Category: Opinions

ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ : ମୁଖ୍ୟମନ୍ତ୍ରୀ ସଫେଇ ରଖନ୍ତୁ – ପଞ୍ଚବିଂଶ ଭାଗ

ସୁଭାଷ ଚନ୍ଦ୍ର ପଟ୍ଟନାୟକ 

ପ୍ରଦ୍ୟୁମ୍ନ ଶତପଥିଙ୍କ ଘନିଷ୍ଠ ବନ୍ଧୁ ବାବୁ ନିରଞ୍ଜନ ସାହୁ ଉଚ୍ଚ ଶିକ୍ଷା ନିର୍ଦ୍ଦେଶକ ଭାବେ ଯୋଗ ଦେବା ପୂର୍ବରୁ ଯେହେତୁ ମୁଖ୍ୟମନ୍ତ୍ରୀଙ୍କ ଅତିରିକ୍ତ ସଚିବ ଥିଲେ, ସେହେତୁ ଶ୍ରୀମତୀ ମାନସୀ ଷଡଙ୍ଗୀଙ୍କ ଚାକିରି ନିୟମିତିକରଣ ପାଇଁ ମୁଖ୍ୟମନ୍ତ୍ରୀଙ୍କ ଅନୁକୂଳ ମନୋଭାବ ସମ୍ପର୍କରେ ସେ ସମ୍ପୂର୍ଣ ଅବଗତ ଥିଲେ । ମାତ୍ର ନଥିରେ ଯେଉଁ ସମସ୍ତ ଦସ୍ତାବିଜ ଥିଲା, ଯେଉଁ ସମସ୍ତ ଟିପ୍ପଣୀ ଲିପିବଦ୍ଧ ହୋଇଥିଲା, ସେ ସବୁଗୁଡ଼ିକ ଶ୍ରୀମତୀ ଷଡଙ୍ଗୀଙ୍କ ଦାୟିତ୍ଵହୀନ ଅନୁପସ୍ଥିତି ପ୍ରତି ଅଙ୍ଗୁଳି ନିର୍ଦ୍ଦେଶ କରୁଥିଲା । ଏପରିକି, ୨୧.୧୨.୨୦୧୮ ତଥା ୨୪.୧୨.୨୦୧୮ ତାରିଖମାନଙ୍କରେ ଦୀର୍ଘ ୧୦ ବର୍ଷ ବ୍ୟାପୀ ତାଙ୍କ ଅନୁପସ୍ଥିତି ସମ୍ପର୍କରେ ଅନୁଷ୍ଠିତ ହୋଇଥିବା ତଦନ୍ତରେ ଅଂଶଗ୍ରହଣ କରି ସେ ନିଜେ ଦର୍ଶାଇଥିଲେ ଯେ, ସ୍ୱାସ୍ଥ୍ୟଗତ କାରଣରୁ ଅନୁପସ୍ଥିତ ଥିଲେ ଓ ନିଜ ଅସୁସ୍ଥତାର ପ୍ରମାଣ ସ୍ୱରୂପ କେତେକ ଔଷଧ-ବରାଦପତ୍ର (prescription) ଦେଖାଇଥିଲେ ଯାହାର କୌଣସି ପ୍ରତ୍ୟୟମାନ୍ୟତା ନଥିଲା । ଶ୍ରୀମତୀ ଷଡଙ୍ଗୀଙ୍କ ଏହି ବୟାନ ସ୍ପଷ୍ଟ କରିଦେଇଥିଲା କି, ସେ ଅନୁପସ୍ଥିତ ନଥିଲେ, ବରଂ ତାଙ୍କୁ ଅନୁପସ୍ଥିତ ରଖାଯାଇଥିଲା ବୋଲି ସରକାରୀ ନିର୍ଦ୍ଧାରଣ ଥିଲା ଭିତ୍ତିହୀନ ଓ ପ୍ରମାଦପୂର୍ଣ । ଏପରି ସ୍ଥଳେ ତାଙ୍କ ପୂର୍ବବର୍ତ୍ତୀ ନିର୍ଦ୍ଦେଶକଙ୍କ ୧୪.୨.୨୦୧୯ ତାରିଖର ତଦନ୍ତ ରିପୋର୍ଟକୁ ବଦଳାଇବା ପ୍ରଦ୍ୟୁମ୍ନ ଶତପଥିଙ୍କ ବନ୍ଧୁ ହୋଇଥିଲେ ବି ନିରଞ୍ଜନ ସାହୁଙ୍କ ପରି ଜଣେ ଅଭିଜ୍ଞ ପ୍ରଶାସକଙ୍କ ପାଇଁ ଥିଲା ଏକ ବିଷମ ସମସ୍ୟା । ସେ କିଂକର୍ତ୍ତବ୍ୟବିମୂଢ ହୋଇ ପଡ଼ିଥିଲେ ।

ହାଇକୋର୍ଟ ଆଦେଶ ଓ ମାନସୀ ଷଡଙ୍ଗୀ

ବାବୁ ନିରଞ୍ଜନ ସାହୁ ଉଚ୍ଚ ଶିକ୍ଷା ନିର୍ଦ୍ଦେଶକ ହେବାର ଦୁଇ ମାସ ପୂର୍ବରୁ ମାନ୍ୟବର ଓଡ଼ିଶା ହାଇକୋର୍ଟ ମାନସୀ ଷଡଙ୍ଗୀଙ୍କ ରିଟ୍ ମାମଲାର ଫଇସଲା କରି ୩.୪.୨୦୧୯ ତାରିଖରେ କହିଥିଲେ ଯେ, ୩ ମାସ ଭିତରେ ଅର୍ଥାତ୍ ୩.୭.୨୦୧୯ ଭିତରେ ରାଜ୍ୟ ସରକାର ତାଙ୍କ ପ୍ରାର୍ଥନା ଉପରେ ବିହିତ ଆଦେଶ ପ୍ରଦାନ କରିବେ । ଏ ସମୟ ସରିଗଲା ପଛେ, ନୂଆ ନିର୍ଦ୍ଦେଶକ ପୁରୁଣା ନିର୍ଦ୍ଦେଶକଙ୍କ ୧୪.୨.୨୦୧୯ ତାରିଖର ନିର୍ଦ୍ଧାରଣକୁ ବଦଳାଇ ପାରିଲେ ନାହିଁ । ଅଥଚ, ଅର୍ଥ ଲୋଭ ହେତୁ ହାଇ କୋର୍ଟକୁ ଯାଇଥିବା ମାନସୀ ଷଡଙ୍ଗୀ କୋର୍ଟଙ୍କୁ କହିଲେ ନାହିଁ କି, ସରକାର ତାଙ୍କ ଆଦେଶର ଅବମାନନା କରିଛନ୍ତି । ସତେ ଯେମିତି ଅଜାଗା ଘା ଦେଖି ହେଉ ନଥିଲା କି ଦେଖାଇ ହେଉନଥିଲା !

ଆଶା ବିରୁଦ୍ଧରେ ଆଶା ନେଇ ମାନସୀ ଷଡଙ୍ଗୀ ଓ ଉଚ୍ଚ ଶିକ୍ଷା ବିଭାଗ ଅପେକ୍ଷା କରିରହିଥିଲେ ନିରଞ୍ଜନ ସାହୁଙ୍କ ରିପୋର୍ଟକୁ ।

ହାଇ କୋର୍ଟ ଆଦେଶ ଦେବାର ୩ ମାସ ୧୮ ଦିନ ଅତିବାହିତ ହେଲା । ତଥାପି ପ୍ରଦ୍ୟୁମ୍ନ ଶତପଥିଙ୍କ ଘନିଷ୍ଠ ବନ୍ଧୁ ନିରଞ୍ଜନ ସାହୁ କହିଲେ ନାହିଁ ଯେ, ମାନସୀ ଷଡଙ୍ଗୀଙ୍କ ଅନୁପସ୍ଥିତି ଇଚ୍ଛାକୃତ ନଥିଲା । ଫଳରେ ହାଇ କୋର୍ଟଙ୍କ ଆଦେଶକୁ ନିର୍ଦ୍ଦିଷ୍ଟ ୩ ମାସ ମଧ୍ୟରେ କାର୍ଯ୍ୟକାରୀ ନ କରି, ହାତ ଛନ୍ଦି ବସିରହିଥିଲା ଉଚ୍ଚ ଶିକ୍ଷା ବିଭାଗ । ସତ କହିଲେ ନିଧଡ଼କ ବସିଥିଲା । କାରଣ, ଏହା ଜାଣିଥିଲା ଯେ, ନିଜର ବୃହତ୍ତର ସ୍ଵାର୍ଥ ଦୃଷ୍ଟିରୁ ମାନସୀ ଏହି ବିଳମ୍ବ ବିରୁଦ୍ଧରେ ହାଇ କୋର୍ଟକୁ ଯିବେନାହିଁ । ଏବଂ ମାନସୀ ଷଡଙ୍ଗୀ ହାଇ କୋର୍ଟରେ କୋର୍ଟ ଅବମାନନା ମାମଲା ଦାଏର ନ କଲେ , କୋର୍ଟ ଆଦେଶ ଉପରେ ମହାପାତ୍ର-ମିଶ୍ର-ବାଳକୃଷ୍ଣାନ ଗ୍ୟାଙ୍ଗ ପରିସ୍ରା କଲେ ମଧ୍ୟ କୋର୍ଟ ତାହା ଜାଣିବ ନାହିଁ । ଯାହାଙ୍କ ପାଇଁ କୋର୍ଟଙ୍କ ଆଦେଶ ସେ ଯଦି ସେହି ଆଦେଶର ଅବମାନନା ବିରୁଦ୍ଧରେ କୋର୍ଟକୁ କିଛି ନ କହନ୍ତି , କୋର୍ଟ ବା କା’ଣ କରିବେ?

