ନିଉଜସିଣ୍ଡିକେଟ
ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଭାଷାରେ ଏହି ଅନନ୍ୟ ଆନ୍ଦୋଳନର ଜୀବନରେ ଜୁଲାଇ ୧୭ ଏପରି ଏକ ଦିନ, ଯାହା ଅଶେଷ ଗୁରୁତ୍ଵ ବହନ କରେ । ଆଜକୁ ବର୍ଷକ ତଳେ, ୨୦୧୮ର ଜୁଲାଇ ୧୬ ତାରିଖ ସନ୍ଧ୍ୟାରେ ସରକାରଙ୍କ ଦ୍ଵାରା ନିଯୁକ୍ତ ସୁପାରି ଘାତକମାନେ ଭାଷା ଆନ୍ଦୋଳନକୁ ଛୁରୀ ମାରି ମୃତପ୍ରାୟ କରିଦେଇଥିଲେ; କିନ୍ତୁ ଓଡିଆ ଜାତି ତା ଭାଷା ଜନନୀ ପାଇଁ ଅଣ୍ଟା ଭିଡ଼ି ଠିଆହେଲା ଜୁଲାଇ ୧୭ରେ । ଏବଂ ଓଡ଼ିଆ ଜାତିର ଭାଷା ଅଧିକାର ପାଇଁ ଚାଲିଥିବା ଏହି ଆନ୍ଦୋଳନ ଗ୍ରହମୁକ୍ତ ହୋଇଗଲା । ସରକାର ପୁଣି କିଛି ଛଦ୍ମ ଘାତକ ପଠାଇଥିଲେ । କିନ୍ତୁ ସେମାନେ ପାରିଲେନି । ଆପେ ଆପେ ପଳାଇଲେ । ତେଣୁ ଜୁଲାଇ ୧୭ ହେଉଛି ଗ୍ରହମୁକ୍ତ ଭାଷା ଆଂଦୋଳନର ଜନ୍ମ ଦିବସ । ଏହି ଦିବସର ପ୍ରଥମ ବର୍ଷ ପୂରଣୀ ଅବସରରେ ଭାଷା ଆନ୍ଦୋଳନର ସଭାପତିମଣ୍ଡଳୀ ଦ୍ଵାରା ଆହୁତ ହୋଇ ଓଡ଼ିଶାର ବିଭିନ୍ନ ପ୍ରାନ୍ତରୁ ଭାଷାପ୍ରେମୀମାନେ ଭୁବନେଶ୍ବରସ୍ଥ ଲୋହିଆ ଏକାଡେମୀ ସମ୍ମିଳନୀ କକ୍ଷରେ ଜୁଲାଇ ୧୭ ତାରିଖରେ ସମବେତ ହୋଇ ଓଡ଼ିଶା ସରକାରୀ ଭାଷା ଆଇନର ସମ୍ପୂର୍ଣ ତ୍ରୁଟିଶୂନ୍ୟ କାର୍ଯ୍ୟକାରୀତା ପାଇଁ ସର୍ବସମ୍ମତିକ୍ରମେ ୪ଟି ପ୍ରସ୍ତାବ ଗ୍ରହଣ କରିଛନ୍ତି ଯାହା ଏଥିପୂର୍ବରୁ ପ୍ରକାଶିତ ହୋଇଛି । ଏହି ସମ୍ମିଳନୀରେ ଯୋଗ ଦେଇ ନିଜ ନିଜ ଅଭିମତ ବଳରେ ଏହାକୁ ସାର୍ଥକ କରିଥିବା ମାତୃଭାଷାପ୍ରେମୀମାନେ ହେଲେ –
(ଅଶୋକ ପରିଡ଼ା), 
(ଭୁବନମୋହନ ମହାନ୍ତି), 
(ଦେବୀପ୍ରସନ୍ନ ନାୟକ), 
(ଗିରିଜକାନ୍ତ ମିଶ୍ର), 
(କମଳଲୋଚନ ନାୟକ),
(ପ୍ରଦୀପ୍ତ ନାୟକ), 
(ଲିଙ୍ଗରାଜ ସ୍ଵାଇଁ), 
(ରାମାଶଙ୍କର),
(ସାରଦା ପ୍ରସାଦ ମହାପାତ୍ର),
(ତୁଷାରକାନ୍ତ ଶତପଥୀ) ।
ଓଡ଼ିଶା ସରକାରୀ ଭାଷା ଆଇନ,୧୯୫୪ର କାର୍ଯ୍ୟକାରୀତା ପାଇଁ ୨୦୧୫ରେ ଗଠିତ ମନ୍ତ୍ରୀସ୍ତରୀୟ କମିଟିର ସଦସ୍ୟ ଭାବେ ଶ୍ରୀ ପଟ୍ଟନାୟକ ଦୁଇଟି ନିର୍ଦ୍ଦିଷ୍ଟ ପ୍ରସ୍ତାବ ରଖିଥିଲେ । ଆଇନଟିର ଉଲ୍ଲଂଘନକାରୀକୁ ଦଣ୍ଡବିଧାନ ବ୍ୟବସ୍ଥା ନଥିବାରୁ ଇଂରାଜିମନସ୍କ କର୍ମଚାରୀମାନେ ଓଡ଼ିଆରେ କାମ କରୁନାହାନ୍ତି ଓ ଏହି ବ୍ୟବସ୍ଥା ନ ହେଲା ଯାଏଁ ଏହି ସମସ୍ୟାର ଅନ୍ତ ଘଟିବ ନାହିଁ ବୋଲି ନିରୂପଣ କରି ସେ ଏହି ବ୍ୟବସ୍ଥା ସହ ଆଇନଟିର ସମ୍ପୂର୍ଣ କାର୍ଯ୍ୟକାରୀତା ପାଇଁ ୧୧ଟି ନିୟମ ସମ୍ବଳିତ ଏକ ନିଯମାବଳୀ ଦେଇଥିଲେ ଓ ମୂଳ ଆଇନରେ ନିଯମାବଳୀ ପ୍ରଣୟନର କ୍ଷମତା ସରକାରଙ୍କକୁ ପ୍ରଦତ୍ତ ହୋଇନଥିବାରୁ ଆଇନ ସଂଶୋଧନ ଦ୍ଵାରା ଏହି ତ୍ରୁଟି ସୁଧାରିବାକୁ ତହିଁର ଚିଠା ମଧ୍ୟ ଦେଇଥିଲେ । ଏହି ପରାମର୍ଶ ଅନୁସାରେ ୨୦୧୬ରେ ଆଇନ ସଂଶୋଧନ କରି ନିଯମାବଳୀ ପ୍ରଣୟନର କ୍ଷମତା ସରକାର ପ୍ରାପ୍ତ ହୋଇଛନ୍ତି । କିନ୍ତୁ ନିଯମାବଳୀ ପ୍ରଣଯନ କ୍ଷେତ୍ରରେ ସୁଭାଷବାବୁଙ୍କ ପ୍ରଦତ୍ତ ପରାମର୍ଶ ଓ ଚିଠା ସରକାରଙ୍କୁ ଅଡୁଆରେ ପକାଇଛି । ଭାଷା ପାଇଁ ଗଠିତ ସ୍ଵତନ୍ତ୍ର ୱେବ ସାଇଟରେ ସ୍ଥାନିତ ହୋଇଥିବା ଶ୍ରୀ ପଟ୍ଟନାୟକଙ୍କ ପ୍ରସ୍ତାବିତ ବିଧାନକୁ ସରକାର ଲୁଚେଇ ଦେବା ମତଲବରେ ୱେବ ସାଇଟଟିକୁ ସର୍ବସାଧାରଣଙ୍କ ପାଇଁ ନିଷିଦ୍ଧ କରିଥିବା ବେଳେ ଶ୍ରୀ ପଟ୍ଟନାୟକଙ୍କ ଦୁଇଜଣ ମୂଳ ସହଯୋଗୀ ପ୍ରଦ୍ୟୁମ୍ନ ଶତପଥୀ ଓ ପବିତ୍ର ମହାରଥାଙ୍କୁ ସେମାନଙ୍କ ଆର୍ଥିକ ଅସାଧୁତାର ଉପଯୋଗ କରି ପୋଷାମନେଇଛନ୍ତି ଓ ୨୦୧୮ରେ ଆଇନଟିର ଅନାବଶ୍ୟକ ସଂଶୋଧନ କରି ସୁଭାଷବାବୁ ଦେଇଥିବା ବିଧାନକୁ ବିଧିଭୁକ୍ତ ନକରିବା ପାଇଁ ପଦକ୍ଷେପ ନେଇଛନ୍ତି । ଉପରୋକ୍ତ ଦୁଇ ସରକାରୀ ପୋଷାମନା ଖଳନାୟକ ଆଇନଟି ଠିକ ଭାବେ ସଂଶୋଧନ ହୋଇସାରିଛି ବୋଲି ଲୋକଙ୍କୁ ମିଛ କହି ଓଡ଼ିଆଦ୍ରୋହୀ ସରକାରଙ୍କୁ ଘଣ୍ଟାଘୋଡାଉଛନ୍ତି ଓ ସେମାନେ ସୁଭାଷବାବୁଙ୍କ ଘନିଷ୍ଠ ସହକର୍ମୀ ଭାବେ ସାଧାରଣରେ ପରିଚିତ ହୋଇଥିବା ହେତୁ ଲୋକେ ବିଭ୍ରାନ୍ତିରେ ପଡ଼ୁଛନ୍ତି । ତେଣୁ ଲୋକଙ୍କ ସମ୍ମୁଖରେ ସମସ୍ତ ତଥ୍ୟ ରଖିବା ପାଇଁ ଓ ଏପରି ବିଷମ ସ୍ଥିତିରେ କର୍ତ୍ତବ୍ୟ ନିରୂପଣ ପାଇଁ ଏ ପର୍ଯ୍ୟନ୍ତ କଳାପତାକା ଅଭିଯାନରେ ଅଂଶ ଗ୍ରହଣ କରିଥିବା ମାତୃଭାଷାପ୍ରେମୀଙ୍କୁ ସାମାଜିକ ଗଣମାଧ୍ୟମରେ ଖୋଲା ନିମନ୍ତ୍ରଣ ଦେଇ ଏହି ସମ୍ମିଳନୀ ଅନୁଷ୍ଠିତ ହୋଇଥିଲା । ତହିଁରେ ଶ୍ରୀ ପଟ୍ଟନାୟକ ରଖିଥିବା ଭିତ୍ତି-ଭାଷଣ ଓଡ଼ିଆ ଭାଷା ଇତିହାସର ସଠିକ ଅବଲୋକନ ପାଇଁ ଅତ୍ୟନ୍ତ ଗୁରୁତ୍ବପୂର୍ଣ ହୋଇଥିବା ହେତୁ ତାହା ତଳେ ଅବିକଳ ପ୍ରଦତ୍ତ ହେଲା ।
