Posts tagged Asit Mohanty

ନିଉଜ ସିଣ୍ଡିକେଟ

ଅମାନିଆଁ କର୍ମଚାରୀଙ୍କୁ ଆର୍ଥିକ ଦଣ୍ଡବିଧାନ ପାଇଁ ନିଯମାବଳୀ ପ୍ରଣୟନ କରି ଓଡ଼ିଶା ସରକାରୀ ଭାଷା ଆଇନକୁ କଡ଼ାକଡ଼ି ଭାବେ କାର୍ଯ୍ୟକାରୀ କରିବାକୁ ସର୍ବପ୍ରଥମେ ପ୍ରସ୍ତାବ ଓ ଚିଠା ପ୍ରଦାନ କରିଥିବା ଭାଷା ଆଂଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକ ବାରମ୍ବାର କହିଆସିଛନ୍ତି ଯେ, ଓଡ଼ିଆ ଜାତିକୁ ତାର ଭାଷା ଅଧିକାରରୁ ବଞ୍ଚିତ କରିବା ପାଇଁ ରାଜ୍ୟ ସରକାର ମୂଳ ଆଇନର ଭୁଲ ସଂଶୋଧନ କରିଛନ୍ତି ଓ ଭୁଲ ନିଯମାବଳୀ ପ୍ରଣୟନ କରି, ତାହାକୁ ମଧ୍ୟ ପ୍ରମାଦପୂର୍ଣ ଭାବେ ସଂଶୋଧନ କରିଛନ୍ତି । ସରକାର ଏହି ସମସ୍ତ ଭୁଲକୁ ବିଲୋପ କରନ୍ତୁ ଓ ଅମାନିଆଁ କର୍ମଚାରୀଙ୍କ ବିରୁଦ୍ଧରେ ଦଣ୍ଡବିଧାନ ପାଇଁ ଆଇନଗତ ପଦକ୍ଷେପ ନେବାର ଅଧିନର ପ୍ରତ୍ଯେକ ଓଡ଼ିଆଙ୍କୁ ଦିଆଯାଉ ବୋଲି ସ ଦାବିକରିଆସିଛନ୍ତି । ମାତୃଭାଷାପ୍ରେମୀ ଶ୍ରେଷ୍ଠ ଓଡ଼ିଆମାନେ ଏଥିପାଇଁ ନୀତିନିଷ୍ଠ ଭାବେ ପ୍ରତ୍ୟହ ନିଶବ୍ଦ କଳା ପତାକା ଅଭିଯାନ ଚଳାଇ ସାରା ଓଡ଼ିଶାରେ ଅଭୂତପୂର୍ବ ଜନଜାଗୃତି ସୃଷ୍ଟି କରିଛନ୍ତି । ମାତ୍ର ଓଡ଼ିଆକୁ ଓଡ଼ିଶାର ସରକାରୀ ଭାଷା କରାଇ ନଦେବା ଜିଦରେ ଅତଳ ଥିବା ମୁଖ୍ୟମନ୍ତ୍ରୀ ଏହି ଆନ୍ଦୋଳନକୁ ଭାଙ୍ଗି ଦେବାପାଇଁ ମଧ୍ୟ ଶ୍ରୀ ପଟ୍ଟନାୟକଙ୍କର ଦୁଇ ସହକର୍ମୀଙ୍କ ଅର୍ଥଲୋଲୁପତାର ସୁଯୋଗ ନେଇ ସେମାନଙ୍କୁ ଥୋପ ପକାଇ ଧରିଛନ୍ତି ଓ ସେମାନେ ୧୬।୭।୨୦୧୮ ତାରିଖରେ କଳା ପତାକା ଅଭିଯାନରୁ ଓହରିଯାଇ ଏହି ଭୁଲ ସଂଶୋଧଙଗୁଡ଼ିକ ସପକ୍ଷରେ ପ୍ରଚାର କରିବାରେ ଲାଗିଛନ୍ତି ।