ରାଜ୍ୟପାଳଙ୍କ ହସ୍ତକ୍ଷେପ

ଭାଷା ଆନ୍ଦୋଳନକୁ ଭାଙ୍ଗିବା ସର୍ତ୍ତରେ ପ୍ରଦ୍ୟୁମ୍ନ ଶତପଥିଙ୍କ ସ୍ତ୍ରୀଙ୍କୁ ଚାକିରି ଓ ୧୦ ବର୍ଷର ଛୁଟି ମଞ୍ଜୁର କରିବାକୁ ମୁଖ୍ୟମନ୍ତ୍ରୀ ଯଦି ପ୍ରତିଶ୍ରୁତି ନଦେଇଥାନ୍ତେ, ତେବେ ଶାସନକଳ ଯେତେ ସବୁ ବେଆଇନ କାମ କରିଗଲା ତାହା ହୁଏତ କରିନଥାନ୍ତା । ତେଣୁ ଭାଷା ଆନ୍ଦୋଳନର ପ୍ରତିଷ୍ଠାତା ଭାବେ ଏ ସମସ୍ତ କଥା ରାଜ୍ୟପାଳଙ୍କୁ ଅବଗତ କରାଇବା ଥିଲା ମୋର ନୈତିକ କର୍ତ୍ତବ୍ୟ । ମୁଁ ସେ କର୍ତ୍ତବ୍ୟ କଲି । ଏବଂ ଏଥିପାଇଁ ୨୨.୭.୨୦୧୯ରେ ରାଜ୍ୟପାଳଙ୍କୁ ଏକ ସ୍ମାରକପତ୍ର ଦେଇ ଏହି ବେଆଇନ କର୍ମ ଉପରେ କାର୍ଯ୍ୟାନୁଷ୍ଠାନ ପାଇଁ ମୁଁ ଅନୁରୋଧ କଲି । ତହିଁର ପ୍ରାଥମିକ ଅନୁଶୀଳନ ପରେ ୨.୮.୨୦୧୯ରେ ମାନ୍ୟବର ରାଜ୍ୟପାଳ ଉଚ୍ଚ ଶିକ୍ଷା ସଚିବଙ୍କୁ ମୋ ସ୍ମାରକପତ୍ର ଉପରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ କରି ତହିଁର ରିପୋର୍ଟ (action taken report) ମୋ ପାଖକୁ ପଠାଇବାକୁ ଆଦେଶ ଦେଲେ (ରାଜ୍ୟପାଳଙ୍କ ଆଦେଶ ୯୯୪୬ ତା ୨.୮.୨୦୧୯ ) ।

ମାନସୀଙ୍କ ସାହାଯ୍ୟକାରୀଙ୍କୁ ପଦୋନ୍ନତି

ରାଜ୍ୟପାଳଙ୍କ ଏହି ଆଦେଶ ଉଚ୍ଚ ଶିକ୍ଷା ସଚିବଙ୍କ ଉପରେ କୌଣସି କାର୍ଯ୍ୟକାରୀ ପ୍ରଭାବ ପକାଇଲାନାହିଁ । ପରିସ୍ଥିତି ତାହା ହିଁ ଥିଲା ।

କାର୍ଯ୍ୟତଃ ରଦ୍ଦ (de facto qushed) ହୋଇସାରିଥିବା ମାନସୀ ଷଡଙ୍ଗୀଙ୍କ ନିଯୁକ୍ତିରେ ସେ ପୁନଶ୍ଚ ଯୋଗଦେବା ପାଇଁ ନଥି ସଜାଡ଼ିଥିବା ଅନୁଶାସନସଚିବ ସୂର୍ଯ୍ୟନାରାୟଣ ମହାପାତ୍ରଙ୍କୁ ଦଣ୍ଡିତ କରିବା ପରିବର୍ତ୍ତେ ସରକାର ଉପଶାସନସଚିବ ପଦକୁ ପଦୋନ୍ନତି ଦେଇ ସେହି ଏକା ଉଚ୍ଚ ଶିକ୍ଷା ବିଭାଗରେ ରଖିଥାନ୍ତି (ବିଜ୍ଞପ୍ତି ସଂଖ୍ୟା ୨୦୦୦୬ ତା ୨୨.୫.୨୦୧୯) । ଏତଦ୍ଦ୍ଵାରା ଶିକ୍ଷା ସଚିବ ଏହି ବାର୍ତ୍ତା ପାଇଥାନ୍ତି ଯେ, ଭାଷା ଆନ୍ଦୋଳନକୁ ଛୁରୀ ମାରିଥିବା ପ୍ରଦ୍ୟୁମ୍ନ ଶତପଥିଙ୍କ ସ୍ତ୍ରୀଙ୍କୁ ସାହାଯ୍ୟ କରିବା ହିଁ ନବୀନବାବୁଙ୍କ ରାଜୁତିରେ ଅଧିକ ଲାଭଦାୟକ । ତା ନହୋଇଥିଲେ, ରାଜ୍ୟପାଳଙ୍କ ଆଦେଶ ସିଧାସଳଖ ତାଙ୍କୁ ସମ୍ବୋଧିତ ହୋଇଥିବା ବେଳେ ତହିଁ ଉପରେ ଶୋଇରହିବାକୁ ସେ ସାହସ କରିନଥାନ୍ତେ ।

ଅତର୍ଛ ଆଦେଶ

ଅନନ୍ୟୋପାୟ ହୋଇ ସୂଚନା ଅଧିକାର ପ୍ରୟୋଗ କରି ମୁଁ ୧୧.୯.୨୦୧୯ ତାରିଖରେ ଦୁଇଟି ନିର୍ଦ୍ଦିଷ୍ଟ ତଥ୍ୟ ଲୋଡ଼ିଲି :- (୧) ରାଜ୍ୟପାଳଙ୍କ ଉପରୋକ୍ତ ଆଦେଶ ଉପରେ ଯଦି କୌଣସି କାର୍ଯ୍ୟାନୁଷ୍ଠାନ ହୋଇଥାଏ , ତାର ନଥିଟିପ୍ପଣୀ ଓ ବିବରଣୀର ନକଲ ଏବଂ (୨) ଉଚ୍ଚ ଶିକ୍ଷା ନିର୍ଦ୍ଦେଶକ ୧୪.୨.୨୦୧୯ ତାରିଖରେ ମାନସୀ ଷଡଙ୍ଗୀଙ୍କ ଦୀର୍ଘ ଅନୁପସ୍ଥିତି ସମ୍ପର୍କରେ ଦେଇଥିବା ତଦନ୍ତ ରିପୋର୍ଟ ଉପରେ ସରକାର ଯଦି କିଛି ପଦକ୍ଷେପ ନେଇଥାନ୍ତି, ତାହାର ନଥି ଟିପ୍ପଣୀ ଓ ବିବରଣୀର ନକଲ । ଏହା ସଚିବଙ୍କ ଆଖିରୁ ନିଦ ହଜେଇଦେଲା । ସେ ଅତର୍ଛରେ ଆଦେଶ ଦେଲେ,

“The period of absence (of Smt. Manasi Sarangi) from 02.07.2008 to 23.07.2018 will be treated as breakage in service. She will not get any salary or consequential benefit for that period on the principle of no work no pay. This period shall not be counted for career advancement and pension.”

(କ୍ରମଶଃ)

ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ : ମୁଖ୍ୟମନ୍ତ୍ରୀ ସଫେଇ ରଖନ୍ତୁ – ଚତୁର୍ବିଂଶ ଭାଗ

ସୁଭାଷ ଚନ୍ଦ୍ର ପଟ୍ଟନାୟକ 

ଉଚ୍ଚ ଶିକ୍ଷା ନିର୍ଦ୍ଦେଶକଙ୍କୁ ନିଷ୍ପତ୍ତି ବଦଳାଇବାକୁ ସମ୍ପୃକ୍ତ ବିଭାଗର ଅତିରିକ୍ତ ଶାସନ ସଚିବ ୧.୩.୨୦୧୯ରେ ଚାପ ପ୍ରୟୋଗ କରିବା ମୂଳରେ ଅନ୍ୟତମ କାରଣ ଥିଲା ୪.୧୨.୨୦୧୮ରେ ଓଡ଼ିଶା ହାଇ କୋର୍ଟରେ ମାନସୀ ଷଡଙ୍ଗୀ ଦାଖଲ କରିଥିବା ରିଟ୍ ମାମଲା ।

ମହାପାତ୍ର-ମିଶ୍ର-ବାଳକୃଷ୍ଣାନ ଗ୍ୟାଙ୍ଗର ସଭ୍ୟମାନେ ଭଲଭାବେ ଜାଣିଥିଲେ ଯେ, ମୁଖ୍ୟମନ୍ତ୍ରୀ ଓ ମନ୍ତ୍ରୀଙ୍କ ଚାପ ନଥିଭୁକ୍ତ ହୋଇନଥିବା ହେତୁ କେବଳ ସେହିମାନଙ୍କ ନଥିଭୁକ୍ତ ଟିପ୍ପଣୀଗୁଡ଼ିକ ହିଁ କୋର୍ଟଙ୍କ ତର୍ଜମା ଭିତରକୁ ଆସିବ ଓ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ତଦନ୍ତ ରିପୋର୍ଟ ସେମାନଙ୍କ ପାଇଁ କାଳ ହେବ । ତେଣୁ ସେମାନେ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କୁ ସାନି ତଦନ୍ତ କରି ସେହିମାନଙ୍କ କଥା ଅନୁସାରେ ପରିବର୍ତ୍ତିତ ରିପୋର୍ଟ ଦେବାକୁ ବାଧ୍ୟ କରିଥିଲେ ।

