ନମସ୍ତେ ମଧୁବାବୁ

ସନ୍ତୋଷ କୁମାର ମିଶ୍ର,  ଅଧିବକ୍ତା, ଭବାନୀପାଟଣା

ମଧୁବାବୁଙ୍କୁ ମୁଁ ରାତିରେ ଭେଟିଲି
ବସିଥିଲି ତାଙ୍କ ପାଖରେ,
ପଚାରିଲେ ମୋତେ ଓଡ଼ିଶା ଖବର
କହି ଦେଲି ସଂକ୍ଷେପରେ ।୧।

ଜାତି ନନ୍ଦିଘୋଷ ରଥ ଗଡେ ଅଜା
ସ୍ୱାର୍ଥକୁ ସାରଥୀ କରେ,
ଗଧ ଟାଣୁ ଅଛି ଶଙ୍ଖର ଦଉଡି
ପାଞ୍ଚ ଟଙ୍କା ଆହାରରେ । ୨।

ସ୍ୱାଭିମାନି ତୁମେ ହୋଇଥିଲ ବୋଲି
ଓକିଲଙ୍କ ହେଲ ଦେବତା,
ସତ୍ୟର ପ୍ରକଟ ତୁମେ କରୁଥିଲ
ସତ୍ୟକୁ କରିଲୁ ହତ୍ୟା ।୩।

ତୁମେ ଲଢୁଥିଲ ନ୍ୟାୟ ପାଇଁ ଅଜା
ଆମେ ଲଢୁ ଧନ ପାଇଁ,
ବିଚାରପତି ଭି ବସନ୍ତି ଅସନେ
ଦରମା ଗଣ୍ଡିକ ପାଇଁ ।୪।

ସବୁ ଓଡ଼ିଆଙ୍କୁ ଏକତ୍ରିତ କରି
ଓଡ଼ିଶା ପ୍ରଦେଶ କଲ,
ବଡ଼ ଭାଇ ଏଠି ଉତ୍କଳ ବୋଲାଏ
କୌଶଳ ସାବତ ତୁଲ୍ୟ ।୫।

ଗରିବଙ୍କ ତୁମେ ବ୍ୟାଙ୍କ ଖାତା ଅଜା
ମଧୁ ପେନସନ ନାଁରେ,
ରାଜା ନେତାଙ୍କର ଗୁରୁ ହୋଇଗଲ
ଏବେ ଗୁରୁ ଦିବସରେ ।୬।

ମୋ ପୂର୍ବ ପୁରୁଷ ଜୟ କରିଥିଲେ
ଗଙ୍ଗା ଠାରୁ ଗୋଦାବରୀ,
ତାଙ୍କରି ସନ୍ତାନ ଭିକ ମାଗେ ଏବେ
ମହାନଦୀ ଜଳ ଧାରୀ ।୭।

ଓଡ଼ିଆଙ୍କ ଶ୍ରେଷ୍ଠ ବୋଲାଉଛି ଯିଏ
ଓଡିଆ ପାରୁନି କହି,
ଓଡ଼ିଆ ଭାଷାରେ ଦଣ୍ଡ ବିଧାନ ଟା
କେମିତି ରଖିବେ ଭାଇ ।୮।

ଜାତିର ଉନ୍ନତି ନେତା କରୁଛନ୍ତି
ସ୍ୱାର୍ଥକୁ ସାରଥି ମଣି,
ଏ ଦଳୁ ସେ ଦଳ ନିତି ଡେଉଁଛନ୍ତି
ହାତ ଶଙ୍ଖ ପଦ୍ମ ଗଣି ।୯।

ମୁଁ ପରା ବୋଲାଏ ଓଡ଼ିଆ ସନ୍ତାନ
ଫୋଟ ପରିଚୟ ପାଇ,
ଭୋଟ ଦେବି ଅଜା ଆନନ୍ଦେ ଏଥର
ଦୁଇ ହଜାରଟେ ନେଇ ।୧୦।

ଶାର୍ଗୁଣା ବିଲୁଆ ଚିକିତ୍ସକ ହୋଇ
ପ୍ରାଣୀଙ୍କୁ କରନ୍ତି ଶବ,
ଚିକିତ୍ସାଳୟ ର ସଂମାନ ବଢାଏ
ଦେଖି ଚାକଚକ ଭାବ ।୧୧।

ମୁଁ ମନେ ଭାବିଛି ତୋଷମଦ କରି
ବଢ଼ାଇବି ମୋର ମାନ,
ବିକି ସ୍ୱାଭିମାନ ବଢାଏ ସଂମାନ
ପାଇବାକୁ ଯେ ଆସନ ।୧୨।

ଓଡ଼ିଆ ସନ୍ତାନ ଲାଞ୍ଚ ଦେଇ ନେଇ
ଯାଇଛନ୍ତି ପୁରା ସଢି,
ଲାଞ୍ଚ ଦେଲେ ନେଲେ ବଢାଏ ସମ୍ପର୍କ
ଗଡଇ ସଂସାର ଗାଡ଼ି ।୧୩।

ସ୍ୱାର୍ଥ ଏଠି ଜାୟା ମିଥ୍ୟା ହୁଏ ପୁତ୍ର
ସଙ୍ଗେ କରିଛନ୍ତି ବାସ,
ରାଜ୍ୟରେ ବିପ୍ଳବ ଘଟିବନି ଆଉ
ସମସ୍ତଙ୍କୁ କଲା ଗ୍ରାସ ।୧୪।

