ – ପ୍ରଦ୍ୟୁମ୍ନ ଶତପଥୀ ଓ ପବିତ୍ର ମହାରଥା – ସେହି ସନ୍ଧ୍ୟାରେ ସଂପୂର୍ଣ୍ଣ ଅନଧିକୃତ ଭାବେ ଘୋଷଣା କରିଥିଲେ ଯେ, ଭାଷା ଆନ୍ଦୋଳନର  ନିଷ୍ପତ୍ତିକ୍ରମେ କଳାପତାକା ଅଭିଯାନ ସ୍ଥଗିତ ରହିଲା ।

ଓଡ଼ିଶାର ସମସ୍ତ ଗଣମାଧ୍ୟମ ଜାଣନ୍ତି ଯେ, ଭାଷା ଆନ୍ଦୋଳନ ମୋର ମାନସ ସନ୍ତାନ । ସେମାନେ ସମସ୍ତେ ଜାଣନ୍ତି ଯେ, ଭାଷା ଆଇନର କାର୍ଯ୍ୟକାରୀତା ପାଇଁ ମନ୍ତ୍ରୀସ୍ତରୀୟ କମିଟିର ସଦସ୍ୟ ଭାବେ ମୁଁ ସରକାରଙ୍କୁ ଦେଇଥିବା ଚିଠା ବିଧାନ ସପକ୍ଷରେ ମୋ ନିଜସ୍ଵ ପଦ୍ଧତ୍ତିରେ ଏହା ଚାଲିଥାଏ ଯାହାର ପରିଚାଳନାରେ ମୋତେ ସାହାଯ୍ୟ କରୁଥାନ୍ତି ପ୍ରଦ୍ୟୁମ୍ନ ଶତପଥୀ ଓ ପବିତ୍ର ମହାରଥା । ଅଥଚ ମୋ ଅନୁପସ୍ଥିତିରେ ସେମାନେ ଯେତେବେଳେ ଏହି ବକ୍ତବ୍ୟ ରଖିଲେ, ଗଣମାଧ୍ୟମମାନଙ୍କର ସମ୍ବାଦିକୀୟ ଦାୟିତ୍ଵ ଥିଲା ସତ୍ୟାସତ୍ୟ ଜାଣିବା ପାଇଁ ମୋତେ ପଚାରିବା । ମାତ୍ର କେହି ବି  ପଚାରିନଥିଲେ । ସେମାନେ ସମସ୍ତେ ପ୍ରଚାର କରିଥିଲେ ଯେ, କଳା ପତାକା ଅଭିଯାନ ବନ୍ଦ ହୋଇଗଲା ଓ ମୁଁ ପଠାଇଥିବା ପ୍ରତିବାଦ ଉପରେ  ମଧ୍ୟ ସମସ୍ତେ କଳା ଢାଙ୍କୁଣୀ ଘୋଡ଼ାଇ ଦେଇଥିଲେ ବା ସାମ୍ବାଦିକୀୟ ଭାଷାରେ ତାହାକୁ ବ୍ଳାକ୍ଆଉଟ୍ (blackout) କରିଦେଇଥିଲେ । ଅତଏବ, ମୁଖ୍ୟମନ୍ତ୍ରୀ ପ୍ରଦ୍ୟୁମ୍ନ ପବିତ୍ରଙ୍କ ଆନୁଗତ୍ୟ କିଣି କଳା ପତାକା ଅଭିଯାନ ବନ୍ଦ କରିବାକୁ ସେଦିନ ଅପୋଦ୍ୟମ କରିଥିଲେ କେବଳ ନୁହେଁ, ଗଣମାଧ୍ୟମମାନେ ଯେପରି କେବଳ ସେହିମାନଙ୍କ ଘୋଷଣାକୁ ହିଁ ପ୍ରଚାର କରନ୍ତି ଓ ମୋର ପ୍ରତିକ୍ରିୟା ଉପରେ କଳାପରଦା ଢାଙ୍କି ରଖନ୍ତି ତାର ବି ବ୍ୟବସ୍ଥା କରିଥିଲେ ।