ନିର୍ଦ୍ଦେଶକଙ୍କଠାରୁ ଏକ ନୂଆ ତଦନ୍ତ ରିପୋର୍ଟ ଆସିବା ପୂର୍ବରୁ ସେମାନଙ୍କ କବ୍ଜାରେ ଥିବା ଉଚ୍ଚ ଶିକ୍ଷା ବିଭାଗ ହାଇ କୋର୍ଟରେ ପ୍ରତିବାଦୀ ଭୂମିକା ନିର୍ବାହ କରିବାକୁ ସାହସ କରିନଥିଲା, କାରଣ ତଦ୍ଦ୍ଵାରା ସେମାନଙ୍କ ଜାଲିଆତି କୋର୍ଟଙ୍କ ଆଖିରେ ଧରା ପଡ଼ିଯାଇଥାନ୍ତା ।

କୋର୍ଟ ଯେତେବେଳେ ଦେଖିଲେ ଯେ, ମାନସୀଙ୍କ ଦାବି ବିରୁଦ୍ଧରେ ଉଚ୍ଚ ଶିକ୍ଷା ବିଭାଗର କୌଣସି ଆପତ୍ତି ନାହିଁ , ୩.୪.୨୦୧୯ରେ ମାମଲାଟିକୁ ନିର୍ବିବାଦ ଫଇସଲା କରି ଆଦେଶ ଦେଲେ ଯେ, ସରକାର ୩ ମାସ ଭିତରେ ଶ୍ରୀମତୀ ଷଡଙ୍ଗୀଙ୍କ ପ୍ରାର୍ଥନା ଉପରେ ନିଷ୍ପତ୍ତି ନିଅନ୍ତୁ ।

“ମଳୁ ଖୋଜୁଥିଲା କାକର ପାଣି , ବଇଦ କହିଲା ପି ତୋରାଣି” ପରି ଏ ଆଦେଶ ଉପରୋକ୍ତ ଗ୍ୟାଙ୍ଗକୁ ସତେ ଯେମିତି ନୂଆ ଜୀବନ ଦେଇଦେଲା !

“ଶ୍ରୀମତୀ ଷଡଙ୍ଗୀ ସ୍ଵେଚ୍ଛାରେ ଅନୁପସ୍ଥିତ ନଥିଲେ, ତାଙ୍କୁ ଦୁରଭିସନ୍ଧି ହେତୁ ଅନୁପସ୍ଥିତ ରଖା ହୋଇଥିଲା” ବୋଲି ସରକାର ଯେହେତୁ ସିଦ୍ଧାନ୍ତ କରିଛନ୍ତି, ସେହେତୁ ସାନି ତଦନ୍ତ ପାଇଁ ଦିଆଯାଇଥିବା ଆଦେଶ ମାନି ନିର୍ଦ୍ଦେଶକ ତଦନୁରୂପ ନୂଆ ରିପୋର୍ଟ ଦେବେ ବୋଲି ଏହି ଗ୍ୟାଙ୍ଗ ସୁନିଶ୍ଚିତ ଥିଲା ।

ଏହି ଗ୍ୟାଙ୍ଗ ଯେହେତୁ ତାଙ୍କ ସପକ୍ଷରେ, ସେହେତୁ ପ୍ରଦ୍ୟୁମ୍ନ ଶତପଥୀ ଦମ୍ପତ୍ତି ବି ନିଯୁକ୍ତି ନିୟମିତିକରଣ ଓ ପିଛିଲା ବେତନ ବାବଦରେ ଦେଢ଼ କୋଟି ଟଙ୍କା ଉପାର୍ଜନ ନେଇ ସୁନିଶ୍ଚିତ ଥିଲେ । ଉପରୋକ୍ତ ଗ୍ୟାଙ୍ଗ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ନୂଆ ରିପୋର୍ଟକୁ ଅପେକ୍ଷା କରି ଆରାମରେ ବସିଥିବା ବେଳେ, ହାଇ କୋର୍ଟ ଦେଇଥିବା ୩ ମାସ ସମୟ ସରିଯାଇଥିଲେ ବି ମାନସୀ ଷଡଙ୍ଗୀ ସରକାରଙ୍କ ଉପରେ କ୍ଷୁର୍ଣ ନଥିଲେ, କାରଣ ସେ ସୁନିଶ୍ଚିତ ଥିଲେ ଯେ, ପ୍ରଦ୍ୟୁମ୍ନ ଚଳାଇଥିବା ଗୋଟି ବ୍ୟର୍ଥ ହେବ ନାହିଁ ।

ସାଙ୍ଗଙ୍କୁ ନିର୍ଦ୍ଦେଶକ

ତଥାପି , ପ୍ରାୟ ଦେଢ଼କୋଟି ଟଙ୍କା ନଗଦ ପାଇବାର ଲୋଭ ପ୍ରଦ୍ୟୁମ୍ନ ଶତପଥୀଙ୍କୁ ବ୍ୟତିବ୍ୟସ୍ତ କଲା । ଭାଷା ଆନ୍ଦୋଳନକୁ ବନ୍ଦ କରାଇବା ସର୍ତ୍ତରେ ସେ ତାଙ୍କ ସ୍ତ୍ରୀଙ୍କ ଚାକିରି ପୁନର୍ଜୀବିତ କରାଇଥିଲେ ମଧ୍ୟ ଏବଂ ଭାଷା ଆନ୍ଦୋଳନ ପ୍ରତ୍ୟାହୃତ ହୋଇସାରିଛି ବୋଲି ସରକାରଙ୍କୁ ଲେଖିକରି ଜଣାଇଥିଲେ ମଧ୍ୟ, ସୁଭାଷ ଚନ୍ଦ୍ର ପଟ୍ଟନାୟକ ପ୍ରତିଷ୍ଠା କରିଥିବା ଭାଷା ଆନ୍ଦୋଳନ ନିୟମିତ ଚାଲିରହିବା ହେତୁ ସେ ନିଜେ ଆଶଙ୍କା କରୁଥିଲେ ଯେ, ମୁଖ୍ୟମନ୍ତ୍ରୀଙ୍କ ଦପ୍ତରରୁ ମାନସୀଙ୍କ ସପକ୍ଷରେ ଚାପ ପ୍ରୟୋଗ ହୁଏତ ଆଉ ସମ୍ଭବ ହେବ ନାହିଁ । ତା ଛଡ଼ା, ଶ୍ରୀମତୀ ଷଡଙ୍ଗୀ ଚାକିରିରେ ଯୋଗ ଦେଇସାରିଥିବା ହେତୁ ମନ୍ତ୍ରୀଙ୍କ ଭୂମିକା ବି ଶେଷ ହୋଇଯାଇଥିଲା । ସୁତରାଂ ସବୁ ନିର୍ଭର କରୁଥିଲା ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ସହଯୋଗ ଉପରେ ।

ଏହି ପରିପ୍ରେକ୍ଷୀରେ ପ୍ରଦ୍ୟୁମ୍ନ ଯାଇଥିଲେ ଉଚ୍ଚ ଶିକ୍ଷା ନିର୍ଦ୍ଦେଶାଳୟକୁ । ସେଠାରେ ତଳିଆ ଅମଲାତନ୍ତ୍ରରୁ ସେ ଯାହା ଅବଗତ ହେଲେ ସେଥିରେ ତାଙ୍କ ଅକଲ ଗୁଡୁମ୍ ହୋଇଗଲା ।

ସେ ଜାଣିଲେ ଯେ, ସରକାରଙ୍କ ୧.୩.୨୦୧୯ ତାରିଖର ଆଦେଶ କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶକଙ୍କ ସମ୍ମୁଖରେ ନଥି ରଖାହୋଇଥିଲା ୧୪.୩.୨୦୧୯ ତାରିଖରେ । ଆଦେଶର ୨ଟିଯାକ ଭାଗକୁ ଉପନିର୍ଦ୍ଦେଶକ ଉପସ୍ଥାପିତ କରିଥିଲେ । ପ୍ରଥମଟି ହେଲା, ମାନସୀଙ୍କ ଅନୁପସ୍ଥିତି ସମୟ ଉପରେ ନିର୍ଦ୍ଦେଶକ ୧୪.୨.୨୦୧୯ରେ ଦେଇଥିବା ନିର୍ଦ୍ଧାରଣର ପୁନର୍ବିଚାର ଓ ୨ୟଟି ହେଲା, ୧୯.୯.୨୦୧୮ ତାରିଖରୁ ତାଙ୍କୁ ୭ମ ବେତନ ଆୟୋଗଙ୍କ ସୁପରିଶର ସର୍ବନିମ୍ନ ହାରରେ ବେତନ ପ୍ରଦାନ ପାଇଁ ସେ ଯୋଗ ଦେଇଥିବା ଶିଶୁ ଅନନ୍ତ ମହାବିଦ୍ୟାଳୟର ଅଧ୍ୟକ୍ଷଙ୍କୁ ଅଧିକାର ପ୍ରଦାନ । ଉଚ୍ଚ ଶିକ୍ଷା ନିର୍ଦ୍ଦେଶକ ୧୫.୩.୨୦୧୯ରେ ୨ୟ ଭାଗଟିକୁ ମଞ୍ଜୁର କରିଥିବା ବେଳେ ୧ମ ଭାଗଟିକୁ ଭ୍ରୂକ୍ଷେପ କରିନଥିଲେ ।