ତୁମରି ସନ୍ତାନ ବୋଲାଉଛି ଅଜା
ଓକିଲାତି କାମ କରି,
ପେଟର ନାଆରେ ବେପାର କରୁଛି
ହେବିନି ମୁଁ ତୁମ ସରି ।୧୫।

ଜନନୀ ରୋଦନ ଦେଖି ସହିଯାଏ
ପତ୍ନୀର ଆନନ୍ଦ ପାଇଁ,
ରାତିଟା ମୋହର ରଙ୍ଗୀନ ଆଲୁଅ
ଜହ୍ନ ରାତି ଆଉ ନାହିଁ ।୧୬।

ପାରିଲେନି ସହି ମୋର ସତ୍ୟ ବାକ୍ୟ
ଗୋଟିଏ ଚାପୁଡ଼ା ଦେଲେ,
ଭାଙ୍ଗି ଗଲା ନିଦ ଦେଖିଛି ସପନ
ସପନରେ ଆସିଥିଲେ ।୧୭।

ଉତ୍କଳ ଗୌରବ ହେ ମଧୁସୂଦନ
ଚାରି ଅଠେଇସକୁ ଆସ,
ସେ ପୂଣ୍ୟ ତିଥିରେ କହିବ ଓଡ଼ିଆ
ମୋ ମଧୁବାବୁ ନମସ୍ୟ ।୧୮।


ପଦ୍ମପୁରରେ ବର୍ଷାଙ୍କ ବିଜୟ ନବୀନଙ୍କ ବିଜୟ ନୁହେଁ, ଓଡ଼ିଆ ମାଟିମମତାର ବିଜୟ

ସୁଭାଷ ଚନ୍ଦ୍ର ପଟ୍ଟନାୟକ

“ମାତୃଭୂମି ମାତୃଭାଷାରେ ମମତା ଯା ହୃଦେ ଜନମି ନାହିଁ , ତାକୁ ଯଦି ଜ୍ଞାନୀଗଣରେ ଗଣିବା ଅଜ୍ଞାନୀ ରହିବେ କାହିଁ?”

ମାତୃଭାଷାର ଭୂମି ଓଡ଼ିଶାକୁ ଅନ୍ୟ ଭାଷାଭାଷୀଙ୍କ ପ୍ରାଦୁର୍ଭାବ କବଳରୁ ରକ୍ଷା କରି ତାକୁ ତାର ଭୌଗୋଳିକ ସ୍ୱରୂପ ଦେବା ପାଇଁ ସମଗ୍ର ଓଡ଼ିଆ ଜାତି ବିଲାତି କ୍ଷମତାଧରମାନଙ୍କ ସହ ଯେଉଁ ସୁଦୀର୍ଘ ସଂଗ୍ରାମ ଚଳାଇଥିଲା, ତାହାକୁ ସାର୍ଥକତାର ସାଞ୍ଜୁ ଯୋଗାଇଥିବା ଉପରୋଦ୍ଧୃତ୍ତ ଉକ୍ତି ଝରି ଆସିଥିଲା ସ୍ୱଭାବକବି ଗଙ୍ଗାଧରଙ୍କ ଅମୃତସ୍ରାବୀ ଲେଖନୀରୁ, ମାତୃଭୂମି ଶୀର୍ଷକରେ ।  ଗଙ୍ଗାଧରଙ୍କ ସେହି ମାତୃଭୂମି ଓଡ଼ିଶାକୁ ହାଣି ଖଣ୍ଡ ଖଣ୍ଡ କରିଦେବାପାଇଁ ଅଣଓଡ଼ିଆ ବେପାରୀଙ୍କ  ପ୍ରଭାବପୁଷ୍ଟ ବିଜେପି ଯେଉଁ ଚକ୍ରାନ୍ତ ଚଳାଇଛି ତାକୁ ସ୍ଵଭାବ କବିଙ୍କ ମାଟିର ସହୋଦରା ପଦ୍ମପୁର ପଦଦଳିତ କରିଛି  ଓଡ଼ିଶା ବିଧାନସଭା ପାଇଁ  ଅନୁଷ୍ଠିତ ଉପନିର୍ବାଚନରେ । 

ଏହି ଉପନିର୍ବାଚନର ଔପଚାରିକ ଫଳ ଘୋଷଣା ଯଥାସମୟରେ ହେବ, ମାତ୍ର ଏହା ସ୍ପଷ୍ଟ ହୋଇସାରିଛି ଯେ, ସେଠାରେ ବିଜୟଟୀକା ନାଇବାକୁ ସଜବାଜ ହୋଇଥିବା ବିଜେପି ପରାଜୟ ଭୋଗିଛି, ବିଜୟ ଲାଭ କରିଛନ୍ତି ବିଜେଡ଼ିର ଆକସ୍ମିକ ପ୍ରାର୍ଥିନୀ, ଯେ କି ବିଜେଡ଼ି ପାଇଁ ବା ବିଜେଡ଼ି ପତାକା ତଳେ କେବେ କୌଣସି ରାଜନୈତିକ ଭୂମିକା ନିର୍ବାହ କରିନଥିଲେ  ।

ବିଧାନସଭାକୁ ଲୋକେ ଯାହାଙ୍କୁ ପଠାନ୍ତି, ତାଙ୍କର ମୁଖ୍ୟ କାମ ବିଧାନ ପ୍ରଣୟନ, ରାଜ୍ୟ ପରିଚାଳନା ପାଇଁ ସରକାରଙ୍କୁ ଅର୍ଥ ପ୍ରଦାନ ଓ ବ୍ୟୟ ଅନୁମୋଦନ, ଦୃଶ୍ୟମାନ ଅପଶାସନ ଉପରେ ଆଲୋଚନା ଓ ଉତ୍ତରଦାୟିତ୍ଵ ନିର୍ଦ୍ଧାରଣ, ଜନସାଧାରଣଙ୍କ ସ୍ଵାର୍ଥ ସେବା ପାଇଁ ପ୍ରଶାସନିକ ପରିବେଶ ସଂସ୍ଥାପନ ଏବଂ ରାଜ୍ୟ ଶାସନରେ ଗଣତାନ୍ତ୍ରିକ ଚଳଣିର ସଂରକ୍ଷଣ ଓ ଅଗଣତାନ୍ତ୍ରିକ ଆଚରଣର ମୂଳୋତ୍ପାଟନ ଏବଂ ଏଥିପାଇଁ ବିଧାୟକୀୟ ବ୍ୟବସ୍ଥା ଅବଲମ୍ବନ ।

ଏତଦ୍ଦୃଷ୍ଟିରୁ ଦେଖିଲେ, କୌଣସି ଅଭିଜ୍ଞତା ନଥିବା ନବଗତା ବିଜେଡି ପ୍ରାର୍ଥିନୀଙ୍କ ଅପେକ୍ଷା ପଦ୍ମପୁରର ସଚେତନ ଭୋଟରମାନେ ପ୍ରଚୁର ବିଧାୟକୀୟ ଅଭିଜ୍ଞତାସମ୍ପନ୍ନ ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କୁ ବହୁ ଅଧିକ ପରିମାଣରେ ସମର୍ଥନ କରିବା କଥା । ମାତ୍ର ସେ ହାରିଗଲେ । କାହିଁକି?

ହରିଗଲେ; କାରଣ, ମା ଓଡ଼ିଶାକୁ ହାଣିବା ପାଇଁ ଯେଉଁ ବିଚ୍ଛିନ୍ନତାବାଦୀ ସ୍ଵର ଓଡ଼ିଆ ଜାତିକୁ ଦୁଃଖରେ ଭିଜାଉଛି, ସେହି ହୀନ ଚକ୍ରାନ୍ତର ଜନକ ହେଉଛି ବିଜେପି । କ୍ଷମତାଲିପ୍ସୁ ଅଟଳ ବିହାରୀ ବାଜପାୟୀ ଅଣଓଡ଼ିଆ ବେପାରୀମାନଙ୍କ ସହଯୋଗରେ ପଶ୍ଚିମ ଓଡ଼ିଶାରେ ଅଧିକ ଭୋଟ ପାଇବା ବିଶ୍ଵାସ କରି ତାହାକୁ ଏକ ସ୍ଵତନ୍ତ୍ର ରାଜ୍ୟ କରିବାର ବିଷ ମଞ୍ଜି ପ୍ରଥମେ ବୁଣିଥିଲେ । ତହିଁ ଉପରେ ଆବଶ୍ୟକୀୟ ଆଲୋକପାତ କରି ୨୫.୩.୧୯୯୮ରେ ‘ସମ୍ବାଦ’ କାଗଜରେ ମୁଁ ଯେଉଁ ଚର୍ଚ୍ଚା ରଖିଥିଲି ତହିଁର ଶୀର୍ଷକ ଥିଲା ‘ଓଡ଼ିଶାପାଇଁ ବିଜେପି ବିପତ୍ତି’ । ଆଜିକୁ ୧୨ ବର୍ଷ ତଳେ କଟକର ‘ଭାରତ ଭାରତୀ’ ଦ୍ଵାରା ପ୍ରକାଶିତ ମୋର ସ୍ତମ୍ଭସଂହିତା ‘ସିଂହାବଲୋକନ’ର ୩୩୦- ୩୫ ପୃଷ୍ଠାଚୟରେ ତାହା ସ୍ଥାନିତ ହୋଇଛି । ପଦ୍ମପୁରରେ ନିର୍ବାଚନ ଆସନ୍ନ ଜାଣି ଭୋଟ ହାସଲ ପାଇଁ ଲୋକଙ୍କୁ ବିଚ୍ଛିନ୍ନତାବାଦୀ ନିଶା ପିଆଇବାକୁ ବିଜେପି ସମର୍ଥକ ଗୋଷ୍ଠୀ ଯେଉଁ ଉଦ୍ୟମ କରିଥିଲେ ତାହା ନିଜ ମାଟିମାଆକୁ ଭଲ ପାଉଥିବା ଓଡ଼ିଆ ଭାଷା ଜାତୀୟତାର ପବନ ପୀଠ ବରପାଲିର  ଜିଲ୍ଲାଜାତ ସହୋଦରା ପଦ୍ମପୁରରେ ସଂଖ୍ୟା ଗରିଷ୍ଠ ଓଡ଼ିଆଙ୍କୁ ଗଭୀର ମାନସିକ ଯନ୍ତ୍ରଣା ଦେଇଥିଲା । ସେମାନେ ଏହି ଉପନିର୍ବାଚନରେ ନୀରବରେ ନିଜର ରୋଷ ପ୍ରକଟ କରିଛନ୍ତି ବିଜେପି ବିରୁଦ୍ଧରେ ।