କିନ୍ତୁ ଏ ଅପ୍ରତ୍ୟାଶିତ ଭୟଙ୍କର ଆଘାତ ସତ୍ତ୍ୱେ ଭାଷାଜନନୀର ସଂଗ୍ରାମ ଜାରିରହିଲା । ତାର ବିଜୟ ପତାକା – କଳାପତାକା – ନିର୍ଦ୍ଧାରିତ ସମୟରେ ଉଡ଼ିଚାଲିଲା ରାଜଧାନୀର ଛାତି ଉପରେ ପ୍ରତିଦିନ । ଏବଂ ଉପରୋକ୍ତ ଦୁଇ ଅର୍ଥଲୋଭୀଙ୍କୁ ପୋଷା ମନାଇ ଭାଷା ଆନ୍ଦୋଳନକୁ ଭାଙ୍ଗିଦେବାକୁ ଯେଉଁ ଚକ୍ରାନ୍ତ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେହି ଚକ୍ରାନ୍ତକୁ ପାଦରେ ଦଳିଦେଲେ ଭାଷା ମାଆର ଭୀମ ପରି ଶକ୍ତିଶାଳୀ ସନ୍ତାନ ରଞ୍ଜନ କୁମାର ଦାସ, ଯାହାଙ୍କ ଓଡ଼ିଆଜାତୀୟତାବୋଧ ଏତେ ଅସୀମ ଥିଲା ଯେ, ଇତିହାସରେ ସ୍ନାତକୋତ୍ତର ଉପାଧି ପାଇସାରି ବହିରାଗତ ପର୍ଯ୍ୟଟକମାନଙ୍କୁ ଓଡ଼ିଶାର ପ୍ରାକୃତିକ, ସଂସ୍କୃତିକ ଓ କଳାତ୍ମକ ଐତିହ୍ୟ ଉପରେ ଅବଗତ କରାଇବା ପାଇଁ ସେ ସ୍ଵତନ୍ତ୍ର ଶିକ୍ଷା ଅର୍ଜନ କରିଥିଲେ ଓ ପର୍ଯ୍ୟଟକମାନଙ୍କୁ ଓଡ଼ିଶାର ବୈଶିଷ୍ଟ୍ୟ ଉପରେ ଦିଗ୍ଦର୍ଶନ ଦେବା କମ ଆୟକାରୀ ହୋଇଥିଲେ ମଧ୍ୟ ତାହାକୁ ହିଁ ନିଜର ବୃତ୍ତି ଭାବେ ଗ୍ରହଣ କରିଥିଲେ ।

ଏହି ଅସାଧାରଣ ମାତୃଭୂମିବତ୍ସଳ ରଞ୍ଜନ କୁମାର ଦାସ ୧୬ ଅଗଷ୍ଟ ୨୦୧୮ ତାରିଖରେ ମଧୁବାବୁଙ୍କ ଜନ୍ମପୀଠ ସତ୍ୟଭାମାପୁରର ଶିଶୁମାନଙ୍କ ହାତରୁ କଳାପତାକା ଗ୍ରହଣ କରି ନିଜ ସଂଗ୍ରାମୀ ଜୀବନର ଘନିଷ୍ଠ ସହଯୋଗୀ ସର୍ବଶ୍ରୀ ଜିତେନ୍ଦ୍ର କୁମାର ସାହୁ , ଆଳୟ ସାମନ୍ତରାୟ, ନରେଶ ବେଉରା, ନବକିଶୋର ଦାସ, ଆଶିଷ ଖଟୁଆ, ସୂର୍ଯ୍ୟପ୍ରକାଶ ପାଣି ଓ ପ୍ରତାପ ମହାନ୍ତିଙ୍କ ସହ ପାଣିଚିଆ ଖରାରେ ଡହଡହ ତାତିଥିବା ରାଜରାସ୍ତାରେ ଚାଲି ଚାଲି ୧୭ ଅଗଷ୍ଟ ୨୦୧୮ରେ ବିଧାନସଭା ସମ୍ମୁଖରେ ପହଞ୍ଚି ଓଡ଼ିଆ ଭାଷାର ଜୀବନ ଇତିହାସରେ ଯେଉଁ ନୂଆ ଅଧ୍ୟାୟ ଯୋଡ଼ିଲେ  ତାହା ଭାଷାପ୍ରେମର ଅନନ୍ୟ ନିଦର୍ଶନ କେବଳ ନଥିଲା, ଭାଷା ବିଦ୍ଵେଷୀ ନବୀନଙ୍କ ଛାତିରେ ଏପରି ଛନକା ଭରିଦେଇଥିଲା ଯେ, ୧୫ ଦିନ ଭିତରେ ଓଡ଼ିଶାର ସର୍ବତ୍ର ସବୁ ଦପ୍ତର ଓ ଦୋକାନର ନାମ ଓଡ଼ିଆରେ ଲେଖାହେବା ବାଧ୍ୟତାମୂଳକ ହେବ ଓ ଆଇନରେ ଥିବା ତ୍ରୁଟି ସଂଶୋଧନ କରାଯିବ ବୋଲି କହିବାକୁ ତର ସହିନଥିଲା ।