ଏଥିରୁ ଶତପଥୀ ନିସନ୍ଦିଗ୍ଧ ହୋଇଗଲେ ଯେ, ତାଙ୍କୁ ସାହାଯ୍ୟ କଲାପରି ବ୍ୟକ୍ତି ନିର୍ଦ୍ଦେଶକ ନ ହେଲେ ମାନସୀ ପିଛିଲା ବେତନ ବାବଦରେ ପ୍ରାୟ ଦେଢ଼କୋଟି ଟଙ୍କା ପାଇବା ସମ୍ଭବ ହେବ ନାହିଁ  ଓ ଚାକିରିଗତ ସଙ୍କଟ ବି ଟଳିବ ନାହିଁ ।

ତାଙ୍କ ସାଙ୍ଗ ନିରଞ୍ଜନ ସାହୁ , ଯେ କି ତାଙ୍କ ସମସ୍ତ ସାମାଜିକ କ୍ରିୟାକର୍ମରେ ତାଙ୍କ ଘନିଷ୍ଠ ସହଯୋଗୀ ଭାବେ ଅଂଶ ଗ୍ରହଣ କରିଥାନ୍ତି , ଥିଲେ ମୁଖ୍ୟମନ୍ତ୍ରୀଙ୍କ ଅତିରିକ୍ତ ଶାସନ ସଚିବ । ସେ ଯଦି ଉଚ୍ଚ ଶିକ୍ଷା ନିର୍ଦ୍ଦେଶକ ହୋଇଯାଇପାରନ୍ତି ତେବେ ତ ସମସ୍ୟା ଶେଷ ! ତେଣୁ ସାହୁଙ୍କୁ ନିର୍ଦ୍ଦେଶକ କରିବାକୁ ଗୋଟି ଚାଳନା ଆରମ୍ଭ ହେଲା ।

ମୁଖ୍ୟମନ୍ତ୍ରୀ ନିଜେ ନ ଚାହିଁଲେ ତାଙ୍କ ଅତିରିକ୍ତ ସଚିବଙ୍କୁ କିଏ ବା ସାହସ କରିବ ବଦଳି କରାଇବାକୁ?

ପ୍ରଦ୍ୟୁମ୍ନ ଶତପଥୀ ଭାଷା ଆନ୍ଦୋଳନକୁ ବନ୍ଦ କରାଇ ପାରିନଥିଲେ ମଧ୍ୟ , ନିର୍ବାଚନ ବେଳେ ଭାଷା ଆନ୍ଦୋଳନ କାରଣରୁ ଅଡୁଆରେ ପଡ଼ିବେ ବୋଲି ମୁଖ୍ୟମନ୍ତ୍ରୀ ଯେଉଁ ଆଶଙ୍କା କରୁଥିଲେ , ପ୍ରଦ୍ୟୁମ୍ନଙ୍କ ବିଶ୍ଵାସଘାତକତା ହେତୁ ଆନ୍ଦୋଳନ ଜଖମ ହୋଇ, ସେ ସେହି ଆଶଙ୍କାରୁ ଉଧୁରି ଯାଇଥିଲେ । ତେଣୁ ମୁଖ୍ୟମନ୍ତ୍ରୀ ତାଙ୍କୁ ଦେଇଥିବା ‘ବିଶ୍ଵାସଘାତକ ଜାଗିରି’ ଖାତିରରେ , ନିର୍ବାଚନ ପରେ , ନିଜ ଅତିରିକ୍ତ ସଚିବ ନିରଞ୍ଜନ ସାହୁଙ୍କୁ ଉଚ୍ଚ ଶିକ୍ଷା ନିର୍ଦ୍ଦେଶକ ଭାବେ ବଦଳି କରିଦେଇଥିଲେ (Notifiication No.16976 dated 21st June 2019) ଏବଂ ଏଥିପାଇଁ ଅସୁବିଧା ନ ହେବାକୁ ନିର୍ଦ୍ଦେଶକ ପଦବୀର ବର୍ଗ ବି ବଦଳାଇ ଦେଇଥିଲେ ।


ଆଶ୍ଵସ୍ତ ହୋଇଥିଲେ ଶତପଥୀ ଦମ୍ପତ୍ତି ଓ ଧରିନେଇଥିଲେ ଯେ ନୂଆ ନିର୍ଦ୍ଦେଶକଙ୍କ ନୂଆ ରିପୋର୍ଟ ଆସିଗଲା ପରେ ପ୍ରାୟ ଦେଢ଼କୋଟି ଟଙ୍କାର ପିଛିଲା ବେତନ ସହ ୧୦ ବର୍ଷର ଅନୁପସ୍ଥିତି କାଳ ଚାକିରୀ କାଳରେ ସାମିଲ ହୋଇ ମାନସୀଙ୍କ ଚାକିରି ନିୟମିତ ହୋଇଯିବ । ଓଡ଼ିଆ ଜାତି ପ୍ରତି ବିଶ୍ଵାସଘାତକତା କଲେ ନବୀନ ପଟ୍ଟନାୟକ କେତେ ଯେ କରୁଣା କରିପାରନ୍ତି, ଏହି ଘଟଣାଟି ତହିଁର ଏକ ଦୁଃଖଦାୟକ ଦୃଷ୍ଟାନ୍ତ । (କ୍ରମଶଃ)

ଅବିମୃଷ୍ୟ ଅବମାନନା: ମନୀଷୀ ନବକୃଷ୍ଣଙ୍କ ପ୍ରତି ସରକାରୀ ଅସମ୍ମାନ

ସୁଭାଷ ଚନ୍ଦ୍ର ପଟ୍ଟନାୟକ

ମନୀଷୀ ନବକୃଷ୍ଣ ଚୌଧୁରୀଙ୍କର ଜନ୍ମ ଦିବସ ଭାବେ ନଭେମ୍ବର ୨୩ ଓଡ଼ିଆ ଜାତି ପାଇଁ ଏକ ଚିର ନମସ୍ୟ ଦିବସ । ଏହି ଦିବସରେ ମୁଖ୍ୟମନ୍ତ୍ରୀ ତାଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବେ ବୋଲି ଗତକାଲି ଠାରୁ ବିଧାନସଭା ସମ୍ମୁଖସ୍ଥ ତାଙ୍କ ବିଜେସ୍ଥଳୀରେ ସାଜସଜ୍ଜା ଆରମ୍ଭ ହୋଇଥିଲା । ଆଜି ସକାଳେ ଭାଷା ଆଂଦୋଳନର ଭକ୍ତିଅର୍ଘ୍ୟ ପ୍ରଦାନ ପାଇଁ ଆମେ ଯେତେବେଳେ ସେଠାରେ ପହଞ୍ଚିଥିଲୁ, ସାଜସଜ୍ଜା ତଥାପି ମଧ୍ୟ ଚାଲିଥାଏ ।

ଧଳା କନା ଘେରା ବିଶାଳ ଆତପତ୍ରାଣ ତିଆରି ସରିଥାଏ ; ଦାମୀ ଗଦିଦିଆ ଚୌକିଚୟ ସଜାହେବ, ଲାଲ୍ ଗାଲିଚା ବିଛା ହେବ , ମୁଖ୍ୟମନ୍ତ୍ରୀ ଆସିବେ ।

ସର୍ବତ୍ୟାଗୀ ନବବାବୁଙ୍କ ପାଇଁ ନବାବୀ ଶ୍ରଦ୍ଧା ଜ୍ଞାପନର ପର୍ବକୁ ଅପେକ୍ଷା ନ କରି ଉଦୟଭାନୁର କୋମଳ ରଶ୍ମୀ ତାଙ୍କ ପ୍ରତିମୂର୍ତ୍ତିକୁ ଆଲିଙ୍ଗନ କଲାବେଳେ ଆମେ (ମୋ ସମେତ ଡଃ ଅଶୋକ ମିଶ୍ର , ଶ୍ରୀମତୀ ଆଶାରାଣୀ ମିଶ୍ର, ରଞ୍ଜନ କୁମାର ସାହୁ, ଚୈତନ୍ୟ ବିଶ୍ଵାଳ ,ନବୀନ ମିଶ୍ର, ନିରଞ୍ଜନ ଖିଲାର, ଆଶିଷ କୁମାର ବେହେରା ପ୍ରମୁଖ) ଆମ ଜାତିର ଭାଷା ଅଧିକାରକୁ ବିଧିଭୁକ୍ତ କରି ଓଡ଼ିଶା ସରକାରୀ ଭାଷା ଆଇନ ପ୍ରଦାନ କରିଥିବା ଆମ ପ୍ରିୟ ପ୍ରଥମ ମୁଖ୍ୟମନ୍ତ୍ରୀଙ୍କୁ ସର୍ବାଗ୍ରେ ଦେଇଥିଲୁ କୃତଜ୍ଞ ଓଡ଼ିଆ ଜାତିର ଶ୍ରଦ୍ଧାସୁମନର ଅର୍ଘ୍ୟ ।