ଆମେରିକାନ ସ୍ଵାର୍ଥସେବା ପାଇଁ ମନମୋହନ ସିଂହ , ପ୍ରଣବ ମୁଖାର୍ଜୀ ଓ ସୋନିଆ ଗାନ୍ଧୀଙ୍କ ଦେଶଦ୍ରୋହୀ ଆଚରଣ ହେତୁ କଂଗ୍ରେସକୁ ଲୋକେ ଯେଉଁ ଦଣ୍ଡ ଦେଇଛନ୍ତି ତାହା ସେମାନଙ୍କୁ ମଗରଗରୁ ଆଣି କାନ୍ତାରରେ ପକାଇଥିଲେ ମଧ୍ୟ ଓଡ଼ିଶାର ଲୋକେ ସେହି ଦଳ ପ୍ରତି କୌଣସି କରୁଣା ପ୍ରଦର୍ଶନ ପାଇଁ ପ୍ରସ୍ତୁତ ନୁହନ୍ତି ।

ଏହି ପରିସ୍ଥିତି  ହିଁ ସଂପୂର୍ଣ୍ଣ ଦୁର୍ନୀତିଗ୍ରସ୍ତ , ଅପାରଗ, ଓଡ଼ିଆଦ୍ରୋହୀ  ପ୍ରବଞ୍ଚକ ନବୀନ ପଟ୍ଟନାୟକଙ୍କ ପ୍ରତି ହୃଦୟରେ ପ୍ରବଳ ବିତୃଷ୍ଣା ଓ ଘୃଣା ସତ୍ତ୍ୱେ ମାଟିର ନିଷ୍କଳଙ୍କ ଝିଅ ବର୍ଷା ସିଂ ବରିହାଙ୍କ ମଥା ଉପରେ ପଦ୍ମପୁରବାସୀଙ୍କ ଭୋଟ ବର୍ଷା କରାଇଛି । ପୋଷାମନା ମିଡ଼ିଆ ଏହାକୁ ନବୀନଙ୍କ ଜନପ୍ରିୟତାର ପ୍ରମାଣ ବୋଲି ପ୍ରଚାର କରିବା ସ୍ଵାଭାବିକ । ମାତ୍ର ନବୀନଙ୍କ ପ୍ରତି ସାଧାରଣ ଲୋକଙ୍କ ରୋଷ ଯଦି ପ୍ରବଳ ନଥାନ୍ତା ତେବେ ପ୍ରଦୀପ ପୁରୋହିତ କେବଳ ଅଣଓଡ଼ିଆ ଲାଭଖୋର ବେପାରୀଙ୍କ ପ୍ରଚୋଦନାରେ ଚାଲିଥିବା ବିଚ୍ଛିନ୍ନତାବାଦୀମାନଙ୍କ ନଗଣ୍ୟ ଭୋଟ ପାଇଥାନ୍ତେ, ୭୮୧୨୮ ଭୋଟ ପାଇପାରିନଥାନ୍ତେ; କାରଣ, କଂଗ୍ରେସର ସତ୍ୟ ଭୂଷଣ ସାହୁ ମଧ୍ୟ ବିଧାୟକୀୟ ଦକ୍ଷତାରେ ପୁରୋହିତଙ୍କ ପରି ଜଣାଶୁଣା ।

ବସ୍ତୁତଃ, ମନମୋହନ ସିଂହ , ପ୍ରଣବ ମୁଖାର୍ଜୀ ଓ ସୋନିଆ ଗାନ୍ଧୀଙ୍କ ଅପକର୍ମ ହେତୁ ସୃଷ୍ଟି ହୋଇଥିବା ରୋଷ ଶାନ୍ତ ହୋଇନଥିବା ହେତୁ, କଂଗ୍ରେସର ପାରମ୍ପରିକ ସମର୍ଥକମାନେ ସେମାନଙ୍କ ଭୋଟ ନିଜ ଦଳୀୟ ପ୍ରାର୍ଥୀଙ୍କୁ ନଦେଇ ପୁରୋହିତଙ୍କୁ ଦେଇଛନ୍ତି । କଂଗ୍ରେସ ପ୍ରାର୍ଥୀ ଅମାନତ ହରାଇଛନ୍ତି । ଏହା ସତ୍ତ୍ୱେ ଯେ ପୁରୋହିତ ହାରିଛନ୍ତି, ତାହା ତାଙ୍କ ଦୋଷରୁ ନୁହେଁ, ବରଂ ଓଡ଼ିଶାକୁ ଖଣ୍ଡ ବିଖଣ୍ଡ କରି ଅଣଓଡ଼ିଆଙ୍କୁ ଖୁସି କରାଇବାକୁ ଚାହୁଁଥିବା ବିଜେପି ଦୋଷରୁ ହାରିଛନ୍ତି । 

ଏହି ପ୍ରେକ୍ଷାପଟରେ ଏହା ହିଁ କୁହାଯାଇପାରେ ଯେ, ବର୍ଷାଙ୍କ ବିଜୟ ନବୀନ ପଟ୍ଟନାୟକଙ୍କ ବିଜୟ ନୁହେଁ , ପଶିମ ଓଡ଼ିଶାର ଅଣଓଡ଼ିଆ ବେପାରୀ ସଞ୍ଚଳିତ ବିଚ୍ଛିନ୍ନତାବାଦ ବିରୁଦ୍ଧରେ ଓଡ଼ିଆ ଜାତିର ମାଟିମମତାର ବିଜୟ ।

ବିଚ୍ଛିନ୍ନତାବାଦୀ ବିଷବାହକ ବିଜେପିକୁ ଆଗାମୀ ନିର୍ବାଚନରେ ମଧ୍ୟ ପଶ୍ଚିମ ଓଡ଼ିଶାରେ ପରାଜିତ ହେବାକୁ ହେବ।