ପରିସ୍ଥିତି ଏପରି ଥିବା ବେଳେ ଓଡ଼ିଶାର ଶ୍ରେଷ୍ଠ ସାହିତ୍ୟପ୍ରହରୀ , ଗବେଷକ ସାମ୍ବାଦିକ ଡ॰ଅସିତ ମହାନ୍ତି ଦୈନିକ ସମ୍ବାଦରେ ତାଙ୍କ ଜନପ୍ରିୟ ସ୍ତମ୍ଭ ‘ସାହିତ୍ୟିକ ପାଣିପାଗ’ରେ ଏହି ସ୍ପର୍ଶକାତର ପ୍ରସଙ୍ଗରେ ଏକ ନିବନ୍ଧ ପ୍ରକାଶ କରିଛନ୍ତି, ଯହିଁରେ ସେ ମଧ୍ୟ କହିଛନ୍ତି ଯେ, ଓଡ଼ିଶା ସରକାରୀ ଭାଷା (ସଂଶୋଧନ) ନିଯମାବଳୀର ଉପଯୋଗୀତା ସଂଶୟାଛନ୍ନ । ନିବନ୍ଧଟିର ଐତିହାସିକ ମୂଲ୍ୟ ଦୃଷ୍ଟିରୁ ଆମେ ତାହାକୁ ଏଠାରେ ଏକ ସାର୍ବଜନୀନ ଦସ୍ତାବିଜ ଭାବେ ସ୍ଥାନିତ କରୁଛୁ ।

ଓଡ଼ିଆରେ ଓଡ଼ିଶାର ପରିଚାଳନା ପାଇଁ ଚାଲିଥିବା କଳାପତାକା ଅଭିଯାନ ଆଜି ତିନିବର୍ଷ ଟପିଲା । ଏହି ଉଲଲକ୍ଷେ ଭାଷା ଆନ୍ଦୋଳନ ପକ୍ଷରୁ ପ୍ରକାଶିତ ବୈଦ୍ୟୁତିକ ପୁସ୍ତକ (e-book) – ଆମ ଭାଷା ପାଇଁ ଆମ ଲଢ଼େଇ – ବିଶ୍ବାର୍ପିତ ହୋଇଥିବାବେଳେ ‘ସଙ୍କଟାବର୍ତ୍ତରେ ଓଡିଶା ସରକାରୀ ଭାଷା ଆଇନ’ ଶୀର୍ଷକ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଏଥିରେ ମୁଖ୍ୟବକ୍ତା ଭାବେ ଯୋଗ ଦେଇ ଗବେଷକ ଓ ସାମ୍ବାଦିକ ଡକ୍ଟର ଅସିତ ମହାନ୍ତି କହିଥିଲେ ଓଡ଼ିଶା ସରକାରୀ ଭାଷା ଆଇନ କ୍ଷେତ୍ରରେ ସରକାରୀ ପ୍ରବଞ୍ଚନା ଆଜିକୁ ଶହେ ବର୍ଷ ତଳେ ଏହି ଦିନ (୧୩ ଏପ୍ରିଲ) ବିଦେଶୀ ଇଂରାଜ ବାହିନୀ ଘଟାଇଥିବା ଜାଲିଆନାଵାଲାବାଗ୍ ଗଣହତ୍ୟା ଠାରୁ କମ୍ ନୁହେଁ । ତାଙ୍କ ଭାବନାର ଲିଖିତ ରୂପ ଭାଷା ଆନ୍ଦୋଳନ ପକ୍ଷରୁ ପ୍ରକାଶିତ ହୋଇଛି । ଭାଷା ଆନ୍ଦୋଳନର ଏକ ସହାୟକ ସାହିତ୍ଯ ରୂପେ ତାହା scribd.com ପୃଷ୍ଠାରୁ ନିମ୍ନରେ ସ୍ଥାନିତ ହେଲା ।

Dr. Asit Mohanty on Bhasha Andolan, Orissa by Subhas Chandra Pattanayak on Scribd