ମୁଖ୍ୟମନ୍ତ୍ରୀଙ୍କ ପ୍ରୀତ୍ୟର୍ଥେ ସେଦିନର ଏହି ଐତିହାସିକ ଘଟଣାକୁ ଓଡ଼ିଶାର ଗଣମାଧ୍ୟମମାନେ ବ୍ଳାକ୍ଆଉଟ୍ କରିଥିବା ବେଳେ ଆନ୍ଦୋଳନର ଛତ୍ରପୁର ସଞ୍ଚାଳକ ସୌମ୍ୟରଞ୍ଜନ ନାୟକ ଫେସବୁକ ମାଧ୍ୟମରେ ତାର ପ୍ରସାରଣ କରିଥିଲେ ଓ ପରେ ଭିନ୍ନଧାରାର ପ୍ରତିଜ୍ଞା ଟିଭି ତାହାକୁ ହିଁ ପ୍ରସାରିତ କରିଥିଲା । ଆପଣମାନଙ୍କ ଉଦ୍ଦେଶ୍ୟରେ ତାହାକୁ orissamattersର YouTube ମଞ୍ଚରେ ସ୍ଥାନିତ କରି ଏଠାରେ ସଲଗ୍ନ କରାଗଲା ।

ଏହି ଘଟଣା ପରେ ଓଡ଼ିଶା ସରକାର ଅତର୍ଛିଯାଇ ଆଇନଟିକୁ ମାସକ ପରେ ୨ୟ ବାର  ସଂଶୋଧନ କରିବାକୁ ବାଧ୍ୟ ହୋଇଥିଲେ ମଧ୍ୟ ତାହା ଥିଲା  ତ୍ରୁଟିପୂର୍ଣ୍ଣ ୧ମ ସଂଶୋଧନର ପୁନଃ ବୈଧିକରଣ ଓ ପରିବର୍ଦ୍ଧନ ।

ଏହି ପ୍ରତାରଣା ବିରୁଦ୍ଧରେ  ଓ ଷଡ଼ଯନ୍ତ୍ର ସମ୍ପର୍କରେ ସାରା ଓଡ଼ିଶାର ଜନଗଣଙ୍କୁ ଅବଗତ କରାଇ ଭାଷା ମାଆର ବିଜୟ ସୁନିଶ୍ଚିତ କରିବା ପାଇଁ ନିଜ ସାଥୀମାନଙ୍କୁ କଳାପତାକା ସହ ସାଇକଲ ଅଭିଯାନ ପାଇଁ ରଞ୍ଜନ ଯେଉଁଦିନ କାର୍ଯ୍ୟକ୍ରମର ରୂପରେଖ ପ୍ରସ୍ତୁତ କଲେ ଓ ସେଥିପାଇଁ ସାଥୀ ସମ୍ପର୍କ ଆରମ୍ଭ କଲେ, ତହିଁର ତୃତୀୟ ଦିନ ଅତିବାହିତ ହେବା ପୂର୍ବରୁ ତାଙ୍କୁ ହତ୍ୟା କରାଗଲା । ଭାଷା ଆନ୍ଦୋଳନ ଓ ଓଡ଼ିଶା ସୂଚନା ଅଧିକାର ଅଭିଯାନର ତଥା ଜନସାଧାରଣଙ୍କ ପ୍ରତିବାଦ ବିକ୍ଷୋଭ ଓ ବାରମ୍ବାର ଦାବି ସତ୍ତ୍ୱେ ତାଙ୍କ ହତ୍ୟାକାରୀକୁ ଧରିବା ପାଇଁ କୌଣସି ତତ୍ପରତା ପ୍ରକାଶ ପାଇନାହିଁ ।

ଏହି ହେତୁ ଆମେ ସନ୍ଦେହ କରୁ ଯେ , ମୁଖ୍ୟମନ୍ତ୍ରୀଙ୍କ ଚକ୍ରାନ୍ତ କବଳରୁ ଭାଷା ଆନ୍ଦୋଳନକୁ ରକ୍ଷା କରିବା ପାଇଁ ଓ ଓଡ଼ିଆ ଭାଷାରେ ଓଡ଼ିଶାର ପରିଚାଳନା ଅଲଙ୍ଘ୍ୟ କରିବା ପାଇଁ ରଞ୍ଜନଙ୍କ ଉପରସୂଚିତ କଳାପତାକାଧାରୀ ପଦଯାତ୍ରା ଓ କଳାପତାକା ସହ ସାରା ଓଡ଼ିଶାରେ ସାଇକଲ ଯାତ୍ରା କରିବା ପ୍ରସ୍ତାବର ପ୍ରତିକ୍ରିୟାରେ ତାଙ୍କୁ ହତ୍ୟାକରାଯାଇଛି ଓ ସେହି କାରଣରୁ ମୁଖ୍ୟମନ୍ତ୍ରୀଙ୍କ କର୍ତ୍ତୃତ୍ତ୍ଵାଧିନ ପୋଲିସ ହତ୍ୟାକାରୀକୁ ଧରୁନାହିଁ ।

ଏହି ପ୍ରେକ୍ଷାପଟରେ ଏହି ହତ୍ୟାକାଣ୍ଡର ସିବିଆଇ ତଦନ୍ତ ପାଇଁ ଭାଷା ଆନ୍ଦୋଳନକାରୀମାନଙ୍କ ପକ୍ଷରୁ ମୁଁ ଦାବି କରୁଛି ।