ଭାଷା ଆଇନରେ ଜାଲିଆତି: ପ୍ରାମାଣିକ ପୁସ୍ତକ ‘ଭର୍ତ୍ସନୀୟ ବିଧାନସଭା’ ଲୋକାର୍ପିତ

ନ୍ଯୁଜ ସିଣ୍ଡିକେଟ୍

ଓଡ଼ିଶା ରାଜ୍ଯଭାଷା ଆଇନ, ୧୯୫୪ (The Orissa Official Language Act, 1954)କୁ କାର୍ଯ୍ୟକାରୀ କରିବା ପରିବର୍ତ୍ତେ ତହିଁରେ  ଅପସଂଶୋଧନ କରି ତାକୁ ଅକର୍ମଣ୍ୟ କରିଦିଆଯାଇଛି ଓ ଏହା କରିବା ପାଇଁ ବିଧାନ ପ୍ରଣଯନ ପ୍ରକ୍ରିୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାଲିଆତି ପ୍ରୟୋଗ କରିଛନ୍ତି । ଏହାର ପ୍ରାମାଣିକ ପୁସ୍ତକ – ‘ଭର୍ତ୍ସନୀୟ ବିଧାନସଭା – ଜୁଲାଇ ୧୭ ସନ୍ଧ୍ୟା ୭ଟାରେ ଲୋକାର୍ପିତ କରିଛନ୍ତି ପୁସ୍ତକର ଲେଖକ ସୁଭାଷ ଚନ୍ଦ୍ର ପଟ୍ଟନାୟକ ସାମାଜିକ ଗଣମାଧ୍ୟମ ଫେସବୁକ୍ ମଞ୍ଚରେ ସିଧା ପ୍ରସାରଣ ଶୈଳୀରେ । 

ଓଡ଼ିଆ ଭାଷାରେ ଓଡ଼ିଶାର ପରିଚାଳନା ପାଇଁ  ୧୯୫୪ରୁ ଆଇନ ଥିଲେ ମଧ୍ୟ ଇଂରାଜୀମାନସ୍କ୍କ ଲୋକେ କ୍ଷମତାରେ ରହି ଅତି ଅବୈଧ ଭାବେ ଇଂରାଜୀକୁ ହିଁ  କାର୍ଯ୍ୟାଳୟର ଭାଷା ବନାଇରଖିଛନ୍ତି ଓଡ଼ିଶାରେ ।  ଏହି ଆଇନର ଆଜନ୍ମ ଦୁର୍ବଳତା ଦୂରକରି ଏହାକୁ ଅଲଙ୍ଘ୍ଯ କରିବା ପାଇଁ ଏଥିପାଇଁ ଗଠିତ ମନ୍ତ୍ରୀସ୍ତରୀୟ କମିଟିର ସଦସ୍ୟ ଭାବେ ଶ୍ରୀ ପଟ୍ଟନାୟକ ୨୦୧୫ରେ ଆବଶ୍ୟକୀୟ ଆଇନ ସଂଶୋଧନର ପ୍ରସ୍ତାବ ଦେଇଥିଲେ । ଯେହେତୁ ସେହି ପ୍ରସ୍ତାବରେ ଆଇନ ଉଲଙ୍ଘନକାରୀକୁ ଦଣ୍ଡବିଧାନ ଅନ୍ତର୍ଭୁକ୍ତ ଥିଲା, ସେହେତୁ ତାହାକୁ ଆଲିଆଗଡକୁ ଫିଙ୍ଗିଦେଇଥିଲେ ମୁଖ୍ୟମନ୍ତ୍ରୀ ଓ ମନ୍ତ୍ରୀସ୍ତରୀୟ କମିଟିକୁ ପବନରେ ଉଡାଇ ଦେଇଥିଲେ । ଏହାର ପ୍ରତିବାଦରେ ଶ୍ରୀ ପଟ୍ଟନାୟକ ପ୍ରତିଷ୍ଠା କରିଥିଲେ ଭାଷା ଆନ୍ଦୋଳନ ଓ ମୁଖ୍ୟମନ୍ତ୍ରୀଙ୍କ ଷଡଯନ୍ତ୍ର ସମ୍ପର୍କରେ ଜନାବଗତି ତଥା ଜନସାଧାରଣଙ୍କ ଭାଷା ଅଧିକାର ପ୍ରାପ୍ତି ପାଇଁ ଜନଜାଗୃତି ଉଦ୍ଦେଶ୍ୟରେ ତାଙ୍କ ଉଦ୍ଭାବିତ ‘ନୀରବ କଳାପତାକା ଅଭିଯାନ’ ଆଂଦୋଳନର କ୍ରିୟାତ୍ମକ ଅବେଗରେ ଆଗେଇଚାଲିଲା । 

ଏହି ଅଭିଯାନ ପ୍ରଭାବରୁ ମୁକ୍ତି ପାଇଁ ମୁଖ୍ୟମନ୍ତ୍ରୀ ଆଇନ ସଂଶୋଧନର କୁଝ୍ହଟିକା ତିଆରି କରି ଆଇନଟିର ଅପସଂଶୋଧନ କରିଛନ୍ତି ଓ ଏଥିପାଇଁ ବିଧାନ ପ୍ରଣୟକ ପ୍ରକ୍ରିୟାରେ ଜାଲିଆତି ପ୍ରୟୋଗ କରିଛନ୍ତି । 