ତାଙ୍କୁ ଓଡ଼ିଆ ଜାତିର କୃତଜ୍ଞତା ଜଣାଇ ପ୍ରତିଦିନ ଅପରାହ୍ନ ୫ଟାରେ ଆରମ୍ଭ ହୋଇଥାଏ ଆମର କଳାପତାକା ଅଭିଯାନ ତାଙ୍କରି ପ୍ରଦତ୍ତ ଭାଷା ଆଇନର ସଶକ୍ତୀକରଣ ପାଇଁ । ଆଜି ଥିଲା ଏହି ଅଭିଯାନର ୧୩୧୭ତମ ଦିବସ । ଆମେ ପହଞ୍ଚିଲା ବେଳକୁ ସକାଳର ଦୃଶ୍ୟପଟ ବଦଳି ଯାଇଥିଲା ।  ସରିଯାଇଥିଲା ଛଳନାମୟ ଶ୍ରଦ୍ଧାଜ୍ଞାପନର  ପର୍ବ । ଗଦେଇ ହୋଇ ରହିଥିଲା ମନୀଷୀ ନବକୃଷ୍ଣଙ୍କ ପ୍ରତି ଚଳିତ ସରକାରର ଘୃଣା କେତେ ତୀବ୍ର ତାହାରି ନମୁନା ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବାପା ବିଜୁ ପଟ୍ଟନାୟକଙ୍କୁ ନିଜ ମନ୍ତ୍ରୀମଣ୍ଡଳରେ ଖଣି ଓ ଶିଲ୍ପ ମନ୍ତ୍ରୀ କରିନଥିଲେ ବୋଲି ପ୍ରତିଶୋଧପରାୟଣ ହୋଇ ସେ ଯେଉଁ ନୀଳମଣି ରାଉତରାୟଙ୍କୁ ହଳେଇ ନବବାବୁଙ୍କୁ ଏପରି ମାନସିକ ଯନ୍ତ୍ରଣା ଦେଇଥିଲେ ଯେ, ସେ ମୁଖ୍ୟମନ୍ତ୍ରୀ ପଦବୀ ତ୍ୟାଗ କରିବାକୁ ଶ୍ରେୟ ମଣିଥିଲେ, ସେହି ନୀଳମଣି ତାଙ୍କ ଆତ୍ମଜୀବନୀରେ ଲେଖିଛନ୍ତି, “ମୁଁ ଆଜି ହୃଦୟଙ୍ଗମ କରୁଛି, କେତେ ମହାନ, ଉଦାର ତଥା ଗଣତନ୍ତ୍ରବାଦୀ ଥିଲେ ସେ ସମୟର ମୁଖ୍ୟମନ୍ତ୍ରୀ ଶ୍ରୀ ନବକୃଷ୍ଣ ଚୌଧୁରୀ । ଗଣତନ୍ତ୍ର ଓ ସଂସଦୀୟ ରାଜନୀତିରେ ସରକାରର ସ୍ଵାର୍ଥ ଓ ଦଳୀୟ ସ୍ଵାର୍ଥର ଭିତରେ ପାର୍ଥକ୍ୟ କଣ ସେକଥା ଶ୍ରୀ ଚୌଧୁରୀ ଯେପରିଭାବରେ ବୁଝିଥିଲେ ଏବଂ ନିଜ ଦଳ ଭିତରେ ଅପ୍ରିୟ ହେଲେ ମଧ୍ୟ ଶାସନକୁ ଦୁର୍ନୀତିମୁକ୍ତ କରି ସମାଜବାଦୀ ଗଣତାନ୍ତ୍ରିକ ନୀତି ଆଦର୍ଶରେ ପରିଚାଳିତ କରିବା ପାଇଁ ତାଙ୍କର ଯେଉଁ ପ୍ରଗାଢ ଆଗ୍ରହ ଥିଲା, ଅନ୍ୟ କୌଣସି ମୁଖ୍ୟମନ୍ତ୍ରୀଙ୍କ ପାଖରେ ମୁଁ ତାହା ଲକ୍ଷ୍ୟ କରିପାରିନାହିଁ । ଏଭଳି ହୃଦୟବାନ ମହାନ ବ୍ୟକ୍ତି ଯଦି ଅଧିକ ଦିନ ଓଡ଼ିଶାର ଶାସନ ସହ ଜଡ଼ିତ ଥାନ୍ତେ, ତ ହେଲେ ହୁଏତ କେତେକ ଉଚ୍ଚ ମାନର ସୁସ୍ଥ ଗଣତାନ୍ତ୍ରିକ ପରମ୍ପରା ସୃଷ୍ଟି ହୋଇପାରିଥାନ୍ତା ; ମାତ୍ର ଆମେମାନେ ତାହା ସମ୍ଭବ କରାଇ ଦେଲୁନାହିଁ ।”

ଆଜି ତାଙ୍କ ଶୁଭ ଜନ୍ମ ଦିନରେ କଣ ଠିକାଦାରକୁ କୁହା ହୋଇପାରିନଥାନ୍ତା ସକାଳର ସାଜସଜ୍ଜା ସଂଧାରେ ଏପରି ନ ଭାଙ୍ଗିବାକୁ ? ସନ୍ଧ୍ୟାରେ କଣ ଏହି ସ୍ଥଳରେ ତାଙ୍କ ସ୍ମୃତି ଚାରଣ ପାଇଁ ଆୟୋଜନ କରାଯାଇପରିନଥାନ୍ତା ? ଆଜି ତାଙ୍କ ଶୁଭ ଜୟନ୍ତୀରେ ଦିନ ତମାମ ପାଇଁ ରଖାଯାଇପାରିନଥାନ୍ତା ଏହି ସାଜସଜ୍ଜା? ଏହା ସ୍ପଷ୍ଟ କରେ ଯେ, ଏ ସାଜସଜ୍ଜା ମୁଖ୍ୟମନ୍ତ୍ରୀନ ନବୀନଙ୍କ ପାଇଁ ହୋଇଥିଲା, ମନୀଷୀ ନବକୃଷ୍ଣଙ୍କ ଜୟନ୍ତୀ ସମ୍ମାନରେ ନୁହେଁ ।

ଓଡ଼ିଶା ସରକାରୀ ଭାଷା ଆଇନ ପ୍ରଦାତା, ଓଡ଼ିଶାର ପ୍ରଥମ ମୁଖ୍ୟମନ୍ତ୍ରୀ ମନୀଷୀ ନବକୃଷ୍ଣ ଚୌଧୁରୀଙ୍କ ପ୍ରତି ଏହି ସରକାରୀ ଅସମ୍ମାନ ଘୋର ନିନ୍ଦନୀୟ ।

ଆମ ଭାଷା ଆମ ଅଧିକାର ଆଜି ସକାଳେ ମୋର ଯେଉଁ ବାର୍ତ୍ତା ରେକର୍ଡ କରିଥିଲେ, ତାଙ୍କ ଅନୁରୋଧକ୍ରମେ, ଭାଷା ଆନ୍ଦୋଳନକାରୀମାନଙ୍କ ଅବଗତି ପାଇଁ ଏଠାରେ ସ୍ଥାପିତ କରି  ଉପସ୍ଥାପନାଟିକୁ ଅଧୁନାତନ କରାଗଲା ।

 

ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ : ମୁଖ୍ୟମନ୍ତ୍ରୀ ସଫେଇ ରଖନ୍ତୁ – ଅଷ୍ଟାଦଶ ଭାଗ

ସୁଭାଷ ଚନ୍ଦ୍ର ପଟ୍ଟନାୟକ

ଦୁର୍ନୀତିର ସ୍ରୋତରେ ପହଁରିବାକୁ କୁଣ୍ଠା ନ କରି, ମୁଖ୍ୟମନ୍ତ୍ରୀଙ୍କୁ ଖୁସି କରିବା ପାଇଁ, ମହାପାତ୍ର-ମିଶ୍ର-ବାଳକୃଷ୍ଣନ ଗ୍ୟାଙ୍ଗ ଭାଷା ଆନ୍ଦୋଳନ ଭାଙ୍ଗିବା ସକାଶେ ପ୍ରଦ୍ୟୁମ୍ନ ଶତପଥୀ ରଖିଥିବା ସର୍ତ୍ତ ପୂରଣ କରିବାକୁ ଯାଇ ଯେ ସମ୍ପୂର୍ଣ ବେଆଇନ ଓ ଜାଲିଆ କାମ କରିଥିଲେ , ତାହା ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ତଦନ୍ତ ରିପୋର୍ଟ ସ୍ପଷ୍ଟ କରିଦେଇଥିଲା । ତାହାକୁ ମାନିଲେ ମଲେ , ନ ମାନିଲେ ମଲେ – ଏହି ଅବସ୍ଥା ସୃଷ୍ଟି ହୋଇଥିଲା ଏହି ଗ୍ୟାଙ୍ଗର ।