ଓଡ଼ିଶାର ଅନ୍ୟତମ ସୁଯୋଗ୍ୟ ସାମ୍ବାଦିକ ଶ୍ରୀ ସମ୍ପଦ ମହାପାତ୍ରଙ୍କ ସମ୍ପାଦନାରେ ପ୍ରକାଶ ପାଉଥିବା ଦୈନିକ ‘ନିତିଦିନ’ ସୁବିଦିତ ବ୍ୟକ୍ତିମାନଙ୍କୁ ତାର ‘ବ୍ୟକ୍ତିତ୍ବ’ ପୃଷ୍ଠାରେ ସ୍ଥାନିତ କରି ଆସିଛି ∣ ଏହି ପୃଷ୍ଠା ଏଥର ମଣ୍ଡନ କରିଛନ୍ତି ବିଶିଷ୍ଟ ସାମ୍ବାଦିକ ଓ ସମାଲୋଚକ ଅସିତ ମହାନ୍ତି ∣

ଓଡିଶା ସାହିତ୍ୟ ଏକାଡେମୀରେ ଲାଗିରହିଥିବା ଅବ୍ୟବସ୍ଥା ଉପରେ ଦୃଷ୍ଟି ଆକର୍ଷିତ ହେବାରୁ ସେ କହିଛନ୍ତି , “ଯେଉଁମାନେ (ଏହାର) ସଭାପତି, ସମ୍ପାଦକ, କର୍ମକର୍ତ୍ତା – ସେମାନେ (ନିଜ ପଦବୀକୁ) ଚାକିରି ପରି ନଭାବି ଏକାଡେମୀକୁ ଯଦି ଘର ବୋଲି ଭାବିବେ , ତେବେ ସବୁ ସମସ୍ୟାର ସମାଧାନ ହୋଇଯିବ”

ଭାଷା ଆନ୍ଦୋଳନର କଳାପତାକା ଅଭିଯାନ କେବଳ ‘ଓଡ଼ିଆରେ ଓଡ଼ିଶାର ସଞ୍ଚାଳନ ଓ ତହିଁର ଖିଲାପକାରୀକୁ ଦଣ୍ଡବିଧାନ’ ପାଇଁ ଉଦ୍ଦିଷ୍ଟ, ତା ନୁହେଁ, ଓଡ଼ିଆ ଭାଷା ଓ ସାହିତ୍ୟର ଗାରିମା ରକ୍ଷା ଓ ବିକାଶ ପାଇଁ ବି ଅଭିପ୍ରେତ ∣ ଏହି ଅଭିଯାନ ପ୍ରତି ଅସିତ ବାବୁଙ୍କ ଅବଦାନ ପ୍ରାଣପୂର୍ତ୍ତ ଭାଷା ପ୍ରେମରେ ଭରା ∣ ତେଣୁ ଆନ୍ଦୋଳନର ସବୁ ସାଥୀଙ୍କ ପାଇଁ ‘ନିତିଦିନ’କୁ ସେ ଦେଇଥିବା ସାକ୍ଷାତ୍କାର ଏଠାରେ ସ୍ଥାନିତ ହେଉଅଛି ∣ (ଭାଷା ଆନ୍ଦୋଳନ, ଓଡିଶା)

ଓଡ଼ିଆର ଶାସ୍ତ୍ରୀୟ ମାନ୍ୟତା: ଅସଲ ବିଚାରକଙ୍କ ଚିଠି, ଯାହାକୁ ଚାପିଦେଇ ଇତିହାସକୁ କରାଯାଇଛି ପଥହୁଡା