ପୁସ୍ତକଟିକୁ ଲୋକାର୍ପିତ କରି ଶ୍ରୀ ପଟ୍ଟନାୟକ ଏଥିର  ସୂଚନା ଦେଇ  କହିଥିଲେ ଯେ, ତାଙ୍କ ପ୍ରସ୍ତାବ ଅନୁରୂପେ ଆଇନ ବିଭାଗ ଆଇନତଃ ପ୍ରସ୍ତୁତ କରିଥିବା  ଚିଠା ସଂଶୋଧନ-ବିଧେୟକକୁ ନଥିରୁ ଗାୟେବ କରି ତା ସ୍ଥାନରେ ଜାଲିଆତିପ୍ରସୂତ ଚିଠା ବିଧେୟକ ରଖି ବିଧାନସଭାରେ ଭାଷା ଆଇନର ଭୁଲ ସଂଶୋଧନ କରାଯାଇଛି ଏବଂ ଏପରି ବିଧାୟକୀୟ ଦୁରାଚାର ସମ୍ପର୍କରେ ମନ୍ତ୍ରୀମଣ୍ଡଳର ସମସ୍ତ ସଦସ୍ଯଙ୍କୁ ତଥା ବିଧାନସଭାର ସମସ୍ତ ସଦସ୍ଯକୁ ଲିଖିତରୂପେ ସେ ଆଗୁଆ ସୂଚନା ଦେଇଥିଲେ ମଧ୍ୟ ପଞ୍ଚଦଶ ବିଧାନସଭାର ସଦସ୍ୟମାନେ ନିଜ ନିଜର ବିଧାୟକୀୟ ବିଜ୍ଞତା ପ୍ରୟୋଗ କରିବାରୁ ନିବୃତ୍ତ ରହିଯିବା ହେତୁ ଓଡ଼ିଶା ରାଜ୍ଯଭାଷା ଆଇନ ଅକର୍ମଣ୍ୟ ହୋଇଯାଇଛି । 

ଜନସାଧାରଣଙ୍କ ସ୍ଵାର୍ଥ ରକ୍ଷା ପାଇଁ ବିଧାନ ପ୍ରଣୟନ  ହିଁ ବିଧାନସଭାର ଦାୟିତ୍ଵ । ଯେଉଁ ବିଧାନସଭା ଏହି ଦାୟିତ୍ଵ ନିର୍ବାହ ନକରେ ତାହା ଭର୍ତ୍ସନାଯୋଗ୍ୟ । ସେହେତୁ ଓଡ଼ିଶାର ପଞ୍ଚଦଶ ବିଧାନସଭା ଭର୍ତ୍ସନୀୟ ବୋଲି  କହିଥିଲେ ଶ୍ରୀ ପଟ୍ଟନାୟକ । 

ଶୁଭ ଲକ୍ଷଣ : ଭାଷା ମାଆ ପାଇଁ ସାହିତ୍ଯ ଶିବିର ଚଳଚଞ୍ଚଳ

ନ୍ଯୁଜ ସିଣ୍ଡିକେଟ

ଆନନ୍ଦର କଥା, ଭାଷା ମାଆ ପାଇଁ ସାହିତ୍ଯ ଶିବିର ଅଧିକରୁ ଅଧିକ ମାତୃଭାଷାପ୍ରାଣ ସାହିତ୍ଯିକମାନଙ୍କୁ ନେଇ ଚଳଚଞ୍ଚଳ  ହୋଇଉଠିଛି । ସ୍ଵାର୍ଥ ପାଇଁ ସାହିତ୍ଯ ପ୍ରବାହର ଗତିପଥ ବଦଳାଇ ଭାଷା ମାଆ ପାଇଁ ସାହିତ୍ଯ ସୃଷ୍ଟି ସକାଶେ ଡକରା ଦେଇଛି କଳାପତାକା ଅଭିଯାନ । ମହାନ ଆମ ମାତୃଭାଷା ସଂଘର ପ୍ରତିଷ୍ଠାତା ଶ୍ରୀମାନ ରାଜେଶ ଶତପଥୀଙ୍କ ସଂଯୋଜନାରେ ପରିଚାଳିତ ଏହି ଶିବିରକୁ ଅନୁଷ୍ଠାନିକ ଭାବେ ଉନ୍ମୋଚନ କରିଥିଲେ ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ । 