ମିଥ୍ୟାବାଦୀ ଗ୍ୟାଙ୍ଗର ବ୍ୟର୍ଥ କୌଶଳ

ଏମାନେ ଗାଲୁକଳ୍ପ ପ୍ରୟୋଗ କରି ୨୨.୬.୨୦୧୫ ତାରିଖର ସରକାରୀ ଆଦେଶକୁ ସମ୍ପୃକ୍ତ ନଥିରେ ସମ୍ପୂର୍ଣ କବର ଦେଇ ଦେଇଥିଲେ ମଧ୍ୟ ଏବଂ ଏମାନଙ୍କ ଏହି ଅପକର୍ମ ଶିକ୍ଷାମନ୍ତ୍ରୀ ଅନନ୍ତ ଦାସଙ୍କ ସ୍ଵାକ୍ଷର ବଳରେ ସରକାରୀ ଆଦେଶରେ ପରିଣତ ହୋଇଥିଲେ ମଧ୍ୟ , ସରକାର ୨୦୧୫ର ଉପରୋକ୍ତ ଆଦେଶକୁ ରଦ୍ଦ କରିନଥିଲେ କି ପ୍ରତ୍ୟାହାର କରିନଥିଲେ । ଏମାନଙ୍କ ଭିତରୁ କୃପାସିନ୍ଧୁ ମିଶ୍ରଙ୍କ ସ୍ଵାକ୍ଷରରେ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କୁ ୧୮.୭.୨୦୧୮ରେ ଯାଇଥିବା ନିର୍ଦ୍ଦେଶରେ ଅବଶ୍ୟ କୁହାହୋଇଥିଲା ଯେ, ଉପରୋକ୍ତ ସରକାରୀ ଆଦେଶ ଅଧିକ୍ରାନ୍ତ କରାଯାଇ (“In supersession of this department letter No. 13290 dated 22.06.2015”) ଏହି ଆଦେଶ ଦିଆଯାଇଛି । ମାତ୍ର ଏହାକୁ ଅଧିକ୍ରାନ୍ତ କରାଗଲା ବୋଲି ସରକାର କୌଣସି ଆଦେଶ ଦେଇନଥିଲେ । ବରଂ ଏଥିପାଇଁ ପ୍ରସ୍ତାବ ଦେଇଥିବା ଅତିରିକ୍ତ ଶାସନ ସଚିବ ମିଶ୍ରଙ୍କ ଟିପ୍ପଣୀ (ଟିପ୍ପଣୀ ସଂଖ୍ୟା ୯) ଗୃହୀତବ୍ୟ ନହେବାରୁ ତହିଁ ଉପରେ ସେ ନିଜେ ତଳିଆ ଅମଲାତନ୍ତ୍ରର “ସୁଚିନ୍ତିତ ମତ” (ଟିପ୍ପଣୀ ସଂଖ୍ୟା ୧୦) ପାଇଁ ଅନୁରୋଧ କରିଥିଲେ ଏବଂ “ସୁଚିନ୍ତିତ ମତ” ଦେଇ ଅନୁଶାସନସଚିବ ମହାପାତ୍ର ଯେଉଁ ଗାଲୁକଳ୍ପ ପ୍ରୟୋଗ କଲେ ତହିଁରେ ମିଶ୍ରଙ୍କ ଟିପ୍ପଣୀ ସମ୍ପୂର୍ଣ ଅଧିକ୍ରାନ୍ତ ହୋଇଗଲା ଓ ତାହା ହିଁ ଶେଷ ପର୍ଯ୍ୟନ୍ତ କାଏମ ରହିଲା ।

ଅତଏବ, ୨୨.୬.୨୦୧୫ର ସରକାରୀ ଆଦେଶ ଅଧିକ୍ରାନ୍ତ ହୋଇ ଶ୍ରୀମତୀ ଷଡଙ୍ଗୀଙ୍କ ଯୋଗଦାନ ପାଇଁ ସରକାର ହୁକୁମ କରିଥିବା, ଯାହା ୧୮.୭.୧୮ର ଆଦେଶରେ କୁହା ହୋଇଛି, ତାହା ଥିଲା ସମ୍ପୂର୍ଣ ବିତ୍ତିହୀନ । ଆଇନତଃ, ଏହି ଆଦେଶ ସତ୍ତ୍ୱେ ୨୨.୬.୨୦୧୫ର ସରକାରୀ ଆଦେଶ ଅଧିକ୍ରାନ୍ତ ନହୋଇ କାଏମ ଥିଲା । ତେଣୁ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ତଦନ୍ତ ରିପୋର୍ଟ ପାଇ, ମହାପାତ୍ର-ମିଶ୍ର-ବାଳକୃଷ୍ଣାନ ଗ୍ୟାଙ୍ଗଙ୍କ ଅକଲ ଗୁଡୁମ ହୋଇଗଲା । ଏମାନେ ନାଲିଆଖି ଦେଖାଇ ନିର୍ଦ୍ଦେଶକଙ୍କୁ ତାଙ୍କ ରିପୋର୍ଟ ବଦଳାଇବାକୁ ଚେଷ୍ଟା କରିଥିଲେ । ମିଶ୍ରଙ୍କ ସ୍ଵାକ୍ଷରରେ ୧.୩.୨୦୧୯ ତାରିଖରେ ନିର୍ଦ୍ଦେଶକଙ୍କୁ କୁହା ହୋଇଥିଲା କି , ୨.୭.୨୦୦୮ ତାରିଖରୁ ୨୨.୭.୨୦୧୮ ତାରିଖ ପର୍ଯ୍ୟନ୍ତ ମାନସୀ ଷଡଙ୍ଗୀଙ୍କ ଅନୁପସ୍ଥିତି ଉପରେ ସେ ଦେଇଥିବା ମତ ବଦଳାନ୍ତୁ ଓ ସେ ଅନୁପସ୍ଥିତ ନଥିଲେ, ବରଂ ଅନୁପସ୍ଥିତ ରହିବାକୁ ତାଙ୍କୁ ବାଧ୍ୟ କରାହୋଇଥିଲା ବୋଲି ସାନି ମତ ଦେଇ, ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ସେ କରିଥିବା ସୁପାରିଶ ମଧ୍ୟ ବଦଳାନ୍ତୁ । ଦସ୍ତାବିଜୀୟ ଗୁରୁତ୍ଵ ଦୃଷ୍ଟିରୁ ଚିଠିଟି ପଠିତବ୍ୟ । ତହିଁରେ ଲେଖା ହୋଇଛି :-

“In inviting a reference to your letter No.6358 dated 14.2.2019 on the above noted subject, I am directed to say that the period of absence of Smt. Manasi Sarangi, lecturer in Botany, S. A. Mahabidyalaya, Balipatna, Khorda w.e.f. 02.07.2008 to 22.7.2018 may be reexamined at your level as per the relevant Rules.” (ଚିଠି ସଂଖ୍ୟା ୫୪୭୦, ତା ୧.୩.୨୦୧୯) । କିନ୍ତୁ ଉଚ୍ଚ ଶିକ୍ଷା ନିର୍ଦ୍ଦେଶକ ଏହି ଅବାନ୍ତର ଆଦେଶ ପ୍ରତି କାଣିଚାଏ ଗୁରୁତ୍ଵ ବି ଦେଲେନାହିଁ ।

ଗାଁ ଲୋକେ ପଣସ ଖାଇ ….

ମହାପାତ୍ର-ମିଶ୍ର-ବାଳକୃଷ୍ଣାନ ଗ୍ୟାଙ୍ଗ ଭଲଭାବେ ଜାଣିଥିଲେ ଯେ, ଶ୍ରୀମତୀ ମାନସୀ ଷଡଙ୍ଗୀଙ୍କ ବିରୁଦ୍ଧରେ ୨୨.୬.୨୦୧୫ରେ ରାଜ୍ୟ ସରକାର ଯେଉଁ ଆଦେଶ ଜାରି କରିଥିଲେ ତାହା ଥିଲା ଏକ ନିର୍ଦ୍ଧାରକ ଆଦେଶ (speaking order) ଯାହା ଆଇନତଃ ଏତେ ସୁଦୃଢ ଥିଲା ଯେ, କୌଣସି ଯୁକ୍ତି ବଳରେ ବି ତାକୁ ଅକାମି କରିବା ସମ୍ଭବ ନଥିଲା । ଦୁର୍ନୀତି ସହ ସହବାସପ୍ରବଣତା ସାଙ୍ଗକୁ ମୁଖ୍ୟମନ୍ତ୍ରୀ ଓ ମନ୍ତ୍ରୀଙ୍କ ଚାପରେ ପ୍ରଦ୍ୟୁମ୍ନ ଶତପଥିଙ୍କ ସ୍ତ୍ରୀଙ୍କୁ ଚାକିରିରେ ଯୋଗଦାନ ପାଇଁ ପଥ ପରିଷ୍କାର କରିବା ମତଲବରେ ସେମାନେ ବାଟକୀଳ ନ ମାନି ମାଡ଼ିଯାଇଥିଲେ ଓ ସେହି ପ୍ରକ୍ରିୟାରେ ସେହି ସରକାରୀ ଆଦେଶଟିକୁ ଗାଲିଚା ତଳେ ଚାପିଦେଇଥିଲେ । ଗାଁ ଲୋକେ ପଣସ ଖାଇ ଭଣ୍ଡାରୀ ମୁଣ୍ଡରେ ଅଠା ବୋଳିଲା ପରି ଏହି ଗ୍ୟାଙ୍ଗ ନିଜର ଏହି ବେଆଇନ କାମ ପାଇଁ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ମୁଣ୍ଡରେ ଅଠା ଲଗାଇ ଖସିଯିବା ଉଦ୍ଦେଶ୍ୟରେ ମାନସୀଙ୍କ ଅନୁପସ୍ଥିତି କାଳ କିପରି ଗୃହୀତ ହେବ ତାହା ତାଙ୍କରି ତଦନ୍ତ ଉପରେ ନିର୍ଭର କରିବ ବୋଲି କହି, ତଦନ୍ତର ନିର୍ଣୟ କଣ ହେବା ସରକାରଙ୍କ ଇଚ୍ଛା ସେ ସମ୍ପର୍କରେ ତାଙ୍କୁ ପୂର୍ବଧାରଣାଗ୍ରସ୍ତ କରାଇବାକୁ ଚେଷ୍ଟା କରିଥିଲେ ଏହା ହିଁ କହି ଯେ, ଶ୍ରୀମତୀ ଷଡଙ୍ଗୀ ନିଜେ ଇଚ୍ଛାକରି ଅନୁପସ୍ଥିତ ନ ଥିଲେ , ତାଙ୍କର କୌଣସି ଭୁଲ ନ ଥାଇ ସୁଦ୍ଧା ସମ୍ପୃକ୍ତ କର୍ତ୍ତୃପକ୍ଷ ତାକୁ କର୍ମ ସମ୍ପାଦନରୁ ଦୂରେଇ ରଖିଥିଲେ (“for none of her faults she is kept out of service and has not been allowed to join in duty and perform her duties”) ଓ “Therefore, gross illegality has occurred in (her) case” (ସେହେତୁ ତାଙ୍କ କ୍ଷେତ୍ରରେ ଘୋର ବେଆଇନ କାମ ହୋଇଛି ) । ମାତ୍ର ଉଚ୍ଚ ଶିକ୍ଷା ନିର୍ଦ୍ଦେଶକ ପୂର୍ବଧାରଣାଗ୍ରସ୍ତ ହେବାକୁ ନିଜକୁ ଅନୁମତି ଦେଲେନାହିଁ । ପୋଲିସ କ’ଣ କରିବାକୁ ଯାଉଛି, ତା ଉପରେ ଧୂର୍ତ୍ତ ଅପରାଧୀ ଯେପରି ନଜର ରଖିଥାଏ, ନିର୍ଦ୍ଦେଶକ କ’ଣ କରିବାକୁ ଯାଉଛନ୍ତି ତା ଉପରେ ପ୍ରଦ୍ୟୁମ୍ନ ଶତପଥୀ ସେମିତି  ନଜର ରଖିଥିଲେ ।