ସୁଭାଷ ଚନ୍ଦ୍ର ପଟ୍ଟନାୟକ

ବିଶିଷ୍ଟ ସାମ୍ବାଦିକ ଓ ଗବେଷକ ଶ୍ରୀଯୁକ୍ତ ଅସିତ ମହାନ୍ତିଙ୍କ ଏକ ଆଲୋକବର୍ଷୀ ଆଲୋଚନା (ସମ୍ବାଦ, 19 . 10 . 2017) ପ୍ରଥମଥର ପାଇଁ ଓଡ଼ିଶାବାସୀଙ୍କୁ ଅବଗତ କରାଇଲା କି, ଆମ ଭାଷାର ଶାସ୍ତ୍ରୀୟ ମାନ୍ୟତା ପାଇଁ ଡ଼. ଦେବୀ ପ୍ରସନ୍ନ ପଟ୍ଟନାୟକ ଯେଉଁ ଏକଚାଟିଆ ଶ୍ରେୟ ହାସଲ କରିଛନ୍ତି ତାହା ଇତିହାସକୁ ପଥହୁଡା କରୁଛି ∣ ଶାସ୍ତ୍ରୀୟ ମାନ୍ୟତା ପାଇଁ ଅସଲ ବିଚାରକ ଥିବା ଭାଷା ବିଶାରଦ ପ୍ରଫେସର ପ୍ରକାଶ ଚନ୍ଦ୍ର ପଟ୍ଟନାୟକ ଦେବୀ ବାବୁଙ୍କ ପ୍ରତିବେଦନରେ ଆଦୌ ସ୍ଥାନିତ ହୋଇନଥିବା ରହସ୍ୟଜନକ ମନେହେଲା ∣ ଯେହେତୁ ଘଟଣାଟି ଉପରେ ମୁଁ ସବିଶେଷ ଗବେଷଣା କରିଛି, ଏବଂ ଅସିତ ବାବୁଙ୍କ ସୂଚନା ଲାଗିଲା ସମ୍ପୂର୍ଣ ପ୍ରାସଙ୍ଗିକ, ସେହେତୁ ପ୍ରଫେସର ପଟ୍ଟନାୟକଙ୍କ ସହ ମୁଁ ସମ୍ପର୍କ ସ୍ଥାପନ କଲି ∣ ସେ ମୋତେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ତାଙ୍କ ନାମରେ ହିଁ ଦେଇଥିବା ଏକ ପତ୍ରର ନକଲ ଦେଇଛନ୍ତି, ଯାହା ଶାସ୍ତ୍ରୀୟ ମାନ୍ୟତା ବ୍ୟାପାରରେ ଘଟିଥିବା ଇଛାକୃତ ଅବୈଧତା ଉପରେ ଆଲୋକପାତ କରେ ∣ ଚାପି ହୋଇ ରହିଥିବା ଅବୈଧତାର ଉପଯୁକ୍ତ ତଦନ୍ତ କରି ଯେଉଁ ସତ୍ୟ ଲୁଚି ରହିଛି ତାହାକୁ ପଦାକୁ ଆଣିବା ପାଇଁ ଏବଂ ସରକାରୀ ସନ୍ଦର୍ଭଟି ଉପରୁ ସତ୍ତ୍ଵାଧିକାର ସଙ୍କଟ ଅପସାରଣ ପାଇଁ ସେ ଏହି ଚିଠିରେ ମୁଖ୍ୟମନ୍ତ୍ରୀଙ୍କୁ ଲିଖିତ ପରାମର୍ଶ ଦେଇଥିଲେ ∣

ଏହି ଐତିହାସିକ ଚିଠି, ଯାହାକୁ ମୁଖ୍ୟମନ୍ତ୍ରୀଙ୍କ ଦପ୍ତରରେ ଚାପିଦେଇ ଶାସ୍ତ୍ରୀୟ ମାନ୍ୟତା ଇତିହାସକୁ ଭାଷା ମାଫିଆଙ୍କ ମର୍ଜୀ ଅନୁସାରେ ବାଟବଣା କରାଯାଇଛି, ତାହା ପ୍ରଫେସର ପଟ୍ଟନାୟକଙ୍କ ଠାରୁ ପାଇ, ଆମ ଭାଷା ଇତିହାସର ସଠିକତା ପାଇଁ ଏଠାରେ ଆମେ ଉପସ୍ଥାପନା କରୁଛୁ :-