ସଂଯୋଜକ ଓ ଉନ୍ମୋଚକଙ୍କ  ଭିନ୍ନ ବଲାଙ୍ଗିର, କଳାହାଣ୍ଡି, କନ୍ଧମାଳ, ଢେଙ୍କାନାଳ, କଟକ ଓ ଖୋର୍ଦ୍ଧା ଆଦି ଜିଲ୍ଲାମାନଙ୍କରୁ  ସର୍ବଶ୍ରୀ ଗଜାନନ ମିଶ୍ର, କୈଳାସ ଚନ୍ଦ୍ର ସାହାଣୀ,କ୍ଷୀରୋଦ ନାୟକ,  ନାମାକ୍ଷୀ ପୁରୋହିତ, ନିରୂପମା ପ୍ରଧାନ, ରାଧାକାନ୍ତ ଦୀପ , ଇତିଶ୍ରୀ ବେହେରା, ସୁବଳ ସାଗର, ସୁନୀତା ପଶାୟତ,  ରଞ୍ଜନ କୁମାର ସାହୁ, ସସ୍ମିତା ପାତ୍ର, ପ୍ରଦୀପ୍ତ ରଞ୍ଜନ ମହାପାତ୍ର, ରାଜେନ୍ଦ୍ର ପୁଟେଲ, ସେନ ଆଚାର୍ଯ୍ୟ, ସତ୍ୟଜିତ ମହାପାତ୍ର, ରଞ୍ଜିତା ବେହେରା, ମନୋରଞ୍ଜନ ଦାସ, ଗାୟତ୍ରୀ ସାହୁ, ନାରାୟଣ ରାଉତ, ରାଜେନ୍ଦ୍ର ସାହୁ, ମୌସୁମୀ ନାଗ, ନମିତା ସିଆଲ, ଜି ମାଝି, ଅଖିଲ ସେଠୀ, ଦିବ୍ୟଶକ୍ତି ସାମନ୍ତରାୟ, ପ୍ରମିତା ନାୟକ, ଚୁମ୍କି ବାରିକ, ମାନସ ରଞ୍ଜନ ମାହାକୁଡ, ଲଲାଟେନ୍ଦୁ ମାଝି, ପ୍ରିୟଦର୍ଶିନୀ ପଣ୍ଡା, ପ୍ରଜ୍ଞା ପାରମିତା, ଉଦ୍ଧବ କୁମ୍ଭାର, ଡିସେମ୍ବର ନିଆଲ, ସୋନାଲୀ ପାଣିଗ୍ରାହୀ ପ୍ରମୁଖ ବହୁ ବରିଷ୍ଠ ଓ କନିଷ୍ଠ ସାହିତ୍ୟିକ ଏହି ୱେବ ସମ୍ମିଳନୀରେ ଭାଗ ନେଇଥିଲେ । 

ଓଡ଼ିଆ ଭାଷାରେ ଓଡ଼ିଶାର ପରିଚାଳନା ପାଇଁ ଦୀର୍ଘଦିନୁ ଅଦାଲତୀୟ  ସଂଘର୍ଷ କରି ଆସିଥିବା ଏବଂ ୨୦୧୫ରେ ଏଥିପାଇଁ  ଆମରଣ ଅନଶନ କରି ଭାଷା ପାଇଁ ନବଜାଗରଣ  ସୃଷ୍ଟି କରିଥିବା ଟିଟିଲାଗଡ଼ର ଅଧିବକ୍ତା ଓ କବି ଗଜାନନ ମିଶ୍ର, ଭୁବନେଶ୍ବର ଆସି ବହୁବାର କଳା ପତାକା ତୋଳିଥିବା ଭବାନୀପାଟଣାର ଅଧିବକ୍ତା ଓ କବି ସନ୍ତୋଷ କୁମାର ମିଶ୍ର, କବି କୈଲାଶ ଚନ୍ଦ୍ର ସାହାଣୀ, କବି ରାଜେଶ ଶତପଥୀ, କବିସୌରଭ କୈଲାଶ ବେହେରା ପ୍ରମୁଖ ଭାଷା ମାଆ ପାଇଁ ନିଜ ନିଜ ସାହିତ୍ଯ ନିବେଦନ କରିଥିଲେ । 

ପ୍ରତି ମାସର ଶେଷ ରବିବାର ସନ୍ଧ୍ଯା ୬ରେ ଏହି ଶିବିର ଅନୁଷ୍ଠିତ ହେବ । 

 

କଳାପତାକା ଅଭିଯାନର ମାସିକ ୱେବିନାର// ଆମ ଭାଷା ଓ ଆମ କର୍ତ୍ତବ୍ୟ


ଓଡ଼ିଆ ଭାଷାରେ ଓଡ଼ିଶାର ପରିଚାଳନା ପାଇଁ କଳାପତାକା ଅଭିଯାନର ଏକ ନୂତନ ଫର୍ଦ୍ଦ ଭାବେ ଆଜି ସନ୍ଧ୍ଯା ୬ରେ ଉନ୍ମୋଚିତ ହୋଇଛି ମାସିକ ୱେବ୍ ସେମିନାର (ୱେବିନାର) : ‘ଆମ ଭାଷା ଓ ଆମ କର୍ତ୍ତବ୍ୟ’ ।