ମନ ଜାଣେ ପାପ

ଓଡ଼ିଆରେ ଗୋଟିଏ ଢଗ ଅଛି : “ମା ଜାଣେ ବାପ, ମନ ଜାଣେ ପାପ” । ପ୍ରଦ୍ୟୁମ୍ନ ଶତପଥିଙ୍କ ମନ ତାଙ୍କ ପାପ ଜାଣିଥିଲା । ଭାଷା ଆନ୍ଦୋଳନକୁ ବନ୍ଦ କରିଦେବା ସର୍ତ୍ତରେ ସ୍ତ୍ରୀଙ୍କ ପାଇଁ ଚାକିରି କରାଇ, ପିଛିଲା ଦରମା ବାବଡକୁ ପ୍ରାୟ ଦେଢକୋଟି ଟଙ୍କା ପାଇବା ପଥ ସେ ପରିଷ୍କାର କରାଇଥିଲେ ।

ସେ ସୁନିଶ୍ଚିତ ଥିଲେ ଯେ, କଳାପତାକା ଧରିବାକୁ ସେ ଯଦି ଲୋକ ଯୋଗାଇ ନ ଦିଅନ୍ତି ତେବେ ସୁଭାଷ ଚନ୍ଦ୍ର ପଟ୍ଟନାୟକ ଯେତେ ବୌଦ୍ଧିକ କସରତ କଲେ ମଧ୍ୟ ଭାଷା ଆନ୍ଦୋଳନ ଚଳାଇ ପାରିବେ ନାହିଁ । କିନ୍ତୁ ତାଙ୍କ ହିସାବ ଭୁଲ ହୋଇଗଲା । ସେ ଓ ପବିତ୍ର ଏବଂ ତାଙ୍କ ଗ୍ୟାଙ୍ଗ ଯେତେ ଜଘନ୍ୟ ଉଦ୍ୟମ କଲେ ମଧ୍ୟ କଳାପତାକା ଅଭିଯାନକୁ ଅଟକାଇ ପାରିଲେ ନାହିଁ । ଭାଷା ଆନ୍ଦୋଳନ ଅତୁଟ ରହିଲା ।

ସେ ତାଙ୍କ ପାପକୁ ତାଙ୍କ ଗ୍ୟାଙ୍ଗଠୁ ଲୁଚେଇ ରଖିଥିଲେ ମଧ୍ୟ ନିଜେ ତ ଜାଣିଥିଲେ ଯେ, ଯେଉଁ ଉଦ୍ଦେଶ୍ୟରେ ସରକାର ତାଙ୍କ ସ୍ତ୍ରୀଙ୍କୁ ଚାକିରିରେ ଯୋଗ ଦେବାକୁ ଆଦେଶ ଦେଇଥିଲେ ସେ ଉଦ୍ଦେଶ୍ୟ ଯଦି କାର୍ଯ୍ୟକାରୀ ନ ହୁଏ, ତେବେ ନିର୍ଦ୍ଦେଶକଙ୍କୁ ଦିଆଯାଇଥିବା ତଦନ୍ତର ପରିଣତି ହୁଏତ ତାଙ୍କ ପ୍ରତିକୂଳରେ ବି ଯାଇପାରେ ଓ ୨୨.୬.୨୦୧୫ତାରିଖର ସରକାରୀ ଆଦେଶର ବୈଧତା ଓ ଅଲଙ୍ଘ୍ୟତା ଉପରେ ଗୁରୁତ୍ଵ ଦେଇପାରେ, କାରଣ ସେପରି ନ କରିବା ପାଇଁ ହୁଏତ ଭାଷା ଆଂଦୋଳନର ଅତୁଟତା ହେତୁ ବିରକ୍ତ ତୃତୀୟ ମହଲା ଆଉ ଚାପ ପ୍ରୟୋଗ ନକରିପାରେ ।

ଦୋଷରା ଚାଲ୍

ଯେଉଁ ସରକାରୀ ଆଦେଶ ବଳରେ ଶ୍ରୀମତୀ ଷଡଙ୍ଗୀ ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ଦପ୍ତରରେ ଯୋଗ ଦେଲେ, ସେଥିରେ କୁହା ହୋଇଥିଲା, “The intervening period from the date she was kept out of service from 2.7.2008 till she joins in the Directorate shall be decided after due enquiry made at the level of the Directorate.” (ନିର୍ଦ୍ଦେଶାଳୟ ସ୍ତରରେ ତଦନ୍ତ ହୋଇ ଶ୍ରୀମତୀ ଷଡଙ୍ଗୀଙ୍କ ଅନୁପସ୍ଥିତିକୁ କିପରି ଗ୍ରହଣ କରାଯିବ ତାହା ନିଷ୍ପତ୍ତି ହେବ) । ତଦନ୍ତ ଯେ ତାଙ୍କ ବିରୁଦ୍ଧରେ ଯିବ ଏଥିରେ ଶ୍ରୀମତୀ ଷଡଙ୍ଗୀ ଓ ତାଙ୍କ ସ୍ଵାମୀ ପ୍ରଦ୍ୟୁମ୍ନ ଶତପଥିଙ୍କର କୌଣସି ସନ୍ଦେହ ନଥିଲା , କାରଣ ସେମାନେ ଜାଣିଥିଲେ ଯେ, ତାଙ୍କ ଅନୁପସ୍ଥିତି ସମ୍ପୂର୍ଣ ଅଯଥା ଓ ଅନଧିକୃତ ଥିଲା । ଏହି ଆଶଙ୍କା ହେତୁ ସେ ଏକ ଦୋଷରା ଚାଲ୍ ଚଳାଇଲେ । (କ୍ରମଶଃ)

ଟଙ୍କା ପାଇଁ ଭାଷା ଆନ୍ଦୋଳନକୁ ଛୁରୀ ମାରିଛନ୍ତି ପ୍ରଦ୍ୟୁମ୍ନ ଶତପଥୀ : ମୁଖ୍ୟମନ୍ତ୍ରୀ ସଫେଇ ରଖନ୍ତୁ – ସପ୍ତଦଶ ଭାଗ

ସୁଭାଷ ଚନ୍ଦ୍ର ପଟ୍ଟନାୟକ 

ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ତଦନ୍ତ ରିପୋର୍ଟ ନିଷ୍କମ୍ପ କର୍ମ ସମ୍ପାଦନର ଏକ ଆଦର୍ଶ ହୋଇ ରହିବ । ସରକାରଙ୍କ ନୀତିଭ୍ରଷ୍ଟ ଆଭିମୁଖ୍ୟ ପ୍ରତି ଖାତିର ନ କରି ସେ ଯେଉଁ ତଦନ୍ତ କରି ଥିଲେ ତାହା ଯେପରି ନୀତିନିଷ୍ଠ ଥିଲା, ସେହି ପରି ନିର୍ବିଚଳିତ ଥିଲା ତହିଁର ନିଷ୍କର୍ଷ । ତାହାର କିୟଦଂଶ :-

“Smt. Sarangi had remained absent from duties un-authorizedly for a long period of 10 years. On perusal of all documents and records available and personal hearing, it is revealed that, there is a strong case for appropriate action under the relevant Rules against Smt. Sarangi for such long unauthorized absence from duty without valid reasons.”

ଅର୍ଥାତ୍ , ଶ୍ରୀମତୀ ଷଡଙ୍ଗୀ କର୍ମକ୍ଷେତ୍ରରୁ ଦୀର୍ଘ ୧୦ ବର୍ଷ କାଳ ଅନଧିକୃତ ଭାବେ ଅନୁପସ୍ଥିତ ଥାଇ ତାଙ୍କ କର୍ତ୍ତବ୍ୟ ସମ୍ପାଦନ କରିନଥିଲେ । ଉପଲବ୍ଧ ସମସ୍ତ ଦଳିଲ୍ ଦସ୍ତାବିଜ୍ ଓ ନଥିପତ୍ରର ଗଭୀର ଅନୁଧ୍ୟାନ ଏବଂ ବ୍ୟକ୍ତିଗତ ଶୁଣାଣିରୁ ଏହା ଦୃଢ ଭାବେ ସ୍ପଷ୍ଟ ଯେ, କୌଣସି ବିଧିମାନ୍ୟ କାରଣ ନ ଥାଇ ସେ ଏତେ ଦୀର୍ଘ କାଳ ଧରି କର୍ମକ୍ଷେତ୍ରରୁ ଅନୁପସ୍ଥିତ ଥିଲେ । ଏହି ଅନୁପସ୍ଥିତି ଥିଲା ଅନଧିକୃତ । ତେଣୁ ପ୍ରଯୁଜ୍ୟ ନିଯମାବଳୀ ଅନୁସାରେ ତାଙ୍କ ବିରୁଦ୍ଧରେ ସମୁଚିତ କାର୍ଯ୍ୟାନୁଷ୍ଠାନ ହେବା ଆବଶ୍ୟକ ।

ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ଏହି ତଦନ୍ତ ରିପୋର୍ଟ ସରକାରଙ୍କ ସବୁ ଫନ୍ଦିକୁ ଫସରଫସା କରିଦେଲା । ଏହା ସାବ୍ୟସ୍ତ କଲା ଯେ , ଶ୍ରୀମତୀ ଷଡଙ୍ଗୀଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାର ୨୨.୬.୨୦୧୫ ତାରିଖରେ ଯେଉଁ ଆଦେଶ ଦେଇଥିଲେ (ଆଦେଶ ପତ୍ରାଙ୍କ ୧୩୨୯୦) ତାହା ହିଁ ଥିଲା ଠିକ୍ ଓ ତାହାକୁ ବଦଳାଇବା ପାଇଁ ହୋଇଥିବା ପ୍ରଶାସନିକ ଉଦ୍ୟମ ସମ୍ପୂର୍ଣ ବେଠିକ୍ ।

ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ଏହି ତଦନ୍ତ ରିପୋର୍ଟ ଯେଉଁ ଦିଗଗୁଡ଼ିକୁ ସ୍ପଷ୍ଟ କଲା ସେଗୁଡ଼ିକ ହେଲା :-

(୧)              ଶ୍ରୀମତୀ ମାନସୀ ଷଡଙ୍ଗୀ ଅନୁପସ୍ଥିତ ନଥିଲେ, ତାଙ୍କୁ ଅନୁପସ୍ଥିତ ରଖା ଯାଇଥିଲା ବୋଲି ଅନୁଶାସନସଚିବ ସୂର୍ଯ୍ୟନାରାୟଣ ମହାପାତ୍ର ଯେଉଁ ଟିପ୍ପଣୀ (ଟିପ୍ପଣୀ ସଂଖ୍ୟା ୧୧) ତାହା ଥିଲା ସମ୍ପୂର୍ଣ ଭିତ୍ତିହୀନ ଓ ଦୁରଭିସନ୍ଧି ପ୍ରଣୋଦିତ । କାରଣ, ସେ ସ୍ଵାସ୍ଥ୍ୟଗତ କାରଣରୁ ଅନୁପସ୍ଥିତ ଥିଲେ ବୋଲି ଶ୍ରୀମତୀ ଷଡଙ୍ଗୀ ତଦନ୍ତ ବେଳେ ପ୍ରକାଶ କରିଥିଲେ ଓ ତାହା ପ୍ରତିପାଦନ କରିବା ପାଇଁ ଡାକ୍ତରୀ ଚିଠା ଦେଖାଇଥିଲେ । ନିର୍ଦ୍ଦେଶକଙ୍କ ତଦନ୍ତ ରିପୋର୍ଟର ୨ୟ ଅନୁଚ୍ଛେଦରେ ଲେଖା ହୋଇଛି, “Appearing at the enquiry on the said date Smt. Sarangi submitted a written submission along with copy of some medical prescriptions and medical fitness certificate which she claimed justify her long absence from duty.” ଅର୍ଥାତ୍ , ଧାର୍ଯ୍ୟ ହୋଇଥିବା ତାରିଖରେ ଯୋଗ ଦେଇ ଶ୍ରୀମତୀ ଷଡଙ୍ଗୀ ତାଙ୍କର ସୁଦୀର୍ଘ ଅନୁପସ୍ଥିତି ସପକ୍ଷରେ ଲିଖିତ ବୟାନ ସମେତ କେତେକ ଡାକ୍ତରୀ ଚିଠା ଓ ସ୍ୱାସ୍ଥ୍ୟ ପ୍ରମାଣପତ୍ର ଦାଖଲ କରିଥିଲେ । ଏଗୁଡ଼ିକ ତାଙ୍କ ୧୦ ବର୍ଷରୁ ଉର୍ଦ୍ଧ୍ଵ ସୁଦୀର୍ଘ ଅନୁପସ୍ଥିତିର କୌଣସି ସନ୍ତୋଷଜନକ କାରଣ ଦର୍ଶାଇପାରିନଥିବା (do not reveal satisfactory reasons to justify long period of absence from duty for more than 10 years.) କହି, କର୍ମକ୍ଷେତ୍ରରୁ ତାଙ୍କୁ ଦୂରେଇ ରଖା ହୋଇଥିବା / ତାଙ୍କୁ କର୍ତ୍ତବ୍ୟ ସମ୍ପାଦନରେ ବାଧା ଦିଆହୋଇଥିବା କଥା ପ୍ରତ୍ୟୟଯୋଗ୍ୟତାବିହୀନ ;
(୨)               ଓଡ଼ିଶା ଶିକ୍ଷା (ସରକାରୀ ସାହାଯ୍ୟପ୍ରାପ୍ତ ଶିକ୍ଷାନୁଷ୍ଠାନର ଶିକ୍ଷକ ଓ କର୍ମଚାରୀ ନିଯୁକ୍ତି ଓ ଚାକିରି ସର୍ତ୍ତ) ନିୟମାବଳୀ, ୧୯୭୪ର ନିୟମ ୨୨ ମୁତାବକ ତାଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ ହେବାକୁ ୨୨.୬.୨୦୧୫ରେ ସରକାର ଦେଇଥିବା ଅଲଙ୍ଘ୍ୟ ଆଦେଶ ଉପରେ ଗୁରୁତ୍ଵ ପ୍ରଦାନ ।

ଭାଷା ଆନ୍ଦୋଳନକୁ ଭାଙ୍ଗିବା ପାଇଁ କଳାପତାକାଧାରୀ ଯୋଗାଉଥିବା ପ୍ରଦ୍ୟୁମ୍ନ ଶତପଥୀଙ୍କ ସହ ମୁଖ୍ୟମନ୍ତ୍ରୀ ଯେଉଁ ସଉଦା କରିଥିଲେ ତଦନୁଯାୟୀ ତାଙ୍କ ସ୍ତ୍ରୀଙ୍କୁ ନିସର୍ତ୍ତ ନିଯୁକ୍ତି ଦେବା ଓ ତାଙ୍କ ଅନୁପସ୍ଥିତି ପାଇଁ ସେ ଦାୟୀ ନୁହନ୍ତି, କର୍ତ୍ତୃପକ୍ଷ ଦାୟୀ ବୋଲି ଦର୍ଶାଇ ତାଙ୍କର ଅନୁପସ୍ଥିତି କାଳକୁ ନିୟମିତ ଚାକିରି ଭାବେ ଗୃହୀତବ୍ୟ ବୋଲି ଦର୍ଶାଇ ପ୍ରଦ୍ୟୁମ୍ନ ଶତପଥୀଙ୍କୁ ସ୍ତ୍ରୀଙ୍କ ପିଛିଲା ବେତନ ସୂତ୍ରରେ ପ୍ରାୟ ଦେଢକୋଟି ଟଙ୍କାର ଆୟ ଯୋଗାଇବା ପାଇଁ ମହାପାତ୍ର-ମିଶ୍ର-ବାଳକୃଷ୍ଣାନ ଗ୍ୟାଙ୍ଗ ୨୨.୬.୨୦୧୫ ତାରିଖର ଚୁଡାନ୍ତ ସରକାରୀ ଆଦେଶକୁ ଯେପରି ଗାଲିଚା ତଳେ କବର ଦେଇ ଶ୍ରୀମତୀ ଷଡଙ୍ଗୀଙ୍କୁ ଚାକିରିରେ ଯୋଗଦିଆଇ ଦେଇଥିଲେ, ତାର ବୈଧତା ଉପରେ ଭୟଙ୍କର ଭାବେ ପ୍ରଶ୍ନ ତୋଳିଲା ଉଚ୍ଚ ଶିକ୍ଷା ନିର୍ଦ୍ଦେଶକଙ୍କ ଏହି ତଦନ୍ତ ରିପୋର୍ଟ । (କ୍ରମଶଃ)