ଭାଷା ଆଂଦୋଳନର କାର୍ଯ୍ୟକାରୀ ସଭାପତି ଅଶୋକ କୁମାର ପରିଡ଼ାଙ୍କ ଅବାହକତ୍ବରେ ଅନୁଷ୍ଠିତ ଏହି ୱେବିନାରରେ ଯୋଗଦେଇଥିଲେ ଫୁଲବାଣୀ, ବୌଦ, ସୋନପୁର, ରାୟଗଡ଼, କଳାହାଣ୍ଡି, ସମ୍ବଲପୁର, କେଉଁଝର, ସୁନ୍ଦରଗଡ଼, ମୟୂରଭଞ୍ଜ, ବାଲେଶ୍ଵର, ଜଗତସିଂହପୁର,କେନ୍ଦ୍ରାପଡ଼ା, କଟକ ଓ ଢେଙ୍କାନାଳ ଜିଲ୍ଲାମାନଙ୍କର ମାତୃଭାଷାପ୍ରେମୀ ଅର୍ଦ୍ଧଶତାଧିକ ଓଡ଼ିଆ । ସେମାନଙ୍କ ମଧ୍ୟରେ ପ୍ରମୁଖ ଥିଲେ ସର୍ବଶ୍ରୀ ଶ୍ରୀକାନ୍ତ ଦାଶ, ବୀରେନ୍ଦ୍ର ଡିଗଲ, ଆନନ୍ଦା ବଡ଼ଶେଠ, ରାଜକିଶୋର ପାଢୀ, ନିରଞ୍ଜନ ବେହେରା, ତ୍ରିଲୋଚନ ପଢିଆରୀ, ବଇକୁନ୍ଥନଥ ସ୍ଵାଇଁ, ଦେବାଶିଷ ପ୍ରିୟରଞ୍ଜନ ସାହୁ, ଜଗନ୍ନାଥ ମଲ୍ଲିକ, ଅମରଜ୍ୟୋତି ରାୟ , ମନମୋହନ ପ୍ରଧାନ, ଶଙ୍କର ମିଶ୍ର, କୁବେର ହରିପାଲ୍। ଏନ୍ . ଏନ୍. ମହାପାତ୍ର , ମୁରଲୀଧର ନାୟକ, ବିକାଶ ଡିଗଲ୍, କବି ସୌରଭ କୈଲାଶ ବେହେରା, ଦୁଷ୍ମନ୍ତ ମାର୍ଥା, ମିଲନ ମହାନନ୍ଦା, ଚିତ୍ତରଞ୍ଜନ ମିଶ୍ର, କିଶୋର ରାଠୋର, ପ୍ରଶାନ୍ତ ପ୍ରଧାନ, ପ୍ରକାଶ ଡିଗଲ୍, ପିଙ୍କି ମହାରଣା, ବି. କେ. ସାହାଣୀ, ମଧୁମିତା, ସୁରେଶ କହଁର ପ୍ରମୁଖ ।

ଓଡ଼ିଶାରେ ଓଡ଼ିଆ ଭାଷାରେ କାର୍ଯ୍ୟାଳୟଗୁଡ଼ିକ ଯେପରି ନିଶ୍ଚୟ ଚାଲେ ତାହା ସୁନିଶ୍ଚିତ କରିବା ପାଇଁ ଆବଶ୍ୟକୀୟ ଆଇନ ସଂଶୋଧନ ଉପରେ ଗୁରୁତ୍ଵ ଦିଆଯାଇଥିଲା ।

ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ଏହି ୱେବିନାରକୁ ଉନ୍ମୋଚିତ କରିଥିବା ବେଳେ ଏହାର ଉଦ୍ଦେଶ୍ୟ ଅବଗତ କରାଇ ଶ୍ରୀ ଅଶୋକ କୁମାର ପରିଡ଼ା କହିଥିଲେ, ଓଡ଼ିଶାର ୯୩ ଶତାଂଶ ବ୍ୟକ୍ତି ନିଜ ଦୈନନ୍ଦିନ ଜୀବନର ଭାଷା ଭାବେ ଓଡ଼ିଆ ଭାଷା ବ୍ୟବହାର କରୁଥିବା ହେତୁ ଇଂରାଜୀରେ ଚାଲିଥିବା ଶାସନ ସର୍ବସାଧାରଣଙ୍କ ପାଇଁ ଅବୋଧ୍ୟ ହୋଇରହିଛି ଓ ଗଣତନ୍ତ୍ର ପଥବଣା ହୋଇପଡ଼ିଛି । ତେଣୁ, ସୁଭାଷବାବୁ ସରକାରଙ୍କୁ ଦେଇଥିବା ପ୍ରସ୍ତାବ ଅନୁସାରେ ଭାଷା ଆଇନର ସାନି ସଂଶୋଧନ କରିବାକୁ ସେ ସରକାରଙ୍କୁ ଆହ୍ଵାନ ଦେଇଥିଲେ । ଓଡ଼ିଶାର ପରିଚାଳନାରେ ଓଡ଼ିଆ ଭାଷା ବ୍ୟବହାରର ପ୍ରଥମିକତା ଉପରେ ଗୁରୁତ୍ଵ ଦେଇଥିଲେ ସର୍ବଶ୍ରୀ ଶ୍ରୀକାନ୍ତ ଦାଶ, ବଇକୁନ୍ତବଥ ସ୍ଵାଇଁ, ରବୀନ୍ଦ୍ରନାଥ ମିଶ୍ର, ଅଖିଳ ବିଶ୍ଵାଳ, ଚିତ୍ତରଞ୍ଜନ ମିଶ୍ର ପ୍ରମୁଖ । ଓଡ଼ିଆ ଜାତିର ଛାତ୍ରସମାଜ ଓଡ଼ିଆ ଭାଷାରେ ଶିକ୍ଷାର୍ଜନ କଲେ ଜ୍ଞାନୋପଲବ୍ଧି ସହଜ ସାଧ୍ୟ ହେବ ବୋଲି କହିଥିଲେ ଛାତ୍ରୀ ମଧୁମିତା ।

ମାତୃଭାଷାପ୍ରେମୀ ରଞ୍ଜନଙ୍କ ସଂଯୋଜନାରେ ଅନୁଷ୍ଠିତ ଏହି ୱେବ ସମ୍ପାନ ଏହି ପ୍ରଣାଳୀରେ ଭାଷା-ଜାତୀୟତା ଜାଗୃତିର ପ୍ରଥମ ପ୍ରୟାସ । ପ୍ରତି ମାସର ତୃତୀୟ ରବିବାର ସନ୍ଧ୍ଯା ୬ରେ “ଆମ ଭାଷା ଓ ଆମ କର୍ତ୍ତବ୍ୟ” ଶୀର୍ଷକରେ ଏହା ଅନୁଷ୍ଠିତ ହୋଇଚାଲିବ ।